Okubala
23 Awo Balamu n’agamba Balaki nti: “Zimba mu kifo kino ebyoto musanvu+ era onteekereteekere ente ennume musanvu n’endiga ennume musanvu.” 2 Amangu ago Balaki n’akola nga Balamu bwe yamugamba. Balaki ne Balamu ne bawaayo ente ennume emu emu n’endiga ennume emu emu ku buli kyoto.+ 3 Balamu n’agamba Balaki nti: “Sigala wano okumpi n’ekiweebwayo kyo ekyokebwa nze ŋŋende; oboolyawo Yakuwa anandabikira, era kyonna ky’anaŋŋamba nja kukikugamba.” Awo n’agenda ku lusozi waggulu.
4 Awo Katonda n’alabikira Balamu,+ Balamu n’amugamba nti: “Ntegese ebyoto musanvu nga biri mu lunyiriri, era mpaddeyo ente ennume emu emu n’endiga ennume emu emu ku buli kyoto.” 5 Awo Yakuwa n’ateeka ekigambo mu kamwa ka Balamu,+ era n’amugamba nti: “Ddayo eri Balaki era bino by’ojja okwogera.” 6 Awo n’addayo eri Balaki, n’alaba Balaki n’abaami ba Mowaabu bonna nga bayimiridde okumpi n’ekiweebwayo kye. 7 Awo Balamu n’ayogera ebigambo bino eby’obunnabbi:+
“Balaki kabaka wa Mowaabu yanzigya mu Alamu,+
Yanzigya mu nsozi ez’ebuvanjuba:
‘Jjangu onnyambe okolimire Yakobo.
Jjangu ovumirire Isirayiri.’+
8 Nnyinza ntya okukolimira abo Katonda b’atakolimidde?
Era nnyinza ntya okuvumirira abo Yakuwa b’atavumiridde?+
9 Mbalengera nga nsinziira waggulu ku njazi,
Era mbalengera nga nsinziira ku busozi.
10 Ani ayinza okubala abantu ba Yakobo+ abangi ng’enfuufu,
Era ani ayinza okubala ekitundu ekimu eky’okuna ekya Isirayiri?
Ka nfe ng’abatuukirivu bwe bafa,
Era enkomerero yange k’ebeere ng’eyaabwe.”
11 Awo Balaki n’agamba Balamu nti: “Kiki kino ky’onkoze? Nnakuleese kukolimira balabe bange naye ate ggwe obawadde buwi mukisa.”+ 12 N’amuddamu nti: “Ekyo kyonna Yakuwa ky’ateeka mu kamwa kange si kye nnina okwogera?”+
13 Awo Balaki n’amugamba nti: “Nkwegayiridde, jjangu tugende mu kifo ekirala w’oyinza okubalengerera. Ojja kulengerako bamu so si bonna. Jjangu onnyambe obakolimire ng’osinziira eyo.”+ 14 Awo n’amutwala ku ttale ly’e Zofimu, ku ntikko ya Pisuga,+ n’azimba ebyoto musanvu era n’awaayo ente ennume emu emu n’endiga ennume emu emu ku buli kyoto.+ 15 Balamu n’agamba Balaki nti: “Sigala wano okumpi n’ekiweebwayo kyo nze ŋŋende njogere naye.” 16 Awo Yakuwa n’alabikira Balamu n’ateeka ekigambo mu kamwa ke, era n’amugamba nti:+ “Ddayo eri Balaki era ebyo by’ojja okwogera.” 17 N’addayo gy’ali n’amulaba ng’alindiridde okumpi n’ekiweebwayo kye ekyokebwa nga n’abaami ba Mowaabu bali naye. Balaki n’amubuuza nti: “Yakuwa agambye ki?” 18 Awo Balamu n’ayogera ebigambo bino eby’obunnabbi:+
“Balaki, situka owulirize.
Mpuliriza ggwe mutabani wa Zipoli.
19 Katonda si muntu nti asobola okulimba,+
Era si mwana wa muntu nti asobola okukyusa ebirowoozo bye.*+
Bw’abaako ky’agambye, takikola?
Bw’ayogera ekintu, takituukiriza?+
21 Takkiriza ddogo lyonna kukolebwa ku Yakobo,
Era takkiriza kabi konna kutuusibwa ku Isirayiri.
Yakuwa Katonda we ali nabo,+
Era atenderezebwa nga kabaka mu bo mu ddoboozi erya waggulu.
22 Katonda abaggya mu Misiri.+
Alinga amayembe ga sseddume ey’omu nsiko* gye bali.+
Mu kiseera kino abantu basobola okwogera ku Yakobo ne ku Isirayiri nti:
‘Laba Katonda ky’akoze!’
24 Laba eggwanga erijja okusituka ng’empologoma,
Era ng’empologoma, lijja kuyimuka.+
Terijja kugalamira okutuusa nga limaze okulya omuyiggo,
Era nga linywedde omusaayi gw’abattiddwa.”
25 Awo Balaki n’agamba Balamu nti: “Bw’oba nga tosobola kumukolimira, kale nno tomuwa mukisa.” 26 Balamu n’addamu Balaki nti: “Saakugambye nti, ‘Ebyo byonna Yakuwa by’anaayogera bye nja okukola’?”+
27 Balaki n’agamba Balamu nti: “Nkwegayiridde, jjangu nkutwale nate mu kifo ekirala, oboolyawo Katonda ow’amazima anaakiraba nga kirungi gwe okunnyamba okubakolimira ng’osinziira eyo.”+ 28 Awo Balaki n’atwala Balamu ku ntikko ya Pyoli, awatunudde mu Yesimoni.*+ 29 Balamu n’agamba Balaki nti: “Zimba mu kifo kino ebyoto musanvu era onteekereteekere ente ennume musanvu n’endiga ennume musanvu.”+ 30 Balaki n’akola nga Balamu bwe yamulagira, n’awaayo ente ennume emu emu n’endiga ennume emu emu ku buli kyoto.