MURU OFUNJEDHA 42
NYUMBO 103 Abusa Ndi Mphatso
Musimbenga “alombwana aniva-idhe” Yohova
“Angagwenle vadhulu . . . , atoovelela alombwana ira takale vyotuva.”—AEF. 4:8.
VINOFUNA I-YO FUNJEDHA
Muyofunjedha yei ninoona mwemo arumiwi okami-a, andimuwa avapingoni na anamaing’anela isa munonikami-edhela aliwa. Ninotapanya thitho vinaire i-yo ira nisimbenga vyongo vinoniirela aliwa.
1. N’nga ndi vyotuva viivi viniva-idhe Yesu?
YESU ngova-a modhala mandha kwaranya mutu uliwethene. Angali vailambo yavathila, atoo-indi-edha basa kopolodhee vokami-a atu. (Luk. 9:12-17) Yesu atooniva-a yotuva ilukulu maningi vonikwela. (Ju. 15:13) Yesu ukanle aniva-anga vyongo vinjinji kumela vevo vavenyathi-iwile liye dhowa dhulu. Yesu atoonilanyedha ira unodha vepa Babee ira aniva-e zimu ochena ira udhanifunji-enga nonilimbi-a thitho ndi vyevyo viirile liye. (Ju. 14:16, 17; 16:13) Unonikami-a thitho va basa yofunji-a atu Bibilya yeniyo inoireya vailambo yothene yavathi vo-indi-edha basa migumano yapingo.—Mat. 28:18-20.
2. Movwelana na lemba la Aefeso 4:7, 8, n’nga ndi alombwana avi aveleliwile ira takale “vyotuva”?
2 Vatokala thitho yotuva inango iniva-idhe Yesu. Rumiwi Paulo atoolemba ira Yesu angadhowile dhulu, “atoovelela alombwana ira takale vyotuva.” (Muleri Aefeso 4:7, 8.) Paulo atoonga ira Yesu atoovelela alombwana enala ira takami-enga pingo. (Aef. 1:22, 23; 4:11-13) Malamboano, “alombwanala” anolaba ninga arumiwi okami-a, andimuwa avapingoni na anamaing’anela isa.a Alombwanala kai olongomana, ee-no anodawi-echa vyongo vinango. (Yak. 3:2) Mbwenye Mbwii-u Yesu Kristu unowa-indi-edhave basa ira tanikami-enga thitho ali ninga yotuva iniva-idhe liye.
3. N’nga ninakami-e a-vi mabasa anolaba “alombwanala”?
3 Yesu atoovelela “alombwanala” ira takami-enga atu pingoni. (Aef. 4:12) Mbwenye i-yo othene ninofwanela akami-anga va basiwa yofuneila. Mofwanafwani-a, enango mwaaliwa anokami-a va mabasa omanga Nyumba dha Umwene. Voi enango anokami-a va basa yovelela vyodya, mawendelo na vyongo vinango. Mbwenye vyongo vyothene vinoonga i-yo venango irana, vinooda kami-a andimuwa avapingoni na anamaing’anela isa. Muyofunjedha yei ninotapanya mwemo munoganyalela i-yo namwasa wa mabasa anolaba alombwanala. Ninotapanya thitho mwemo munathonyi-edhe i-yo ira ninowasimba alombwanala na Yesu.
MABASA ANOLABA ARUMIWI OKAMI-A
4. N’nga ndi mabasa enango avi alaba arumiwi okami-a mu hora ya arumiwi?
4 Mu hora ya arumiwi abali enango tanoo-eliwa kala arumiwi okami-a. (1 Ti. 3:8) Vinooneya ira abalala mbali “arumiwi okami-a” enao alembiwile na Paulo. (1 Ak. 12:28) Vinooneya ira arumiwi okami-ala, anoolaba mabasa enango ofuneya naifunelo yoi andimuwa avapingoni ta-elenga mathuulelwiwa va basa yofuneya, yofunji-a atu nokumbiza mabila a Nlungu. Mofwanafwani-a, arumiwi okami-a tanookami-a volemba malemba venango gula mafwaramento olabi-edhana basila.
