Nkimba Ubwighane bwa Chala ku Bantu Bwakuti Choni?

Ibayibolo likuti ubumi bwa muntu ‘bufupi sona bwizuye ni ntamyo.’ (Jobu 14.1) Ka ubu bobo bumi bo u Chala akalondagha ukuti tubanje nabo? Pala te momo akalondelagha, nkimba ubwighane bwache kwa uswe bwakuti choni? Ka ivi vingize vibombiwepo lumo? Ennya amaansala aghakughomya gho Ibayibolo likwamula.

1. Ka u Yehova akulonda ukuti twikalaghe na bumi buli?

U Yehova akulonda ukuti tube nu bumi ubwakuhobosya nkani. Bo apela abantu ababwandilo, u Adamu nu Eva, akababika mupaladayiso uwakuyemba, mu mughunda uwa Edeni. Pisinda ‘u Chala akabasaya sona u Chala akababuzya akati: ‘mupapane sona mubale, mwizuzye ichisu chapasi nu kuchiswefya.’’ (Ubwandilo 1.28.) U Yehova akalondagha ukuti bapape abana nu kusanuzya ichisu chosi ukuti chibe we paladayiso sona ukuti basungililaghe ivinyamana. Ubwighane bwache bukaba bwakuti abantu bahobokaghe nu bumi ubwiza sona bikalaghe kwa bwila na bwila.

Napo vili bunubu amasiku ghano tutakwikala ubumi ngati bo u Chala akalondagha,a loli ubwighane bwache butasintite. (Yesaya 46.10, 11) U Chala achili akulonda ukuti abantu bo bakumwivwila bize bikale nu bumi bo bute ni ntamyo kwa bwila na bwila.—Belenga Ubuvumbuli 21.3, 4.

2. Ka amasiku ghano tungabomba buli-buli ukuti tuhobokaghe nu bumi?

U Yehova akatupela ukuti tubanje ‘ni zala iyabuzimu,’ cho chifukwa tuli ni chinyonywa ichakulonda ukumumanya sona nu kumwiputa yuyo. (Belenga Matayi 5.3-6.) Akulonda ukuti tube nawe pa bumanyani, ‘twendaghe muzila zyache, tumughane’ sona tumubombelaghe ‘nu moyo [witu] ghosi.’ (Ukukumbusya Indaghilo 10.12; Salimo 25.14) Pala tukubomba bunubu tungaba swe bakuhoboka napo tukukomana ni ntamyo. Pala tukumwiputa u Yehova tukuba nu bumi ubwakuhobosya ichifukwa tukubomba vyo umwene akulonda ukuti tubombaghe.

3. U Yehova akulonda ukuti abantu bikalaghe nu bumi ubwiza

Enelezya IVIDIYO, nu kwamula ilalusyo ili:

IVIDIYO: Choni cho u Chala Akapela Ichisu?—Iyifupi (1:41)

• Choni cho u Chala akapela ichisu ichakuyemba ichi?

Belenga Undumbilili 3.11, nu kwamula ilalusyo ili:

• Nkimba ivi vikubamanyisya choni ivya Yehova?

4. Ubwighane bwa Yehova butasintite

Belenga Salimo 37.11, 29 sona Yesaya 55.11, nu kwamula ilalusyo ili:

• Nkimba tukumanya buli-buli ukuti ubwighane bwa Yehova ubwakukwafyannya nuswe butasintite?

5. Ukumwiputa u Yehova kukutupangisya ukuti tuhobokaghe nu bumi

IVIDIYO: Nkamanyila Ichifukwa cho Tuli nu Bumi (5:03)

• Ka u Terumi akapindula buli-buli pakumanya ichifukwa cho ali nu bumi?

Belenga Undumbilili 12.13, nu kwamula ilalusyo ili:

• Ichifukwa chakuti u Yehova atubombeye ivintu ivyinji hee, ka tungalangizya buli-buli ukuti tukumupalizya?

IFUNDO IZYAKUDUMULA

U Yehova akulonda ukuti tuhobokaghe nu bumi ubwiza kwa bwila na bwila pachisu ichapasi. Waghe tukumwiputa u Yehova nu moyo witu ghosi tungaba nu bumi ubwiza na pa kabalilo kano bulo.

Ukunyokelamo

• Ka pabwandilo u Yehova akalondagha ukuti u Adamu nu Eva bikalaghe buli-buli?

• Ka tukumanya buli-buli ukuti ubwighane bwa Chala ku bantu butasintite?

• Ka mungabomba buli-buli ukuti muhobokaghe nu bumi?

IFUNDO IZYAKONGELEZYAPO

Manya ichifukwa cho tungasubila ukuti umughunda wa Edeni ghukabako naloli.

“Kasi Munda wa Edeni Ukaŵako Nadi?” (Ichitembe cha Mulindilili icha Chitumbuka, Janiwale 1, 2011)

Manya ichifukwa cho tungasubalila ukuti ichisu chikwiza pakubako kwa bwila na bwila.

“Nkimba Ichisu Chikwiza Pakupyutiwa?” (Inkani iya pa intaneti)

Manya vyo Ibayibolo likunena pa nkani iya kuba nu bumi ubwiza.

“Choni cho Tuli nu Bumi?” (Inkani iya pa intaneti)

Ennya vyo umwanavuli yumo yo akinong’onagha ukuti ali na chilichosi, loli akamanya ukuti akasobelwanga ichintu chimo pa bumi bwache.

Pa kabalilo aka Ndi nu Bumi Ubwakuhobosya (3:55)