Esdrase longaka Musiku ya Nzambi

Ya me sala bamvula pene-pene na 70 banda ntangu yina bantu mingi ya Izraele vutukaka na Yeruzalemi. Kasi, ba ya nkaka vanda zinga na bizunga mingi ya kimfumu ya Persia. Na kati ya bawu, vandaka na nganga-nzambi na nkumbu ya Esdrase, yina vanda longaka Musiku ya Yehova. Esdrase kuwaka ti na Yeruzalemi bantu vanda landa ve Musiku, mpe yandi vandaka na nsatu ya kukwenda sadisa bawu. Artazeresesi mfumu ya Persia zonzaka na yandi: ‘Nzambi me pesa nge ndwenga samu nge lenda kulonga Musiku ya yandi. Kwenda, mpe baka muntu nyonso yina ke vanda na nsatu ya kukwenda na nge.’ Esdrase kutanaka na muntu nyonso yina vandaka na nsatu ya kuvutuka na Yeruzalemi. Ba sambilaka Yehova na kubumba bawu na nzyetolo ya yinda yina ba ke sala, mpe na manima ba kwendaka.

Na manima ya bangonda 4, ba kumaka na Yeruzalemi. Kuna bamfumu ya fioti zonzaka na Esdrase: ‘Bantu ya Izraele me tumama ve na Yehova mpe ba me kwela bakento yina ke sambilaka banzambi ya luvunu.’ Yinki Esdrase salaka? Na mantwala ya bantu, Esdrase fukamaka mpe sambilaka: ‘Yehova, nge me sala bamambu mingi samu na beto, kasi beto me sumuka na mantwala ya nge.’ Bantu balulaka bantima, kasi ba bikaka ve kusala bamambu ya yimbi. Esdrase soolaka bakuluntu mpe bazuzi samu na kutadila mambu yayi. Na bangonda tatu yina landaka, ba bingisaka bantu nyonso yina vanda sambila ve Yehova.

Bamvula 12 lutaka. Na manima, ba tungaka dyaka bibaka ya Yeruzalemi. Na yawu, Esdrase vukisaka bantu na kisika ya nene samu na kutangila bawu Musiku ya Nzambi. Ntangu Esdrase fungulaka buku, bantu telamaka. Ba kembilaka Yehova mpe ba nangunaka maboko na zulu samu na kulakisa ti ba me ndima mambu yina yandi me zonza. Na manima, Esdrase tangaka mpe zonzilaka bawu yinki bamambu yina yandi vanda tanga zola zonza, mpe bantu vanda landa yandi mbote-mbote. Ba ndimaka ti ba me kwenda dyaka ntama na Yehova mpe ba dilaka. Kilumbu yina landaka, Esdrase tangilaka dyaka bawu Musiku, mpe ba longokaka ti ntangu fioti kaka me bikana ba me fwana kusala Mukembo ya bayinzo ya matiti. Na mbala mosi, ba bandaka kubongama samu na yawu.

Na kilumbu ya 7 ya mukembo, bantu sepelaka mpe ba vutulaka matondo na Yehova samu ba bukaka bambuma mingi. Ya vandaka ve na mukembo ya matiti ya faso yayi kubanda ntangu ya Yozue. Na manima, bantu vukanaka mpe sambilaka: ‘Yehova, nge vuukisaka beto na bungaamba, nge pesaka beto madya na ntoto ya kuyuma, mpe nge pesaka beto ntoto ya kitoko yayi. Kasi mbala na mbala, beto tumamaka ve na nge. Nge filisaka bambikudi samu na kukebisa beto, kasi beto kuwaka ve. Kasi, nge vanda lakisa beto ntima ya yinda. Nge me soba ve nsilulu ya nge yina nge salaka na Abrahami. Ntangu yayi, beto ke na salaka nge nsilulu ti beto ke tumama na nge.’ Ba sonikaka nsilulu ya bawu, mpe bamfumu ya fioti, Balevi, mpe banganga-nzambi tulaka kinyemo.