Ba Jeux Olympiques lenda vukisa kwandi bantu ya yinza nyonso?—Yinki Biblia ke zonzaka?

Na ba Jeux Olympiques yina ke salama na nsuka ya ngonda ya juillet tii na kati-kati ya ngonda ya août 2024, ya lenda vanda na ba milliards 5 ya bantu yina ke tala bansaka ya bantu yina me katuka na babwala 206. Thomas Bach yina ke mfumu ya Comité International Olympique, me zonza: “Beto ke na salaka mambu mosi yina ke na nataka kizunu na yinza nyonso.” Yandi me bwela: “Beto kembila dikanisi yayi, na kuvandaka na kizunu, bumosi, mpe na kusalaka ve luswaswanu na kati ya beto.”

Ba Jeux Olympiques lenda lungisa kwandi dikanisi ya kitoko yayi? Ya ke kwandi kivuvu ya tsyeleka samu na kuvanda na kizunu mpe bumosi na yinza nyonso?

Ya ke salaka kwandi ti bantu vanda na kizunu mpe bumosi?

Ba Jeux Olympiques ya mvula yayi ke vanda ve kaka bansaka. Ya ke fungula masolo na yina me tadila politike mpe bamambu ya nkaka yina ke kabulaka bantu mutindu, bamambu na yina me tadila muswa ya bantu, mambu ya kusoola bampusu, mambu ya kusambila mpe ya nkaka.

Bansaka mutindu ba Jeux Olympiques ke sadisaka bantu na kulutisa ntangu mpe na kusakana. Kasi, na kisika ya kunata kizunu mpe bumosi, bansaka yayi ke lakisaka mpe pwelele mutindu ya bantu ya kukanisa, mpe mavanga yina ke kabulaka bantu.

Biblia bikulaka ti mavanga yina bantu ke vanda na yawu bubu yayi, ke sala ti ya vanda mpasi na kuvanda na kizunu mpe bumosi. (2 Timote 3:1-5) Samu na kuzaba dyaka mingi na yina me tadila mbikudulu yayi, tala disolo “La Bible a-t-elle prédit la mentalité et la conduite des gens de notre époque?”

Kivuvu ya tsyeleka samu na kizunu mpe bumosi na yinza nyonso

Biblia ke pesaka kivuvu ya tsyeleka samu na kizunu mpe bumosi na yinza nyonso. Ya ke pesaka nsilulu ti bantu nyonso na ntoto ke vanda na bumosi ntangu kimfumu mosi yina ke na mazulu ke yala awa na ntoto. Ni kimfumu yayi Biblia ke bokilaka “Kimfumu ya Nzambi.”—Luke 4:43; Matayi 6:10.

Yesu Kristo, Mfumu ya Kimfumu yayi ke sala ti kizunu vanda na yinza nyonso. Biblia ke zonzaka:

• ‘Muntu ya lunungu ke yela mutindu matiti ya malu-malu, mpe kizunu ke kuma mingi.’—Nkunga 72:7.

• ‘Yandi ke vuukisa mputu yina ke dilaka samu na kulomba lusalusu. Yandi ke vuukisa bawu na bampasi mpe na mubulu.’—Nkunga 72:12, 14.

Ata bubu yayi, malongi ya Yesu ke na vukisaka ba millions ya bantu yina ke na babwala 239. Samu ti ba ke Bakristo, Bambangi ya Yehova ya yinza nyonso me longokaka mutindu ya kuvanda na kizunu. Samu na kuzaba mutindu ba me sala, tanga Yinzo ya Kengidi yina ke na yintu dyambu “Briser le cercle de la haine.”