CIIYO 57
Ino Inga Mwacita Buyani na Mwaciita Cilubo Cinene?
Nabi kwaamba ayi mulisuni Yehova abuumbi alimwi inga mweelesha cankusu kuleya kucita cili coonse ceenga camukalasha, cimwi ciindi inga mwaciita cilubo. Nacibi boobo, shilubo shimwi shilaba shinene kwiinda shimwi. (1 Bene Kolinto 6:9, 10) Na mwaciita cilubo cinene, mutaluubi kwaamba ayi Yehova taakwe kucileka kumusuna; alisuni kumulekelela akumucafwa.
1. Ino nciinshi ncotweelete kucita kwaamba ayi Yehova atulekelele?
Abo basuni Yehova balalinyumfwa cibiibi abuumbi na bashiba ayi bacita cilubo cinene. Nacibi boobo, Yehova alabayuminisha kwiinda mumaswi ngaakashomesha bantu bakwe ayi: “Nabi shibiibi shanu shilibo pyupyupyu anga ngumuswa malowa, shilaakuboolabo tuu anga mbutonje.” (Isaya 1:18) Na twaana kuswa panshi lya moyo, Yehova inga watulekelela. Ino kwaana cilaamba nshi? Cilaamba kulinyumfwa cibiibi pacilubo ncotwacita, kucileka kucita cibiibi ico, alimwi akusenga Yehova kwaamba ayi atulekelele. Lyalo tulyeelete kusebensa cankusu kwaamba ayi tucileeke kuyeeya na kucita sheesho shakapa kwaamba ayi tucite cibiibi. Kwiilikaawo, tulyeelete kweelesha cankusu kukonkela njiisho shakwe Yehova shiluleme.—Amubelenge Isaya 55:6, 7.
2. Ino Yehova alabasebensesha buyani bamanene kutucafwa na twabiisha?
Na twaciita cilubo cinene, Yehova alatulwiita ayi tulyeelete “kwiita bamanene bamulibungano.” (Amubelenge Jemusi 5:14, 15, NWT.) Basankwa aba bakasalwa balisuni Yehova ambelele shakwe. Bakaiishikwa bwakutucafwa kwaamba ayi tubooshe bushicibusa bwesu a Yehova alimwi.—Bene Galatiya 6:1.
Ino bamanene balatucafwa buyani na twaciita cilubo cinene? Bamanene bobilo na botatwe balesa mukutululika, kwiinda mukusebensesha Malembo. Alimwi balatulwiita ansheenga twaciita kwaamba ayi tuleye kubooshawo alimwi kucita cilubo. Na muntu wacita cilubo cinene taasuniiwo kwaana, bamanene balamukusha mulibungano kwaamba ayi atayungi bamwi mulibungano.
AMWIIYILEWO ASHIMWI
Amwiiye mbweenga mwanyumfwishisha kabotu akulumba Yehova mbwaatucafwa na twaciita cilubo cinene.
3. Kulyaambilila cilubo ncetwacita inga kwatucafwa kuboosha bushicibusa bwesu a Yehova
Cilamucisa Yehova na twaciita cilubo, aboobo tulyeelete kulyaambilila kuli nguwe. Amubelenge Kulumbaisha 32:1-5, akubandika mwiipusho uyu:
Ino nceebonshi cili kabotu kulyaambilila shilubo shesu kuli Yehova muciindi cakusisa?
Kwiilika pakulyaambilila kuli Yehova, inga twalinyumfwa kabotu na twasenga lucafwo kubamanene. Amweebele VIDYO, akubandika mwiipusho utokonkelaawo.
Kweelana anshomweebela muvidyo, ino bamanene bakamucafwa buyani mukwesu Canon kuboolela kuli Yehova?
Tulyeelete kwaamba sha lushinisho bamanene ndyebatootwiipusha mukwiinga balisuni kutucafwa. Amubelenge Jemusi 5:16, akubandika mwiipusho uyu:
Ino nceebonshi ncuubu bamanene kutucafwa na katwaamba sha lushinisho ndyebatootwiipusha?
