ບົດສິບເຈັດ
ສະແດງຄວາມເຫຼື້ອມໃສຕໍ່ພະເຈົ້າຢູ່ໃນຄອບຄົວ
1. ການນຳເອົາພະຄຳຂອງພະເຈົ້າໄປໃຊ້ມີຜົນຕໍ່ຊີວິດສົມລົດຢ່າງໃດ?
ພະເຢໂຫວາເປັນຜູ້ກໍ່ຕັ້ງການສົມລົດ ແລະພະຄຳຂອງພະອົງເປັນແຫຼ່ງທີ່ໃຫ້ການຊີ້ນຳທີ່ດີທີ່ສຸດສຳລັບຄອບຄົວ. ຫຼາຍຄົນໄດ້ປະສົບຜົນສຳເລັດໃນຊີວິດຄູ່ຜົວເມຍໂດຍການນຳເອົາຄຳແນະນຳນັ້ນມາໃຊ້. ເປັນຕາຊົມເຊີຍ ບາງຄົນທີ່ພຽງແຕ່ຢູ່ກິນນຳກັນກໍໄດ້ຮັບການກະຕຸ້ນໃຫ້ຈົດທະບຽນການສົມລົດຢ່າງຖືກຕ້ອງຕາມກົດໝາຍ ແລະອີກຫຼາຍຄົນກໍເຊົາມີເພດສຳພັນນອກສາຍສົມລົດ. ແມ່ນແຕ່ຜູ້ຊາຍທີ່ມັກໃຊ້ຄວາມຮຸນແຮງຕໍ່ເມຍກັບລູກກໍໄດ້ຮຽນຮູ້ທີ່ຈະສະແດງຄວາມເມດຕາແລະຄວາມອ່ອນໂຍນ.
2. ໃນຊີວິດຄອບຄົວຂອງຄລິດສະຕຽນ ມີສິ່ງໃດກ່ຽວຂ້ອງຢູ່ນຳ?
2 ຊີວິດຄອບຄົວຂອງຄລິດສະຕຽນກ່ຽວຂ້ອງກັບຫຼາຍຢ່າງ ເຊັ່ນວ່າ ທັດສະນະຂອງເຮົາຕໍ່ຄວາມຜູກພັນແບບຖາວອນຂອງຊີວິດຄູ່ຜົວເມຍ, ສິ່ງທີ່ເຮົາທຳເພື່ອເອົາໃຈໃສ່ໜ້າທີ່ຮັບຜິດຊອບໃນຄອບຄົວ, ແລະວິທີທີ່ເຮົາປະຕິບັດຕໍ່ກັນແລະກັນລະຫວ່າງສະມາຊິກໃນຄອບຄົວ. (ເອເຟດ 5:33–6:4) ເຖິງແມ່ນວ່າເຮົາອາດຮູ້ສິ່ງທີ່ຄຳພີໄບເບິນກ່າວກ່ຽວກັບຊີວິດຄອບຄົວ ແຕ່ເຮົາຈະນຳເອົາຄຳແນະນຳນັ້ນໄປໃຊ້ຫຼືບໍ່ນັ້ນພັດເປັນອີກເລື່ອງໜຶ່ງ. ເຮົາຄົງບໍ່ຢາກເປັນຄືຄົນເຫຼົ່ານັ້ນທີ່ພະເຍຊູຕຳໜິ ເນື່ອງຈາກເຂົາເຈົ້າລະເມີດກົດໝາຍຂອງພະເຈົ້າ. ເຂົາເຈົ້າຈຶ່ງຫາເຫດຜົນແບບຜິດໆ ວ່າ ພຽງແຕ່ມີຄວາມເຫຼື້ອມໃສໃນສາສະໜາກໍພຽງພໍແລ້ວ. (ມັດທາຍ 15:4-9) ເຮົາຄົງບໍ່ຢາກເຮັດຄືວ່າມີຄວາມເຫຼື້ອມໃສຕໍ່ພະເຈົ້າ ແຕ່ບໍ່ໄດ້ສະແດງຄວາມເຫຼື້ອມໃສນັ້ນຢູ່ໃນຄອບຄົວຂອງຕົນເອງ. ແທນທີ່ຈະເປັນແນວນັ້ນ ເຮົາຄວນສະແດງຄວາມເຫຼື້ອມໃສໃນພະເຈົ້າຢ່າງແທ້ຈິງເຊິ່ງ “ເປັນປະໂຫຍດອັນໃຫຍ່.”—1 ຕີໂມເຕ 5:4; 6:6; 2 ຕີໂມເຕ 3:5.
