ເລື່ອງຊີວິດຈິງ
“ຕອນນີ້ຂ້ອຍມັກໄປປະກາດແລ້ວ!”
ຂ້ອຍເກີດຢູ່ໃນເມືອງບາວກູຕາ ເຊິ່ງຢູ່ໃນເກາະໃຕ້ຫຼືເຊົ້າໄອແລນຂອງປະເທດນູແວນເຊລັງ. ຕອນຍັງນ້ອຍຂ້ອຍຮັກພະເຢໂຫວາແລະຮັກຄວາມຈິງ. ຂ້ອຍມັກໄປປະຊຸມຫຼາຍແທ້ໆ ແລະຂ້ອຍກໍຮູ້ສຶກອົບອຸ່ນ ປອດໄພ ແລະມີຄວາມສຸກເມື່ອໄດ້ຢູ່ກັບພີ່ນ້ອງໃນປະຊາຄົມ. ເຖິງຂ້ອຍຈະເປັນຄົນຂີ້ອາຍ ແຕ່ຂ້ອຍກໍມັກໄປປະກາດທຸກອາທິດ. ຂ້ອຍກ້າປະກາດກັບໝູ່ຢູ່ໂຮງຮຽນແລະຄົນອື່ນໆ. ຂ້ອຍພູມໃຈທີ່ຈະໄດ້ເປັນພະຍານພະເຢໂຫວາ. ຂ້ອຍຈຶ່ງອຸທິດຕົວໃຫ້ພະເຢໂຫວາຕອນອາຍຸ 11 ປີ.
ຂ້ອຍເລີ່ມບໍ່ມີຄວາມສຸກ
ໜ້າເສົ້າ ຕອນທີ່ຂ້ອຍເລີ່ມເປັນໄວລຸ້ນ ຂ້ອຍກໍບໍ່ໄດ້ສະໜິດກັບພະເຢໂຫວາຄືກັບແຕ່ກ່ອນ. ຂ້ອຍຮູ້ສຶກວ່າໝູ່ຢູ່ໂຮງຮຽນມີອິດສະຫຼະຫຼາຍ ແລະຂ້ອຍກໍຢາກມີອິດສະຫຼະແບບນັ້ນຄືກັນ. ຂ້ອຍຮູ້ສຶກວ່າກົດທີ່ພໍ່ແມ່ຕັ້ງຂຶ້ນແລະຫຼັກການຂອງຄລິດສະຕຽນເຄັ່ງຄັດໂພດ ແລະຄິດວ່າການນະມັດສະການພະເຢໂຫວາຫຍຸ້ງຍາກຫຼາຍ. ເຖິງຂ້ອຍຈະຮູ້ວ່າພະເຢໂຫວາມີຢູ່ແທ້ ແຕ່ຂ້ອຍກໍບໍ່ໄດ້ຮູ້ສຶກໃກ້ຊິດກັບເພິ່ນເລີຍ.
ຂ້ອຍຍັງໄປປະກາດຢູ່ ແຕ່ຂ້ອຍກໍເຮັດພໍເປັນພິທີຊື່ໆ. ຕອນທີ່ໄປປະກາດຂ້ອຍບໍ່ໄດ້ກຽມຕົວເລີຍ. ດັ່ງນັ້ນ ຂ້ອຍຈຶ່ງບໍ່ຮູ້ວ່າຊິເລີ່ມປະກາດແນວໃດ. ນີ້ເຮັດໃຫ້ຂ້ອຍບໍ່ມີລາຍຢ້ຽມຫຼືນັກສຶກສາ ແລະຂ້ອຍກໍບໍ່ມີຄວາມສຸກຕອນທີ່ໄປປະກາດ ຈາກນັ້ນຂ້ອຍກໍບໍ່ມັກການປະກາດເລີຍ. ຂ້ອຍເວົ້າກັບຕົວເອງວ່າ ‘ໃຜຊິໄປປະກາດທຸກທິດທຸກເດືອນແບບນີ້ໄດ້?’
