Coupe du monde lenda sala kwandi ti yinza nyonso vanda na bumosi?—Yinki Biblia ke zonzaka?

Beto me kanisa ti bantu pene-pene na 5 milliards ke landa coupe du monde yina ke salama kubanda kilumbu ya 20 novembre tii na 18 décembre 2022. Bantu mingi ke kanisá ti bansaka ya nene ya mutindu yayi ke suká ve kaka na kuvukisa ba yina ke talak’ yawu. Ya lenda sala ya kulutila.

• Nelson Mandela, yina vandá mfumu ya bwala ya Afrique du Sud zonzaka: “Sport lenda sala ti yinza bonga. Ya ke natá bantu na kusala mambu mingi ya mbote. Ya ke vukisá bantu na mutindu mosi ya kulutila.”

• Gianni Infantino, mfumu ya FIFAa me zonza: “Ballon [. . .] ke salá ti bantu vanda na bumosi samu ti ya ke pesá bawu kivuvu mpe kilengi. Ba ke zolak’ yawu mingi, ba ke talá ti ba ke zolá bampangi mpe ti bawu nyonso ke na makanisi mosi.”

Coupe du monde, to bansaka ya nkaka ya nene lenda lungisa kwandi bamambu ya kitoko yina ba me zonza? Ya ke kwandi na kilumbu yina bantu na yinza nyonso ke vanda na kizunu mpe bumosi?

Ya ke salá kwandi ti bantu vanda na bumosi?

Mvula yayi coupe du monde me vanda ve kaka bansaka yina me vukisa babwala mingi samu na kubula ballon. Ya fungulá masolo ya ngolo na yina me tadila luzingu ya bantu mpe politike, mutindu mambu ya kusoola bampusu, faso ya yimbi ya kubakila bantu ya nkaka mpe bamambu yina ke salá ti bantu ya nkaka vanda na mbongo, kasi ba ya nkaka vanda ve na yawu.

Ata mutindu yina, bantu mingi ke talá ti ya ke salá kilengi na kulanda bansaka ya mutindu yayi, yina ke vukisá babwala mingi. Ba zola na ntima ya bawu nyonso ti bansaka yayi tula bumosi na kati ya bantu. Kasi bansaka yayi lenda tula ve bumosi ya ntangu nyonso. Dyaka, ntangu ya ke salamá, bambala mingi bantu ke lakisá bifu mpe mavanga yina ke kabulá bantu. Ya ke bifu yina Biblia zonzá ti bantu ke vanda na yawu “na bilumbu ya nsuka.”—2 Timote 3:1-5.

Kivuvu ya tsyeleka samu na bumosi na yinza nyonso

Biblia ke pesá kivuvu ya tsyeleka samu na bumosi na yinza nyonso. Ya ke pesá nsilulu ti bantu nyonso na ntoto ke vanda na bumosi ntangu kimfumu mosi yina ke na mazulu ke yala awa na ntoto. Ni kimfumu yayi Biblia ke bokilá “Kimfumu ya Nzambi.”—Luke 4:43; Matayi 6:10.

Yesu Kristo, Mfumu ya Kimfumu yayi ke sala ti kizunu vanda na yinza nyonso. Biblia ke zonzaka:

• ‘Muntu ya lunungu ke yela mutindu matiti ya malu-malu, mpe kizunu ke kuma mingi.’—Nkunga 72:7.

• ‘Yandi ke vuukisa mputu yina ke dilaka samu na kulomba lusalusu. Yandi ke vuukisa bawu na bampasi mpe na mubulu.’—Nkunga 72:12, 14.

Malongi ya Yesu me sala ti bubu yayi, ba millions ya bantu yina ke vandá na babwala 239 vanda na bumosi. Ba me longoka kulosa kifu ya kuyiná bampangi. Na kuzaba dyaka mingi, tanga masolo yina ke na yintu dyambu “Briser le cercle de la haine.”