ພະບັນຍັດ
2 “ແລ້ວພວກເຮົາກໍເດີນທາງກັບໄປບ່ອນກັນດານຕາມເສັ້ນທາງທະເລແດງຕາມທີ່ພະເຢໂຫວາສັ່ງຂ້ອຍ.+ ພວກເຮົາໄດ້ເດີນທາງອ້ອມເຂດພູເສອີຢູ່ຫຼາຍມື້. 2 ໃນທີ່ສຸດ ພະເຢໂຫວາກໍບອກຂ້ອຍວ່າ 3 ‘ພວກເຈົ້າຍ່າງອ້ອມໄປອ້ອມມາຢູ່ພູນີ້ດົນແລ້ວ. ຕອນນີ້ໃຫ້ພວກເຈົ້າຂຶ້ນໄປທາງເໜືອ 4 ແລະໃຫ້ບອກພວກອິດສະຣາເອນວ່າ “ພວກເຈົ້າຈະຕ້ອງຂ້າມເຂດແດນຂອງລູກຫຼານເອຊາວ+ພີ່ນ້ອງຂອງພວກເຈົ້າທີ່ຢູ່ເສອີ.+ ພວກເຂົາຈະຢ້ານພວກເຈົ້າ+ ແຕ່ພວກເຈົ້າຕ້ອງລະວັງ. 5 ຢ່າໄປຕໍ່ສູ້ກັບພວກເຂົາ. ເຮົາຈະບໍ່ເອົາແຜ່ນດິນຂອງພວກເຂົາໃຫ້ພວກເຈົ້າ. ແມ່ນແຕ່ສ່ຳຝ່າມືດຽວເຮົາກໍຈະບໍ່ເອົາໃຫ້ ເພາະເຮົາໄດ້ຍົກເຂດພູເສອີໃຫ້ເປັນຂອງເອຊາວແລ້ວ.+ 6 ຖ້າພວກເຈົ້າຈະກິນເຂົ້າກິນນ້ຳຂອງພວກເຂົາ ພວກເຈົ້າຕ້ອງໄດ້ຊື້ນຳພວກເຂົາ.+ 7 ພະເຢໂຫວາພະເຈົ້າຂອງພວກເຈົ້າໄດ້ອວຍພອນພວກເຈົ້າທຸກຢ່າງ. ພະເຈົ້າໄດ້ແນມເບິ່ງພວກເຈົ້າຕະຫຼອດຕອນທີ່ພວກເຈົ້າຍ່າງຢູ່ບ່ອນກັນດານທີ່ກວ້າງໃຫຍ່ນັ້ນ. ຕະຫຼອດ 40 ປີ ພະເຢໂຫວາພະເຈົ້າຂອງພວກເຈົ້າກໍຢູ່ນຳພວກເຈົ້າ ແລະພວກເຈົ້າບໍ່ໄດ້ຂາດເຂີນອີ່ຫຍັງ.”’+ 8 ພວກເຮົາຈຶ່ງຂ້າມເຂດແດນຂອງລູກຫຼານເອຊາວ+ພີ່ນ້ອງຂອງພວກເຮົາທີ່ຢູ່ເສອີ ແລະບໍ່ໄດ້ໄປທາງເຂດອາຣາບາ ເອລັດ ແລະເອັດຊີໂອນເກເບ.+
ຈາກນັ້ນ ພວກເຮົາກໍຍ່າງລຽບໄປຕາມເສັ້ນທາງບ່ອນກັນດານໂມອາບ.+ 9 ພະເຢໂຫວາບອກຂ້ອຍວ່າ ‘ຢ່າໄປໂຈມຕີຫຼືຕໍ່ສູ້ພວກໂມອາບ ເພາະເຮົາຈະບໍ່ເອົາແຜ່ນດິນຂອງພວກເຂົາໃຫ້ພວກເຈົ້າແມ່ນແຕ່ໜ້ອຍດຽວ. ເຮົາໄດ້ເອົາເມືອງອາຣະໃຫ້ເປັນຂອງລູກຫຼານໂລດແລ້ວ.+ 10 (ແຕ່ກີ້ພວກເອມີມ+ທີ່ໂຕໃຫຍ່ໆສູງໆຄືກັບພວກອານາກເຄີຍຢູ່ຫັ້ນ. 11 ພວກເຣຟາຢິມ+ກໍໂຕໃຫຍ່ໆສູງໆຄືກັບພວກອານາກ.