N’nga munodhilimbi-edha ira mukale ndimuwa wavapingoni?

1-2. N’nga mabasa apama “anolaba andimuwa avapingoni,” anothangani-avon’ni?

AKALA mukadhi mulabanga ninga rumiwi okami-a wa hora indendai, munofwanela dhilimbi-edha ira mukaena makalelo apama anofuneela ira mutu akale ndimuwa wavapingoni. N’nga munodhilimbi-edha ira mulabenga naaliwa “basa yapama,” yolabela abali naarongolinyu ninga ndimuwa wavapingoni?—1 Ti. 3:1.

² N’nga andimuwa avapingoni anolaba basa ivi? Anosogolela va basa yolaleela, anokaana thindhi vofunji-a, anoira maulendo aubusa, anolimbi-a pingo namadhu apama na vyoira viwa. Ngumwasee Bibilya linoonga ira alombwana athidhala ndi “yotuva.”—Aef. 4:8.

3. N’nga bali unaire a-vi ira akale ndimuwa wavapingoni? (1 Timoteo 3:1-7; Titu 1:5-9)

³ N’nga bali unaire a-vi ira akale ndimuwa wavapingoni? Vyongo vinofuneela ira mutu akale ndimuwa wavapingoni, ‘pyo-iyana maningi na vinofuneela ira mutu alembiwe basa. Muilambwila, mutu unooda lembiwa basa akala utokaana dodoliso yolaba basiyo. Mo-iyana na vyevi, ira mutu akale ndimuwa wavapingoni vanofuneela vyongo vinjinji, a-kala kaana dodoliso lofunji-a venango laleela baa-i. Unofuneela kaana makalelo anoongiwa va 1 Timoteo 3:1-7 na Titu 1:5-9. (Muleri.) Muyofunjedha yei, ninotapanya makundo malukulu 3 enao anofuneya ira mutu akale ndimuwa wavapingoni. Makundwee ndi kaana limbili lapama waatu othene, pingoni venango kabe, kanaa ifwanafwani-o yapama ninga muru wabanja thitho kala ofunechecha labela pingo.

MUKAENGANA LIMBILI LAPAMA

4. N’nga “kala o-okaana mwasa onukedheliwa” unothapulelan’ni?

⁴ Ira mutu akale ndimuwa wavapingoni, unofwanela “kala o-onukedhiwa mwasa uliwethene,” vyevi vinothapulela kaana limbili lapama pingoni. Wenjedhela vevo, unofwanela kaana “limbili lapama waatu o-ororomeleya.” Atu o-ororomeleya anooda nyozanga vyongo vinororomela nyo, mbwenye katinofwanela kaikelanga akala mutokaana rima wapama venango makalelo apama. (Dan. 6:4, 5) Ee-no mudhifukenga ira, ‘n’nga nditokaana limbili lapama wari mwa pingoni na waatu o-ororomeleya?’

5. N’nga munathonyi-edhe a-vi ira muli mutu “odhiveliwana vyongo vyapama”?

⁵ Mutu “odhiveliwana vyapama,” unoona vyongo mwapama mwaatu enango thitho onowasimba namwasa wamakalelwiwa. Aliwa anosangalala irela atu enango vyongo vyapama, kwaranya vyevyo vyadedi-edhela aliwa. (1 At. 2:8; Tit. 1:8) Mwasiwa ngwan’ni andimuwa avapingoni anofwanela kaana makalelo enala? Namwasa oi hora dhinjinji anofuneela ira maulendo aubusa thitho samalela abali naarongoliwa pingoni. (1 Pe. 5:1-3) Angalive ira yen’na ndi basa ilukulu, aliwa anosangalala laba thitho kami-a atu enango.—May. 20:35.

