ICHIMANYILO 7

Ukunena Ivyabwanaloli

Luka 1.3

IFUNDO INKULU: Mubombezyanje amabukaboni aghabwanaloli ukuti mubavwe abantu ukumanya ifundo iyabwanaloli.

Mufufuze nu kwagha amabukaboni aghabwanaloli. Mwenelezye ukuti ifundo zyo mukunena zikufuma mu Mazyu gha Chala, nanti vingabombiwa mubelengaghe ukufuma mu Bayibolo. Nanti mukulonda ukubombezya ubukaboni ubwakufuma ku basayansi, munyuzipepala pamo ichintu chimo cho chabombiwa, mufufuze ukuti ivintu ivyo vyabwanaloli.
Mubombezyange akiza ivintu ivyakufufuzila. Mulongosolaghe amasimbo ukuyana na mo ghabeleye umwakukolelana nu butenga bo buli mu Bayibolo sona na bo buli mumabuku aghakufuma ku “wambombo umusubiliwa nu wamahala.” (Mata. 24.45) Nanti mukubombezya amabukaboni gho ghatafumite mu Bayibolo mwenelezye ukuti mutakusinta chilichosi pamo ukunena ichintu chimo ichakupambana na mo abenecho bakasimbila.

Mutakakokomezyanje pakunena ifundo pamo ubwingi bwa vintu. Umwakufwanikizya, mutakanenaghe amazyu aghakuti, “abantu bamo” ukuti “ichilundilo icha bantu,” aghakuti “akabalilo kamo” ukuti “akabalilo kosi,” aghakuti “pamo vikabombiwa” ukughanena ukuti “vikabombiwa.”
Mubavwe abantu ukuti bivwisye amabukaboni. Nanti mwabelenga isimbo pamo ibuku limo, mulalusyange amalalusyo umwaluso pamo munganena ichifwanikizyo ukuti abantu baghe ifundo yo mwalondagha ukuti bayimanye.