Okutuukiriza Obulungi Obuweereza Bwaffe—Okuddamu Omuntu Atukambuwalidde

Lwaki Kikulu: Abantu abasinga obungi be tusanga nga tubuulira tebatukambuwalira. Wadde kiri kityo, Yesu yagamba nti abantu abamu bajja kutukyawa. (Yok. 17:14) N’olwekyo bwe tubuulira omuntu n’atukambuwalira, tekisaanidde kutwewuunyisa. Omuntu ng’oyo tusaanidde okumuddamu mu ngeri eweesa Yakuwa Katonda ekitiibwa. (Bar. 12:17-21; 1 Peet. 3:15) Bwe tukola tutyo, embeera tejja kweyongera kwonooneka. Ate era kijja kukwata nnyo ku oyo aba atukambuwalidde n’abalala abatulaba, kibaleetere okuwuliriza omulundi omulala nga waliwo ababuulizi abagenzeeyo okubabuulira.—2 Kol. 6:3.

Engeri y’Okukikolamu:

Omuntu bw’akukambuwalira, sigala ng’oli mukkakkamu. Ekyo kiyinza okumukkakkanya. Tokitwala nti omuntu oyo tatwagala bwagazi. (Mub. 7:9) Ayinza okuba ng’akukambuwalidde olw’okuba alina ebizibu, oba olw’okuba ogenzeeyo mu kiseera ekikyamu. Ne bwe kiba nti ebyo by’oba omubuulidde bye bimunyiizizza, omuntu oyo ayinza okuba nga yatuwulirako eby’obulimba.—2 Kol. 4:4.
Muddemu mu ngeri ey’ekisa. (Nge. 15:1) Kyandiba nti omuzuukusizza mu tulo oba abadde alina by’akola? Wadde nga tetulina kwetondera bantu olw’okubabuulira, oyinza okumwetondera olw’okugenda ewuwe mu kiseera ekikyamu. Akambuwadde olw’okuba waliwo ebintu eby’obulimba ebitwogerwako bye yawulira? Bwe kiba bwe kityo, oyinza okumugamba nti: “Ebyo bye wawulira si bituufu, naye nnandyagadde nkunnyonnyole ekituufu.” Waliwo emu ku nzikiriza zaffe gy’awakanya, gamba ng’okugoba mu kibiina aboonoonyi abateenenya oba okugaana okuteekebwamu omusaayi? Oyinza okumugamba nti: “Waliwo n’abalala abalina endoowoza ng’eyiyo. Wandyagadde nkulage ekyo Bayibuli ky’eyigiriza ku nsonga eyo?”
Omuntu bw’aba omukambwe ennyo, kiba kirungi okumuviira mu kifo ky’okugezaako okumuddamu. Bw’akugamba nti tayagala Bajulirwa ba Yakuwa kuddamu kugenda wuwe, oyinza okumugamba nti temujja kuddamu kugenda wuwe.

Mu Mwezi Guno Gezaako Bino:

Mwegezeemu mu kusinza kwammwe okw’amaka.
Bwe muva ku nnyumba y’omuntu abakambuwalidde, mukubaganye ebirowoozo n’oyo gw’oba obuulidde naye ku ngeri esingayo obulungi gye wandikuttemu embeera eyo.