+ ພວກໂມອາບເອີ້ນພວກເຣຟາຢິມວ່າເອມີມ. 12 ກ່ອນໜ້ານີ້ພວກໂຮລີ+ເຄີຍຢູ່ເສອີ ແຕ່ພວກລູກຫຼານຂອງເອຊາວໄດ້ຂ້າພວກເຂົາ ຍຶດເອົາແຜ່ນດິນນັ້ນ ແລະໄດ້ເຂົ້າໄປຢູ່ແທນ.+ ພວກອິດສະຣາເອນກໍຈະເຮັດກັບຄົນໃນແຜ່ນດິນທີ່ພະເຢໂຫວາຈະເອົາໃຫ້ແບບນັ້ນຄືກັນ.) 13 ຕອນນີ້ ໃຫ້ພວກເຈົ້າຂ້າມຮ່ອມພູ*ເຊເຣັດ.’ ພວກເຮົາກໍຂ້າມຮ່ອມພູ*ເຊເຣັດໄປ.+ 14 ພວກເຮົາໃຊ້ເວລາ 38 ປີ ເພື່ອເດີນທາງຈາກກາເດັດບາເນອາຈົນຂ້າມຮ່ອມພູ*ເຊເຣັດ. ໃນໄລຍະນັ້ນ ຄົນທີ່ເປັນທະຫານໃນລຸ້ນນັ້ນໄດ້ຕາຍຈາກຄ້າຍພັກໝົດແລ້ວ ຄືກັບທີ່ພະເຢໂຫວາໄດ້ສາບານໄວ້ກັບເຂົາເຈົ້າ.+ 15 ພະເຢໂຫວາໄດ້ໃຊ້ລິດເດດ*ຂອງເພິ່ນທຳລາຍຄົນເຫຼົ່ານັ້ນໃຫ້ໝົດໄປຈາກຄ້າຍພັກ.+
16 ຫຼັງຈາກຄົນທີ່ເປັນທະຫານລຸ້ນນັ້ນຕາຍໄປໝົດແລ້ວ+ 17 ພະເຢໂຫວາກໍເວົ້າກັບຂ້ອຍວ່າ 18 ‘ມື້ນີ້ພວກເຈົ້າຈະອອກຈາກເຂດແດນໂມອາບເຊິ່ງກໍຄືອາຣະ. 19 ເມື່ອພວກເຈົ້າເຂົ້າໄປໃກ້ພວກອຳໂມນ ຢ່າໄປໂຈມຕີຫຼືຕໍ່ສູ້ພວກເຂົາ ເພາະເຮົາຈະບໍ່ເອົາແຜ່ນດິນຂອງພວກອຳໂມນໃຫ້ພວກເຈົ້າ ແມ່ນແຕ່ສ່ຳຝ່າມືດຽວ. ເຮົາໄດ້ເອົາແຜ່ນດິນນັ້ນໃຫ້ລູກຫຼານຂອງໂລດແລ້ວ.+ 20 ແຜ່ນດິນນີ້ເຄີຍເປັນຂອງພວກເຣຟາຢິມ.+ (ແຕ່ກີ້ພວກເຣຟາຢິມເຄີຍຢູ່ຫັ້ນ ແລະພວກອຳໂມນເອີ້ນພວກເຂົາວ່າຊຳຊຸມມິມ. 21 ພວກເຣຟາຢິມເປັນຄົນໂຕໃຫຍ່ໆສູງໆຄືກັບພວກອານາກ.+ ພະເຢໂຫວາໄດ້ຊ່ວຍພວກອຳໂມນໄລ່ພວກເຣຟາຢິມອອກໄປ ແລ້ວພວກອຳໂມນກໍເຂົ້າໄປຢູ່ແຜ່ນດິນນັ້ນແທນ. 22 ພະເຈົ້າກໍເຄີຍຊ່ວຍລູກຫຼານຂອງເອຊາວທີ່ຢູ່ເສອີ+ແບບນີ້ຄືກັນ. ເພິ່ນໄດ້ຊ່ວຍເຂົາເຈົ້າຂັບໄລ່ພວກໂຮລີ+ອອກໄປ. ເຂົາເຈົ້າກໍໄດ້ຍຶດແລະຢູ່ໃນແຜ່ນດິນນັ້ນຈົນຮອດທຸກມື້ນີ້. 23 ພວກອາວີມເຄີຍຢູ່ບ້ານຕ່າງໆໃນເຂດຂອງເມືອງຄາຊາ+ ແຕ່ພວກກາບໂຕຣີມ+ທີ່ມາຈາກກາບໂຕຣ*ໄດ້ຂັບໄລ່ເຂົາເຈົ້າອອກໄປແລະຢູ່ຫັ້ນແທນ.)
