ບົດທີ 3
ອາດາມກັບເອວາບໍ່ເຊື່ອຟັງພະເຈົ້າ
ມີມື້ໜຶ່ງຕອນທີ່ເອວາຢູ່ຄົນດຽວ ງູໂຕໜຶ່ງໄດ້ມາເວົ້າກັບລາວ. ມັນຖາມລາວວ່າ: ‘ແມ່ນແທ້ບໍທີ່ພະເຈົ້າຫ້າມພວກເຈົ້າບໍ່ໃຫ້ກິນໝາກໄມ້ທຸກຕົ້ນໃນສວນນີ້?’ ເອວາຕອບວ່າ: ‘ພວກເຮົາກິນໝາກໄມ້ໃນສວນນີ້ໄດ້ທຸກຕົ້ນ ຍົກເວັ້ນຕົ້ນດຽວ. ຖ້າພວກເຮົາກິນ ພວກເຮົາຈະຕາຍ.’ ແລ້ວງູກໍບອກລາວວ່າ: ‘ພວກເຈົ້າຊິບໍ່ຕາຍດອກ. ທີ່ຈິງ ຖ້າພວກເຈົ້າກິນໝາກໄມ້ຈາກຕົ້ນນັ້ນ ພວກເຈົ້າຊິເປັນຄືກັບພະເຈົ້າ.’ ແຕ່ນັ້ນແມ່ນຄວາມຈິງບໍ? ບໍ່ແມ່ນ. ງູໄດ້ຕົວະເອວາ ແຕ່ເອວາກໍເຊື່ອມັນ. ເອວາເບິ່ງໝາກໄມ້ນັ້ນຕະຫຼອດ. ແຮ່ງລາວເບິ່ງ ລາວກໍແຮ່ງຢາກກິນ. ສຸດທ້າຍລາວກໍກິນແລະເອົາໃຫ້ອາດາມກິນນຳ. ອາດາມຮູ້ດີວ່າຖ້າບໍ່ເຊື່ອຟັງພະເຈົ້າ ເຂົາເຈົ້າຈະຕາຍ ແຕ່ລາວກໍຍັງເລືອກທີ່ຈະກິນໝາກໄມ້ນັ້ນ.
ຕອນແລງຂອງມື້ນັ້ນ ພະເຢໂຫວາກໍມາເວົ້າກັບອາດາມແລະເອວາ. ເພິ່ນຖາມເຂົາເຈົ້າວ່າເປັນຫຍັງເຂົາເຈົ້າບໍ່ເຊື່ອຟັງເພິ່ນ. ເອວາໄດ້ໂທດງູ ສ່ວນອາດາມກໍໂທດເອວາ. ຍ້ອນອາດາມກັບເອວາບໍ່ເຊື່ອຟັງພະເຢໂຫວາ ເພິ່ນຈຶ່ງໄລ່ເຂົາເຈົ້າອອກຈາກສວນເອເດັນ. ແລ້ວພະເຢໂຫວາກໍໃຫ້ມີທູດສະຫວັນເຝົ້າທາງເຂົ້າສວນໄວ້ແລະໃຫ້ມີດາບໄຟໝູນຢູ່ ເພື່ອບໍ່ໃຫ້ອາດາມກັບເອວາເຂົ້າໄປໃນສວນໄດ້ອີກ.
ພະເຢໂຫວາບອກວ່າຜູ້ທີ່ຕົວະເອວາກໍຈະຖືກລົງໂທດຄືກັນ. ທີ່ຈິງຜູ້ທີ່ເວົ້າກັບເອວາບໍ່ແມ່ນງູ ຍ້ອນພະເຢໂຫວາບໍ່ໄດ້ສ້າງງູໃຫ້ເວົ້າໄດ້. ຜູ້ທີ່ເຮັດໃຫ້ງູເວົ້າໄດ້ແມ່ນຊາຕານແລະມັນກໍຕັ້ງໃຈຕົວະເອວາ. ທູດສະຫວັນອົງນີ້ຖືກເອີ້ນວ່າມານຮ້າຍແລະຊາຕານ. ໃນອະນາຄົດພະເຢໂຫວາຈະທຳລາຍມັນ ເພື່ອຈະບໍ່ໃຫ້ມັນໄປຕົວະໃຜໃຫ້ເຮັດຊົ່ວໄດ້ອີກ.
“ມານຮ້າຍ . . . ເປັນຜູ້ຂ້າຄົນຕັ້ງແຕ່ຕອນເລີ່ມຕົ້ນ ແລະມັນບໍ່ໄດ້ຍຶດໝັ້ນໃນຄວາມຈິງ ຍ້ອນມັນບໍ່ມີຄວາມຈິງ.”—ໂຢຮັນ 8:44