ບົດ 120
ການປະຕິເສດໃນລານບ້ານ
ຫຼັງຈາກປະພະເຍຊູໄວ້ໃນສວນເຄດເຊມາເນແລ້ວໜີໄປດ້ວຍຄວາມຢ້ານພ້ອມກັບອັກຄະສາວົກຄົນອື່ນໆ ເປໂຕແລະໂຍຮັນກໍຢຸດໜີ. ບາງທີເຂົາອາດໄປທັນພະເຍຊູຕອນທີ່ພະອົງຖືກພາໄປທີ່ເຮືອນຂອງອັນນາ. ເມື່ອອັນນາສົ່ງພະອົງໄປຫາປະໂລຫິດໃຫຍ່ກາອີເຟ ເປໂຕກັບໂຍຮັນຕິດຕາມໄປໃນໄລຍະຫ່າງພໍສົມຄວນ ເຂົາເຈົ້າທຸກໃຈຫຼາຍຈາກຄວາມຢ້ານກົວກ່ຽວກັບຊີວິດຂອງຕົນເອງ ແລ້ວຍັງເປັນຫ່ວງທີ່ສຸດໃນສິ່ງທີ່ຈະເກີດຂຶ້ນກັບນາຍ.
ເມື່ອມາເຖິງທຳນຽບອັນກວ້າງຂວາງຂອງກາອີເຟ ໂຍຮັນເຂົ້າໄປໃນບໍລິເວນເຮືອນໄດ້ ເນື່ອງຈາກປະໂລຫິດໃຫຍ່ຮູ້ຈັກລາວ. ຢ່າງໃດກໍດີ ເປໂຕຖືກປະໃຫ້ຢືນຢູ່ນອກປະຕູ. ອີກບໍ່ດົນໂຍຮັນກັບມາເວົ້າກັບສາວໃຊ້ທີ່ເຝົ້າປະຕູແລະເປໂຕຈຶ່ງໄດ້ຮັບອະນຸຍາດໃຫ້ເຂົ້າໄປ.
ອາກາດຕອນນີ້ກຳລັງໜາວ ຄົນໃຊ້ແລະເຈົ້າໜ້າທີ່ຂອງປະໂລຫິດໃຫຍ່ໄດ້ດັງໄຟຂຶ້ນ. ເປໂຕຍ່າງເຂົ້າໄປຮ່ວມຝີງໄຟໃຫ້ອຸ່ນກາຍລະຫວ່າງຄອຍຖ້າຜົນພິຈາລະນາຄະດີຂອງພະເຍຊູ. ຢູ່ຫັ້ນ ແສງໄຟເຮັດໃຫ້ຄົນເຝົ້າປະຕູທີ່ຍອມໃຫ້ເປໂຕເຂົ້າໄປເຫັນລາວໄດ້ຊັດແຈ້ງຂຶ້ນ. ຈຶ່ງຮ້ອງຂຶ້ນວ່າ “ຝ່າຍທ່ານທັງມວນໄດ້ຢູ່ກັບພະເຍຊູ ຊາວຄາລິເລ.”
ເປໂຕຮ້ອນໃຈຫຼາຍຍ້ອນພວກນັ້ນຈື່ລາວໄດ້ ຈຶ່ງປະຕິເສດຕໍ່ໜ້າຄົນທັງໝົດທີ່ລາວເຄີຍຮູ້ຈັກພະເຍຊູ. ເຂົາກ່າວວ່າ “ສິ່ງອັນທີ່ເຈົ້າໄດ້ເວົ້ານັ້ນ ເຮົາກໍບໍ່ຮູ້ຈັກແລະບໍ່ເຂົ້າໃຈ.”
