Sheenga Shamucafwa Kunookwiiya Lyoonse
SA CILAMUYUMINA kwiiya Baibo nsondo ansondo? Sa cimwi ciindi mulalinyumfwa ayi kwiiya Baibo takusangalashi? Soonse cimwi ciindi mbotulinyumfwa. Sombi amuyeeye pashintu shimwi nshotucita lyoonse mbuli kusamba. Nabi kwaamba ayi kusamba kulayandika ciindi ankusu, tulalinyumfwa kabotu na twasamba! Kwiiya Baibo akwalo inga kakutupa kulinyumfwa kabotu. (Efe. 5:26) Atubandike pa shimwi sheenga shamucafwa:
Amulembe mulongo. Tulicishi ayi kucita ciiyo ca Baibo capalweesu ‘ncintu ciyandika abuumbi’ ncotweelete kunoocita. (Filip. 1:10) Kwaamba ayi munookonkela mulongo ngomwakalemba, amuubike pakwaamba ayi kacimubeta cuubu kubonaawo. Na mpashi inga mwabika alamu pa fooni yanu kwaamba ayi inoomwibalushaako na kwacaala paniini kwaamba ayi ciindi cakutalika kwiiya cishike.
Amuyeeye pa sheenga shamucafwa kubikila maano ndyemutokwiiya. Ino ncili cimubeta cuubu ndyemutokwiiya? Kucakubonenaako, sa cilamubeta cuubu kubikila maano ku nshomutokwiiya na mweeya kwa liwoola lyomwi? Nabi sa mpashi mulanyumfwa kabotu kunookwiiya kwa mamineti aniini sombi mankanda aanji? Mulicishi kabotu cimubeta cuubu. Aboobo amuyeeye pabukaalo bwanu ndyemutosala bulaamfu bwaciindi ndyeshi munookwiiya. Na mulanyumfwa butolo kutalika kwiiya na ciindi ncemwakabika cashika, mpashi inga mweelesha kwiiyakobo kwa mamineti ali 10. Kwiiya kwa mamineti ali 10 kuli kabotu kwiinda kuteeyaawo. Alimwi kulilabo na mwatalika kwiiya, mpashi inga mwasuna kutolelela.—Filip. 2:13.
Amusalile limwi nsheshi mukeeye. Na ciindi cakwiiya cashika lyalo nkokuyeeya nsheshi mwiiye, mpashi inga ‘kamutasebenseshi kabotu ciindi ncomucite.’ (Efe. 5:16) Amweeleshe kulemba nsheenga mwasuna kwiiya. Kucakubonenaako, na kuli mwiipusho ngomucite pamakani amwi ngomutatonyumfwishisha kabotu, amuulembe. Alimwi lyoonse na mwamanisha kwiiya, inga mwalemba ashimwi nsheenga mwasuna kwiiya.
Amwaaluleko mbomwiiya na kaciyandika. Amweeleshe kwaalulako mulongo wanu mbuli bulaamfu bwaciindi ncomwiiya alimwi amakani ngomusala kwiiya. Cintu ciyandika abuumbi nkunoocita ciiyo ca Baibo capalwaanu nsondo ansondo. Kwaamba ayi mucikoonshe kucita boobo, na kaciyandika amwaalule bushiku aciindi ndyemwiiya, bulaamfu bwaciindi ncomwiiya, na makani ngomwiiya.
Tulafubilaamo abuumbi na katwiiya Baibo nsondo ansondo. Tulayumya bushicibusa bwesu a Yehova, tuleeya kusala kabotu shakucita alimwi tulayuminishikwa.—Joshu. 1:8.