Ezara anoofunji-a ilamulo ya Nlungu

Vali vangavirile vyawa 70 khumela vevo Aisraeli vyawelele aliwa wu Yerusalemu. Mbwenye vatookala Aisraeli enango enao takala mumatatamo enango aumwene wa Persiya. M’mbo-i mwaatwala ali Ezara thitho anoofunji-a atu ilamulo ya Yohova. Ezara atoovwa ira Aisraeli enango enao takala wu Yerusalemu kata-arela ilamulo. E-no atothuulela vyodhowa weo ira amaakhami-e. Mwene Aritasasita atom’mwandela ira: ‘Nlungu atouva-a zelu ira ufunji-enga ilamulwee. Udhowe wu Yerusalemu thitho unooda m’tukhula mutu uliwethene unofuna dhowa na weyo.’ Ezara atoogumana naatu othene enao tafuna welela wu Yerusalemu. Aliwa tatoolobela wa Yohova ira aakami-e vaulendwiuo adhamale tatooroma wenda ulendo.

Vangavirile myedi 4 tatoofiya wu Yerusalemu. Andimuwa tatoom’mwandela Ezara ira: ‘Aisraeli tato-iya m’lambela Yohova thitho atothela a-iyana olambela milungu yonama.’ N’nga Ezara airile n’ni? Liye atookokora vemethoni vaatu othene nolobela ira: ‘Yohova mutoniirela vyongo vinjinji, mbwenye i-yo nitoudawelani.’ Atwao tatoochinyuwa mbwenye vatookala vyongo vinango vyodaweya vyafuneela aliwa visakha-edha. Ee-no Ezara atoosakhula andimuwa naatu azelu ira takami-e atwao. Moi myedi miraru yamala aliwa atu othene enao ta-am’lambela Yohova tatootamangi-iwa.

Ee-no vatoovira vyawa 12. Vahora yeniyo Aisraeli tatoomanga okoka panda wa Yerusalemu. Adhamale atoogumani-a atu noroma alerela ilamulo ya Nlungu. Ezara angadhulile bukhu lailamulo atu othene tatooimela. Liye atom’titimi-a Yohova thitho atwao tatoovenyathi-a mandhiwa noroma m’titimi-anga Yohova. Ee-no Ezara atooroma leri ilamulwiyo thitho atu tatoovuruwana mopwaseya. Atwao tatoorumela ira tali tanga-iidhe m’lambela Yohova voi tatooroma ula. Vadambo lo-arela Ezara atoodhowanave leri ilamulwiyo. Atwao tatoozindiyela ira tanofuneela ira pwando la misasa thitho hora yeniyene tatooroma kozeela.

Aisraeli tatooira pwando wa malambo 7 thitho tatooroma sangalala nom’simba Yohova namwasa vowava-a vyo-anda vinjinji. Vali va-anaireye pwando la misasa ninga lelo romela vahora ya Yoswa. Pwandolo lingamadhi, atu tatoogumanyeya nolobela ira: ‘Yohova mwatoonivulumucha wuudhaari, mwatoonidyi-a ningali kokolani thitho mwatooniva-a ilambo yobaleya. Mbwenye i-yo nikhadhi niudawelangani moweli-edha weli-edha. Mwatooruma anamaongela mbwenye kanaavwele. Mwatoonilevela rima thitho mwatoolokota yolanyedha inyu wa Abrahamu. Va-eeni ninolanyedha ira ninongo uvwelani.’ Adhamale tatoolemba yolanyedha yiwayo thitho andimuwa, Alevi naalimbo velela sembe tatoosimikizela yolanyedhiyo no-ela izindiyelwiwa.