6. N’nga ninathonyi-edhe a-vi ira nili “owachela alendo”? (Aebere 13:2, 16; muone thitho iruthiruthi.)

⁶ Munooda thonyi-edha ira muli “owachela alendo,” mwairelanga atu enango vyapama thangani-avo atu oi kai afwinyu avarimani. (1 Pe. 4:9) Voonga vya mutu owachela alendo, bukhu n’nango laongile ira: “Lango wanyumbee thitho warimee, unokala odhuleyene masiki waatu oi kanowaidhiwa.” Munooda ira pama dhifuka ira: “N’nga limbili langa vamwasa owachela alendo ndi loi a-vi?’ (Muleri Aebere 13:2, 16.) Mutu owachela alendo unogawana vyongo vina liye na alendwao thangani-avo osauwa thitho atu enao anom’labela Yohova mororomeleya ninga anamaing’anela isa, naatu enao adhidhe dhaonga mwasa kumela mupingo unango.—Mar. 18:2-8; San. 3:27; Luk. 14:13, 14; May. 16:15; Aro. 12:13.

7. N’nga andimuwa avapingoni anathonyi-edhe a-vi ira kai “odhiveliwana kobiri”?

⁷ “Kakale odhiveliwana kobiri.” Vyevi vinothapulela ira kano-ela mathuulelwee othene vafuma. Akala muli ofuma venango osauwa, mudhilimbi-edhenga e-la vyongo vya Umwene va limburo loroma vaingumiinyu. (Mat. 6:33) Mwa-indi-edhanga basa horinyu, kopolo na vyongo vinyu ira mum’labele Yohova, musamalelenga banja linyu thitho labela pingo. (Mat. 6:24; 1 Ju. 2:15-17) Munooda dhifuka ira: ‘N’nga mathuulelwanga mboi a-vi vamwasa wa kobiri? N’nga ndinokala okwakwanana vyongo vyofuneeleya vaingumini? Venango ndinothuulela vyokaana kobiri dhinjinji?’—1 Ti. 6:6, 17-19.

8. N’nga munathonyi-edhe a-vi ira kamuli “oira vyongo mokwaranyi-a madile” thitho “odhikondi-a”?

⁸ Akala muli mutu “o-oira vyongo mokwaranyi-a madile” na “odhikondi-a,” munodhi-elela madile vavyongo vyothene vinoira nyo vaingumiinyu. Kamunoira vyongo mokwaranyi-a madile vamwasa wa vyodya, umwa, vyowara, dhibalei-a thitho vyosangalali-a. Kamunolandela ingumi yaatu ailamboi. (Luk. 21:34; Yak. 4:4) Munokalecha opwaseya masiki vevo atu enango vanouthomani aliwa. Kamunomwa “vyolezeli-a mokwaranyi-a madile” thitho atu enango katinouidhiwani ninga mutu omwa maningi vyolezeli-a. munooda dhifuka ira, ‘N’nga ndinothonyi-edha ira ndili mutu o-oira vyongo mokwaranyi-a madile na odhikondi-a?’

9. N’nga mutu “othuulela pama” na “wamasaka-edho unoira a-vi”?

⁹ Akala muli mutu “othuulela pama,” munosakula vyoira vo-indi-edha basa makundo a Bibilyani. Mwathuulelanga modi-a makundo enala, vinoukami-ani ira mukale mutu wazelu thitho ovwechecha vyongo. Kamunosakula vyongo motamanga rima. Malomwee munoonechecha ira mutoidhiwa makundo othene okuza mwasuo. (San. 18:13) Vyevi vinoukami-ani sakula vyongo movwelana na mathuulelo a Yohova. Mutu “oira vyongo mwamasaka-edho” unoira vyongo mofwanelela thitho vahoree. Unokala onyindeleya no-arelanga malangi-o. Makalelo enala anooda ukami-ani ira mukaena limbili lapama. Dhoweni nithapanyeni makalelo anoonga Bibilya ira ndimuwa wavapingoni unofwanela akaana ira aoni-enga ifwanafwani-o yapama ninga muru wabanja.

KALA MURU WABANJA WAPAMA

10. N’nga lombwana “unoing’anela pama banjalee” unoira a-vi?

¹⁰ Akala muli muru wabanja thitho munofuna kala ndimuwa wavapingoni, banja linyu linofwanela kala laifwanafwani-o yapama. Ee-no munofwanela kala “lombwana oing’anela pama banjalee.” Munofwanela kaana limbili loi munodhiveliwana thitho samalela banja linyu. Mwaifwanafwani-o, munofwanela sogolela banja linyu va vyongo vyothene vyokuza lambela. Mwasiwa ngwan’ni vyevyi pyofuneya? Rumiwi Paulo atoofuka ira: “Akala mutu kanoidhiwa ing’anela banjalee n’nga pingo wa Nlungu unauing’anele a-vi?”—1 Ti. 3:5.

