Okweyisa Obulungi Kye Kisobozesa Omuntu Okuba n’Ebiseera eby’Omu Maaso Ebirungi?

Okuviira ddala mu biseera eby’edda, abantu babadde n’endowooza egamba nti okweyisa obulungi kye kisobozesa omuntu okuba n’ebiseera eby’omu maaso ebirungi. Ng’ekyokulabirako, abantu b’omu Asiya baali bakkiririza nnyo mu bigambo by’omusomesa omufirosoofo eyali ayitibwa Confucius (551-479 E.E.T.) eyagamba nti: “Ky’otayagala bakukole naawe tokikola balala.”a

EKINTU ABANTU BANGI KYE BAKOLA

Ne mu kiseera kino abantu bangi balowooza nti okweyisa obulungi kye kisobozesa omuntu okuba n’ebiseera eby’omu maaso ebirungi. Bafuba okussa ekitiibwa mu bantu abalala, okuba n’empisa ennungi, okuba ab’obuvunaanyizibwa, n’okufuba okuba abeesimbu. Omukazi ayitibwa Linh, ow’omu Vietnam agamba nti: “Nnalowoozanga nti bwe nnandifubye okuba omwesigwa era omwesimbu, nnandibadde mu bulamu obulungi.”

Omukazi y’omu ng’awa emmere abaavu n’abatalina wa kusula.

Abamu bakola ebintu ebirungi olw’ebyo bye bayigirizibwa mu madiini gaabwe. Omusajja ayitibwa Hsu-Yun, abeera mu Taiwan agamba nti, “Nnayigirizibwa nti omuntu bw’aba nga yeeyisa bulungi, bw’afa agenda mu bulamu obweyagaza, ate bw’aba nga yeeyisa bubi bw’afa abonaabona.”

BIKI EBIVAAMU?

Omukazi asitudde omwana we nga munakuwavu era nga mukoowu.

Kyo kituufu nti bwe tukolera abalala ebirungi tufuna emiganyulo mingi. Kyokka bangi abafuba okukolera abalala ebirungi bakizudde nti oluusi ebivaamu si bye baba basuubira. Omukazi ayitibwa Shiu Ping, abeera mu Hong Kong agamba nti: “Nnakiraba mu bulamu bwange nti abo abakolera abalala ebirungi oluusi tebafuna birungi. Nnafuba okufaayo ku b’omu maka gange n’okukola ebintu ebirungi. Naye omwami wange yandekawo nze ne mutabani wange, era obufumbo bwaffe bwasasika.”

Bangi bakirabye nti oluusi amadiini tegayamba bantu kweyisa bulungi. Omukazi abeera mu Japan ayitibwa Etsuko agamba nti, “Nnayingira eddiini emu era nga nze nkulira ekibiina ky’abavubuka. Kyokka nneewuunya nnyo okukiraba nti abantu abamu mu ddiini eyo baali beenyigira mu bikolwa eby’obugwenyufu, baali balwanira obukulu, era nga bakozesa bubi ssente ezaaweebwangayo.”

“Nnafuba okufaayo ku b’omu maka gange n’okukola ebintu ebirungi. Naye omwami wange yandekawo nze ne mutabani wange, era obufumbo bwaffe bwasasika.”—SHIU PING, HONG KONG

Ate abantu abamu ababadde abanyiikivu mu ddiini baweddemu amaanyi bwe bakirabye nti bateganidde bwereere okukola ebintu ebirungi. Ekyo kye kyaliwo ku mukyala ayitibwa Van, abeera mu Vietnam. Agamba nti: “Buli lunaku nnagulanga ebibala, ebimuli, n’emmere, ne mbiwaayo eri bajjajja abaafa, nga nsuubira nti nnandifunye emikisa. Kyokka wadde nga nnakola ebintu ebyo byonna awamu n’obulombolombo obulala okumala emyaka mingi, omwami wange yafuna obulwadde obw’amaanyi ennyo; ate muwala wange eyali asomera mu nsi emu ey’ebweru n’afiira ku myaka emito ennyo.”

ENSONGA LWAKI OKWEYISA OBULUNGI TEKIMALA

Kikulu nnyo okweyisa obulungi, naye si kye kyokka ekisobozesa omuntu okuba n’ebiseera eby’omu maaso ebirungi. Lwaki kiri bwe kityo? Weetegereze ekyo Ebyawandiikibwa Ebitukuvu kye bigamba.

SI BULI MUNTU NTI AYAGALA OKUKOLA EBINTU EBIRUNGI

“Omwonoonyi omu bw’ati ayinza okuzikiriza ebirungi bingi.”—OMUBUULIZI 9:18.

Ne bw’ofuba ennyo okweyisa obulungi, ebintu ebibi abalala bye bakola biyinza okukukosa. Ng’ekyokulabirako, bwe wabaawo ekirwadde eky’amaanyi era ekisaasaana amangu, oyinza okufuba okugoberera obulagirizi bw’ab’obuyinza era ne weewala okusemberera abalala. Naye watya singa abantu abamu bagaana okukolera ku bulagirizi obwo? Enneeyisa yaabwe eyinza okukosa obulamu bwo wadde nga ggwe ofuba okukola ekituufu.

ABANTU BAYINZA OBUTABA NA NDOWOOZA NTUUFU KU KIRUNGI N’EKIBI

“Waliwo ekkubo omuntu ly’alaba ng’ettuufu, naye nga ku nkomerero litwala mu kufa.”—ENGERO 14:12.

Abantu bangi mu byafaayo bazze bakola ebintu bye babadde balowooza nti bituufu kyokka oluvannyuma ne bakizuula nti bikyamu. Okuba n’ekigendererwa ekirungi tekiremesa muntu kutuukibwako bizibu biva mu kusalawo obubi.

TEWALI AMANYI KIJJA KUMUTUUKAKO

“Temumanyi kijja kutuuka ku bulamu bwammwe enkya.”—YAKOBO 4:14.

Omuntu k’abe nga yeeyisa bulungi atya, asobola okufa ekiseera kyonna. Ng’ekyokulabirako, mu kiseera ky’ekirwadde kya COVID-19 abantu bangi abaali bayamba abalala baafiirwa obulamu bwabwe. Ate lowooza ku mukyala ayitibwa Liting abeera mu China eyafiirwa taata we mu kabenje. Agamba nti: “Nnasigala nneebuuza ensonga lwaki omuntu ow’ekisa ng’oyo afa. Taata wange yali mukozi nnyo, mwetoowaze, era nga mwesimbu. Ku bantu abaali mu mmotoka, ye yekka eyafa.”

Bwe kiba nti okweyisa obulungi ku bw’akyo si kye kiviirako omuntu okuba n’ebiseera eby’omu maaso ebirungi, kati olwo kiki ekiyinza okuyamba omuntu okuba n’ebiseera eby’omu maaso ebirungi? Okusobola okuddamu ekibuuzo ekyo, twetaaga obulagirizi obwesigika, kwe kugamba, twetaaga okumanya wa we tusobola okuggya eby’okuddamu mu bibuuzo byaffe. Wa we tuyinza okuggya obulagirizi obwo?

a Okumanya ebisingawo ku ebyo Confucias bye yayigiriza, laba ekitabo Mankind’s Search for God essuula 7, akatundu 31-35. Kyakubibwa Abajulirwa ba Yakuwa era kiri ne ku mukutu, www.pr418.com.