Makani Akusebensesha amu Kabuku Kamabungano Abuumi Anciito
SEPTEMBER 7-13
BUBONI BUCANIKA MUMASWI AKWE LESA | KULONGA 23-24
“Mutanokonkela Likoto lya Bantu”
(Kulonga 23:1) “Mutanooya caamba makani akubeca nabi kucafwa muntu ulubite kwiinda mukupa bukamboni bwakubeca.
w18-CW.08 4 mapa. 7-8
Sa Mulyeshi Kabotu Makani Oonse?
Sa mulanyumfwa kabotu kutumina beshicibusa banu mameseji na imelo? Na ubo mbocibete, na mwabona makani apya pa TV, pa intaneti, na kukutika kunyusi nabi kunyumfwa makani acitikila bamwi, mpashi inga mwalinyumfwa anga ndimwe mweelete kutaanguna kwaamba makani ayo asangalasha bweenka mbuli beshikulemba makani mbobacita. Nacibi boobo, kamutana kutuma meseji na imelo iyo, mulyeelete kuliipusha ayi: ‘Sa ndishinishite kwaamba ayi makani ngoonsuni kutuma ngancine? Sa ndyeshi kabotu makani oonse?’ Na tamushinishite, nkokwaamba ayi mulakonsha kutuma makani akubeca cakuteshiba kubamakwesu. Na mutootonsha, inga cabota kutaatuma makani ayo.
Kuli lipenshi alimwi lyeenga lyesa ceebo ca kutuma mameseji na imelo cakufwaambana. Mushishi shimwi incito yesu moyakakashikwa, beshikutupikisha mpashi inga balemba makani eenga atupa boowa nabi kutupa kwaamba ayi tupilinganye bamakwesu bamwi. Amuyeeye shakacitika mucishi cakalinga kwiitwa ayi Soviet Union kalekale. Bakapokola mbobakalinga kwiita ayi KGB, bakalinga kwaambilisha makani akubeca ayi bamakwesu bamwi bakalinga kutanjilila bakapondokela libunga lyakwe Yehova. Bamakwesu baanji bakashoma makani aya akubeca akulipansaanya kulibunga lyakwe Yehova. Cakabica abuumbi! Cisangalasha ncakwaamba ayi, mukuya kwaciindi baanji bakaboolela, sombi bamwi tabakwe kuboolela. Lushomo lwabo lwakanyonyooka. (1 Timo. 1:19) Ino nshiinshi nsheenga twaciita kwaamba ayi tuleye mapensho amushobo uyu? Mulyeelete kuleya kutuma na kwaambilisha makani akubeca alimwi atacite bumboni. Mutanooshoma makani aliwoonse ngomwanyumfwabo. Munokweelesha kushinisha ayi makani ayo ngancine.
(Kulonga 23:2) Mutanookonkela likoto lya bantu na batoobisha nabi na batoopa bukamboni bulengesha kusendeka koombolosha kululeme.
it-1-E 11 pala. 3
Aloni
Cilasangalasha kushiba kwaamba ayi mankanda oonse otatwe Aloni ndyaakaalilwa kushomeka, citoboneka ayi lakwe teshi ngowakatalika kucita cintu citaluleme, sombi wakasuminisha bukaalo na kuyungwa abamwi kumulengesha kutashomeka. Bunene bunene mu cilubo cakutaanguna nakwiinga wakasebensesha njiisho icanika mumulawo waamba ayi: “Mutanookonkela likoto lya bantu na batoobisha.” (Kulo. 23:2) Nacibi boobo, liina lyakwe Aloni lyakasebenseshekwa mumalembo munshila yabulemu, alimwi Yesu, mwanaakwe Lesa ndyaakalinga pacishi capanshi, wakeshiba kuyandika kwa bupailisha bwa bamulunyungu lwakwe Aloni.—Kulu. 115:10, 12; 118:3; 133:1, 2; 135:19; Mate. 5:17-19; 8:4.
