ICHIMANYILO 6

Mulongosolaghe Akiza Amasimbo

Isimbo lyo likulangizya ifundo iya mu Bayibolo

Yohani 10.33-36

IFUNDO INKULU: Mutakabelenge bulo isimbo nu kubuka pa simbo ilyamwabo. Loli mwenelezye ukuti abantu bamanya akiza ukukolelana ko kulipo pakasi pisimbo lyo mwabelenga ni fundo yo mukunena.

MO MUNGABOMBELA:

Mulesannyange amazyu aghakulondiwa. Nanti mwabelenga isimbo, mulangizye amazyu gho ghali ni fundo inkulu yo mukulonda. Mungabomba bunubu umwakupyanizya amazyu gho ghali ni fundo yo mukulonda pamo ukulalusya ilalusyo lyo lingabavwa abantu ukumanya amazyu aghakulondiwa.

Nanti mwabombezya amazyu aghakupambana ukuti mulongosole isimbo, mwenelezye ukuti abantu bakumanya ukukolelana ko kulipo pakasi pa mazyu agha mu Bayibolo ni fundo yo mukulongosola.
Mulongosole ifundo inkulu. Nanti mwanda nu kunena ichifukwa cho mukulonda ukubelengela isimbo, mulongosole amazyu gho ghali mwisimbo gho ghakukolelana ni chifukwa cho mwanenite.

Nanti mukulongosola isimbo, mwenelezye ukuti Ibayibolo lyinyu lyakwighuka. Ivi vingabavwa abantu ukwennya ukukolelana ko kulipo pakasi pa fundo yo mukulongosola ni vesi lyo mwabelenga.
Munenaghe umwakudumula. Mutakanene ivintu vyo vitakukolelana ni fundo yinyu inkulu. Mumanye vyo abantu bavimenye kale ivyakukwafannya ni nkani yinyu nu kwinong’onela mo mungabombela ukuti abantu bayivwisye akiza ifundo yinyu.