ຊີວິດສົມລົດຈະໝັ້ນຍືນດົນປານໃດ?
3. (ກ) ມີຫຍັງເກີດຂຶ້ນກັບຄູ່ສົມລົດຫຼາຍຄູ່ ແຕ່ຄວາມຕັ້ງໃຈຂອງເຮົາຄວນຈະເປັນຢ່າງໃດ? (ຂ) ຈົ່ງໃຊ້ຄຳພີໄບເບິນເພື່ອຕອບຄຳຖາມທີ່ມີຢູ່ທາງລຸ່ມວັກນີ້.
3 ສາຍສຳພັນລະຫວ່າງຜົວເມຍເບິ່ງຄືວ່ານັບມື້ນັບຈະຖືກຕັດຂາດໄດ້ງ່າຍ. ຄູ່ຜົວເມຍບາງຄູ່ຢູ່ກິນນຳກັນເປັນເວລາຫຼາຍປີ ແຕ່ໃນທີ່ສຸດກໍໄດ້ຕັດສິນໃຈທີ່ຈະປະຮ້າງກັນແລ້ວໄປແຕ່ງດອງກັບຄົນໃໝ່. ນອກຈາກນັ້ນ ບໍ່ແມ່ນເລື່ອງຜິດປົກກະຕິອີກຕໍ່ໄປທີ່ໄດ້ຍິນວ່າຄູ່ຜົວເມຍໄວຫນຸ່ມແຍກທາງກັນພາຍຫຼັງແຕ່ງດອງໄດ້ບໍ່ດົນ. ບໍ່ວ່າຄົນອື່ນຈະເຮັດແນວໃດກໍຕາມ ເຮົາຄວນປາຖະໜາທີ່ຈະເຮັດໃຫ້ພະເຢໂຫວາພໍໃຈ. ສະນັ້ນ ຂໍໃຫ້ພິຈາລະນາຄຳຖາມແລະຂໍ້ພະຄຳພີຕໍ່ໄປນີ້ເພື່ອຈະເຂົ້າໃຈສິ່ງທີ່ພະຄຳຂອງພະເຈົ້າກ່າວກ່ຽວກັບຊີວິດສົມລົດແບບຖາວອນ.
ເມື່ອຊາຍຍິງແຕ່ງດອງກັນແລ້ວ ເຂົາເຈົ້າຄວນຄາດໝາຍວ່າຈະຢູ່ກິນນຳກັນດົນປານໃດ? (ມາລະໂກ 10:6-9; ໂລມ 7:2, 3)
ມູນເຫດພຽງຢ່າງດຽວທີ່ພະເຈົ້າຍອມຮັບສຳລັບການປະຮ້າງແລ້ວແຕ່ງດອງໃໝ່ໄດ້ນັ້ນຄືຫຍັງ? (ມັດທາຍ 5:31, 32; 19:3-9)
ກ່ຽວກັບການປະຮ້າງເຊິ່ງພະຄຳຂອງພະອົງບໍ່ອະນຸຍາດໃຫ້ເຮັດ ພະເຢໂຫວາຮູ້ສຶກແນວໃດ? (ມາລາກີ 2:13-16)
ຄຳພີໄບເບິນເຫັນດີວ່າການແຍກກັນເປັນວິທີແກ້ໄຂບັນຫາຊີວິດຄູ່ຜົວເມຍບໍ? (1 ໂກລິນໂທ 7:10-13)
ການແຍກກັນຢູ່ອາດເປັນສິ່ງທີ່ຍອມຮັບໄດ້ພາຍໃຕ້ສະພາບການແບບໃດ? (ຄຳເພງ 11:5; ລືກາ 4:8; 1 ຕີໂມເຕ 5:8)
4. ເປັນຫຍັງຄູ່ສົມລົດບາງຄູ່ຈຶ່ງຢູ່ນຳກັນຢ່າງໝັ້ນຄົງ?