ຈາກນັ້ນ ເປໂຕຈຶ່ງອອກໄປໃກ້ປະຕູທາງອອກ. ທີ່ນັ້ນສາວໃຊ້ອີກຄົນໜຶ່ງສັງເກດເຫັນລາວ ຈຶ່ງໄດ້ເວົ້າກັບພວກທີ່ຢືນຢູ່ຂ້າງໆ ວ່າ “ທ່ານຜູ້ນີ້ທັງມວນໄດ້ຢູ່ກັບພະເຍຊູ ຊາວນາຊາເລດ.” ອີກເທື່ອໜຶ່ງເປໂຕໄດ້ປະຕິເສດ ໂດຍສາບານວ່າ “ເຮົາບໍ່ຮູ້ຈັກທ່ານຜູ້ນັ້ນ.”
ເປໂຕຍັງຢູ່ໃນລານບ້ານຕໍ່ໄປ ພະຍາຍາມທີ່ສຸດເພື່ອບໍ່ໃຫ້ເປັນທີ່ສັງເກດໄດ້. ຄົງຈະແມ່ນຕອນນີ້ແຫຼະລາວສະເດີດຕົກໃຈເນື່ອງຈາກສຽງໄກ່ຂັນຍາມຮຸ່ງເຊົ້າ. ໃນລະຫວ່າງນັ້ນ ການພິຈາລະນາຄະດີຂອງພະເຍຊູກຳລັງດຳເນີນຕໍ່ໄປ ຄືວ່າຈະດຳເນີນການໃນສ່ວນໜຶ່ງຂອງເຮືອນທີ່ຢູ່ເທິງລານນັ້ນ. ເປໂຕແລະຄົນອື່ນໆ ຄົງຄອຍຖ້າຢູ່ທາງລຸ່ມແລະຈະເຫັນເຂົາພາກັນເອົາພິຍານຫຼາຍຄົນປ່ຽນໜ້າກັນເຂົ້າໆ ອອກໆ ເພື່ອມາໃຫ້ການ.
ປະມານໜຶ່ງຊົ່ວໂມງຜ່ານໄປຕັ້ງແຕ່ເທື່ອສຸດທ້າຍທີ່ເຂົາຈື່ວ່າເປໂຕເປັນຜູ້ຕິດຕໍ່ຄົບຫາກັບພະເຍຊູ. ດຽວນີ້ຄົນເຫຼົ່ານັ້ນທີ່ຢືນຢູ່ຫັ້ນໄດ້ເຂົ້າມາຫາເປໂຕແລ້ວເວົ້າວ່າ “ຈິງແທ້ ທ່ານເປັນຜູ້ໜຶ່ງໃນພວກນັ້ນດ້ວຍ ເພາະວ່າຄວາມປາກຂອງທ່ານກໍໃຫ້ຮູ້ແຈ້ງແລ້ວ.” ຄົນໜຶ່ງໃນກຸ່ມເປັນພີ່ນ້ອງກັບມາລະໂຂທີ່ເປໂຕໄດ້ຟັນຫູຂອງລາວຂາດ. ລາວໄດ້ກ່າວວ່າ “ເຮົາບໍ່ເຫັນທ່ານໃນສວນກັບພະອົງຫຼື”?
ເປໂຕຢືນຢັນຢ່າງແຂງຂັນວ່າ “ເຮົາບໍ່ຮູ້ຈັກທ່ານຜູ້ນັ້ນ.” ທີ່ຈິງ ເປໂຕພະຍາຍາມເຮັດໃຫ້ພວກນັ້ນເຊື່ອວ່າພວກເຂົາເຂົ້າໃຈຜິດ ໂດຍສາບານວ່າຂໍໃຫ້ເຫດຮ້າຍຕົກໃສ່ຕົນຫາກເວົ້າບໍ່ຈິງ.