ຕອນອາຍຸ 17 ປີຂ້ອຍຢາກໃຊ້ຊີວິດແບບອິດສະຫຼະ. ດັ່ງນັ້ນ ຂ້ອຍຈຶ່ງເກັບເຄື່ອງຂອງແລະຍ້າຍໄປຢູ່ອົດສະຕຣາລີ. ພໍ່ແມ່ເສຍໃຈຫຼາຍທີ່ຂ້ອຍເຮັດແບບນັ້ນ. ພວກເພິ່ນເປັນຫ່ວງຂ້ອຍຫຼາຍ ແຕ່ພວກເພິ່ນກໍຄິດວ່າຂ້ອຍຈະຍັງຮັບໃຊ້ພະເຢໂຫວາຕໍ່ໆໄປ.
ຕອນຢູ່ອົດສະຕຣາລີ ຄວາມເຊື່ອຂອງຂ້ອຍກໍແຮ່ງອ່ອນລົງເລື້ອຍໆ. ຂ້ອຍເລີ່ມຂາດການປະຊຸມ ຂ້ອຍຫຼິ້ນນຳໄວລຸ້ນທີ່ມີນິດໄສຄືຂ້ອຍ. ມື້ໜຶ່ງເຮົາກໍໄປປະຊຸມ ແລະອີກມື້ໜຶ່ງກໍໄປກິນເຫຼົ້າແລະເຕັ້ນຢູ່ເທັກຢູ່ບາ. ເມື່ອຄິດເຖິງຊີວິດໃນຕອນນັ້ນ ຂ້ອຍຮູ້ວ່າຂ້ອຍໃຊ້ຊີວິດແບບຕີສອງໜ້າທັງຊິຢູ່ຝ່າຍພະເຢໂຫວາແລະຢູ່ຝ່າຍໂລກ. ແຕ່ຂ້ອຍກໍບໍ່ມີຄວາມສຸກເລີຍ.
ໄດ້ບົດຮຽນທີ່ສຳຄັນແບບບໍ່ຄາດຄິດ
ສອງປີຕໍ່ມາ ຂ້ອຍກໍຮູ້ຈັກພີ່ນ້ອງຍິງຄົນໜຶ່ງທີ່ຊ່ອຍໃຫ້ຂ້ອຍເລີ່ມຄິດວ່າຈະໃຊ້ຊີວິດແນວໃດ. ຂ້ອຍພັກຢູ່ກັບພີ່ນ້ອງຍິງໂສດ 5 ຄົນ ແລະພວກເຮົາກໍໄດ້ເຊີນຜູ້ດູແລໝວດກັບເມຍຊື່ທາມາຣາມາພັກຢູ່ເຮືອນອາທິດໜຶ່ງ. ຕອນທີ່ຜູ້ດູແລໝວດໄປເຮັດວຽກຂອງປະຊາຄົມ ທາມາຣາກໍໄດ້ໃຊ້ເວລາກັບພວກເຮົາແລະລົມກັນຢ່າງມ່ວນຊື່ນ. ທາມາຣາເປັນຄົນທີ່ເຂົ້າຫາໄດ້ງ່າຍແລະເປັນກັນເອງ. ຂ້ອຍມີຄວາມສຸກຫຼາຍ. ຂ້ອຍບໍ່ຄິດເລີຍວ່າຄົນທີ່ມີຄວາມເຊື່ອເຂັ້ມແຂງຈະມັກມ່ວນແບບນີ້.
ທາມາຣາເປັນຄົນທີ່ດຸໝັ່ນຫ້າວຫັນໃນວຽກປະກາດ ແລະມີຄວາມສຸກທີ່ໄດ້ເຮັດແບບນັ້ນ. ນີ້ເຮັດໃຫ້ຄົນອື່ນຢາກເຮັດຄືກັນກັບລາວ. ລາວມີຄວາມສຸກທີ່ໄດ້ຮັບໃຊ້ພະເຢໂຫວາຢ່າງດີທີ່ສຸດ. ແຕ່ຂ້ອຍພັດບໍ່ມີຄວາມສຸກເລີຍເພາະຂ້ອຍບໍ່ໄດ້ຮັບໃຊ້ພະເຢໂຫວາເຕັມທີ. ການທີ່ລາວມີຄວາມຄິດໃນແງ່ບວກແລະມີຄວາມສຸກສົ່ງຜົນຕໍ່ຊີວິດຂອງຂ້ອຍຫຼາຍ. ຕົວຢ່າງຂອງທາມາຣາເຮັດໃຫ້ຂ້ອຍຄິດເຖິງຄວາມຈິງທີ່ສຳຄັນທີ່ວ່າ ພະເຢໂຫວາຢາກໃຫ້ເຮົາທຸກຄົນຮັບໃຊ້ເພິ່ນ “ຢ່າງມີຄວາມສຸກ” ແລະ “ຮ້ອງດີໃຈ.”—ເພງ. 100:2, ລ.ມ.