(Kulonga 23:3) Alimwi mutanoosalulula pakoombolosha muntu mukandu.
it-1-E 343 pala. 5
Boofu
Kutoombolosha kabotu makani ceebo ca mashinka kanwa kwakalinga kwiimikaninwaako a boofu, alimwi Mulawo tawakalinga kuyuminisha mashinka kanwa, shipo na kasalulushi, mukwiinga shintu isho shakalinga kupa kwaamba ayi moomboloshi aalilwe koombolosha kabotu akwaalilwa kucita shintu munshila yeelete. “Mashinka kanwa alalengesha ayi bantu abo bapofole.” (Kulo. 23:8) “Makulo alalengesha buluya kubasongo boonse.” (Duto. 16:19) Moomboloshi nabi abe mululeme na musongo, inga wakumwa abuumbi na bantu mbaatokoombolosha bamupa cipo. Mulawo wakwe Lesa tawaambibo pa bubiibi bweenga bwaswaamo ceebo cakutambula cipo, sombi ulaamba apa muntu mbwaabona shintu. Mulawo uyu ulaamba ayi: “Mulyeelete kushomeka akululika pakoombolosha. Mutabi akasalulushi kubantu bakandu nabi kuloonda babile.” (Lefi 19:15) Aboobo mbonekelo ya muntu na kupuka nkwakalinga kucite, takwakalinga kweelete kulengesha moomboloshi, koombolosha babile ceebo cakwaamba ayi mbabile.—Kulo. 23:2, 3.
Kulangoola Buboni Bwakumushimu
(Kulonga 23:9) “Mutabi alunkutwe kumuswamashi. Mwebo mulishi buswamashi mbobubete ceebo mwakalinga baswamashi mucishi ca Ijipiti.
w16-CW.10 9 pala. 4
“Mutaluubi Kutambula Kabotu Beensu”
Muciindi ca kulwiita bene Isilaeli kulemeka baswamashi, Yehova wakalinga kusuni ayi kabacita shintu bweenka mbobakalinga kusuni ayi bamwi babacitile. (Amubelenge Kulonga 23:9.) Bakalinga ‘kucishi kuba muswamashi mbokubete.’ Nabi bene Ebulu kabatana kuba basha, bene Ijipiti bakalinga kubanyansha ceebo cakwaamba ayi bakalinga kupusene mushobo alimwi abupailishi. (Mata. 43:32; 46:34; Kulo. 1:11-14) Bene Isilaeli bakeenda mubuumi buyumu abuumbi ciindi ndyebakalinga baswamashi, sombi Yehova wakalinga kusuni ayi kababona baswamashi mbuli bene ‘Isilaelinyinaabo.’—Lefi 19:33, 34.
(Kulonga 23:20, 21) “Amubone, ndaakutuma munjelo kunembo lyanu kwaamba ayi akamulaame mulweendo, alimwi akumushisha kumusena ngondakamubambila. 21 Mukanoomunyumfwila alimwi akukonkela nsheshi akanoomulwiita. Mutakamwaalukili, ceebo ndime ndamutuma alimwi na mukamwaalukile, teshi akamulekeleleewo.
it-2-E 393
Mikayelo
1. Ngo munjelo eenkabo usalalite waambwa liina mu Baibo, kukushakobo munjelo Gabuliyelo, alimwi ngo munjelo eenkabo wiitwa ayi “munene wa baanjelo.” (Judi 9) Tulacana liina ili ciindi cakutaanguna mulibuku lya Danyelo capita 10, umo Mikayelo mwaakasansululwa ayi “munene womwi wa baanjelo” ndyakesa mukucafwa munjelo umwi uyo wakalinga walwanwa ku “munjelo munene wa bulelo bwa bene Pesha.” Mikayelo wakeetwa ayi “munjelo munene shikulama bene Isilaeli,” “munjelo munene uyo ulama bene mishaanu.” (Danye. 10:13, 20, 21; 12:1) Makani aya alalansha kuli Mikayelo mbuli munjelo wakatanjilila bene Isilaeli muluyanga. (Kulo. 23:20, 21, 23; 32:34; 33:2) Makani amwi atucafwa kunyumfwisha citeente ici, ngaaya aamba ayi, “Mikayelo munene wa baanjelo, wakalinga kupikishanya aMubiibi pacikani cakubwesa mutuntu wakwe Mose.”—Judi 9.
Kubelenga Baibo: (Kulonga 23:1-19)
SEPTEMBER 14-20
BUBONI BUCANIKA MUMASWI AKWE LESA | KULONGA 25-26
“Cintu Ciyandika Abuumbi mu Tente Isalalite”
(Kulonga 25:9) Mukeeyaake ashiyandika shoonse shamukati bweenka mbuli mbweshi nkakuboneshe.
