“Katonda Ayagala Oyo Agaba n’Essanyu”

Kirabo kya ngeri ki ekiyinza okukusanyusa ennyo? Awatali kubuusabuusa, ffenna tusanyuka nnyo singa omuntu atuwa ekirabo nga yeeyagalidde so si lwa kuba awaliriziddwa buwalirizibwa. Ekigendererwa omuntu ky’aba nakyo ng’atuwa ekirabo kiba kikulu nnyo gye tuli. N’okusingira ddala, kiba kikulu nnyo eri Katonda. Weetegereze ebigambo omutume Pawulo bye yaluŋŋamizibwa okuwandiika ebiri mu 2 Abakkolinso 9:7.

Lwaki Pawulo yawandiika ebigambo ebiri mu kyawandiikibwa ekyo? Yali akubiriza Abakristaayo ab’omu Kkolinso okuwaayo basobole okuyamba bakkiriza bannaabwe abaali mu bwetaavu. Yabakaka okuwaayo? Nedda, kubanga yabawandiikira nti: “Buli muntu akole nga bw’amaliridde mu mutima gwe, si lwa nnaku oba olw’okuwalirizibwa, kubanga Katonda ayagala oyo agaba n’essanyu.” Ka twetegereze ebigambo ebyo.

“Nga bw’amaliridde mu mutima gwe.” Pawulo alaga nti Omukristaayo ow’amazima agaba olw’okuba aba asazeewo “mu mutima gwe.” Takoma bukomi ku kumanya obwetaavu bakkiriza banne bwe balimu. Omuwandiisi w’ebitabo omu agamba nti ekigambo ekyavvuunulwa “nga bw’amaliridde” kiyinza okutegeeza “okulowooza ku ky’okukola nga bukyali.” N’olwekyo Omukristaayo ng’oyo alowooza nnyo ku bakkiriza banne abali mu bwetaavu era ne yeebuuza engeri gy’ayinza okubayambamu.​—1 Yokaana 3:17.

“Si lwa nnaku oba olw’okuwalirizibwa.” Pawulo ayogera ku ngeri bbiri ez’okugaba Abakristaayo ab’amazima ze balina okwewala; okugaba nga si basanyufu, n’okugaba nga bawaliriziddwa.” Ekitabo ekimu ekinnyonnyola amakulu g’ebigambo ebiri mu Bayibuli kigamba nti omuntu agaba olw’ennaku agaba “ng’alina enyiike ku mutima olw’okuba agenda kuwaayo ssente ze.” Ate oyo agaba ng’awaliriziddwa akikola nga teyeeyagalidde. Ani ku ffe eyandyagadde omuntu ng’oyo amuwe ekirabo?

“Katonda ayagala oyo agaba n’essanyu.” Omutume Pawulo agamba nti Omukristaayo bw’asalawo okugaba, asaanidde okugaba nga musanyufu. Mu butuufu, omuntu bw’agaba ng’alina ekigendererwa ekirungi, afuna essanyu. (Ebikolwa 20:35) Omuntu bw’agaba nga musanyufu, abalala basobola okukiraba. Takoma ku kuwulira mu mutima gwe nti musanyufu, naye essanyu lye lyeyoleka ne ku maaso. Omuntu ng’oyo atusanyusa, era asanyusa ne Katonda. Enkyusa endala eya Bayibuli egamba nti: “Katonda ayagala nnyo abantu abaagala okugaba.”​—Contemporary English Version.

Ebigambo by’omutume Pawulo ebyo ebyaluŋŋamizibwa biyamba Abakristaayo okumanya endowooza gye basaanidde okuba nayo ku kugaba. Ka kibe nti tuwaayo biseera byaffe, amaanyi gaffe, oba ebintu byaffe, ka tukikole nga tuli basanyufu, era olw’okuba twagala okuyamba abalala, naddala abo abali mu bwetaavu. Okugaba okw’engeri eyo kujja kutuleetera essanyu lingi era kujja kutufuula mikwano gya Katonda, kubanga Katonda “ayagala oyo agaba n’essanyu.”