4 ຄູ່ຜົວເມຍບາງຄູ່ຢູ່ກິນນຳກັນຢ່າງໝັ້ນຄົງໄດ້. ເປັນຍ້ອນຫຍັງ? ການເລື່ອນການແຕ່ງດອງອອກໄປຈົນກວ່າທັງສອງຝ່າຍເປັນຜູ້ໃຫຍ່ແມ່ນປັດໄຈສຳຄັນຢ່າງໜຶ່ງ ແຕ່ວ່າການຊອກຄູ່ຄອງທີ່ສົນໃຈສິ່ງຕ່າງໆ ຮ່ວມກັນແລະສາມາດເວົ້າເລື່ອງຕ່າງໆ ຢ່າງເປີດອົກເປີດໃຈກໍສຳຄັນເຊັ່ນກັນ. ເຖິງແນວນັ້ນກໍຕາມ ສິ່ງສຳຄັນຍິ່ງກວ່ານັ້ນອີກແມ່ນການເລືອກຄູ່ຄອງທີ່ຮັກພະເຢໂຫວາແລະເຊື່ອວ່າພະຄຳຂອງພະອົງເປັນແຫຼ່ງພື້ນຖານສຳລັບການແກ້ໄຂບັນຫາຕ່າງໆ. (ຄຳເພງ 119:97, 104; 2 ຕີໂມເຕ 3:16, 17) ຄົນແບບນັ້ນຈະບໍ່ມີທັດສະນະທີ່ວ່າ ຖ້າຢູ່ນຳກັນບໍ່ໄດ້ກໍຈະແຍກກັນຢູ່ຫຼືປະຮ້າງກັນ. ລາວຈະບໍ່ໃຊ້ຂໍ້ບົກພ່ອງຂອງຄູ່ຄອງມາເປັນຂໍ້ແກ້ຕົວເພື່ອຫຼີກລ້ຽງຄວາມຮັບຜິດຊອບຂອງຕົນເອງ. ແທນທີ່ຈະເປັນແນວນັ້ນ ລາວພ້ອມຈະປະເຊີນໜ້າກັບບັນຫາຕ່າງໆ ແລະຊອກຫາທາງແກ້ໄຂໃຫ້ໄດ້.
5. (ກ) ຄວາມພັກດີຕໍ່ພະເຢໂຫວາມີບົດບາດໃນຊີວິດສົມລົດຢ່າງໃດ? (ຂ) ເຖິງວ່າຈະປະສົບການຕໍ່ຕ້ານ ແຕ່ການທີ່ເຮົາຍຶດໝັ້ນກັບມາດຕະຖານຂອງພະເຢໂຫວາຈະເປັນປະໂຫຍດແນວໃດ?
5 ຊາຕານອ້າງວ່າເມື່ອເຮົາປະສົບຄວາມທຸກລຳບາກ ເຮົາກໍຈະປະຖິ້ມແນວທາງຂອງພະເຢໂຫວາ. (ໂຢບ 2:4, 5; ສຸພາສິດ 27:11) ເຖິງຢ່າງນັ້ນກໍຕາມ ພະຍານພະເຢໂຫວາສ່ວນຫຼາຍທີ່ປະສົບຄວາມຫຍຸ້ງຍາກເນື່ອງຈາກຖືກຄູ່ຄອງຂອງຕົນຕໍ່ຕ້ານກໍບໍ່ໄດ້ປະຖິ້ມຄຳສາບານທີ່ໄດ້ຕົກລົງກັນໃນຕອນແຕ່ງດອງ. ເຂົາເຈົ້າຍັງຮັກສາຄວາມພັກດີຕໍ່ພະເຢໂຫວາແລະຄຳສັ່ງຕ່າງໆ ຂອງພະອົງ. (ມັດທາຍ 5:37) ເຖິງແມ່ນວ່າໄດ້ຖືກຕໍ່ຕ້ານເປັນເວລາຫຼາຍປີກໍຕາມ ບາງຄົນທີ່ພາກພຽນອົດທົນກໍໄດ້ປະສົບຄວາມຍິນດີເມື່ອອີກຝ່າຍໜຶ່ງເຂົ້າມາຮ່ວມຮັບໃຊ້ພະເຢໂຫວານຳກັນ! (1 ເປໂຕ 3:1, 2) ສ່ວນຄລິດສະຕຽນທີ່ຄູ່ຄອງບໍ່ໄດ້ສະແດງທ່າທີວ່າຈະປ່ຽນແປງ ຫຼືຜູ້ທີ່ຖືກຄູ່ຄອງປະຖິ້ມເນື່ອງຈາກເຂົາເຈົ້າຮັບໃຊ້ພະເຢໂຫວາ ຄົນເຫຼົ່ານັ້ນກໍຮູ້ເຊັ່ນດຽວກັນວ່າເຂົາເຈົ້າຈະໄດ້ຮັບການອວຍພອນເນື່ອງຈາກໄດ້ສະແດງຄວາມເຫຼື້ອມໃສຕໍ່ພະເຈົ້າຢູ່ໃນຄອບຄົວ.—ຄຳເພງ 55:22; 145:16.