it-1-E 165
Libokoshi lya Cipangano
Bwakuyaka Libokoshi. Cintu cakutaanguna Yehova ncaakalwiita Mose ciindi ndyaakalinga kuyaka tente, mbubaambo bwakuyaka Libokoshi, mukwiinga cakalinga cintu ciyandika abuumbi mu tente alimwi amumisumba yoonse ya bene Isilaeli. Libokoshi lyakalinga masentimita ashika cakuma 111 mubulaamfu, masentimita ashika cakuma 67 mubufwaafwi alimwi kuya mwiculu masentimita ashika cakuma 67. Lyakapangwa kuswa kucisamu ca mulombe, alimwi bakalibika golodi wiine wiine pansengwe amukati. Alimwi shamweela shakapangwa agolodi wiine wiine. Lubasu lwabili lwa Libokoshi nkokwaamba ayi cifwekesho, cakapangwa agolodi wiine wiine, kuteshi shisamu lyalo akunanikaako golodi, alimwi mubulaamfu amubufwaafwi cakalinga kweelene a Libokoshi. Kweela kwa cifwekesho bakabikaako bakelebu bobilo ba golodi bakupanga alimwi bakalinga kulangana, umwi kweela kwa cifwekesho aumwi kweela, ano mapapaminwa abo akalinga kunoofungulukite peculu lya Libokoshi. (Kulo. 25:10, 11, 17-22; 37:6-9) Cimwi ciindi cifwekesho ici cakalinga kwiitwa ayi “cifwekesho cankumbu” na “cifwekesho pakalinga kulekelelwa shibiibi.”—Kulo. 25:17; Ebu. 9:5; amubone mutwi waamba ayi PROPITIATORY COVER mu Insight.
(Kulonga 25:21) Lyalo ukabikemo mabwe apampamene ayo obilo akufwekawo cifwekesho peculu.
it-1-E 166 pala. 2
Libokoshi lya Cipangano
Libokoshi lyakalinga kusebenseshekwa mbuli cintu cisalalite cakulaminaamo shintu shisalalite, kwiilikaawo aMilawo Likumi. (Kulo. 25:16) Mu Libokoshi bakabikaamo a “kangomo kagolodi kakalinga kucite mana alimwi ankoli yakwe Aloni yakasonsa matewu,” sombi tempele yakwe Solomoni kaitana kuyakwa, ishi shintu shakakushikwaamo. (Ebu. 9:4; Kulo. 16:32-34; Shakube 17:10; 1 Baami 8:9; 2 Maka. 5:10) Mose katana kufwa, wakapa bene Lefi bapailishi “libuku lya milawo” akubalwiita ayi tabakalinga kweelete kuyibika mukati, sombi “kulibika lubamba aLibokoshi lya Cipangano cakwe Yehova, Lesa wanu, . . . uko lilaakunooli bukamboni bwakushinina bantu bakwe boonse.”—Duto. 31:24-26.
(Kulonga 25:22) Ono nebo ndaakunookwaamba awebo peculu lya cifwekesho. Alimwi pakati ka bakelebu bobilo bali pacifwekesho, mpweshi nkakupete milawo yangu yoonse ayi ukalwiite bene Isilaeli.
it-1-E 166 pala. 3
Libokoshi lya Cipangano
Kutondesha ayi Lesa ali pakati kabo. Kuswabo kalekale Libokoshi lyakalinga kutondesha ayi Lesa ali pakati kabo. Yehova wakashomesha ayi: “Ono nebo ndaakunookwaamba awebo peculu lya cifwekesho, alimwi pakati ka bakelebu bobilo bali pacifwekesho.” “Mukwiinga ndakunoombonekela mulikumbi peculu lya cifwekesho ca Libokoshi lya Cipangano.” (Kulo. 25:22; Lefi 16:2) Samwelo wakalemba ayi Yehova “ulishiite pacuuna cakwe ca bwaami pakati ka bakelebu” (1 Samwe. 4:4); aboobo bakelebu ‘bakalinga kwiimikaninaako cikoci cakwe Yehova.’ (1 Maka. 28:18) Nceceeco, ‘Mose ndyaakenjila mu tente ya Cipangano mukwaamba aYehova, wakalinga kunyumfwa liswi lakwe Lesa kaamwaambila kuswa pakati ka bakelebu peculu lya cifwekesho ca nkumbu pa Libokoshi lya Cipangano.’ (Shakube 7:89) Pesule, Joshuwa alimwi aFineyasi mupailishi munene, bakeepusha Yehova kunembo lya Libokoshi lya Cipangano. (Joshu. 7:6-10; Boombo. 20:27, 28) Nacibi boobo, mupailishi munene eenkabo ngowakalinga kunjila mumusena Usalalite Wiindaawo akubona Libokoshi lya Cipangano linkanda lomwi pamwaaka, kwaamba ayi acite kusekelela kwa kulekelelwa shibiibi, kuteshi kuya mukubandika a Yehova.—Lefi 16:2, 3, 13, 15, 17; Ebu. 9:7.
