Yehova ke pesa kwandi mvutu na balusambu ya munu?

1-2. Samu na yinki ntangu ya nkaka beto lenda kanisa ti Yehova ke na kuwá ve beto?

BIBLIA me pesa beto nsilulu ya kitoko yayi: ‘Kuwa kyese mingi ya tsyeleka na Yehova, mpe yandi ke pesa nge bansatu ya ntima ya nge.’ (Nku. 37:4) Kasi ya zola zonza kwandi ti Yehova ke pesa beto na mbala mosi mambu yina beto me lomba yandi? Samu na yinki kyuvu yayi ke mfunu? Beto tala mwa bifwani. Mpangi mosi ya kento yina ke ve ya kukwela ke na sambilá samu na kusala lukolo ya EER (École pour évangélisateurs du Royaume). Kasi bamvula ke na lutá mpe ba ke na bokilá ve yandi. Mpangi mosi ya bakala ya ntwenya ke na sambilá samu yandi beluka na maladi mosi ya ngolo samu yandi ke na nsatu ya kusala mingi na kimvuka. Kasi kimbevo ya yandi ke na manisá ve. Bibuti ke na sambilá samu mwana ya bawu bikana ya kukangama na matsyeleka. Kasi mwana ya bawu me bika kusadila Yehova.

² Ntangu ya nkaka nge mpe lombá Yehova mambu mosi, kasi nge kuzwá ve yawu. Na yawu, nge lenda kanisa ti Yehova ke kuwá balusambu ya ba ya nkaka, kasi ya nge ve. Nge lenda kanisa mpe ti nge salá mambu yina nyongisá Yehova. Mpangi mosi ya kento na nkumbu ya Janiceb kutaná na mambu ya faso yayi. Yandi na bakala ya yandi zonzá na Yehova na lusambu ti ba vandá na nsatu ya kukwenda na Betele. Yandi me zonza: “Na munu, ya zolá baka ve bangonda samu ba bokila beto na Betele.” Kasi bangonda kumá bamvula, mpe ba bokilá ve bawu. Janice me zonza: “Mu kumá na kyadi mingi, mpe mabanza ya munu vandá yenga-yenga. Mu sambilá mingi samu ba bokila beto. Mu vandá kanisa ti mu salá mambu yina fwemisá Yehova. Samu na yinki Yehova kuwá ve lusambu ya munu?”

3. Yinki beto ke zonzila na disolo yayi?

³ Bantangu ya nkaka beto lenda yufula kana Yehova ke na kuwá kwandi balusambu ya beto. Ata bisadi ya yandi ya ntama kutaná na mambu yayi. (Yobi 30:20; Nku. 22:2; Aba. 1:2) Yinki ke ndimisa nge ti Yehova ke pesa mvutu na balusambu ya nge? (Nku. 65:2) Samu na kuzwa mvutu, beto zonzila ntete byuvu tatu yayi: 1) Yinki beto lenda vingila ti Yehova ke sala? 2) Yinki Yehova ke na vingilá ti beto sala? 3) Samu na yinki ntangu ya nkaka beto me fwana kulomba bamambu ya nkaka na lusambu?

YINKI BETO LENDA VINGILA TI YEHOVA KE SALA?

4. Wapi nsilulu Yehova me pesa beto na Yeremia 29:12?

⁴ Yehova me pesa beto nsilulu ti yandi ke kuwa balusambu ya beto. Beto ke tangaka na Yeremia 29:12: ‘Beno ke bokila munu, beno ke kwiza, mpe beno ke sambila munu, mpe mu ke kuwa beno.’ Nzambi ya beto ke zolá beto samu beto ke ya kukwikama na yandi. Na yawu, yandi lenda kanga ata fioti ve makutu na balusambu ya beto. (Nku. 10:17; 37:28) Kasi, ya zola zonza ve ti yandi ke pesa beto nyonso yina beto ke lombak’ yandi. Ya ke na bima yina beto ke kuzwa kaka na yinza ya malu-malu.