ແຕ່ລະຄົນເຮັດສ່ວນຂອງຕົນເອງ
6. ເພື່ອຊີວິດສົມລົດຈະປະສົບຜົນສຳເລັດໄດ້ ເຮົາຕ້ອງນັບຖືການຈັດຕຽມຫຍັງ?
6 ແນ່ນອນ ຊີວິດສົມລົດທີ່ປະສົບຜົນສຳເລັດຮຽກຮ້ອງຫຼາຍກວ່າການຢູ່ນຳກັນເທົ່ານັ້ນ. ຄວາມຈຳເປັນຂັ້ນພື້ນຖານຄື ແຕ່ລະຝ່າຍຕ້ອງເຄົາລົບການຈັດຕຽມຂອງພະເຢໂຫວາໃນເລື່ອງການເປັນປະມຸກ. ການເຮັດແບບນີ້ພາໃຫ້ມີຄວາມເປັນລະບຽບດີ ແລະມີຄວາມຮູ້ສຶກປອດໄພພາຍໃນຄອບຄົວ. ໃນ 1 ໂກລິນໂທ 11:3 ເຮົາອ່ານວ່າ “ພະຄລິດເປັນຫົວ [“ປະມຸກ,” ທ.ປ.] ຂອງຜູ້ຊາຍທຸກຄົນ ແລະຜູ້ຊາຍເປັນຫົວຂອງຜູ້ຍິງ ແລະຫົວຂອງພະຄລິດເປັນພະເຈົ້າ.”
7. ຄວນຈະໃຊ້ຄວາມເປັນປະມຸກໃນຄອບຄົວແນວໃດ?
7 ເຮົາສັງເກດເຫັນສິ່ງທຳອິດທີ່ຂໍ້ນີ້ກ່າວເຖິງບໍ? ແມ່ນແລ້ວ ຊາຍທຸກຄົນມີປະມຸກ ຄືພະຄລິດ ເຊິ່ງຜູ້ຊາຍຄວນຍອມຢູ່ໃຕ້ອຳນາດ. ນີ້ໝາຍຄວາມວ່າຜູ້ເປັນຜົວຄວນໃຊ້ຕຳແໜ່ງປະມຸກໃນແນວທາງທີ່ສະທ້ອນເຖິງຄຸນລັກສະນະຕ່າງໆ ຂອງພະເຍຊູ. ພະຄລິດຍອມຢູ່ໃຕ້ອຳນາດຊີ້ນຳຂອງພະເຢໂຫວາ, ຮັກປະຊາຄົມຢ່າງເລິກເຊິ່ງ, ແລະຍັງເອົາໃຈໃສ່ເບິ່ງແຍງປະຊາຄົມນຳອີກ. (1 ຕີໂມເຕ 3:15) ພະເຍຊູເຮັດເຖິງຂັ້ນ “ສະລະຊີວິດຂອງພະອົງເພື່ອ [ປະຊາຄົມ].” ແທນທີ່ຈະຍິ່ງທະນົງແລະຂາດການຄຳນຶງເຖິງຄົນອື່ນ ພະເຍຊູ “ມີໃຈອ່ອນຫວານແລະຖ່ອມໃຈລົງ.” ຄົນເຫຼົ່ານັ້ນທີ່ເຂົ້າມາຢູ່ພາຍໃຕ້ການຊີ້ນຳຂອງພະອົງໃນຖານະປະມຸກຈະ “ພົບຄວາມເຊົາເມື່ອຍໃນຈິດໃຈ.” ເມື່ອຜູ້ເປັນຜົວປະຕິບັດກັບຄອບຄົວຂອງຕົນແບບນີ້ ລາວສະແດງວ່າລາວຍອມຢູ່ພາຍໃຕ້ການຊີ້ນຳຂອງພະຄລິດ. ໂດຍວິທີນັ້ນ ເມຍທີ່ເປັນຄລິດສະຕຽນຈະເຫັນວ່າການຮ່ວມມືກັບຜົວແລະການຢູ່ໃຕ້ການຊີ້ນຳຂອງຜົວທີ່ເປັນຫົວໜ້າຄອບຄົວ ເປັນປະໂຫຍດແລະກໍ່ຄວາມສົດຊື່ນໃຈ.—ເອເຟດ 5:25-33, ທ.ປ.; ມັດທາຍ 11:28, 29; ສຸພາສິດ 31:10, 28.