24 ໃຫ້ພວກເຈົ້າຂ້າມຮ່ອມພູ*ອາໂນນໄປ.+ ເຮົາໄດ້ມອບສີໂຮນ+ກະສັດຂອງຄົນອາໂມທີ່ຢູ່ເມືອງເຮັດຊະໂບນໄວ້ໃນມືຂອງພວກເຈົ້າແລ້ວ. ໃຫ້ພວກເຈົ້າໄປໂຈມຕີແລະຍຶດເອົາແຜ່ນດິນຂອງລາວ. 25 ມື້ນີ້ເຮົາຈະເຮັດໃຫ້ຄົນທົ່ວໂລກຮູ້ສຶກຢ້ານເມື່ອໄດ້ຍິນເລື່ອງຂອງພວກເຈົ້າ. ເຂົາເຈົ້າຈະກະວົນກະວາຍແລະໂຕສັ່ນ*ຍ້ອນພວກເຈົ້າ.’+
26 ຂ້ອຍໄດ້ສົ່ງຄົນຈາກບ່ອນກັນດານເກເດໂມດ+ໄປຫາກະສັດສີໂຮນທີ່ຢູ່ເມືອງເຮັດຊະໂບນ ເພື່ອຂໍສ້າງສັນຕິສຸກກັບລາວ+ ໂດຍເວົ້າວ່າ 27 ‘ຂ້ອຍຂໍຍ່າງຜ່ານແຜ່ນດິນຂອງທ່ານ. ຂ້ອຍຈະໃຊ້ທາງຫຼັກເທົ່ານັ້ນ ຈະບໍ່ລ້ຽວຊ້າຍລ້ຽວຂວາ.+ 28 ຂ້ອຍຈະຊື້ເຂົ້າຊື້ນ້ຳນຳທ່ານ. ມີແຕ່ຂໍຍ່າງຜ່ານຊື່ໆ 29 ຈົນກວ່າຂ້ອຍຈະຂ້າມແມ່ນ້ຳຈໍແດນເຂົ້າໄປໃນແຜ່ນດິນທີ່ພະເຢໂຫວາພະເຈົ້າຈະເອົາໃຫ້ພວກເຮົາ. ພວກລູກຫຼານຂອງເອຊາວທີ່ຢູ່ເສອີກັບພວກໂມອາບທີ່ຢູ່ອາຣະກໍເຄີຍໃຫ້ພວກເຮົາຍ່າງຜ່ານແຜ່ນດິນຂອງເຂົາເຈົ້າຄືກັນ.’ 30 ແຕ່ກະສັດສີໂຮນທີ່ຢູ່ເມືອງເຮັດຊະໂບນບໍ່ຍອມໃຫ້ພວກເຮົາຍ່າງຜ່ານແຜ່ນດິນຂອງລາວ. ຍ້ອນພະເຢໂຫວາປ່ອຍໃຫ້ລາວເປັນຄົນຫົວແຂງ+ແລະໃຈແຄບ ເພື່ອຈະມອບລາວໄວ້ໃນມືຂອງພວກເຮົາຄືກັບຕອນນີ້.+
31 ແລ້ວພະເຢໂຫວາກໍເວົ້າກັບຂ້ອຍວ່າ ‘ເຮົາໄດ້ມອບສີໂຮນແລະແຜ່ນດິນຂອງລາວໃຫ້ເຈົ້າແລ້ວ. ໃຫ້ເຂົ້າໄປຍຶດເອົາແຜ່ນດິນຂອງລາວໂລດ.’+ 32 ເມື່ອສີໂຮນກັບຄົນຂອງລາວທັງໝົດມາຕໍ່ສູ້ກັບພວກເຮົາຢູ່ຢາຮາດ+ 33 ພະເຢໂຫວາພະເຈົ້າຂອງພວກເຮົາກໍມອບລາວໄວ້ໃນມືຂອງພວກເຮົາ. ພວກເຮົາຈຶ່ງຊະນະລາວກັບລູກຂອງລາວ ແລະຄົນຂອງລາວທັງໝົດໄດ້. 34 ຕອນນັ້ນ ພວກເຮົາໄດ້ຍຶດແລະທຳລາຍທຸກໆເມືອງ. ພວກເຮົາໄດ້ຂ້າຜູ້ຊາຍ ຜູ້ຍິງ ແລະເດັກນ້ອຍ. ພວກເຮົາບໍ່ປ່ອຍໃຫ້ໃຜລອດຈັກຄົນ.+ 35 ພວກເຮົາໄດ້ປຸ້ນເອົາຝູງສັດແລະເຄື່ອງຂອງຈາກເມືອງຕ່າງໆທີ່ພວກເຮົາຍຶດໄດ້. 36 ຕັ້ງແຕ່ເມືອງອາໂຣເອ+ທີ່ຢູ່ແຄມຮ່ອມພູ*ອາໂນນ (ລວມທັງເມືອງທີ່ຢູ່ໃນຮ່ອມພູ) ໄປຈົນຮອດກິລຽດ ພວກເຮົາເອົາຊະນະໄດ້ທຸກເມືອງ. ພະເຢໂຫວາພະເຈົ້າຂອງພວກເຮົາໄດ້ຊ່ວຍພວກເຮົາໃຫ້ຍຶດໄດ້ທຸກເມືອງ.+ 37 ແຕ່ພວກເຈົ້າບໍ່ໄດ້ເຂົ້າໄປໃນແຜ່ນດິນຂອງພວກອຳໂມນ+ ເຂດທັງໝົດຂອງຮ່ອມພູ*ຢັບໂບກ+ ແລະເມືອງຕ່າງໆເຊິ່ງຢູ່ເຂດທີ່ມີພູຫຼາຍໆໜ່ວຍ ແລະບໍ່ໄດ້ເຂົ້າໄປບ່ອນອື່ນໆທີ່ພະເຢໂຫວາພະເຈົ້າຂອງພວກເຮົາຫ້າມບໍ່ໃຫ້ໄປ.”