11-12. N’nga akala mutu unofuna kala ndimuwa wavapingoni, banjalee linofwanela kala loi a-vi? (Muone thitho iruthiruthi.)

¹¹ Akala muli baba, munofwanela kala oi “a-iminyu anouvwelani na rima othene.” Munofwanela afunji-a mwaudhivela. Pyaimbarimbari ira mofwanafwana na a-ima othene, aliwa anodhiveliwana theya, venango waredha. Mbwenye namwasa oi munowafunji-a pama, aliwa anooda kala ovwela, alemezo, thitho amakalelo apama. Mbwenye muirenga vyongo vyothene vinaode nyo vokami-a a-iminyu ira takale vauxamwali wapama na Yohova, ta-arelenga makundo a Bibilyani thitho tadhilimbi-edhe ira tabadiziwe.

¹² “Unofwanela kaana a-ima ororomeleya thitho o-oongeliwa ira mbamakalelo othakala venango o-otongeya.” Akala mwana wa bali utoira yodawa ilukulu, n’nga vinam’kuze a-vi babee? Akala babuo kaafunji-a venango m’va-a malangi-o mwanuo, pyoi kanofwanela kala ndimuwa wavapingoni. Muone Nsanja ya Namaing’anela ya 15 wa Outubro, wa 1996, thakhuru 21, ndima 6 na 7.

SAMALELA PINGO

13. N’nga munathonyi-edhe a-vi ira muli “ololela” na “o-ovwa vinyu baa-i”?

¹³ Abali anothonyi-edha makalelo apama anokami-a maningi pingo. Mutu “ololela” unolimbi-a rendele. Ira mukale ololela, munofwanela vuruwananga atu enango taonganga thitho kala okozeya wendela mathuulelwiwa. Akala muli vari votapanya, n’nga munokala okozeya wendela makundo enao abali anjinji anowaona aliwa ira mbofwanelela akala katino-iyana na makundo a Bibilyani? Madhu oi “kakale ovwa vyee ekene,” anothapulela ira mutuo kanokanyi-edha ira atu enango tairengana vyongo vinoona liye ira pyofwanelela. Unozindiyela upama okaana anamalangi-a anjinji. (Mar. 13:8, 9; San. 15:22) Kanofwanela thitho kala “odhiveliwana kangana” venango “o-orucha thakaleliwa.” Malo mokala wauwalanga venango odhiveliwana kangana, munofwanela kala opwaseya na oira vyongo mosamala. Mutu odhiveliwana “rendele,” ngunoroma irana vyongo mwarendele masiki vyongo viruche maningi. (Yak. 3:17, 18) Mwaonganga moriya rima, munooda didili-a mirima yaatu enango masiki atu oruni-a.—Ana. 8:1-3; San. 20:3; 25:15; Mat. 5:23, 24.

14. N’nga madhu oi “kakale . . . obadiziwa wene” na “ororomeleya” anothapulelan’ni?

¹⁴ Ira bali akale ndimuwa wavapingoni, “kakale obadiziwa wene.” Angalive ira kavinonyindela ira mutuo ubadiziwile walelene venango wa vyawa vinjinji ndulimu, vanofuneela hora ira aulukule mwauzimu. Mofwanafwana na Yesu, munofwanela kala odhiyevi-a thitho kala okozeya laba basa iliyothene inauva-eni Yohova. (Mat. 20:23; Afl. 2:5-8) Munooda thonyi-edha ira muli “ororomeleya” vo-arela makundo olongomana a Yohova thitho malangi-o anoniva-a gulu.—1 Ti. 4:15.