8. (ກ) ດ້ວຍເຫດໃດວິທີການຂອງຄລິດສະຕຽນອາດເບິ່ງຄືວ່າໃຊ້ບໍ່ໄດ້ຜົນຕາມທີ່ຕ້ອງການກັບບາງຄອບຄົວ? (ຂ) ເມື່ອປະເຊີນກັບສະຖານະການແບບນັ້ນ ເຮົາຄວນຈະເຮັດແນວໃດ?
8 ແນວໃດກໍຕາມ ບັນຫາຕ່າງໆ ຍັງຈະເກີດຂຶ້ນ. ເນື່ອງຈາກການສະແດງຄວາມບໍ່ພໍໃຈໜ້ອຍໜຶ່ງເມື່ອໄດ້ຮັບຄຳແນະນຳອາດກາຍເປັນນິດໄສເປັນເວລາດົນແລ້ວກ່ອນທີ່ຜູ້ໃດຜູ້ໜຶ່ງໃນຄອບຄົວເລີ່ມໃຊ້ຫຼັກການໃນຄຳພີໄບເບິນ. ບາງຄັ້ງຄຳຂໍຮ້ອງທີ່ສຸພາບແລະທ່າທີທີ່ປ່ຽມດ້ວຍຄວາມຮັກອາດເບິ່ງຄືວ່າບໍ່ໄດ້ເກີດຜົນ. ເຮົາຮູ້ວ່າຄຳພີໄບເບິນບອກໃຫ້ກຳຈັດ “ຄວາມຮ້າຍແລະການຮ້ອງຖຽງກັນແລະຄວາມປ້ອຍດ່າ” (ເອເຟດ 4:31) ແຕ່ຖ້າບາງຄົນເບິ່ງຄືວ່າຈະບໍ່ລົງມືປະຕິບັດເມື່ອມີການແນະນຳແບບສຸພາບ ເຮົາຄວນຈະເຮັດຢ່າງໃດ? ພະເຍຊູບໍ່ໄດ້ຮຽນແບບຄົນທີ່ມັກຂົ່ມຂູ່ແລະກ່າວຄຳຊົ່ວ ແຕ່ພະອົງໄວ້ວາງໃຈໃນພະບິດາ. (1 ເປໂຕ 2:22, 23) ເມື່ອສະຖານະການທີ່ສ້າງຄວາມເຄັ່ງຕຶງເກີດຂຶ້ນໃນຄອບຄົວ ຈົ່ງສະແດງຄວາມເຫຼື້ອມໃສຕໍ່ພະເຈົ້າໂດຍການອະທິດຖານເຖິງພະເຢໂຫວາເພື່ອຂໍຄວາມຊ່ວຍເຫຼືອຈາກພະອົງ ແທນທີ່ຈະນຳເອົາແນວທາງຂອງໂລກມາໃຊ້.—ສຸພາສິດ 3:5-7.
9. ແທນທີ່ຈະຊອກຈັບຜິດກັນ ຜົວທີ່ເປັນຄລິດສະຕຽນຫຼາຍຄົນໄດ້ຮຽນຮູ້ທີ່ຈະເຮັດແນວໃດ?
