Yosiya Yali Ayagala Nnyo Amateeka ga Katonda

Yosiya yafuuka kabaka wa Yuda nga wa myaka munaana. Mu kiseera ekyo abantu baali basinza ebifaananyi era nga beenyigira mu bikolwa eby’obusamize. Yosiya bwe yali wa myaka 16, yatandika okunoonya engeri entuufu ey’okusinzaamu Yakuwa. Bwe yaweza emyaka 20, yatandika okusaanyaawo ebifaananyi byonna n’ebyoto bya bakatonda ab’obulimba mu Yuda. Ate Yosiya bwe yaweza emyaka 26, yakola enteekateeka okudaabiriza yeekaalu ya Yakuwa.

Kabona asinga obukulu, Kirukiya, yazuula mu yeekaalu omuzingo ogwaliko Amateeka ga Yakuwa, oboolyawo nga gwe muzingo gwennyini Musa gwe yawandiika. Omuwandiisi wa kabaka eyali ayitibwa Safani yatwala omuzingo ogwo ewa Yosiya n’asoma Amateeka mu ddoboozi ery’omwanguka. Yosiya bwe yawulira Amateeka nga gasomebwa, yakiraba nti abantu baali bamaze emyaka mingi nga bajeemera Yakuwa. Kabaka Yosiya yagamba Kirukiya nti: ‘Yakuwa musunguwavu. Genda weebuuze ku Yakuwa atubuulire kye tusaanidde okukola.’ Yakuwa yaddamu ng’ayitira mu nnabbi omukazi ayitibwa Kuluda. Yabagamba nti: ‘Abantu b’omu Yuda banvaako. Nja kubabonereza, naye ekyo sijja kukikola nga Yosiya akyafuga nga kabaka, kubanga yeetoowazza mu maaso gange.’

Kabaka Yosiya bwe yawulira obubaka obwo, yagenda mu yeekaalu era n’ayita abantu b’omu Yuda bonna bakuŋŋaane. Yasomera abantu bonna Amateeka ga Yakuwa mu ddoboozi ery’omwanguka. Yosiya n’abantu bonna baasuubiza okugondera Yakuwa n’omutima gwabwe gwonna.

Okumala emyaka mingi, eggwanga lya Yuda lyali terikwata mbaga ey’Okuyitako. Naye Yosiya bwe yasoma Amateeka ga Yakuwa n’akiraba nti embaga ey’Okuyitako yalina okukwatibwa buli mwaka, yagamba abantu bonna nti: ‘Tugenda kukwata embaga ey’Okuyitako.’ Yosiya yateekateeka ebiweebwayo bingi era n’ateekateeka n’abayimbi ab’okuyimbira ku yeekaalu. Abantu b’omu Yuda baakwata embaga ey’Okuyitako, oluvannyuma ne bakwata n’embaga ey’Emigaati Egitali Mizimbulukuse okumala ennaku musanvu. Waali tewabangawo mbaga ya Kuyitako ng’eyo okuva mu nnaku za Samwiri. Mu butuufu, Yosiya yali ayagala nnyo Amateeka ga Yakuwa. Naawe oyagala nnyo okuyiga ebikwata ku Yakuwa?