ຕອນເປໂຕປະຕິເສດເທື່ອທີສາມຢູ່ນັ້ນໄກ່ກໍພໍດີຂັນ. ຕອນນັ້ນແຫຼະ ພະເຍຊູເຊິ່ງອອກມາຢູ່ລະບຽງເທິງລານບ້ານຫຼຽວມາເບິ່ງລາວ. ທັນທີເປໂຕກໍນຶກເຖິງສິ່ງທີ່ພະເຍຊູກ່າວໄວ້ກ່ອນໜ້ານັ້ນສອງສາມຊົ່ວໂມງໃນຫ້ອງຊັ້ນເທິງທີ່ວ່າ “ກ່ອນໄກ່ຈະຂັນສອງເທື່ອ ທ່ານຈະປະຕິເສດເຮົາເຖິງສາມເທື່ອ.” (ປ.ມ.) ຄວາມຮູ້ສຳນຶກເຖິງບາບໜັກຂອງຕົນບີບຮັດໃຫ້ເປໂຕຕ້ອງອອກໄປຮ້ອງໄຫ້ຢ່າງຂົມຂື່ນຢູ່ທາງນອກພຸ້ນ.
ເຫດການນີ້ເກີດຂຶ້ນໄດ້ຢ່າງໃດ? ຫຼັງຈາກໝັ້ນໃຈຫຼາຍຕໍ່ຄວາມເຂັ້ມແຂງທາງຝ່າຍວິນຍານຂອງຕົນເປໂຕປະຕິເສດນາຍຕິດຕໍ່ກັນເຖິງສາມເທື່ອໃນໄລຍະໃກ້ໆ ກັນໄດ້ຢ່າງໃດ? ບໍ່ຕ້ອງສົງໄສວ່າສະພາບແວດລ້ອມໄດ້ເຮັດໃຫ້ເປໂຕຕົກຂຸມພາງໂດຍບໍ່ທັນຮູ້ຕົວ. ຄວາມຈິງຖືກບິດເບືອນ ແລະພະເຍຊູຖືກເຮັດໃຫ້ເບິ່ງຄືກັບອາດຊະຍາກອນທີ່ຕ່ຳຊ້າ. ສິ່ງທີ່ຖືກຕ້ອງເຮັດໃຫ້ເບິ່ງຄືວ່າຜິດໄປ ຄົນບໍລິສຸດຖືກເຮັດໃຫ້ເບິ່ງເປັນຄົນມີມົນທິນ. ດັ່ງນັ້ນ ເນື່ອງຈາກຄວາມກົດດັນໃນຕອນນັ້ນ ເປໂຕຂາດຄວາມດຸນດ່ຽງ. ຄວາມສຳນຶກອັນເໝາະສົມໃນເລື່ອງຄວາມຈົງຮັກພັກດີຂອງລາວຖືກທຳລາຍທັນທີ. ເຮັດໃຫ້ລາວທຸກໂສກແລ້ວກໍອ່ອນເພຍຍ້ອນຢ້ານໜ້າມະນຸດ. ຂໍຢ່າໃຫ້ເຫດການນັ້ນເກີດຂຶ້ນກັບເຮົາເລີຍ! ມັດທາຽ 26:57, 58, 69-75; ມາລະໂກ 14:30, 53, 54, 66-72; ລຶກາ 22:54-62; ໂຍຮັນ 18:15-18, 25-27.
▪ ເປໂຕແລະໂຍຮັນເຂົ້າໄປໃນລານບ້ານຂອງປະໂລຫິດໃຫຍ່ໄດ້ໂດຍວິທີໃດ?
▪ ຕອນທີ່ເປໂຕແລະໂຍຮັນຢູ່ໃນລານບ້ານ ມີສິ່ງໃດເກີດຂຶ້ນໃນເຮືອນ?
▪ ໄກ່ຂັນຈັກເທື່ອ ແລະເປໂຕປະຕິເສດພະເຍຊູຈັກເທື່ອ?
▪ ການທີ່ເປໂຕສາບານນັ້ນໝາຍຄວາມວ່າຢ່າງໃດ?
▪ ແມ່ນຫຍັງເຮັດໃຫ້ເປໂຕປະຕິເສດວ່າບໍ່ຮູ້ຈັກພະເຍຊູ?