15. N’nga ndimuwa wavapingoni, unofwanela kala wadodoliso maningi vofunji-a? Muongemo.

¹⁵ Malemba anoonga movweya pama ira namaing’anela unofwanela kala “oidhiwa funji-a.” N’nga vyevi vinothapulela ira munofwanela kala wadodoliso maningi voonga mwasa? Kabe. Andimuwa avapingoni anjinji ofwanelela, kai adodoliso maningi vofunji-a. Mbwenye anofunji-a mo-inda rima takala muurumiwini thitho va maulendo aubusa. (Mufwanafwani-edhe na lemba la 1 Timoteo 3:2; thitho lemba la 1 Akoritiyo 12:28, 29 na Aefeso 4:11.) Akala vili ee-no, munofwanela dhilimbi-edha ira mukaena dodoliso lofunji-a. N’nga munaire a-vi vyevi?

16. N’nga munaire a-vi ira mukale namafunji-a wadodoliso? (Muone thitho iruthiruthi.)

¹⁶ “O-indedhela mwakopolo madhu ororomeleya.” Ira mukale namafunji-a o-inda rima, munofwanela indi-edha basa madhu a Nlungu vofunji-a novelela malangi-o. Munofwanela funjedhanga mwathidhi Bibilya na mabukhwi-u. (San. 15:28; 16:23) Mwafunjedhanga, muonenga moda mabukhwi-u munoongela aliwa malemba naifunelo yoi mwaa-indi-edhenga basa mundhila yofwanelela. Thitho mwafunji-anga, mudhilimbi-edhenga afiya atu varimani. Munooda wenjedhela dodoliso linyu lofunji-a, mwavepanga malangi-o wa andimuwa avapingoni enao ana dodoliso. (1 Ti. 5:17) Andimuwa avapingoni anofwanela kala oi anooda “limbi-a” abali naarongoliwa thitho “asumulula” vafuneya irana e-no. Mbwenye voirana vyongo vyevi, hora dhothene anofwanela kala oriya rima. Mwakala opwaseya na audhivela, nofunji-anga vo-indi-edha basa madhu a Nlungu, munodha kala namafunji-a wadodoliso namwasa oi munom’sazi-edha Yesu wenuo uli namafunji-a wadodoliso.—Mat. 11:28-30; 2 Ti. 2:24.

MUDHOWENAVE DHILIMBI-EDHA IRA MUKALE NDIMUWA WAVAPINGONI

17. (a) N’nga chini inakami-e rumiwi okami-a vevo vanodhilimbi-edha liye ira akale ndimuwa wavapingoni? (b) N’nga andimuwa avapingoni anofwanela thuulelan’ni tafunanga e-la bali ira akale ndimuwa wavapingoni? (Muone kwadru yoi “Mukalenga odhiyevi-a mwaona ira bali unofwanela kala ndimuwa wavapingoni.”)

¹⁷ Vasogolo voona makalelo ofuneya ira mutu akale ndimuwa wavapingoni, arumiwi okami-a enango anooda onanga ira katinaode kala ndimuwa wavapingoni. Mbwenye muthuulelenga ira Yohova na gululee, katinodedi-edhela ira muthonyi-edhenga makalelwala, mo-odawi-a yongo iliyothene. (1 Pe. 2:21) Thitho zimu wa Yohova wenuo uli wakopolo ngwenuo unaukami-eni ira mukaena makalelwala. (Afl. 2:13) N’nga vatokala kalelo n’nangolee lelo linofuna nyo ira mulithonyi-edhenga maningi? Mum’vepenga Yohova ira aukami-eni. Mufunjedhenga maningi vyokuza kalelolo nofuka andimuwa avapingoni enango ira taukami-eni.

18. N’nga arumiwi othene okami-a anolimbi-iwa iranan’ni?

¹⁸ Dhoweni i-yo othene thangani-avo andimuwa avapingoni, nidhowenave thonyi-edha makalelo atapanyileni i-yo mu yofunjedha yei. (Afl. 3:16) Akala muli rumiwi okami-a, dhilimbi-edheni ira mukale ndimuwa wavapingoni. Mum’vepenga Yohova ira aufunji-eni naifunelo yoi muirenga vyongo vinjinji vom’labela thitho labela abali naarongolinyu. (Esa. 64:8) Yohova auraeli-eni vevo vanodhilimbi-edha nyo ira mukale ndimuwa wavapingoni.