မတဂၤ ပၢဟီၣ်ခိၣ်လဲၣ်

လံာ်စီဆှံတဲဝဲဒ်လဲၣ်​

“ဟီၣ်ခိၣ်ဒီဘ့ၣ်ညါ အိၣ်လၢတၢ်အၢတၢ်သီတဂၤ အတၢ်ပၢ အဖီလာ်.”—၁ ယိၤဟၣ်​ ၅:၁၉, ခ့ခါစှီၤကျိာ်.

“ယွၤအဖိခွါ အိၣ်ဖျါတ့ၢ်ဝဲလၢ . . . ကမၤဟးဂီၤကွံာ် မုၣ်ကီၤလံၢ်အတၢ်မၤတဖၣ်.”—၁ ယိၤဟၣ်​ ၃:၈, မ့ၣ်စံၣ်​ လံာ်စီဆှံ.

လံာ်စီဆှံအဆၢတဖၣ်အံၤ ကဲဘျုးလၢနဂီၢ်ဒ်လဲၣ်​

ပသ့ၣ်ညါဘၣ်လၢ ဘၣ်မနုၤအဃိ ဟီၣ်ခိၣ်န့ၣ်​ အိၣ်ထဲတၢ်ကီတၢ်ခဲတဖၣ်လဲၣ်.—လီၣ်ဖျါ ၁၂:၁၂.

ပနာ်သ့သပှၢ်တၢၢ်လၢ ဟီၣ်ခိၣ်တၢ်အိၣ်သးတဖၣ်​ ကဂ့ၤထီၣ်က့ၤ.—၁ ယိၤဟၣ်​ ၂:၁၇.

တၢ်လၢလံာ်စီဆှံတဲဝဲန့ၣ်​ ပနာ်အီၤသ့ သပှၢ်ကတၢၢ်ဧါ

ပနာ်အီၤသ့ခီဖျိလၢ တၢ်ဂ့ၢ်လၢ တၢ်ဖီလာ်အဃိ.

• မုၣ်ကီၤလံၢ်အတၢ်ပၢ ကဟးဂီၤ ဘူးထီၣ်လံ. ယဟိဝၤယွၤ ဆၢတဲာ်ဝဲလၢ ကမၤလီၤမၢ်ကွံာ်ဝဲ မုၣ်ကီၤလံၢ်အတၢ်ပၢ. ယဟိဝၤယွၤ အၢၣ်လီၤဝဲလၢ “အကမၤဟးဂီၤ . . . မုၣ်ကီၤလံၢ်” ဒီးအကမၤဂ့ၤထီၣ်က့ၤ တၢ်လၢ မုၣ်ကီၤလံၢ် မၤဟးဂီၤဝဲတဖၣ်. —ဧ့ၤဘြံၤ ၂:၁၄, ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ

• ကစၢ်ယွၤ ဃုထၢထီၣ်​ ယ့ၣ်ၡူးခရံာ်လၢ ကပၢဟီၣ်ခိၣ်. မုၢ်မဆါတနံၤအံၤ ပှၤလၢအပၢဟီၣ်ခိၣ်တဂၤန့ၣ်​ အအၢမး ဒီးအဃုထဲအနီၢ်ကစၢ်အဘျုး. ယ့ၣ်ၡူးန့ၣ်​ တလီၤဂာ်ဒီးအီၤနီတစဲးဘၣ်. ခါဆူညါ ယ့ၣ်ၡူးမ့ၢ်ပၢဟီၣ်ခိၣ်န့ၣ်​ တၢ်ကကဲထီၣ်အသးဒ်လဲၣ်. ကစၢ်ယွၤတဲပာ်စၢၤဝဲလၢ ယ့ၣ်ၡူးက “ကသးကညီၤ ပှၤလၢအပတီၢ်ဖုၣ်​ ဒီးပှၤဖှီၣ်ဖိယာ်ဖိ . . . ဒီးအဝဲကမၤပူၤဖျဲး အဝဲသ့ၣ်လၢ တၢ်ဆီၣ်တံၢ်မၤနၢၤ ဒီးတၢ်မၤဆူၣ်မၤစိး.”—စံးထီၣ်ပတြၢၤ ၇၂:၁၃, ၁၄.

• ကစၢ်ယွၤန့ၣ်​ တလံၣ်တၢ်ဘၣ်. လံာ်စီဆှံ တဲဝဲလၢ “ကစၢ်ယွၤ တဲလံၣ်တဲလီတၢ် . . . တသ့ဘၣ်.” (ဧ့ၤဘြံၤ ၆:၁၈) တၢ်လၢယဟိဝၤယွၤ အၢၣ်လီၤ ကိးမံၤဒဲးန့ၣ်​ ကဟဲလၢထီၣ်ပှဲၤထီၣ်ဝဲနီၢ်ကီၢ်. (ယၡါယၤ ၅၅:၁၀, ၁၁) အဃိ ပနာ်သ့သပှၢ်တၢၢ်လၢ “ဟီၣ်ခိၣ်အခိၣ်န့ၣ်​ ကဘၣ်​ တၢ်နီဟးထီၣ်ကွံာ်အီၤ.”—ယိၤဟၣ်​ ၁၂:၃၁.