ບົດ​ຮຽນ​ສຳລັບ​ເຮົາ​ຈາກ​ສິ່ງ​ທີ່​ຢາໂຄບ​ເວົ້າ​ກ່ອນ​ຈະ​ຕາຍ—ຕອນ​ທີ 1

1-2. ຢາໂຄບ​ເຮັດ​ຫຍັງ​ກ່ອນ​ທີ່​ລາວ​ຈະ​ຕາຍ ແລະ​ຍ້ອນຫຍັງ​ລາວ​ຈຶ່ງ​ເຮັດ​ແບບ​ນັ້ນ? (ເບິ່ງ​ຮູບ​ໜ້າ​ປົກ​ນຳ)

ຕອນ​ທີ່​ຢາໂຄບ​ເຖົ້າ​ຫຼາຍ​ແລ້ວ ລາວ​ກັບ​ຄອບຄົວ​ເດີນທາງ​ຈາກ​ການາອານ​ໄປ​ເອຢິບ. ຕອນ​ທີ່​ຢູ່​ເອຢິບ ລາວ​ກໍ​ຍັງ​ຮັບໃຊ້​ພະ​ເຢໂຫວາ​ຢ່າງ​ສັດຊື່​ຕໍ່ໆ​ໄປ​ເປັນ​ເວລາ 17 ປີ. (ປຖກ. 47:28) ຢາໂຄບ​ດີ​ໃຈ​ຫຼາຍ​ທີ່​ໄດ້​ເຫັນ​ໂຢເຊັບ​ອີກ​ຍ້ອນ​ລາວ​ຄິດ​ວ່າ​ໂຢເຊັບ​ຕາຍ​ແລ້ວ. ໃນ​ທີ່​ສຸດ ຢາໂຄບ​ກັບ​ພວກ​ລູກ​ຂອງ​ລາວ​ກໍ​ໄດ້​ມາ​ຢູ່​ນຳ​ກັນ​ອີກ​ເທື່ອ​ໜຶ່ງ. ຢາໂຄບ​ຮູ້​ວ່າ​ອີກ​ບໍ່​ດົນ​ລາວ​ຈະ​ຕາຍ ລາວ​ຈຶ່ງ​ບອກ​ລູກ​ຊາຍ​ທຸກ​ຄົນ​ໃຫ້​ມາ​ຫາ​ຍ້ອນ​ລາວ​ມີ​ເລື່ອງ​ສຳຄັນ​ທີ່​ຈະ​ບອກ​ເຂົາເຈົ້າ.—ປຖກ. 49:28

² ໃນ​ສະໄໝ​ນັ້ນ​ເປັນ​ເລື່ອງ​ປົກກະຕິ​ທີ່​ຫົວໜ້າ​ຄອບຄົວ​ທີ່​ກຳລັງ​ຈະ​ຕາຍ​ຈະ​ເອີ້ນ​ຄົນ​ໃນ​ຄອບຄົວ​ໃຫ້​ມາ​ຢູ່​ລວມ​ກັນ​ເພື່ອ​ຈະ​ສັ່ງ​ລາ​ເຂົາເຈົ້າ. (ອຊຢ. 38:1) ໃນ​ຕອນ​ນັ້ນ ລາວ​ຈະ​ບອກ​ວ່າ​ໃຜ​ຈະ​ເປັນ​ຫົວໜ້າ​ຄອບຄົວ​ຫຼັງ​ຈາກ​ທີ່​ລາວ​ຕາຍ​ແລ້ວ.

3. ຕາມ​ປະຖົມມະການ 49:1, 2 ເປັນ​ຫຍັງ​ຄຳເວົ້າ​ຂອງ​ຢາໂຄບ​ຈຶ່ງ​ມີ​ຄວາມ​ໝາຍ​ເປັນ​ພິເສດ?

³ ອ່ານ​ປະຖົມມະການ 49:1, 2. ການ​ທີ່​ພວກ​ລູກ​ຊາຍ​ຂອງ​ຢາໂຄບ​ມາ​ຢູ່​ລວມ​ກັນ​ເທື່ອ​ນີ້​ບໍ່​ແມ່ນ​ການ​ສັ່ງ​ລາ​ທຳມະດາ ຍ້ອນ​ຢາໂຄບ​ເວົ້າ​ກ່ຽວກັບ​ສິ່ງ​ທີ່​ຈະ​ເກີດຂຶ້ນ​ກັບ​ເຂົາເຈົ້າ​ໃນ​ອະນາຄົດ. ໃນ​ຕອນ​ນັ້ນ ພະ​ເຢໂຫວາ​ໄດ້​ດົນໃຈ​ຢາໂຄບ​ໃຫ້​ບອກ​ພວກ​ລູກ​ຊາຍ​ຂອງ​ລາວ​ກ່ຽວກັບ​ເຫດການ​ສຳຄັນ​ໃນ​ອະນາຄົດ​ເຊິ່ງ​ຈະ​ເກີດຂຶ້ນ​ກັບ​ເຂົາເຈົ້າ​ແລະ​ລູກ​ຫຼານ​ຂອງ​ເຂົາເຈົ້າ. ສະນັ້ນ ສິ່ງ​ທີ່​ຢາໂຄບ​ບອກ​ພວກ​ລູກ​ຊາຍ​ຂອງ​ລາວ​ຈຶ່ງ​ເປັນ​ຄຳ​ພະຍາກອນ.