5. Ntangu Yehova ke kuwaka balusambu ya beto, yandi ke kanisá mpe na yinki? Zonzila yawu.

⁵ Ntangu Yehova ke kuwá balusambu ya beto, yandi ke kanisá mpe na bamambu yina yandi zola kulungisa. (Iza. 55:8, 9) Mosi ya bamambu yina Yehova zola kulungisa ni kusala ti ntoto vanda ya kufuluka na bantu yina ke tumama na yandi na kilengi nyonso. Kasi Satana ke zonzá ti bantu ke vanda na kilengi ya kulutila kana ba kukitwadisa. (Kub. 3:1-5) Samu na kulakisa ti mambu yina Satana zonzá ke luvunu, Yehova me bika bantu yala na zulu ya bampangi. Kasi, ni luyalu ya bantu me nata bampasi yina beto ke na talá bubu yayi. (Lon. 8:9) Beto zaba ti ni na ntangu yayi ve Yehova ke katula bampasi yayi. Kana yandi sala yawu, bantu ya nkaka ke kanisa ti luyalu ya bantu me simba, mpe ti ba me lenda.

6. Samu na yinki beto me bonga kuvanda na kundima ti Yehova ke salá ntangu nyonso mambu na luzolo mpe na lunungu?

⁶ Yehova ke pesá ve bamvutu ya faso mosi na balusambu ya faso mosi. Na kifwani, ntangu mfumu Ezekiasi vandá na kimbevo ya ngolo, yandi bondilá Yehova samu yandi beluka. Na manima, Yehova belusak’ yandi. (2 Mf. 20:1-6) Kasi, ntangu ntumwa Polo bondilá Yehova samu yandi katula yandi “mpasi ya ngolo na nzutu,” ntangu ya nkaka ya vandá kimbevo, Yehova katulá ve yawu. (2 Ko. 12:7-9) Kanisa mpe na kifwani ya ntumwa Zaki na ntumwa Piere. Mfumu Erode vandá sosa kufwa bawu zole. Bampangi ya kimvuka sambilá samu na Piere, mpe ya lenda vanda ti ba sambilá mpe samu na Zaki. Ba kufwá Zaki, kasi Yehova salá kimangu samu na kuvuukisa Piere. (Bis. 12:1-11) Beto lenda yufula: ‘Samu na yinki Yehova vuukisá Piere, kasi Zaki ve?’ Biblia ke pesá ve mvutu na kyuvu yayi.c Kasi beto lenda vanda na kundima ti, bamambu yina Yehova ke salá ke ‘kondwaka lunungu ata fioti ve.’ (Kul. 32:4) Beto zaba mpe ti Yehova vandá sepela na Zaki mpe na Piere. (Luz. 21:14) Bantangu ya nkaka Yehova ke pesá ve mvutu na balusambu ya beto na mutindu yina beto ke na vingilaka. Kasi, beto ke nyongá ve na mutindu yina Yehova me soola na kupesa mvutu na balusambu ya beto, samu beto na kundima ti Yehova ke salá ntangu nyonso bamambu na luzolo mpe na lunungu.​—Yobi 33:13.

7. Yinki beto me bonga ve kusala, mpe samu na yinki?

⁷ Beto me bonga ve kufwanisa bamambu ya beto na ya bampangi. Na kifwani, beto lenda lomba Yehova pesa beto kima mosi, kasi beto ke na kuzwá yawu ve. Na manima, beto lenda kuwa ti mpangi mosi sambilá mpe Yehova samu na yawu, mpe ya lenda talana ti Yehova pesak’ yandi yawu. Mpangi mosi ya kento na nkumbu ya Anna kutaná na mambu ya mutindu yayi. Bakala ya yandi, Matthieu, vandá na cancer, mpe Anna vandá sambila samu bakala ya yandi beluka. Kaka na ntangu yina, bampangi zole ya kento na kimvuka vandá beela mpe cancer. Bampangi yango vandá na bamvula mingi kuluta Matthieu. Anna vandá sambila mingi samu na Matthieu mpe samu na bampangi zole yina. Bampangi yayi beluká, kasi Matthieu kufwaka. Na kubanda, Anna vandá yufula kana ni Yehova salá ti bampangi ya kento beluka. Kana ni Yehova salak’ yawu, samu na yinki yandi belusá ve bakala ya yandi? Beto zaba ve yinki salá ti bampangi zole ya kento beluka. Kasi beto zaba ti Yehova ke katula samu na ntangu nyonso bampasi ya beto, mpe yandi ke na nsatu ya ngolo ya kuvumbula bandiku ya yandi yina kufwaka.​—Yobi 14:15.

8. a) Mutindu Izaya 43:2 ke zonzaka, wa’ faso Yehova ke sadisá beto? b) Wapi mutindu lusambu lenda sadisa beto ntangu beto ke kutaná na bampasi? (Tala video Lusambu ke sadisá beto na bantangu ya mpasi.)

⁸ Yehova ke sadisa beto ntangu nyonso. Tata ya beto ke zolá beto mpe yandi zola ve kutala beto na mpasi. (Iza. 63:9) Kasi yandi ke bumbaka ve beto na bampasi nyonso, mpe bantangu ya nkaka bampasi yango ke vandá mutindu bamaza to batiya. Ata mpila yina, Yehova pesá beto nsilulu ti yandi ke sadisa beto na ‘kuluta na kati’ ya yawu. Izaya 43:2 ke zonzaka: ‘Ntangu nge ke luta na kati ya bamaza, mu ke vanda na nge, mpe ntangu nge ke luta na kati ya banzadi, ya ke dyamisa nge ve. Ntangu nge ke tambula na kati ya tiya, nge ke nyenga ve, ludimi ya tiya ke yoka nge mpe ve.’ Mpasi ni mpasi yina beto ke kutaná na yawu bubu yayi, yandi ke sala nyonso samu na kusadisa beto na kubumba kindiku ya beto na yandi. Yehova ke pesá mpe beto mpeve ya yandi ya santu samu beto lenda kukanga ntima. (Luke 11:13; Flp. 4:13) Na yawu, beto lenda vanda na kundima ti, ntangu nyonso, Yehova ke pesa beto nyonso yina beto ke na yawu nsatu samu na kukanga ntima, mpe kubikana ya kukangama na yandi.d

YINKI YEHOVA KE NA VINGILÁ TI BETO SALA?

9. Mutindu Zaki 1:6, 7 ke na lakisak’ yawu, samu na yinki beto me lunga kuvanda na kiminu ti Yehova ke sadisa beto?

⁹ Yehova ke na vingilá ti beto tudila yandi ntima. (Ebr. 11:6) Bantangu ya nkaka beto lenda tala ti bampasi ya beto me lutila, mpe beto lenda banda kusala ntembe ti Yehova ke sadisa beto. Kasi Biblia ke zonzá na beto ti, na ngolo ya Yehova, beto ke lenda ‘kuluta na zulu ya kibaka.’ (Nku. 18:29) Na yawu, beto me fwana kubika ve bantembe kula na bantima ya beto, kasi kusambila na kiminu ti Yehova ke pesa mvutu na balusambu ya beto. Zaki 1:6, 7 ke zonzaka: “Yandi lomba yawu na kiminu ata kusala ntembe. Muntu yina ke na kusalaka ntembe kele mutindu maza ya mubu yina mupepe ke na kuningisa mpe kunanguna. Muntu ya mutindu yina fwana kubanza ve ti yandi ke kuzwa kima na Mfumu.”

10. Pesa kifwani yina ke na lakisá mutindu beto lenda sala mambu yina ke na kwelaná na balusambu ya beto.

¹⁰ Yehova ke na vingilá ti beto sala bamambu yina ke na kwelaná na balusambu ya beto. Na kifwani, mpangi mosi ya bakala lenda sambila samu mfumu ya yandi ya kisalu bikila yandi ntangu na kuvanda na lukutakanu ya nene. Wapi mutindu Yehova lenda pesa mvutu na lusambu yayi? Yandi lenda pesa mpangi ya beto bukindi samu yandi solola na mfumu ya yandi. Kasi samu na kukwenda nzila mosi na lusambu ya yandi, mpangi yayi me fwana kukwenda tala mfumu ya yandi. Ntangu ya nkaka, ya ke lomba yandi kwenda tala mfumu bambala mingi, to yandi wisana na mpangi ya yandi ya kisalu samu ba sala na kisika ya bampangi, to yandi ndima ba katula yandi mbongo kilumbu yina yandi ke sala ve.