ຂ້ອຍກັບມາມັກວຽກປະກາດອີກແລ້ວ
ຂ້ອຍຢາກມີຄວາມສຸກຄືກັບທາມາຣາ. ແຕ່ເພື່ອຈະເປັນແບບນັ້ນໄດ້ ຂ້ອຍຕ້ອງປ່ຽນແປງຕົວເອງຫຼາຍແທ້ໆ. ຂ້ອຍບໍ່ໄດ້ປ່ຽນແປງຕົວເອງບາດດຽວ ແຕ່ຂ້ອຍຄ່ອຍໆເຮັດເທື່ອລະເລັກເທື່ອລະໜ້ອຍ. ຂ້ອຍເລີ່ມກຽມຕົວກ່ອນໄປປະກາດ ແລະສະໝັກເປັນໄພໂອເນຍສົມທົບບາງເທື່ອ. ການເຮັດແບບນີ້ຊ່ອຍຂ້ອຍໃຫ້ມີຄວາມໝັ້ນໃຈຫຼາຍຂຶ້ນແລະບໍ່ຢ້ານຫຼາຍເກີນໄປ. ເມື່ອຂ້ອຍໃຊ້ຄຳພີໄບເບິນຫຼາຍຂຶ້ນໃນວຽກປະກາດ ຂ້ອຍກໍມ່ວນກັບການປະກາດຫຼາຍຂຶ້ນ. ບໍ່ດົນຫຼັງຈາກນັ້ນ ຂ້ອຍກໍເປັນໄພໂອເນຍສົມທົບປະຈຳ.
ຂ້ອຍເລີ່ມເປັນໝູ່ກັບພີ່ນ້ອງທີ່ມີອາຍຸຕ່າງກັນເຊິ່ງເຂົາເຈົ້າຮັກພະເຢໂຫວາແລະມີຄວາມສຸກທີ່ໄດ້ເຮັດວຽກຮັບໃຊ້ເພິ່ນ. ຕົວຢ່າງທີ່ດີຂອງເຂົາເຈົ້າຊ່ອຍຂ້ອຍໃຫ້ຄິດວ່າສິ່ງໃດສຳຄັນທີ່ສຸດໃນຊີວິດ ແລະຂ້ອຍກໍເລີ່ມອ່ານຄຳພີໄບເບິນທຸກໆມື້. ຂ້ອຍເລີ່ມມ່ວນກັບວຽກປະກາດຫຼາຍຂຶ້ນເລື້ອຍໆ ແລະໃນທີ່ສຸດຂ້ອຍກໍສະໝັກເປັນໄພໂອເນຍປະຈຳ. ນີ້ເປັນເທື່ອທຳອິດໃນຮອບຫຼາຍປີທີ່ຂ້ອຍຮູ້ສຶກອົບອຸ່ນແລະມີຄວາມສຸກທີ່ໄດ້ຢູ່ກັບພີ່ນ້ອງໃນປະຊາຄົມ.
ຂ້ອຍໄດ້ຄູ່ໄພໂອເນຍທີ່ຢູ່ນຳກັນຕະຫຼອດ
ໜຶ່ງປີຕໍ່ມາ ຂ້ອຍກໍໄດ້ພົບກັບອາເລັກ. ລາວເປັນຄົນໃຈດີ ຮັກພະເຢໂຫວາ ແລະຮັກວຽກປະກາດຫຼາຍແທ້ໆ. ລາວເປັນຜູ້ຊ່ວຍວຽກຮັບໃຊ້ ແລະເປັນໄພໂອເນຍໄດ້ 6 ປີແລ້ວ. ລາວເຄີຍໄປຮັບໃຊ້ຢູ່ມາລາວີປະມານເຈັດແປດເດືອນເຊິ່ງເປັນເຂດທີ່ມີຄວາມຈຳເປັນຫຼາຍ. ຕອນຢູ່ຫັ້ນລາວໄດ້ຄົບຫາກັບພີ່ນ້ອງທີ່ເປັນມິດຊັນນາຣີເຊິ່ງເປັນຕົວຢ່າງທີ່ດີໃຫ້ກັບລາວແລະຊ່ອຍລາວໃຫ້ເອົາວຽກຮັບໃຊ້ພະເຢໂຫວາມາເປັນສິ່ງສຳຄັນທີ່ສຸດໃນຊີວິດ.
