ຕອນທີ 4
ວິທີໃຊ້ວິທີປະຢັດເງິນ
“ການທັງຫຼາຍກໍຕັ້ງໝັ້ນຄົງຢູ່ [ສຳເລັດ] ດ້ວຍການປຶກສາກັນ.”—ສຸພາສິດ 20:18
ເຮົາທຸກຄົນຕ້ອງມີເງິນເພື່ອຈະມີສິ່ງທີ່ຈຳເປັນສຳລັບຄອບຄົວ. (ສຸພາສິດ 30:8) ນອກຈາກນັ້ນ ‘ເງິນຍັງໃຫ້ການປົກປ້ອງ.’ (ຜູ້ເທສະໜາປ່າວປະກາດ 7:12) ການທີ່ຜົວແລະເມຍຈະເວົ້າເລື່ອງເງິນນຳກັນກໍບໍ່ແມ່ນເລື່ອງງ່າຍ ແຕ່ຢ່າຍອມໃຫ້ເງິນສ້າງບັນຫາໃນຊີວິດຄູ່ຂອງທ່ານ. (ເອເຟດ 4:32) ເມື່ອຜົວແລະເມຍຕ້ອງຕັດສິນໃຈໃນເລື່ອງການໃຊ້ຈ່າຍເງິນ ທັງສອງຄວນຈະຮ່ວມມືແລະໄວ້ວາງໃຈກັນ.
1 ວາງແຜນຢ່າງຮອບຄອບ
ຄຳພີໄບເບິນແນະນຳວ່າ: “ຖ້າຜູ້ໃດຢາກກໍ່ສ້າງປ້ອມ ຜູ້ນັ້ນຈະບໍ່ນັ່ງລົງກ່ອນແລະຄຶດລາຄາແລະນັບເບິ່ງວ່າຈະມີເຂົ້າຂອງພໍໄດ້ກະທຳໃຫ້ສຸດແລ້ວຫຼື?” (ລືກາ 14:28) ດັ່ງນັ້ນ ສຳຄັນຫຼາຍທີ່ພວກທ່ານຕ້ອງວາງແຜນນຳກັນກ່ຽວກັບການໃຊ້ຈ່າຍເງິນ. (ອາໂມດ 3:3) ໃຫ້ທ່ານຕັດສິນໃຈວ່າສິ່ງໃດຈຳເປັນຕ້ອງຊື້ແລະຕ້ອງໃຊ້ເງິນຫຼາຍປານໃດ. (ສຸພາສິດ 31:16) ບໍ່ແມ່ນວ່າມີເງິນພໍທີ່ຈະຊື້ໄດ້ ແລ້ວກໍຊື້ໂລດ. ຄວນໃຊ້ຈ່າຍເງິນຕາມທີ່ມີຢູ່ນັ້ນ ແລະໃຫ້ຫຼີກລ່ຽງການເປັນໜີ້.—ສຸພາສິດ 21:5; 22:7
ຄຳແນະນຳ:
ຖ້າທ່ານມີເງິນເຫຼືອໃນຕອນທ້າຍຂອງເດືອນ ໃຫ້ຕັດສິນໃຈນຳກັນວ່າຈະເຮັດຫຍັງກັບເງິນນັ້ນ
ຖ້າທ່ານຈ່າຍເງິນເກີນງົບທີ່ຕັ້ງໄວ້ ໃຫ້ວາງແຜນຢ່າງຄັກແນ່ເພື່ອຫຼຸດຜ່ອນການໃຊ້ຈ່າຍລົງ. ເຊັ່ນວ່າ ທ່ານສາມາດແຕ່ງກິນເອງແທນທີ່ຈະໄປຊື້ຂອງກິນສຸກຫຼືໄປກິນຢູ່ຮ້ານອາຫານ
2 ສັດຊື່ແລະເບິ່ງຕາມຕົວຈິງ
ຄຳພີໄບເບິນແນະນຳວ່າ: ໃຫ້ “ຊອກຫາສິ່ງທີ່ສັດຊື່ຕໍ່ໜ້າພະອົງເຈົ້າ [ພະເຢໂຫວາ] ບໍ່ໃຊ່ເທົ່ານັ້ນແຕ່ວ່າຕໍ່ໜ້າຄົນທັງປວງດ້ວຍ.” (2 ໂກລິນໂທ 8:21) ທ່ານຄວນສັດຊື່ຕໍ່ຄູ່ຂອງທ່ານໃນເລື່ອງລາຍຮັບລາຍຈ່າຍຂອງທ່ານ.
ໃຫ້ປຶກສາຫາລືກັບຄູ່ຂອງທ່ານເມື່ອຕ້ອງຕັດສິນໃຈເລື່ອງໃຫຍ່ໆທາງການເງິນ. (ສຸພາສິດ 13:10) ການປຶກສາກັນກ່ອນໃນເລື່ອງເງິນຈະຊ່ວຍຫຼີກລ່ຽງການຜິດຖຽງກັນໄດ້. ໃຫ້ຄິດວ່າລາຍຮັບທີ່ທ່ານຫາມາໄດ້ນັ້ນບໍ່ແມ່ນເງິນສ່ວນຕົວ ແຕ່ແມ່ນເງິນຂອງຄອບຄົວ.—1 ຕີໂມເຕ 5:8
ຄຳແນະນຳ:
ໃຫ້ຕົກລົງກັນໃນເລື່ອງຈຳນວນເງິນທີ່ແຕ່ລະຄົນສາມາດຈ່າຍໄດ້ໂດຍທີ່ບໍ່ຕ້ອງຖາມກັນກ່ອນ
ບໍ່ຄວນລໍຖ້າໃຫ້ບັນຫາເກີດຂຶ້ນກ່ອນ ແລ້ວຈຶ່ງລົມກັນເລື່ອງເງິນ