Okutuukiriza Obulungi Obuweereza Bwaffe—Okuddamu Abo Abatayagala Kutuwuliriza

Lwaki Kikulu?: Ka tugambe nti wagenda kugwawo akatyabaga mu kitundu kyammwe. Okimanyi bulungi nti singa abantu tebava mu kitundu ekyo bajja kufa. Ogenda okulabula muliranwa wo, naye akugamba nti alina eby’okukola bingi. Oyinza okuvaawo obuvi nga tomulabudde? Abantu bangi mu kitundu kye tubuuliramu tebaagala kutuwuliriza, kyokka tebamanyi nti obubaka bwaffe bwe busobola okubayamba okuwonawo. Oluusi tubasanga nga balina eby’okukola bingi. (Mat. 24:37-39) Ate oluusi bayinza okuba nga batulinako endowooza enkyamu. (Mat. 11:18, 19) Bayinza n’okuba nga balowooza nti Abajulirwa ba Yakuwa balinga amadiini amalala agenyigira mu bikolwa ebibi. (2 Peet. 2:1, 2) N’olwekyo, omuntu bw’aba tayagala kutuwuliriza, tetusaanidde kuvaawo buvi.

Engeri y’Okukikolamu:

Nga tonnagenda kubuulira nnyumba ku nnyumba, lowooza ku ebyo abo abatayagala kutuwuliriza bye bayinza okwogera n’engeri gy’oyinza okubaddamu.
Omuntu bw’akuddamu mu ngeri eraga nti tayagala bubaka bwaffe, mu bukkakkamu gezaako okweyongera okunyumya naye. Ekyo oyinza okukikola ng’omusiima olw’ekyo ky’aba ayogedde. Ng’ekyokulabirako, bw’akuddamu nti alina eddiini ye, oyinza okumugamba nti, “Mbadde nsuubira okusanga omuntu nga ggwe ayagala ennyo ebikwata ku Katonda.” Oluusi okulaga nti ofaayo ku muntu gw’oba oyogera naye kiyinza okukusobozesa okumuwa obujulirwa. Ng’ekyokulabirako, bw’akuddamu nti alina eby’okukola bingi, oyinza okumugamba nti: “Nkimanyi nti ebiro bino abantu balina eby’okukola bingi. Naye nga sinnagenda, nnandyagadde okukuwa [yogera ky’oyagala okumuwa].” Oba, omuntu bw’akuddamu nti tayagala, oyinza okumubuuza nti: “Ebiri mu Bayibuli by’otoyagala oba ebikwata ku madiini by’otoyagala?”
Kozesa amagezi. Kijjukire nti Yakuwa takaka bantu kumuwuliriza. (Ma. 30:19) Buli muntu avunaanyizibwa eri Yakuwa. (Bag. 6:5) Bw’ogezaako okwogera n’omuntu naye n’asigala ng’agaanye kiba kirungi okumuleka. Bwe tulaga nti tumussaamu ekitiibwa, ku mulundi omulala ayinza okuwuliriza omubuulizi omulala.—1 Peet. 3:15.

Mu Mwezi Guno Gezaako Kino:

Bwe musanga omuntu n’ayogera mu ngeri eraga nti tayagala kubawuliriza, bwe muvaawo, oyinza okukubaganya ebirowoozo n’oyo gw’oba okoze naye ku ngeri esingayo obulungi gye mwandimuzzeemu.