5. N’nga ndi mabasa enango avi anolaba arumiwi okami-a malamboano?
5 N’nga ndi mabasa enango aavi arumiwi okami-a anolaba aliwa pingoni mwinyu? (1 Pe. 4:10) Arumiwi okami-a anosamalela kobiri dha pingo venango ing’anela isa, itani-a mabukhu ira anamalaleya tawachele, samalela mafwaramento ovwei-ana madhu na ooni-ana mavidiyo, wachela alendo vamigumanoni venango laba basa yosaka-edha Nyumba ya Umwene. Mabasa enala, anokami-a ira vyongo viwendenga pama pingoni. (1 Ak. 14:40) Arumiwi okami-a enango anoonga myasa ya migumano yavari va sumana venango mwasa wavatando. Arumiwi okami-a enango anosakuliwa ira takami-enga namaing’anela gurupu. Thitho hora dhinango arumiwi okami-a ofwanelela anodhowa vambo-i na ndimuwa wavapingoni mairi-a ulendo wa ubusa.
6. Mwasiwa ngwan’ni ninosimba mabasa anolaba arumiwi okami-a?
6 N’nga mabasa anolaba arumiwi okami-a, anokami-a a-vi pingo? Rongola mwinango wau Bolivia dhinalee Beberlyb aongile ira: “Ndinosangalala na migumano namwasa wa mabasa anolaba arumiwi okami-a. Namwasa wa mabasa anolaba aliwa, ndinooda omba, wakula vamigumanoni, vuruwana mwasa thitho onela mavidiyo. Aliwa anoonechecha ira nili obareleya thitho anokami-a atu enao agumaneile va vidiyo konferesiya. Migumano yamala, anosogolela va basa yocheni-a va Nyumbani ya Umwene, samalela kobiri dha pingo thitho anoonechecha ira nitowachela mabukhu. Ndinowasimba maningi!” Leslie wenuo unokala wu Kolombiya thitho man’nee ali ndimuwa wavapingoni, aongile ira: “Man’nanga unonyindela arumiwi okami-a ira talabe mabasa o-iyana i-yana. Aakale ira kavali arumiwi okami-a, angapingeilenga maningi. Ee-no ndinosimba maningi thindhi liwa.” Ndisaasawa thitho na mwemo munovivwela nyo.—1 Ti. 3:13.
7. N’nga ninathonyi-edhe a-vi ira ninosima arumiwi okami-a? (Muone thitho iruthiruthi.)
7 Angalive ira rimani mwi-u ninooda asimba arumiwi okami-a, Bibilya linonilimbi-a ira: “Muthonyi-edhenga ira muli osimba.” (Ako. 3:15) Bali Cristóvão wenuo ngu ndimuwa wavapingoni wu Finlândia atoonga vinoirecha liye vothonyi-edha simba. Liye aongile ira: “Ndinolembelecha karta rumiwi okami-a venango mamesaje okaana lemba loonga mwemo mundilimbi-edhele liye venango mwasee unom’simbela miyo.” Pascal na i-yanee Jael enao anokala wu Nova Caledonia, anolobelela arumiwi okami-a. Pacal atoonga ira: “Va-eeni malobelwi-u ninothangani-avo sembezela nosimba arumiwi okami-a, enao anolaba mabasa mwathindhi pingoni mwi-u.” Yohova unovwa malobelo enala thitho vyevi vinokami-a pingo wethene.—2 Ak. 1:11.