9 ການປ່ຽນແປງບໍ່ໄດ້ເກີດຂຶ້ນແບບວ່ອງໄວສະເໝີໄປ ແຕ່ຄຳແນະນຳໃນຄຳພີໄບເບິນເກີດຜົນແທ້ໆ ຖ້າໃຊ້ຄຳແນະນຳນັ້ນຢ່າງພາກພຽນແລະອົດທົນ. ຜູ້ເປັນຜົວຫຼາຍຄົນພົບວ່າຊີວິດສົມລົດເລີ່ມດີຂຶ້ນເມື່ອເຂົາເຈົ້າໄດ້ເຂົ້າໃຈວິທີທີ່ພະເຍຊູປະຕິບັດກັບປະຊາຄົມ. ປະຊາຄົມບໍ່ໄດ້ປະກອບດ້ວຍມະນຸດທີ່ສົມບູນ ແຕ່ພະເຍຊູຮັກປະຊາຄົມ, ວາງຕົວຢ່າງອັນຖືກຕ້ອງໃຫ້ກັບປະຊາຄົມ, ແລະໃຊ້ຫຼັກການໃນພະຄຳພີເພື່ອຊ່ວຍປັບປຸງແກ້ໄຂປະຊາຄົມ. ພະອົງເຮັດເຖິງຂັ້ນສະລະຊີວິດຕົນເອງເພື່ອປະຊາຄົມ. (1 ເປໂຕ 2:21) ຕົວຢ່າງຂອງພະອົງຫນູນໃຈຜົວທີ່ເປັນຄລິດສະຕຽນຫຼາຍຄົນໃຫ້ເປັນປະມຸກຄອບຄົວທີ່ດີແລະໃຫ້ຄວາມຊ່ວຍເຫຼືອທີ່ປ່ຽມດ້ວຍຄວາມຮັກເພື່ອເຮັດໃຫ້ຊີວິດຄອບຄົວດີຂຶ້ນ. ວິທີດັ່ງກ່າວນີ້ສ້າງຜົນດີຫຼາຍກວ່າການຈັບຜິດກັນຫຼືບໍ່ຍອມລົມກັນ.
10. (ກ) ໃນທາງໃດແດ່ທີ່ຜົວຫຼືເມຍເຊິ່ງອ້າງວ່າເປັນຄລິດສະຕຽນອາດເຮັດໃຫ້ຄົນອື່ນໃນຄອບຄົວຫຍຸ້ງຍາກ? (ຂ) ອາດຈະເຮັດແນວໃດເພື່ອແກ້ໄຂສະຖານະການໃຫ້ດີຂຶ້ນ?
10 ຈະເປັນແນວໃດຖ້າຜົວບໍ່ໄດ້ສຳນຶກເຖິງຄວາມຈຳເປັນທາງດ້ານອາລົມຂອງສະມາຊິກຄອບຄົວຕົນເອງ ຫຼືບໍ່ໄດ້ເປັນຜູ້ເລີ່ມຕົ້ນຈັດຕຽມການພິຈາລະນາຄຳພີໄບເບິນກັບຄອບຄົວແລະກິດຈະກຳຢ່າງອື່ນ? ຫຼືຈະເປັນແນວໃດຖ້າເມຍບໍ່ຮ່ວມມືແລະບໍ່ຍອມຢູ່ໃຕ້ຫຼັກການຂອງພະເຈົ້າ? ບາງຄອບຄົວທີ່ມີການພິຈາລະນາບັນຫາຕ່າງໆ ນຳກັນດ້ວຍຄວາມນັບຖື ໄດ້ຮັບຜົນທີ່ດີ. (ຕົ້ນເດີມ 21:10-12; ສຸພາສິດ 15:22) ເຖິງແມ່ນວ່າຜົນອາດຈະບໍ່ເປັນຕາມທີ່ຫວັງເອົາໄວ້ທັງໝົດກໍຕາມ ເຮົາແຕ່ລະຄົນສາມາດສ້າງບັນຍາກາດໃນຄອບຄົວໃຫ້ດີຂຶ້ນໂດຍການສະແດງຜົນແຫ່ງພະວິນຍານຂອງພະເຈົ້າໃນຊີວິດຂອງເຮົາ ແລະໂດຍການຄຳນຶງເຖິງສະມາຊິກຄົນອື່ນໆ ໃນຄອບຄົວດ້ວຍຄວາມຮັກ. (ຄາລາຊີ 5:22, 23) ຈະມີຄວາມກ້າວໜ້າໃນຄອບຄົວ ບໍ່ແມ່ນລໍຖ້າໃຫ້ຄົນອື່ນເຮັດບາງສິ່ງກ່ອນ ແຕ່ໂດຍການເຮັດສ່ວນຂອງຕົນເອງ. ການທີ່ເຮົາເຮັດແນວນັ້ນກໍໝາຍຄວາມວ່າເຮົາກຳລັງສະແດງຄວາມເຫຼື້ອມໃສຕໍ່ພະເຈົ້າ.—ໂກໂລດ 3:18-21.
