Samu na yinki mambu ya politiki ke na kabulá bantu? Yinki Biblia ke zonzaka?

Na yinza nyonso, mambu ya politiki ke na kabulá bantu mingi. Na 2022, kimvuka ya Pew Research Center sosá dikanisi ya bantu na mambu yango. Na yawu, ba yufulá bantu ya kukula na kati ya babwala 19 mpe mingi na kati ya bawu zonzá: “bantu mingi ke wisaná ve samu ti bawu nyonso ke ve kimvuka mosi ya politiki.”

Mambu ya politiki ke na lutilá dyaka kukabula bantu kisika nge kele? Yinki ke na salá faso yina? Ya lenda yidama kwandi? Tala mambu yina Biblia ke zonzaka.

Mavanga yina ke kabulá bantu

Biblia zonzá ti na ntangu ya beto, yina yawu ke bokilá mpe “bilumbu ya nsuka,” bantu mingi ke vanda na mavanga yina ke sala ti bumosi vanda mpasi.

• “Na bilumbu ya nsuka, bampasi ke lutila. Bantu ke vwanda na munimi, . . . mpe ke tala ve bantu kyadi.”—2 Timote 3:1-3.

Ata bangolo nyonso yina bantu ke na salá, baluyalu ke na lendá ve kusala yina me lunga samu na kubongisa bamambu. Kusala kintwadi samu na kuyidika bamambu ke na talaná mpasi, samu ti bantu nyonso, ke talá ve bamambu faso mosi. Ya ke na kwelaná na yina Biblia zonzá na ntama samu na ntangu ya beto.

• ‘Muntu ke yalaka muntu samu na kupesa yandi mpasi.’—Bingana 8:9.

Kasi, Biblia ke lakisá mutindu bamambu ke bonga: na nzila ya muntu yina ke na twadisá kimfumu yina ke katula bampasi yina beto ke na kutaná na yawu bubu yayi.

Muntu yina me bonga kutwadisa mpe yina ke na kyadi ya bantu

Biblia ke zonzá ti Yesu Kristo ke muntu yina me lunga samu na kutwadisa bantu. Yesu ke na ngolo, lutumu mpe nsatu ya kusala ti bantu zinga na bumosi mpe kizunu.

• ʻNa bilumbu ya yandi muntu ya lunungu ke yela mutindu matiti ya malu-malu, mpe kizunu ke kuma mingi.’—Nkunga 72:7.

• ‘Makanda nyonso ke sadila yandi.’—Nkunga 72:11.

Yesu ke mfumu yina me lunga samu ti yandi ke na kyadi ya bantu mpe nsatu ya kusadisa bawu, mingi-mingi ba yina ba ke na talisá mpasi ata ti ba me sala ata kima.

• ‘Samu yandi ke vuukisa muntu ya bumputu (pauvre) yina ke dila samu na kulomba lubakusu, mpe muntu ya kukondwa mfunu na konso muntu yina me kondwa sadisi. Yandi ke wila muntu ya kukondwa mfunu mpe muntu ya bumputu mawa, mpe yandi ke vuukisa luzingu ya bantu yina ke na bumputu. Yandi ke vuukisa bawu na bampasi mpe na mambu ya ngolo.’—Nkunga 72:12-14.

Sosa kuzaba dyaka mingi na yina me tadila Kimfumu ya Nzambi, luyalu ya mazulu yina Yesu ke na yalaka. Tala wa’ faso ya lenda natina nge bambote mpe wa’ faso nge lenda tudila yawu diboko.

• Tala video Kimfumu ya Nzambi ke yinki?

• Tanga disolo “Le Royaume de Dieu: un gouvernement sans corruption.”