Kutolelela Kubikila Maano Kubamakwesu Abenankashi Paciindi ca Mapensho Anene Akuteengashila Akacitika mu 2021

Mumwaaka wancito wa 2021,a bulwashi bwa COVID-19 bwakatolelela kukuma bantu nsengwe yoonse. Kweelana ashakalembwa mumutwi wakalinga kwaamba ayi “Kupa Lucafwo Nsengwe Yoonse Paciindi ca Bulwashi bwa COVID-19,” twakasebensesha maali aanji abuumbi kupa lucafwo paciindi ca bulwashi bwa COVID-19 alimwi twakapanga makomiti apa lucafwo eendilila 950.

Alimwi baanji ndyebakalinga kupenga kubulwashi bwa COVID-19, kwakacitika amapensho amwi alicitikila akakuma bamakwesu abenankashi nsengwe yoonse. Kwiilika pakupa lucafwo paciindi ca bulwashi bwa COVID-19, bamu Komiti ya Beshikubunganya ya Likoto Litanjilila bakasuminisha ayi kusebenseshekwe maali amadola aku America ashika ku 8 miliyoni, kwaamba ayi bacafwilishe bamakwesu abenankashi bakakumwa kumapensho alicitikila eendilila 200. Amubone maali ngomupa mukuliyandila mbwakasebenseshekwa kupa lucafwo kubaabo bakakumwa kumapensho obilo anene akutengashila akacitika conoono.

Kupasuka kwa Kalundu Keetwa ayi Nyiragongo

Pa 22 May, 2021, kalundu keetwa ayi Nyiragongo kacanika mucishi ca Democratic Republic of the Congo kakatalika kupasuka. Kupasuka kwa kalundu aka kwakanyonyoola maanda, shikolo alimwi amwakulamina maanshi. Ndipakeenda nshiku pesule lya kupasuka kwa kalundu, mutauni iitwa ayi Goma mwakasula lusuko lubiibi lunyonyoola alimwi kwakacitika ashitentaanshi shiniini niini. Bantu baanji bakalwiitikwa kuswa mutauni iyi alimwi baanji bakacicaamo. Bamwi bakacicila mucishi ca Rwanda.

Pabaabo bakaswa mutauni iyi pakalinga Bakamboni Bakwe Yehova bashika ku 5,000. Kalundu ndyekakapasuka bamwi bakanyonyookelwa maanda, lyalo bamwi bakeepilwa shintu mumaandaabo pesule lyakuswa mutauni iyi. Bamu makomiti apa lucafwo amucishi ca Rwanda aca Democratic Republic of the Congo bakasebensela pomwi kupa lucafwo. Kwaamba pa komiti yomwi ipa lucafwo, baku ofesi yamusampi ya mucishi ca Congo (Kinshasa) bakaamba ayi: “Nabi kwaamba ayi shintu shakalinga kupilingene mutauni kabatana kulwiita bantu ayi basweemo, bamu komiti bakatalika kupa shakulya, maanshi, shakulifweeka ashakufwala.” Mutauni imwi bamakwesu abenankashi beendilila 2,000 bakacanika pamusena womwi. Aboobo bamakwesu bamu komiti ipa lucafwo bakapanga matente akukalaamo, kupa bantu mamasiki akubalwiita mbweenga balishitilisha kubulwashi bwa COVID-19 akolela.

Mumyeenshi yotatwe kuswa ciindi kalundu ndyekakapasuka, bamakwesu bakacikonsha kupa bamakwesu abenankashi laisi iindilila makilogilamu 6,000, busu bulema makilogilamu eendilila 6,000, mafuta eendilila malita 8,000 amaanshi eendilila malita 8,000. Kwaamba ayi basebenseshe kabotu maali, baku musampi bakoola shakulya shiinji paciindi comwi shicanika kumusena uku muciindi cakuula shakulya shidulite kuswa kushishi shimwi.

Nankashi umwi wakanyonyookelwa ŋanda yakayakwa conoono ceebo ca kupasuka kwa kalundu, wakaamba ayi: “Twakalinyumfwa cibiibi abuumbi.” Nacibi boobo, bamumukwashi wakwe bakatambula lucafwo lwakumubili alimwi bakayuminishikwa kutolelela kushomeka. Aboobo wakaamba ayi: “Kwiinda mulucafwo lwakwe Yehova, tulicite shintu nshetuyandika. Twaboona kwaamba ayi Yehova alatucafwa kunyamuna mikuli yesu.”

Mapensho Asha Maali ku Venezuela

Kwa myaaka iinji, mucishi ca Venezuela muli mapensho asha maali. Bamakwesu abenankashi mucishi ici batooliyumya ceebo ca bukaalo kuyuma, nsala alimwi akuya panembo kwa bakapondo. Nacibi boobo, libunga lyakwe Yehova lyatolelela kubabikila maano.

Mumwaaka wancito wamana, twakasebensesha maali amadola aku America eendilila 1.5 miliyoni kuula akutuma shakulya alimwi asoopo kumikwashi ibulishite. Baku musampi waku Venezuela bakaamba ayi: “Teshi cuubu kutola shakulya shilema makilogilamu 130, 000 mucishi coonse mweenshi amweenshi alimwi akushipa kubamakwesu abenankashi babulishite.” Kwaamba ayi shakulya shitanonyonyooka, bamakwesu balatuma shakulya shitafwambaani kunyonyooka. Baku musampi bakatolelela akwaamba ayi: “Liinji tuloola shakulya shiinji paciindi comwi, alimwi paciindi ndyeshitebulwa mukwiinga tashiduli bunene. Lyalo tulashitola kwiinda mukusebensesha nshila shuubu kwaamba ayi tutasebenseshi maali aanji.”

Ba Leonel basebensa mu Komiti ipa Lucafwo mucishi ca Venezuela, baliisuni ncito yabo. Bakaamba ayi: “Kupa lucafwo nincito ilibetele. Kusebensa ncito iyi kwanjuminisha abuumbi kuswabo ciindi bakaangu ndyebakafwa kubulwashi bwa COVID-19. Kubikila maano kuncito iyi kwampa kulinyumfwa ayi ndayandika abuumbi kubamakwesu abenankashi babulishite. Ndaboona kwaamba ayi Yehova alalama cishomesho cakwe cakutolelela kubikila maano kubantu bakwe.”

Mukwesu umwi wakatambula lucafwo uyo wakasebensawo kale mukomiti ipa lucafwo, wakaamba ayi: “Ano paciindi ici ndime ndakalinga kuyandika lucafwo. Bamakwesu bakancafwa amukaangu kwiinda mukutupa nshetwakalinga kuyandika lwakumubili akutucafwa kutolelela kukalika moyo. Bakatubikila maano alimwi akutuyuminisha.”

Mapensho amwi anene akutengashila alacitika kwakubula kucenjeshekwa. Nacibi boobo, libunga lyakwe Yehova liinji lilafwambaana kucana shiyandika akupa lucafwo kubaabo babulishite ceebo ca maali ngomupa mukuliyandila acafwilisha ncito ya nsengwe yoonse. Nshila shimwi sha mbweenga mwapa maali shilacanika pa donate.jw.org. Twalumba abuumbi pa bwaabi bwanu.