11. Samu na yinki beto me bonga kusambila bambala mingi samu na bamambu ya beto?

¹¹ Yehova ke na vingilá ti beto sambila yandi bambala mingi samu na bamambu ya beto. (1 Tes. 5:17) Yesu lakisá ti bamambu ya nkaka yina beto ke lombá na Yehova, yandi ke pesa ve beto yawu na mbala mosi. (Luke 11:9) Na yawu, kulemba ve! Sambila bambala mingi, mpe na ntima ya nge nyonso. (Luke 18:1-7) Ntangu beto ke sambilá Yehova bambala mingi samu na mambu, beto ke lakisak’ yandi ti mambu yango ke mfunu samu na beto. Ya ke lakisá mpe ti beto ke na kiminu ti yandi ke na ngolo ya kusadisa beto.

BANTANGU YA NKAKA BETO ME BONGA KULOMBA BAMAMBU YA NKAKA NA LUSAMBU

12. a) Wapi kyuvu beto lenda kukiyufula na yina me tadila bamambu yina beto ke lombá na lusambu, mpe samu na yinki beto me bonga kuyufula yawu? b) Yinki beto lenda sala samu na kulakisa Yehova buzitu na balusambu ya beto? (Tala encadré “Bamambu yina mu ke lombá na lusambu ke lakisá kwandi ti mu ke zitisá Yehova?”)

¹² Ntangu beto ke talá ve mvutu na lusambu ya beto, beto lenda kukiyufula byuvu tatu. Ya ntete: ‘Mambu yina mu ke na lombá ke kwandi ya kulunga?’ Bambala mingi, beto ke kanisá ti beto zaba bamambu yina beto ke na yawu nsatu. Kasi ya lenda vanda ti, bamambu yina beto ke na lombá na lusambu, ni yawu ve ke mbote samu na beto. Ntangu ya nkaka, samu na kuyidika mambu yina ke na beto, ya ke na kima yina me lutila mbote na yina beto ke na lombaka. Dyaka, bamambu ya nkaka yina beto ke na lombá ke kwelaná ve na luzolo ya Yehova. (1 Yoa. 5:14) Na kifwani, kanisa na bibuti yina beto me zonzila na kubanda. Ba sambilá Yehova samu yandi sala ti mwana ya bawu vanda kaka na matsyeleka. Ya ke ve lusambu ya yimbi. Kasi Yehova lenda nata ata muntu na ngolo na kusadila yandi. Yandi zola ti beto nyonso, na bana ya beto mpe na kati, beto soola kusadila yandi. (Kul. 10:12, 13; 30:19, 20) Na yawu, na kisika ya kulomba na Yehova yandi sala ti mwana ya bawu vanda kaka na matsyeleka, bibuti me bonga kusambila samu Yehova sadisa bawu na kulonga mwana ya bawu na mutindu yina ke nata yandi na kuzola Yehova mpe kukuma ndiku ya yandi.​—Bin. 22:6; Ef. 6:4.

13. Mutindu Baebre 4:16 ke zonzak’ yawu, na wapi ntangu Yehova ke sadisa beto? Zonzila yawu.

¹³ Kyuvu ya zole yina beto lenda yufula kele: ‘Samu na Yehova, yayi ke kwandi ntangu ya mbote na kupesa munu mambu yina mu ke na lombaka?’ Beto lenda kanisa ti Yehova me bonga kupesa beto kima yina beto me lomba yandi, kaka na ntangu yina beto me lomba yawu. Kasi, Yehova zaba ntangu ya mbote ya kusadisa beto. Baebre 4:16 ke zonzaka: “Na yina, beto kwenda na kivuvu nyonso pene-pene ya kiti ya kintinu ya Nzambi sika kele bumbote ya yandi. Kuna yandi ke tala beto kyadi, mpe beto ke kuzwa bumbote ya yandi, samu ti yandi sadisa beto na ntangu ya kufwanana.” Ntangu beto ke kuzwá ve na mbala mosi kima yina beto me lomba, beto lenda kanisa ti mvutu ya Yehova kele ‘Ve.’ Kasi, ya lenda vanda ti mvutu ya yandi kele ‘malu-malu yayi ve.’ Na kifwani, beto zonzila dyaka mpangi ya ntwenya yina sambilá Yehova samu yandi belusa yandi. Kana Yehova salá kimangu samu na kubelusa yandi, Satana lenda zonza ti mpangi yayi me bikana ya kukangama na Yehova kaka samu Yehova me belusa yandi. (Yobi 1:9-11; 2:4) Beto zaba mpe ti Yehova tulá ntangu yina yandi ke belusa bimbevo nyonso. (Iza. 33:24; Luz. 21:3, 4) Tekila ntangu yango kuma, beto lenda vingila ve ti yandi sala bimangu samu na kubelusa beto. Na yawu, mpangi ya beto me bonga kulomba na Yehova na kupesa yandi ngolo mpe kizunu na ntima, samu yandi lemba ve na mantwala ya kimbevo ya yandi, mpe yandi bika ve kusadila Yehova.​—Nku. 29:11.