ANDIMUWA AVAPINGONI “ANOLABA BASA MWATHINDHI VARI VINYU”
8. Mwasiwa ngwan’ni Paulo atoolemba ira andimuwa avapingoni a horee “tanoolaba basa mwathindhi”? (1 Atezalonika 5:12, 13)
8 Hora ya arumiwi, andimuwa tanoolaba basa mwathindhi ira takami-e pingo. (Muleri 1 Atezalonika 5:12, 13; 1 Ti. 5:17) Aliwa tanoosogolela vyongo vapingoni. Mofwanafwani-a, tanooiri-a migumano thitho sakula vyoira. Tanoova-a abali naarongola malangi-o audhivela mbwenye mo-ovira kundu naifunelo yoi tabarele pingo. (1 At. 2:11, 12; 2 Ti. 4:2) Abalala tanoolaba basa naifunelo yoi tafwanyelenga vyongo vyofuneya mabanjiwa thitho akami-a limbi-a uxamwaliwa na Yohova.—1 Ti. 3:2, 4; Tit. 1:6-9.
9. N’nga ndi mabasa enango avi anolaba andimuwa avapingoni malamboano?
9 Andimuwa avapingoni anokala opingeya maningi malamboano. Aliwa anolaba basa yolaleela. (2 Ti. 4:5) Andimuwa avapingoni anosogolela basila mwathindhi, onechecha ira basila inolabiwa mu isa ya pingwiwa thitho nifunji-a ira nilabenga pama basila. Aliwa anolaba ninga anamatonga atangaranga thitho katina sakulo. Kristau aira yodawa ilukulu, andimuwa avapingoni anom’kami ira asaka-edhe okokha uxamwalee na Yohova noonechecha ira pingo ukale ochena. (1 Ak. 5:12, 13; Agl. 6:1) Andimuwa avapingoni anoidhiweya ira ndi anamakumbiza. (1 Pe. 5:1-3) Anokozeela thitho onga myasa vamigumanoni, idhiwa pama mutu uliwethene pingoni thitho ira maulendo aubusa. Wenjedhela va mabasa enango, andimuwa avapingo enango anokami-a va mabasa avyomangamanga nosaka-edha Nyumba dha Umwene, kozeela migumano milukulu, kala mumakomisau oongi-ana na ximitari thitho mumagurupu owendela atu obulela. Andimuwa avapingoni anolaba basa mwathindhi ira tanikami-e.
10. Mwasiwa ngwan’ni ninosimba andimuwa avapingoni athindhi?
10 Yohova atoongelatu ira anamakumbizala anodha nisamalela pama, naifunelo yoi “na-aovenga yongo iliyothene.” (Jer. 23:4) Rongola mwinango wau Finlandia dhinalee Johanna, atoosikimizela madhu enala vahora m’mee vya bulela liye maningi. Liye aongile ira: “Angalive ira ndinorucheya wandela atu enango moda unovivwela miyo, ndimuwa mwinango wavapingino wenuo wa-am’mwidhiwa miyo pama anooleva rima na miyo, lobela vambo-i na miyo, thitho ndisikimizela ira Yohova unondidhiveliwana. Kandinothuulela pama vyongo vyothene vyaongile liye, mbwenye inothuulela miyo choi ndanoodhivwa ira ndili obareleya. Ndinororomela ira ngu Yohova am’rumile ira adhandikami-e vahora yofwanelela.” N’nga andimuwa apingoni mwinyu anoukami-ani a-vi?
11. N’nga ninathonyi-edhe a-vi ira ninolemeza andimuwa avapingoni? (Muone thitho iruthiruthi.)
11 Yohova unofuna ira naasimbenga maningi andimuwa avapingoni “namwasa wa mabasiwa.” (1 At. 5:12, 13) Henrietta wenuo unokala wu Finlandia aongile ira: “Andimuwa avapingoni anokami-a atu enango mofunechecha, mbwenye kaiira anokaana kopolo yavakundu. Naaliwene thitho anogumanana nyarwa vaingumiiwa. Hora dhinango ndinoawandelecha ira: ‘Muli ndimuwa wavapingoni wapama thitho ndinofuna muidhiwe vyevyo.’” Rongola mwinango wau Turquiac dhinalee Sera aongile ira: “Limbi-a andimuwa avapingoni uli ninga e-la makura karoni ira idhowenganave wenda. Ee-no ninooda alembela makarta, aitana ira nidhadye vambo-i venango dhowa malaleela vambo-i naaliwa.” N’nga vatokala ndimuwa wavapingoni mwinango unom’simba nyo namwasa wa thindhilee? Musakesakenga hora yom’thonyi-edha ira munom’simba.—1 Ak. 16:18.