Kulangoola Buboni Bwakumushimu
(Kulonga 25:20) Bakelebu balyeelete kulangana pacifwekesho, umwi kweela aumwi kweela, ono mapapaminwa abo alyeelete kunoofungulukite peculu lya cifwekesho.
it-1-E 432 pala. 1
Kelebu
Ndyebakalinga kupanga tente muluyanga, bakapanga ashiyandika shoonse shamukati isho shakalinga kwiimikaninaako bakelebu. Kweela komwi alimwi akumwi kwa cifwekesho ca Libokoshi, kwakalinga bakelebu bobilo bakapangwa kuswa ku golodi wiine wiine. Bakalinga kulangene alimwi bakalinga kufukamite pa cifwekesho munshila yakuba anga batolambila. Boonse bobilo bakafungulula mapapaminwa abo peculu lya cifwekesho munshila yakushitilisha. (Kulo. 25:10-21; 37:7-9) Alimwi pashisani shibotu shamu tente a cisani ico cakalinga kupansaanya musena Usalalite amusena Usalalite Wiindawo bakatalaawo bakelebu ba cikoshanyo.—Kulo. 26:1, 31; 36:8, 35.
(Kulonga 25:30) Apalo peculu patebulu, palyeelete kunoocanika shinkwa wacitondesho upekwa kuli ndime lyoonsebo.
it-2-E 936
Shinkwa Wacitondesho
Shinkwa 12 wakalinga kubikwa patebulu mumusena Usalalite mu tente na mutempele alimwi wakalinga kukushikwaawo nsondo ansondo pabushiku bwa kookesha bwa Cibelu. (Kulo. 35:13; 39:36; 1 Baami 7:48; 2 Maka. 13:11; Neye. 10:32, 33) Liswi liine lisebenseshekwa muci Ebulu ngu “shinkwa wapa ciwa.” Alimwi cimwi ciindi liswi lyakwaamba ayi “ciwa” inga lyasansulula “kubaawo” (2 Baami 13:23), aboobo shinkwa wacitondesho wakalinga kunembo lya ciwa cakwe Yehova lyoonse mbuli mulambu. (Kulo. 25:30) Shinkwa wacitondesho cimwi ciindi aleetwa ayi “shipo sha shimaande shisalalite” (2 Maka. 2:4), alimwi a “cimaande cisalalite.” (Maako 2:26)
Kubelenga Baibo: (Kulonga 25:23-40)
SEPTEMBER 21-27
BUBONI BUCANIKA MUMASWI AKWE LESA | KULONGA 27-28
“Ino Nshiinshi Nsheenga Tweeya Kuswa ku Shakufwala sha Mupailishi?”
(Kulonga 28:30) Mucakufwala ca pacaamba ico, ukabikeko Ulimu alimwi aTumimu, kwaamba ayi Aloni akanooshinyamuna pacaamba pakwisa pameenso angu. Mushiindi sha mbuli sheeshi, lyoonse ulyeelete kufwala cakufwala ico, kwaamba ayi akanooshiba kuyanda kwangu pabene Isilaeli.
it-2-E 1143
Ulimu a Tumimu
Baanji beshikwaamba pamakani amu Baibo balashoma ayi Ulimu a Tumimu shakalinga shisolo. Kweelana aBaibo ya James Moffat translation pa Kulonga 28:30 pali maswi akwaamba ayi “shisolo shisalalite.” Bamwi balaamba ayi shakalinga kucite shipansha shotatwe, cipansha cimwi pakalinga kulembetwe ayi “ee,” cimwi “sobwe,” alimwi cimwi tacakalinga kucitewo maswi aliwoonse. Shakalinga kusebenseshekwa kukumbula mwiipusho, sombi na lubasu lwatakalinga kucitewo cilicoonse lwabonekela nkokwaamba ayi taakuwo cikumbulo. Bamwi balayeeya ayi mpashi akalinga mabwe obilo apampamene acite mbasu shobilo nkokwaamba ayi lubasu lumwi lwakalinga lutuba, lyalo lumwi lwakalinga lushiya. Na bawaala mabwe ayo panshi, lyalo kwaboneka mbasu shobilo shituba, nkokwaamba ayi cikumbulo cakalinga kuba “ee,” lyalo mbasu shobilo shishiya cikumbulo cakalinga kuba “sobwe,” lyalo na kwaboneka lubasu lutuba alimwi alushiya cikumbulo cakalinga kuba taakuwo. Paciindi cimwi mwaami Saulo ndyakeepusha mupailishi na inga watolelela kulwana bene Filisiti, taakwe kutambula cikumbulo. Aboobo wakayeeya ayi mpashi musankwa umwi mulikoto wabisha, lyalo wakasenga ayi: “Noba Lesa ba bene Isilaeli, amunkumbule kwiinda muli Tumimu!” Mpeeke Saulo a Jonasani bakasalwa; kuswawaawo, bakacita cisolo pabasankwa aba bobilo. Makani aya alaamba ayi, “Amunkumbule kwiinda muli Tumimu,” citoboneka kwaamba ayi pakalinga bupusano akucita cisolo, nacibi boobo mpashi mbasu shobilo ishi shakalinga kukoshenyeko.—1 Samwe. 14:36-42.