14. Yinki kifwani ya Janice me longa nge?

¹⁴ Beto zonzila dyaka kifwani ya mpangi ya beto Janice, yina vandá sambila samu na kukwenda na Betele. Ni na manima ya bamvula 5 yandi kwizá zaba wapi mutindu Yehova pesá mvutu na lusambu ya yandi. Yandi me zonza: “Yehova sadilá ntangu yina samu na kulonga munu bamambu mingi, mpe kusadisa munu na kubongisa kimuntu ya munu. Mu vandá na nsatu ya kukulisa kiminu ya munu na yandi mpe kubongisa faso ya munu ya kulongoka Biblia. Mu vandá mpe na nsatu ya kulongoka ti mu lenda sadila Yehova na kilengi kisika ni kisika yina mu kele.” Na manima, ba bokilá Janice na bakala ya yandi na kisalu ya ntwadisi ya circonscription. Ntangu Janice ke kanisá na bamambu nyonso yina lutá, yandi me zonza: “Yehova pesá mvutu na balusambu ya munu, kasi ve mutindu yina mu vandá vingila. Ya baká munu ntangu na kutala mvutu ya kitoko yina yandi pesaka. Mu ke na tondak’ yandi mingi na yina yandi pesá munu bweso ya kutala luzolo mpe ntima ya yandi ya mbote.”

15. Samu na yinki bantangu ya nkaka beto me bonga ve kulomba kaka kima mosi na lusambu? (Tala mpe bizizi.)

¹⁵ Kyuvu ya tatu yina beto lenda yufula kele: ‘Mu me bonga kusambila kwandi ve samu na kima ya nkaka?’ Ya ke mbote na kuzonzila pwelele na Yehova na lusambu bamambu yina beto ke na yawu nsatu. Kasi bantangu ya nkaka, kana beto kangama ve kaka na kima mosi, beto lenda zaba mambu yina Yehova zola ti beto sala. Beto zonzila kifwani ya mpangi ya kento yina vandá sambila samu na kusala lukolo ya EER. Mpangi ya beto zola kusala lukolo yayi samu yandi zola kusadila Yehova kisika yina ke na nsatu ya lubakusu. Na yawu, ntangu yandi ke na sambilá samu ba bokila yandi, yandi lenda lomba mpe na Yehova na kusadisa yandi na kutala bamambu ya nkaka yina yandi lenda sala samu na kusala dyaka mingi na kisalu ya Yehova. (Bis. 16:9, 10) Na manima, yandi lenda sala mambu yina ke kwelana na lusambu ya yandi: yandi lenda lomba na ntwadisi ya circonscription, bimvuka yina ke na nsatu ya mipasuli-nzila pene-pene na kisika yina yandi kele. Yandi lenda sonika mpe na Betele samu na kuzaba kisika yina ke na nsatu ya basamuni.e

16. Na yinki beto lenda vanda na kundima?

¹⁶ Mutindu beto me tala yawu, beto lenda vanda na kundima ti, ntangu Yehova ke pesá mvutu na balusambu ya beto, yandi ke salak’ yawu na luzolo mpe na lunungu. (Nku. 4:3; Iza. 30:18) Ntangu ya nkaka beto lenda kuzwa ve mambu yina beto ke na vingilaka. Kasi ya zola zonza ve ti Yehova me kanga makutu na balusambu ya beto. Yandi lenda sala ve yawu ata fioti. Yandi ke zolá beto mingi, mpe yandi ke bika ve beto ata fioti. (Nku. 9:10) Na yawu, kubika ve ‘kutudila yandi ntima ntangu nyonso,’ na kufungulak’ yandi ntima na lusambu.​—Nku. 62:8.