Mwalimbi-anga andimuwa avapingoni, vinokala ninga “muno-ela” makura karoni naifunelo yoi idhowenave wenda (Muone ndima 7, 11, 15)
ANAMAING’ANELA ISA ANOLIMBI-A MIPINGO
12. N’nga mipingo yalimbi-iwa a-vi muhora ya arumiwi? (1 Atezalonika 2:7, 8)
12 Yesu Kristu atoovelela andimuwa avapingoni enango ninga “yotuva” ira takami-enga mipingo mundhila inango. Mosogoleliwa na Yesu, andimuwa enango awu Yerusalemu tatoom’ruma Paulo, Baranaba na enango ninga anamaing’anela owendawenda. (May. 11:22) Tatoirana vyevi ira talimbi-enga mipingo ninga mwemo andimuwa avapingoni na arumiwi okami-a munoirela aliwa. (May. 15:40, 41) Alombwanala tatoorumela i-yachi vyongo vinango, thitho e-la ingumiiwa vangovini naifunelo yoi tafunji-enga thitho limbi-a afwiwa.—Muleri 1 Atezalonika 2:7, 8.
13. N’nga anamaing’anela isa anolaba mabasa avi?
13 Hora dhinjinji anamaing’anela visa anokala tawendanga. Enango anowenda makilometro manjinji ira tamafiye wu mipingo inango. Sumana nlilothene namaing’anela isa unoonga myasa thitho unoira ulendo wa ubusa. Unoiri-a gumano wa apainiya, wa andimuwa avapingoni thitho gumano okozeela urumiwi. Unokami-ana naandimuwa avapingoni kozeela migumano yavakundu na yagawo thitho onga myasa vagumanuo. Anofunji-a xikola ya apainiya, nosaka-edha gumano wavakundu wa apainiya aisa yiwa. Thitho hora dhinjinji anolaba mabasa avephiwile aliwa na ofesi ya tambi ira talabe.
14. Mwasiwa ngwan’ni ninosimba anamaing’anela isa athindhi?
14 N’nga mipingo inoganyali a-vi na mabasa anolaba anamaing’anela isa? Vosimba mabasa anolaba anamaing’anela isa, bali mwinango wau Turquia aongile ira: “Namaing’anela isa uliwethene afiya vapingoni, vinondilimbi-a ira ndilimbi-enga abali naarongolanga. Nditogumananavo na anamaing’anela isa anjinji mbwenye kavali namaing’anela uliwethene uthonyi-edhe ira ngopingeya maningi venango o-owaredheyana.” Johanna um’mongile i-yo ndulimu atoodhowa malaleela na namaing’anela isa mbwenye kaafwaidhemo atu mavandhe. Liye aongile ira: “Kandinodha diwala vyongo vyaireile va dambo lelo. Abalanga tali tangathamile wene voi ndanowasowa maningi. Namaing’anela isuo atoondilimbi-a vondiwandela ira va-eeni pyorucha ira nikalega na abali-u hora dhothene. Mbwenye muilambo ipya, ninodha kaana hora injinji yokala vambo-i naaliwa.” Mofwanafwana na vyevi, atu anjinji anowadhiveliwana anamaing’anela isa enao anoawendela.—May. 20:37–21:1.
15. (a) Movwelana na lemba la 3 Juwau 5-8, n’nga ninathonyi-edhe a-vi ira ninowasimba anamaing’anela isa? (b) N’nga mwasiwa ngwan’ni ninofwanela asimbanga amwadhi namaing’anela isa, n’nga ninaire a-vi vyevyo? (Muone kwadru yoi “Muthuulelenga a-iyaniwa.”)