ຂ້ອຍກັບອາເລັກແຕ່ງດອງໃນປີ 2003 ແລະຕັ້ງແຕ່ນັ້ນມາເຮົາກໍຮັບໃຊ້ພະເຢໂຫວາເຕັມເວລາຕະຫຼອດ. ເຮົາໄດ້ປະສົບການທີ່ດີຫຼາຍຢ່າງ ແລະພະເຢໂຫວາກໍໃຫ້ສິ່ງດີໆກັບເຮົາຢ່າງລົ້ນເຫຼືອ.
ພະເຢໂຫວາໃຫ້ສິ່ງທີ່ດີຫຼາຍຂຶ້ນເລື້ອຍໆ
ກຳລັງປະກາດຢູ່ເມືອງກະເລໂນ ປະເທດຕີມໍເລັດສະເຕ
ໃນປີ 2009 ເຮົາໄດ້ຮັບໃຊ້ເປັນມິດຊັນນາຣີຢູ່ຕີມໍເລັດສະເຕ ເຊິ່ງເປັນປະເທດນ້ອຍໆທີ່ຢູ່ໃນໝູ່ເກາະຂອງອິນໂດເນເຊຍ. ຕອນນັ້ນເຮົາທັງຮູ້ສຶກຕື່ນເຕັ້ນ ຕົກໃຈ ແລະຢ້ານ. 5 ເດືອນຕໍ່ມາເຮົາກໍໄດ້ເດີນທາງມາຮອດເມືອງດີລີເຊິ່ງເປັນເມືອງຫຼວງຂອງປະເທດຕີມໍເລັດສະເຕ.
ຊີວິດຢູ່ນີ້ແຕກຕ່າງຫຼາຍຈາກບ່ອນທີ່ເຮົາເຄີຍຢູ່. ເຮົາຕ້ອງປັບຕົວເຂົ້າກັບວັດທະນະທຳໃໝ່ ພາສາໃໝ່ ບ່ອນຢູ່ ແລະອາຫານ. ເມື່ອເຮົາໄປປະກາດ ເຮົາເຫັນຄົນທຸກຍາກຂາດເຂີນ ບາງຄົນກໍບໍ່ໄດ້ເຂົ້າໂຮງຮຽນ ບາງຄົນກໍມີບາດແຜທາງຮ່າງກາຍແລະຈິດໃຈຍ້ອນສົງຄາມແລະຄວາມຮຸນແຮງ.a
ວຽກປະກາດຢູ່ນີ້ມ່ວນຫຼາຍ. ມີເທື່ອໜຶ່ງຂ້ອຍໄດ້ພົບເດັກຍິງທີ່ຊື່ມາເຣຍb ອາຍຸ 13 ປີທີ່ກຳລັງໂສກເສົ້າຢູ່ຍ້ອນແມ່ລາວຕາຍໄດ້ສອງສາມປີກ່ອນ ສ່ວນພໍ່ລາວກໍບໍ່ຄ່ອຍຢູ່ນຳລາວ. ມາເຣຍກໍເປັນຄືກັບເດັກນ້ອຍຄົນອື່ນໆທີ່ອາຍຸສ່ຳກັນກັບລາວເຊິ່ງບໍ່ຮູ້ວ່າຈະໃຊ້ຊີວິດແນວໃດ. ຂ້ອຍຈື່ວ່າມີເທື່ອໜຶ່ງທີ່ລາວລະບາຍຄວາມຮູ້ສຶກໃຫ້ຂ້ອຍຟັງ ລາວກໍຮ້ອງໄຫ້ໄປນຳ. ແຕ່ຂ້ອຍບໍ່ເຂົ້າໃຈວ່າລາວເວົ້າຫຍັງ ເພາະຂ້ອຍຍັງບໍ່ເວົ້າພາສານີ້ບໍ່ເກັ່ງເທື່ອ. ຂ້ອຍໄດ້ອະທິດຖານຂໍພະເຢໂຫວາເພື່ອຊ່ອຍຂ້ອຍໃຫ້ຮູ້ວ່າຈະໃຫ້ກຳລັງໃຈລາວແນວໃດ. ຈາກນັ້ນ ຂ້ອຍກໍໄດ້ອ່ານຂໍ້ຄຳພີທີ່ໃຫ້ກຳລັງໃຈລາວ. ສອງສາມປີຕໍ່ມາຂ້ອຍເຫັນວ່າການສຶກສາຄຳພີໄບເບິນໄດ້ຊ່ອຍມາເຣຍໃຫ້ປ່ຽນແປງຊີວິດ ແລະເຮັດໃຫ້ລາວມີໜ້າຕາທີ່ຍິ້ມແຍ້ມແຈ່ມໃສຫຼາຍຂຶ້ນ. ຈາກນັ້ນ ລາວກໍຮັບບັບເຕມາແລະມີນັກສຶກສາຫຼາຍຄົນ. ຕອນນີ້ມາເຣຍຢູ່ໃນຄອບຄົວໃຫຍ່ເຊິ່ງເປັນຄອບຄົວທາງດ້ານຄວາມເຊື່ອ ແລະລາວກໍຮູ້ສຶກວ່າມີຄົນຮັກລາວ.
ພະເຢໂຫວາໄດ້ຊ່ອຍໃຫ້ວຽກຮັບໃຊ້ຢູ່ຕີມໍເລັດສະເຕກ້າວໜ້າແທ້ໆ! ເຖິງວ່າຜູ້ປະກາດຫຼາຍຄົນຈະເຂົ້າມາໃນຄວາມຈິງພຽງແຕ່ 10 ປີຜ່ານມາ ແຕ່ເຂົາເຈົ້າກໍກ້າວໜ້າເຖິງຂັ້ນຮັບໃຊ້ເປັນໄພໂອເນຍ ຜູ້ຊ່ວຍວຽກຮັບໃຊ້ ແລະຜູ້ດູແລ. ສ່ວນບາງຄົນກໍເຮັດວຽກຢູ່ສຳນັກງານການແປ ແລະແປປຶ້ມຕ່າງໆເປັນຫຼາຍພາສາຂອງປະເທດນັ້ນ. ຂ້ອຍມີຄວາມສຸກຫຼາຍແທ້ໆທີ່ເຫັນພີ່ນ້ອງຍິ້ມແຍ້ມແຈ່ມໃສ ຮ້ອງເພງໃນການປະຊຸມ ແລະເຫັນວ່າເຂົາເຈົ້າມີຄວາມເຊື່ອທີ່ເຂັ້ມແຂງຫຼາຍຂຶ້ນ.
ຂ້ອຍກັບອາເລັກກຳລັງຈະໄປເຂດປະກາດທີ່ຍັງບໍ່ທັນມີປະຊາຄົມເພື່ອແຈກຢາຍໃບເຊີນການປະຊຸມອະນຸສອນ
ຊີວິດທີ່ມີຄວາມສຸກຫຼາຍກວ່ານີ້ບໍ່ມີອີກແລ້ວ!
ເຖິງວ່າຊີວິດຢູ່ຕີມໍເລັດສະເຕຈະຕ່າງຈາກອົດສະຕຣາລີຫຼາຍ ແຕ່ຂ້ອຍກໍບໍ່ຄິດເລີຍວ່າມັນຈະມີຄວາມສຸກຫຼາຍປານນີ້. ບາງມື້ເຮົາກໍຂີ່ລົດຕູ້ຄັນນ້ອຍໆທີ່ມີທັງຄົນທັງຜັກແລະປາແຫ້ງເຕັມຢູ່ຫັ້ນ. ບາງເທື່ອເຮົາກໍນັ່ງສຶກສາຢູ່ພື້ນດິນຢູ່ໃນເຮືອນຫຼັງນ້ອຍໆທີ່ທັງຮ້ອນທັງເອົ້າ ແຖມຍັງມີໄກ່ແລ່ນໄປແລ່ນມາ. ເຖິງຈະລຳບາກແບບນີ້ ແຕ່ຂ້ອຍກໍຄິດວ່າ ‘ມັນຄັກແທ້ໆ!’