(Kulonga 28:36) “Ukapange keela kapampamene ka golodi wiine wiine, akulembaawo ayi, ‘Kusalala nkwakwe Yehova.’
it-1-E 849 pala. 3
Pankumo
Mupailishi Munene Wabene Isilaeli. Mu Isilaeli, cisani caku mutwi ca mupailishi munene, cakalinga kucite keela ka golodi pankumo mbuli “keshibilo kasalalite kakubengwa,” alimwi pakeela ako pakalinga kulembetwe maswi akwaamba ayi “Kusalala nkwakwe Yehova.” (Kulo. 28:36-38; 39:30) Mbuli shikwiimikaninaako bene Isilaeli pakulambila Yehova, cakalinga kweelela mupailishi munene kulama kabotu musena wakwe alimwi maswi akalinga pakeela ako akalinga kwiibalusha bene Isilaeli boonse kuyandika kwa kutolelela kuba basalalite ndyebakalinga kusebensela Yehova. Alimwi ishi shakalinga kwiimikaninaako mupailishi munene wiindaawo, Yesu Klistu, mukwiinga Yehova wakamubenga kusebensa ncito ya bupailishi ceebo cakwaamba ayi ilayuminisha kusalala kwakwe Lesa.—Ebu. 7:26.
(Kulonga 28:42, 43) Ukabatungile atuputula twamukati twa cisani citeshimite, tuswa mubukome kweela mumabelo kuloondesha kuba matakosha. 43 Anu Aloni alimwi abana bakwe basankwa balyeelete kunoofwala Shakubefwala ishi lyoonsebo na benjila muTente ya Cipangano, nabi kuya kucipaililo mukusebensa mulimo wa bupailishi muMusena Usalalite, kwaamba ayi bakabule kucaikwa ceebo cakuba mubilibo. Uyu ngumulawo weshi ukabule kumana kuli Aloni alimwi abamulunyungu lwakwe.
w08-CG 8/15 15 pala. 17
Amulemeke Yehova Kwiinda Mukutondesha Bulemu
Tulyeelete kutondesha bulemu ciindi ndyetutolambila Yehova. Lilembo lya Shikushimikila 5:1 ilaamba ayi: “Kamucenjela ndyemuya muŊanda yakwe Lesa.” Mose alimwi a Joshuwa, bakalwiitikwa kufuula nsapato shabo ciindi ndyebakalinga pabusena busalalite. (Kulo. 3:5; Joshu. 5:15) Bakalinga kweelete kucita boobo kwaamba ayi batondeshe bulemu na kuloonda. Bapailishi bene Isilaeli bakalwiitikwa ayi kabafwala tuputula twamukati “kuloondesha kuba matakosha.” (Kulo. 28:42, 43) Ici cakabacafwa kutatondesha matakosha abo ciindi ndyebakalinga kusebensela pacipaililo. Mukwashi woonse wamupailishi wakalinga kweelete kukonkela mulawo wakwe Lesa pamakani akutondesha bulemu.