Amulyaambilile cilubo canu, amwaambe lushinisho kubamanene alimwi akutambula lucafwo lwakwe Yehova
4. Yehova alatondesha nkuumbu kubaabo bacita shilubo
Na muntu wacita cilubo cinene wakaka kukonkela njiisho shakwe Yehova, alakushikwa mulibungano, alimwi tulaleya kuba abushicibusa angukwe. Amubelenge 1 Bene Kolinto 5:6, 11 akubandika mwiipusho uyu:
Bweenka isti mboifutumusha fulaulo, ino kunyumfwana amuntu utasuni kwaana inga kwaleta lipenshi nshi mulibungano?
Bamanene balakonkela cakubonenaako cakwe Yehova cakutondesha nkuumbu kubantu batamaninite kwiinda mukucafwa baabo bakakushikwa mulibungano. Baanji bakalinga bakushikwa mulibungano bakabooshekwa alimwi ceebo cakululikwa. Nabi kwaamba ayi cakalinga cabacisa, kukushikwa kwakabacafwa kushiba ayi ncobakalinga bacita cakalinga cibiibi.—Kulumbaisha 141:5.
Ino Yehova nshaacita ku bamucita shibiibi shilatondesha buyani ayi alicite lusuno, inkuumbu alimwi ayi taatulangili kucita nsheenga tatucikoonshi?
5. Yehova alatulekelela na twaana
Yesu wakaamba cikoshanyo citucafwa kunyumfwishisha Yehova mbwaalinyumfwa na muntu waana. Amubelenge Luka 15:1-7, akubandika mwiipusho uyu:
Ino ici citoomwiisha nshi pali Yehova?
Amubelenge Esekelo 33:11, akubandika mwiipusho uyu:
Ino nciinshi ciyandika abuumbi muntu ncaaelete kucita kwaamba ayi atondeshe ayi waana?
Bweenka mbuli mweembeshi, Yehova alashibikila maano abuumbi mbelele shakwe
BANTU BAMWI BALAAMBA AYI: “Ntooloonda kwaamba ayi na ndwiite bamanene ayi ndakacita cilubo, batoonkusha mulibungano.”
Ino inga mwamucafwa buyani muntu utoyeeya boobo?
CITEENTE CINENE
Na twaciita cilubo cinene sombi twasenga kulekelelwa akushinisha kucileka kucita shibiibi, Yehova inga watulekelela.
Kwiindulukaamo
Ino nceebonshi tulyeelete kulyaambilila shibiibi shesu kuli Yehova?
Ino nciinshi ncotweelete kucita kwaamba ayi Yehova atulekelele shibiibi shesu?
Ino nceebonshi tulyeelete kusenga lucafwo kubamanene na twaciita cilubo cinene?
AMULANGWETEEWO ASHIMWI
Amubone Yehova mbwakatondesha musankwa umwi inkumbu shaambwa pa Isaya 1:18.
Ino nshiinshi bamanene nshobacita kwaamba ayi beeleshe kucafwa baabo beenga bacita cilubo cinene?
“Bamanene Mbobatondesha Lusuno Ankuumbu Kubaabo Bacita Shilubo” (Njashi Yamulindilishi, August 2024)
Amushibe mbobatondeshekwa lusuno ankuumbu abo batasuni kwaana.
“Mbweenga Bamanene Bacafwa Baabo Bakushikwa Mulibungano” (Njashi Yamulindilishi, August 2024)
Amubelenge makani atoocanika pamutwi utokwaamba ayi “Ndakalinga Kuyandika Kuboolela Kuli Yehova,” akwiiya cakapa kwaamba ayi musankwa wakalinga waswa mucancine alinyumfwe ayi Yehova wakamuboosha.
“Baibo Ilaalula Buumi bwa Muntu” (Njashi Yamulindilishi, April 1, 2012)