Ddala Abafu Basobola Okuddamu Okuba Abalamu?

BAYIBULI KY’EGAMBA

“Wajja kubaawo okuzuukira.”​—Ebikolwa 24:15, Enkyusa ey’Ensi Empya.

OMUGANYULO OGULI MU KUMANYA EKYO

Oguma ng’ofiiriddwa omwagalwa wo.​—2 Abakkolinso 1:3, 4.

Oba tokyatya nnyo kufa.​—Abebbulaniya 2:15.

Oba n’essuubi ekkakafu nti oliddamu okulaba abantu bo abaafa.​—Yokaana 5:28, 29.

TUSOBOLA OKUKKIRIZA EKYO BAYIBULI KY’EGAMBA

Lwa nsonga nga ssatu:

• Katonda ye nsibuko y’obulamu. Bayibuli eraga nti Yakuwa Katonda ye “nsibuko y’obulamu.” (Zabbuli 36:9; Ebikolwa 17:24, 25) Oyo eyawa ebitonde byonna obulamu asobola bulungi okuzuukiza omuntu eyafa.

• Katonda yazuukiza abantu mu biseera eby’edda. Bayibuli eyogera ku bantu munaana—abato n’abakulu, abasajja n’abakazi—abaazuukizibwa. Abamu baazuukizibwa nga baakamala okufa, ate omulala yali yaakamala mu ntaana ennaku nnya!​—Yokaana 11:39-44.

• Katonda agenda kuddamu okuzuukiza abantu. Yakuwa okufa akutwala ng’omulabe. (1 Abakkolinso 15:26) Ayagala nnyo okuggyawo omulabe oyo n’okuzuukiza abantu abaafa. Ayagala okuzuukiza abo abaafa baddemu okubeera ku nsi.​—Yobu 14:14, 15.