Kulangoola Buboni Bwakumushimu
(Kulonga 28:15-21) “Ono kukatungwe acakufwala pacaamba ca mupailishi munene ayi anoocisebensesha mukwishiba kuyanda kwangu nebo neLesa. Acalo cilyeelete kutungwa kushintu sheenka shili mbuli sha efodi alimwi aShakubebotesha shikoshenye. 16 Cakufwala ici cilyeelete kunokweelenebo mumbasu shoonse alimwi cipetetwe lyobilo mumbasu shoonse cikabe masentimita ali 22. 17 Pali ncico, ukabikewo mindando ya mabwe amakwebo yone. Mumundando wakutaanguna ukabikemo mabwe eetwa ayi lubi, topasi alimwi agaaneti. 18 Mumundando wabili mukaye mabwe eetwa ayi emalodi, safaya alimwi dayimondi. 19 Mumundando watatu ukabikemo mabwe eetwa ayi tekoisi, ageti alimwi aamefisiti. 20 Mumundando wane mukaye mabwe eetwa ayi belilu, kanelyani alimwi ajasipa. Mabwe amakwebo aya alyeelete kubikwa muShakubebikaamo sha golodi. 21 Palibwe lyomwi alyomwi lya mabwe ayo ali likumi aobilo, palyeelete kulembwa liina lyomwi lya mwanaakwe Jakobo musankwa, kwaamba ayi eemikanine mikowa ya bene Isilaeli.
w12-CW 8/1 26 mapa. 1-3
Sa Mulishi?
Ino mabwe akalinga pa cakufwala ca pacaamba ca mupailishi munene akaswa kuli?
Bene Isilaeli ndyebakashika muluyanga pesule lyakuswa mu Ijipiti, Lesa wakabalwiita kupanga cakufwala ici ca pacaamba. (Kulonga 28:15-21) Pa cakufwala ici pakalinga mabwe a lubi, topasi, agaaneti, emalodi, safaya, dayimondi, tekoisi, ageti, aamefisiti belilu, kanelyani alimwi ajasipa. Ano sa ncakwiila bene Isilaeli bakacikonsha kucana mabwe aya adulite?
Kalekale, bantu bakalinga kubona mabwe mbuli buboni alimwi bakalinga kwaasebensesha mumakwebo. Kucakubonenaako, bene Ijipiti bakalinga kucana mabwe adulite kuswa kumisena pacecino ciindi njobeeta ayi Iran, Afghanistan, alimwi mpashi acishi ca India. Mucishi ca Ijipiti bakalinga kukabaamo mabwe adulite apusenepusene. Beendeleshi bene Ijipiti mbobakalinga kucite nkusu shakweendelesha mikoti shoonse mwakalinga kukabwa mabwe. Jobo alaamba pa bantu bamuciindi cakwe ayi bakalinga kukaba mikoti ilaamfu kulangoolabo mabwe. Kwakalinga mabwe aanji akalinga kukabwa, nacibi boobo Jobo wakaambabo pa mabwe a topasi asafaya.—Jobo 28:1-11, 19.
Makani ngotucana mulibuku lya Kulonga alaamba ayi bene Isilaeli “bakatola bubile bwa bene Ijipiti” ciindi ndyebakalinga kuswa mu Ijipiti. (Kulonga 12:35, 36) Aboobo mpashi bene Isilaeli bakabwesa mabwe ngobakasebensesha pakupanga cakufwala ca pacaamba ca mupailishi kuswa ku Ijipiti.
(Kulonga 28:38) Aloni ulyeelete kunookafwala pankumo, kwaamba ayi nebo neYehova nkanootambula shipo shoonse bene Isilaeli nsheenga babenga kuli ndime, nabi bantu babisha pakupa shipo isho.
it-1-E 1130 pala. 2
Kusalala
Shinyama a Shishango. Boombe bakwiiya, mbelele shakwiiya alimwi ampongo shakwiiya, shakalinga kusalalite kuli Yehova alimwi tashakalinga kuyandika kulubulwa. Shakalinga kweelete kubengwa alimwi cipansha cimwi cakalinga kupekwa ku bapailishi bakasalashikwa. (Shakube 18:17-19) Shakubelya shitaanshi kutebula alimwi ashalikumi, ashalo shakalinga kusalalite bweenka bwakalinga milambu ashipo shoonse shakasalashikwa kwaamba ayi kashisebenseshekwa pa tempele. (Kulo. 28:38) Shintu shoonse shakasalashikwa aYehova shakalinga kusalalite alimwi tashakalinga kweelete kusebenseshekwa munshila iteelete nabi kubonwa ayi taaku mboshibete. Cakubonenaako comwi ngu mulawo wakalinga kwaamba pa calikumi. Na musankwa wasala kupa calikumi, kucakubonenaako wasala kupa witi, lyalo lakwe nabi umwi wamumukwashi mukuteshiba wakushaawo shimwi kwaamba ayi asebenseshe paŋanda wakalinga kupekwa mulandu ceebo cakupwaya mulawo wakwe Lesa ukumite shintu shisalalite. Kweelana amulawo musankwa uyu wakalinga kweelete kulipila maali apa tempele akwene, akwiilikaawo a 20 pesenti, alimwi wakalinga kweelete kubenga mulambu mbelele itacite kampenda. Aboobo ici cakapa kwaamba ayi bene Isilaeli kabatondesha bulemu kushintu shisalalite shakwe Yehova.—Lefi 5:14-16.