ກຳລັງໄປເຂດປະກາດ
ເມື່ອຄິດຄືນຫຼັງ ຂ້ອຍຮູ້ສຶກຂອບໃຈພໍ່ແມ່ຫຼາຍແທ້ໆທີ່ໄດ້ພະຍາຍາມສຸດຄວາມສາມາດເພື່ອສອນຂ້ອຍເລື່ອງພະເຢໂຫວາ ແລະຍັງໄດ້ພະຍາຍາມຊ່ອຍຂ້ອຍຕອນທີ່ເປັນໄວລຸ້ນເຖິງວ່າຂ້ອຍຈະບໍ່ມັກຄວາມຈິງກໍຕາມ. ສິ່ງທີ່ຂຽນໄວ້ໃນສຸພາສິດ 22:6 ເປັນເລື່ອງຈິງໃນຊີວິດຂ້ອຍ. ພໍ່ແມ່ພູມໃຈຫຼາຍໃນໂຕຂ້ອຍກັບອາເລັກ ແລະມີຄວາມສຸກທີ່ໄດ້ເຫັນພວກເຮົາຮັບໃຊ້ພະເຢໂຫວາ. ຕັ້ງແຕ່ປີ 2016 ພວກເຮົາກໍໄດ້ເລີ່ມເຮັດວຽກເປັນຜູ້ດູແລໝວດໃນເຂດທີ່ສາຂາອັອດສະຕຣາເລເຊຍເບິ່ງແຍງ.
ໃຫ້ເດັກນ້ອຍຄົນຕີມໍເບິ່ງວິດີໂອແຈ໋ກກີ້ກັບໂຊເຟຍ
ຕອນນີ້ຂ້ອຍມັກວຽກປະກາດຫຼາຍແທ້ໆ! ເມື່ອຄິດຄືນຫຼັງ ຂ້ອຍບໍ່ຢາກເຊື່ອເລີຍວ່າເປັນຫຍັງຂ້ອຍຈຶ່ງບໍ່ມັກວຽກປະກາດ. ຕອນນີ້ຂ້ອຍເຂົ້າໃຈແລ້ວວ່າ ບໍ່ວ່າຊີວິດເຮົາຈະສຸກຫຼືທຸກ ແຕ່ຄວາມສຸກແທ້ກໍມາຈາກການຮັບໃຊ້ພະເຢໂຫວາຢ່າງເຕັມໃຈ. 18 ປີຜ່ານມາທີ່ໄດ້ຮັບໃຊ້ພະເຢໂຫວາກັບອາເລັກເປັນເວລາທີ່ມີຄວາມສຸກຫຼາຍທີ່ສຸດໃນຊີວິດ. ດັ່ງນັ້ນ ຂ້ອຍຈຶ່ງເຂົ້າໃຈສິ່ງທີ່ດາວິດເວົ້າກັບພະເຢໂຫວາທີ່ຢູ່ໃນຄຳເພງທີ່ວ່າ: “ທຸກຄົນທີ່ມາເພິ່ງພະເຢໂຫວາຈະມີຄວາມສຸກ ພວກເຂົາຈະຮ້ອງດີໃຈຕະຫຼອດເວລາ. . . . ແລະຄົນທີ່ຮັກຊື່ຂອງພະອົງຈະມີຄວາມສຸກ.”—ເພງ. 5:11, ລ.ມ.
ມີຄວາມສຸກທີ່ໄດ້ສຶກສາຄຳພີໄບເບິນໃຫ້ກັບຄົນທີ່ຖ່ອມໃຈ!
a ຕັ້ງແຕ່ປີ 1975 ປະເທດຕີມໍເລັດສະເຕໄດ້ເຮັດສົງຄາມຕໍ່ສູ້ເອົາເອກະລາດຫຼາຍກວ່າ 20 ປີ.
b ຊື່ສົມມຸດ.