15 Rumiwi Juwau atom’limbi-a Gayo ira awachelenga pama abali owendawenda thitho atom’mwandela ira: “Atu ninga enala tadhowanga, udhilimbi-edhenga akami-a mundhila inasangalalena Nlungu.” (Muleri 3 Juwau 5-8.) Ndhila imbo-i inairelena i-yo vyevyo kuitana namaing’anela isa ira nidhadyele vambo-i. Ndhila inango, ndi dhowa malaleela vambo-i na liye vahora idhidhe aliwa dhawaredhi-a pingwi-u. Leslie um’mongile i-yo ndulimu aongile ira: “Ndinovepa Yohova ira aakami-enga fwanya vyongo vyofuneela. Miyo na man’nanga ninowalembelecha makarta oonga mwemo munikami-edhele aliwa.” Nithuulelenga ira anamaing’anela isa anochenyela thitho anogumanana nyarwa. Hora dhinango anobulela, anovikumbanyedha venango kala osukwala. Ee-no madhu olimbi-a anaonge nyo venango yotuva inaava-e nyo vinooda kala vyowakula vya malobelwiwa!—San. 12:25.
NINOFUNEELA ALOMBWANA ENAO ALI NINGA “VYOTUVA”
16. Movwelana na lemba la Sanganiko 3:27, n’nga abali anofwanela vifukanga vyofuka viivi?
16 Vailambo yothene vanofuneela abali oi talabe mu vizo vyo-iyana i-yana. Akala muli bali obadiziwa, n’nga “munooda kami-a” abali na arongolinyu? (Muleri Sanganiko 3:27.) N’nga munodhilimbi-edha ira mukale rumiwi okami-a? N’nga munodhilimbi-edha ira mukale ndimuwa wavapingoni?d N’nga munooda chinja vyongo vinango naifunelo yoi mudhowe mafunja xikola ya anamalaleya vya Umwene? Xikola yen’na, inooda ukami-ani ira Yesu au-indi-edheleni basa maningi. Akala munothuulela ira muli o-ofwanelela, munofwanela ulobelela mwasula wa Yohova. Mum’vepenga ira auva-eni zimu ochena ira mulabe basa iliyothene inava-iwe nyo.—Luk. 11:13; May. 20:28.
17. N’nga vitapanyileni i-yovi, vinoniwandela n’ni vyokuza Mweni-u Yesu Kristu?
17 Vyairile Yesu vosakula “alombwana” enango ira talabenga mipingoni, ngu umboni oi unonisogolela malambo omari-ala. (Mat. 28:20) Ninosimba ira nitokaana Mwene waudhivela, ova-a thitho onithuulela. Mwenula utoniva-a atu ofwanelela ira tanikami-enga. Ee-no ninofwanela kaangana hora yoi naasimbenga abali athindhala. Kwaranya vyongo vyothene, nim’simbenga Yohova namwasa oi “yotuva iliyothene yapama na yolongomana inokumela wa liye.”—Yak. 1:17.
NYUMBO 99 Abale Ambirimbiri
a Andimuwa avapingoni enao anolaba mumakomisau a Gulu Lotonga, mumakomisau okami-a Gulu Lotonga, mukomisau ya tambi na mumakomisau enango, naaliwene thitho ndi “vyotuva.”
b Madhina enango atochinjiwa.
c Voroma laongiwa ira Turquia.
d Ira muidhiwe vyongo vinaire nyo ira mukale rumiwi okami-a venango ndimuwa wavapingoni, muone muru ofunjedha oi “N’nga munodhilimbi-edha ira mukale rumiwi okami-a?” na muru oi “N’nga munodhilimbi-edha ira mukale ndimuwa wavapingoni?” mu Nsanja ya Namaing’anela ya Novembro wa 2024.