Kubelenga Baibo: (Kulonga 27:1-21)
SEPTEMBER 28–OCTOBER 4
BUBONI BUCANIKA MUMASWI AKWE LESA | KULONGA 29-30
“Cipo Kuli Yehova”
(Kulonga 30:11, 12) Lyalo Yehova wakaambila Mose ayi: 12 “Ono pakubelenga bene Isilaeli, musankwa munene woonse ulyeelete kundipila mweelo umwi ulubula buumi bwakwe, kwaamba ayi pakunoobelenga bantu batakacaniki mumwaalu.
it-2-E 764-765
Kulembesha
Pakalundu ka Sinayi. Kwiinda mukulwiitikwa aYehova, kulembesha kwakutaanguna kwakacitika ciindi bene Isilaeli ndyebakalinga pakalundu ka Sinayi mumweenshi wabili mwaaka wabili kuswa ciindi ndyebakaswa ku Ijipiti. Kwaamba ayi bacafwe Mose pakubelenga uku, bakasala kuswa mumikowa yoonse yabene Isilaeli wacinenenene womwi kwaamba ayi abe amukuli wakubelenga bantu bakalinga mumushobo wakwe. Basankwa boonse bacite myaaka 20 akuya kunembo tabakwe kulembeshabo ceebo cakwaamba ayi bakalinga kweelela kusebensa ncito ya bushilumamba, sombi mulawo wakaamba ayi boonse bakalembesha bakalinga kweelete kulipila haafu ya lishekeli ($1.10) mbuli musonko wapa tente ya cipangano. (Kulo. 30:11-16; Shakube 1:1-16, 18, 19) Bantu boonse bakabelengwa bakashika 603,550, kutabelengelaako bene Lefi mukwiinga balo tabakalinga kweelete kutambula musena mucishi cilya. Bene Lefi tabakalinga kulipila musonko wapa tente ya cipangano akusebensa ncito ya bushilumamba.—Shakube 1:44-47; 2:32, 33; 18:20, 24.
(Kulonga 30:13-15) Nkokwaamba ayi muntu woonse weshi akabelengwe ulyeelete kulipila mweelo weelete ngobasuminisha bantu boonse. Muntu woonse ulyeelete kulipila maali ayi ncipo kuli ndime. 14 Aboobo musankwa munene woonse weshi akabelengwe ucite myaaka ili 20 alimwi akuya kunembo, ulyeelete kundipila maali aya. 15 Pakulipila maali alubula buumi bwabo aya, muntu mubile teelete kulipila aanji, nabi mukandu kulipila aniini.
it-1-E 502
Cipo
Bantu bakalinga kupa shipo shimwi kweelana amulawo. Mose ndyakabelenga bene Isilaeli, musankwa uliwoonse wakalinga kucite myaaka 20 akwiindawo wakalubula buumi bwakwe kwiinda mukulipila “haafu ya lishekeli [mpashi maali ashika ku $1.10].” Cakalinga “cipo kuli Yehova” ca kulubula buumi bwabo alimwi “musonko wakusebensesha pa tente ya cipangano.” (Kulo. 30:11-16) Kweelana a Josephus shikulemba makani akalekale aba Juda, wakaamba ayi (The Jewish War, VII, 218 [vi, 6]), kuswawaawo “musonko usalalite” uyu wakalinga kulipilwa mwaaka amwaaka.—2 Maka. 24:6-10; Mate. 17:24; amubone mutwi waamba ayi TAXATION mu Insight.
(Kulonga 30:16) Mwaakubwesa maali aya kuswa kubene Isilaeli, mukaasebenseshe pamilimo ya muTente ya Cipangano. Musonko uyo ulaakuba wakulubula buumi bwabo, aboobo anebo ndaakunoobalama.”
w11-CW 11/1 12 mapa. 1-2
Sa Mulishi?
Ino maali ngobakalinga kusebensesha pa tempele yakwe Yehova ku Jelusalemu akalinga kuswa kuli?