ແຫຼ່ງທີ່ຈະໄດ້ຄຳຕອບ
11, 12. ພະເຢໂຫວາໄດ້ຈັດຕຽມສິ່ງໃດເພື່ອຊ່ວຍເຮົາໃຫ້ມີຊີວິດຄອບຄົວທີ່ປະສົບຜົນສຳເລັດ?
11 ຄົນເຮົາສາມາດໄດ້ຮັບຄຳແນະນຳກ່ຽວກັບເລື່ອງຄອບຄົວຈາກຫຼາຍໆ ແຫຼ່ງ. ແຕ່ວ່າ ເຮົາຮູ້ວ່າພະຄຳຂອງພະເຈົ້າມີຄຳແນະນຳດີທີ່ສຸດ ແລະເຮົາກໍຮູ້ສຶກບຸນຄຸນວ່າໂດຍທາງອົງການຂອງພະອົງທີ່ເຫັນໄດ້ ພະເຈົ້າຊ່ວຍເຮົາໃຫ້ປະຕິບັດຕາມຄຳແນະນຳນັ້ນ. ເຮົາກຳລັງສວຍເອົາປະໂຫຍດຈາກການຊ່ວຍເຫຼືອນັ້ນຢ່າງເຕັມທີບໍ?—ຄຳເພງ 119:129, 130; ມີເກ 4:2.
12 ນອກຈາກການເຂົ້າຮ່ວມການປະຊຸມປະຈຳປະຊາຄົມແລ້ວ ເຮົາໄດ້ຈັດເວລາໄວ້ເພື່ອສຶກສາຄຳພີໄບເບິນກັບຄອບຄົວເປັນປະຈຳບໍ? ຄອບຄົວທີ່ເຮັດແບບນັ້ນໄດ້ມຸ່ງໜ້າໄປສູ່ຄວາມເປັນນ້ຳໜຶ່ງໃຈດຽວກັນໃນການນະມັດສະການ. ຊີວິດຄອບຄົວຂອງເຂົາເຈົ້າດີຂຶ້ນເມື່ອເຂົາເຈົ້ານຳເອົາພະຄຳຂອງພະເຈົ້າໄປໃຊ້ກັບສະພາບການຂອງຕົນເອງ.—ພະບັນຍັດ 11:18-21.
13. (ກ) ຖ້າເຮົາມີບັນຫາຕ່າງໆ ກ່ຽວກັບເລື່ອງຊີວິດຄອບຄົວ ຫຼາຍເທື່ອເຮົາຈະໄດ້ຮັບຄວາມຊ່ວຍເຫຼືອທີ່ຈຳເປັນຈາກແຫຼ່ງໃດ? (ຂ) ການຕັດສິນໃຈທຸກຢ່າງທີ່ເຮົາເຮັດຄວນຈະສະທ້ອນເຖິງສິ່ງໃດ?