Maali ngobakalinga kusebensesha pancito shipusenepusene shapa tempele akalinga kuswa ku misonko bantu njobakalinga kulipila, bunene bunene maali ashalikumi. Nacibi boobo kwakalinga amisonko imwi bantu njobakalinga kulipila. Kucakubonenaako, ciindi ndyebakalinga kupanga tente, Yehova wakalwiita Mose ayi musankwa uliwoonse wakabelengwa wakalinga kweelete kulipila haafu ya lishekeli mbuli “cipo kuli Yehova.”—Kulonga 30:12-16.
Citoboneka kwaamba ayi mukuya kwaciindi, mu Juda uliwoonse wakalinga kweelete kulipila haafu ya lishekeli mwaaka amwaaka mbuli musonko wapa tempele. Uyu ngo musonko Yesu ngwaakalwiita Pita kulipila kwiinda mukusebensesha maali ngakacana mukanwa ka nswi.—Mateyo 17:24-27.
Kulangoola Buboni Bwakumushimu
(Kulonga 29:10) “Lyalo ukalete mucende kunembo lya Tente ya Cipangano akulwiita Aloni alimwi abana bakwe basankwa ayi babike maansaabo pamutwi wa nguwo.
it-1 1029 pala. 4
Lyaansa
Kubika maansa. Maansa takalinga kusebenseshekwa kucatishabo shintu, sombi akalinga kubikwa pa muntu na pacintu kukumanisha luyando lumwi. Kucita boobo kwakalinga kutondesha ayi muntu wapekwa nkusu nabi cintu casalwa, na kushibikwa munshila imwi. Ndyekwakalinga kusekelela kwakubika bapailishi, Aloni alimwi abana bakwe bakabika maansa abo pa mucende apa mbelele shobilo shisankwa shakalinga kusa mukubengwa mbuli mulambu. Aboobo ici cakatondesha patuba kwaamba ayi shinyama ishi shakalinga kubengelwa balo ceebo cakwaamba ayi bakalinga kusa mukuba bapailishi bakwe Yehova Lesa. (Kulo. 29:10, 15, 19; Lefi 8:14, 18, 22) Lesa ndyaakalwiita Mose kusala Joshuwa mbuli shikumupyana, Mose wakabika maansa akwe pali nguwe mukwiinga Joshuwa wakalinga ‘kucite busongo abuumbi,’ aboobo wakalinga kweelela kutanjilila bene Isilaeli. (Duto. 34:9) Maansa akalinga kubikwa pamuntu kutondesha ayi ngweshi akatambule shoolwe. (Mata. 48:14; Maako 10:16) Yesu Klistu wakacata, na kubika maansa pabantu bamwi ndyaakalinga kuboolesha. (Mate. 8:3; Maako 6:5; Luka 13:13) Cimwi ciindi batumwi bakalinga kubika maansaabo pabantu, kwaamba ayi bantu abo batambule cipo ca mushimu usalashi.—Mili. 8:14-20; 19:6.
(Kulonga 30:31-33) “Ukalwiite bene Isilaeli ayi, ‘Mafuta aya asalalite akunanika alyeelete kusebensa mumilimo yangu mumashalane anu oonse acisa. 32 Tamweelete kunanika bantubo nabi kusebensesha nshila yakusenkanya ayi mupange mafuta amwi a mushobo mbuli wooyo. Mafuta ayo alisalalite, amwebo mulyeelete kwaalanga ayi ncakwiila alisalalite. 33 Uyo woonse ngweenga wapanga mafuta ali mbuli ngawo, nabi kunanika muntu umwi uteshi mupailishi, teshi akanoociyeyeelwa kuba mulikoto lya bantu bangu.’”
it-1-E 114 pala. 1
Unanikitwe, Kunanika
Mumulawo Yehova ngwaakapa Mose, wakamulwiita bwakupanga mafuta akunanika. Mafuta aya akalinga kupangwa kwiinda mukusenkanya tuntu tulibetele abuumbi mbuli mule, mafuta anunkila kabotu asinamoni, mafuta anunkila kabotu akalamasi, kasya a olifi. (Kulo. 30:22-25) Muntu wakalinga kucaikwa na wapanga mafuta aya akwaasebensesha munshila iteelete. (Kulo. 30:31-33) Aboobo munshila yacikoshanyo, ici cakalinga kutondesha kuyandika akusalala kwa mukuli muntu ngwaakalinga kutambula kwiinda mukunanikwa mafuta asalalite.
Kubelenga Baibo: (Kulonga 29:31-46)