13 ເຮົາອາດມີຂໍ້ຂ້ອງໃຈຕ່າງໆ ກ່ຽວກັບເລື່ອງຄອບຄົວ. ຕົວຢ່າງເຊັ່ນ ກ່ຽວກັບເລື່ອງການຄຸມກຳເນີດເດ? ມີກໍລະນີໃດບໍທີ່ການເອົາລູກອອກສົມຄວນ? ຖ້າລູກຜູ້ໜຶ່ງສະແດງຄວາມສົນໃຈໃນເລື່ອງຝ່າຍວິນຍານພຽງແຕ່ໜ້ອຍດຽວ ຄວນຮຽກຮ້ອງໃຫ້ລາວມີສ່ວນຮ່ວມໃນການນະມັດສະການກັບຄອບຄົວຫຼາຍປານໃດ? ບັນຫາຕ່າງໆ ແບບນີ້ມີການພິຈາລະນາໃນໜັງສືຕ່າງໆ ເຊິ່ງຈັດພິມໂດຍພະຍານພະເຢໂຫວາ. ຈົ່ງຮຽນຮູ້ທີ່ຈະໃຊ້ຄູ່ມືກ່ຽວກັບການສຶກສາຄຳພີໄບເບິນເຊິ່ງລວມເຖິງດັດຊະນີໜັງສືຕ່າງໆ ເພື່ອຊອກຫາຄຳຕອບ. ຖ້າບໍ່ມີໜັງສືທີ່ອ້າງເຖິງໃນດັດຊະນີ ກໍໃຫ້ຊອກເບິ່ງຢູ່ຫ້ອງສະຫມຸດຂອງຫໍປະຊຸມລາຊະອານາຈັກ. ຫຼືເຮົາອາດຈະໄດ້ຂໍ້ມູນຈາກໜັງສືເຫຼົ່ານັ້ນໂດຍໃຊ້ລະບົບຄອມພິວເຕີ. ນອກຈາກນັ້ນ ເຮົາຍັງສາມາດພິຈາລະນາບັນຫາຕ່າງໆ ນີ້ກັບຄລິດສະຕຽນຊາຍຍິງທີ່ອາວຸໂສ. ແນວໃດກໍຕາມ ເຮົາບໍ່ຄວນຄາດຫວັງຄຳຕອບວ່າ ອັນນີ້ແມ່ນຫຼືອັນນັ້ນບໍ່ແມ່ນ ສຳລັບຄຳຖາມທຸກໆ ຂໍ້ສະເໝີໄປ. ຫຼາຍເທື່ອເຮົາເອງ ຕ້ອງເປັນຜູ້ຕັດສິນເລື່ອງຕ່າງໆ ບໍ່ວ່າໃນຖານະເປັນສ່ວນບຸກຄົນຫຼືໃນຖານະເປັນຄູ່ສົມລົດ. ເມື່ອເປັນຢ່າງນັ້ນ ເຮົາຄວນຈະເຮັດການຕັດສິນໃຈທີ່ສະແດງວ່າເຮົາມີຄວາມເຫຼື້ອມໃສໃນພະເຈົ້າບໍ່ພຽງແຕ່ຕໍ່ໜ້າສາທາລະນະເທົ່ານັ້ນ ແຕ່ຢູ່ພາຍໃນຄອບຄົວຂອງເຮົາກໍເຊັ່ນດຽວກັນ.—ໂລມ 14:19; ເອເຟດ 5:10.
ການພິຈາລະນາທົບທວນ
• ຄວາມພັກດີຕໍ່ພະເຢໂຫວາກ່ຽວຂ້ອງຢ່າງໃດກັບຄວາມສັດຊື່ຕໍ່ຄູ່ສົມລົດ?
• ເມື່ອຢູ່ພາຍໃຕ້ຄວາມກົດດັນຍ້ອນບັນຫາຄອບຄົວ ອັນໃດຈະຊ່ວຍເຮົາໃຫ້ເຮັດໃນສິ່ງທີ່ພະເຈົ້າພໍໃຈ?
• ເຖິງແມ່ນວ່າບາງຄົນໃນຄອບຄົວມີຂໍ້ບົກພ່ອງ ເຮົາສາມາດເຮັດສິ່ງໃດເພື່ອໃຫ້ສະຖານະການດີຂຶ້ນໄດ້?
[ຮູບພາບໜ້າ 155]
ຄວາມເປັນປະມຸກຂອງຜົວຄວນສະທ້ອນເຖິງຄຸນລັກສະນະຕ່າງໆ ຂອງພະເຍຊູ
[ຮູບພາບໜ້າ 157]
ການສຶກສາຄຳພີໄບເບິນກັບຄອບຄົວເປັນປະຈຳ ຊ່ວຍເຮັດໃຫ້ຄອບຄົວມີຄວາມເປັນນ້ຳໜຶ່ງໃຈດຽວກັນ