4. ເຮົາ​ຈະ​ຮຽນ​ຫຍັງ​ໃນ​ບົດ​ນີ້? (ເບິ່ງ​ຂອບ “ຄອບຄົວ​ຂອງ​ຢາໂຄບ” ນຳ)

⁴ ໃນ​ບົດ​ນີ້ ເຮົາ​ຈະ​ເບິ່ງ​ສິ່ງ​ທີ່​ຢາໂຄບ​ເວົ້າ​ກັບ​ລູກ​ຊາຍ 4 ຄົນ​ຂອງ​ລາວ​ເຊິ່ງ​ກໍ​ຄື: ຣູເບັນ ຊີເມໂອນ ເລວີ ແລະ​ຢູດາ. ໃນ​ບົດ​ຕໍ່​ໄປ​ເຮົາ​ຈະ​ເບິ່ງ​ສິ່ງ​ທີ່​ຢາໂຄບ​ເວົ້າ​ກັບ​ລູກ​ຊາຍ​ອີກ 8 ຄົນ​ຂອງ​ລາວ. ໃນ​ບົດ​ນັ້ນ ຢາໂຄບ​ໄດ້​ບອກ​ລ່ວງ​ໜ້າ​ໃນ​ສິ່ງ​ທີ່​ຈະ​ເກີດຂຶ້ນ​ກັບ​ພວກ​ລູກ​ຊາຍ​ຂອງ​ລາວ​ແລະ​ລູກ​ຫຼານ​ຂອງ​ເຂົາເຈົ້າ ເຊິ່ງ​ໃນ​ທີ່​ສຸດ​ຈະ​ກາຍ​ເປັນ​ຊາດ​ອິດສະຣາເອນ. ເມື່ອ​ເຮົາ​ຄິດ​ເຖິງ​ສິ່ງ​ທີ່​ເກີດຂຶ້ນ​ກັບ​ຊາດ​ອິດສະຣາເອນ​ໃນ​ສະໄໝ​ແຕ່​ກີ້ ເຮົາ​ກໍ​ຈະ​ເຫັນ​ວ່າ​ສິ່ງ​ທີ່​ຢາໂຄບ​ເວົ້າ​ເກີດຂຶ້ນ​ແທ້. ເມື່ອ​ເຮົາ​ຮຽນ​ກ່ຽວກັບ​ສິ່ງ​ທີ່​ຢາໂຄບ​ເວົ້າ ເຮົາ​ຈະ​ໄດ້​ບົດ​ຮຽນ​ທີ່​ສຳຄັນ​ເຊິ່ງ​ຈະ​ຊ່ວຍ​ເຮົາ​ໃຫ້​ເຮັດ​ໃນ​ສິ່ງ​ທີ່​ພະ​ເຢໂຫວາ​ພໍໃຈ.

ຣູເບັນ

5. ຣູເບັນ​ຄາດໝາຍ​ຈະ​ໄດ້​ຮັບ​ຫຍັງ​ຈາກ​ພໍ່?

⁵ ຢາໂຄບ​ເວົ້າ​ກັບ​ຣູເບັນ​ເປັນ​ຜູ້​ທຳອິດ ລາວ​ເວົ້າ​ວ່າ: “ເຈົ້າ​ເປັນ​ລູກກົກ​ຂອງ​ພໍ່.” (ປຖກ. 49:3) ຍ້ອນ​ເປັນ​ລູກກົກ ຣູເບັນ​ຄາດໝາຍ​ວ່າ​ຈະ​ໄດ້​ມໍລະດົກ 2 ເທົ່າ​ຈາກ​ພໍ່. ນອກ​ຈາກ​ນັ້ນ ລາວ​ອາດ​ຄາດໝາຍ​ວ່າ​ຈະ​ໄດ້​ເປັນ​ຫົວໜ້າ​ຄອບຄົວ​ຫຼັງ​ຈາກ​ທີ່​ພໍ່​ຕາຍ ແລະ​ລາວ​ກໍ​ຄາດໝາຍ​ວ່າ​ບາງ​ຄົນ​ໃນ​ຕະກູນ​ຂອງ​ລາວ​ຈະ​ໄດ້​ເປັນ​ຫົວໜ້າ​ຄອບຄົວ​ຕະຫຼອດ​ໄປ.

6. ເປັນ​ຫຍັງ​ຣູເບັນ​ຈຶ່ງ​ເສຍ​ສິດ​ທີ່​ລູກກົກ​ຈະ​ໄດ້​ຮັບ? (ປະຖົມມະການ 49:3, 4)

⁶ ແຕ່​ຣູເບັນ​ເສຍ​ສິດ​ທີ່​ລູກກົກ​ຈະ​ໄດ້​ຮັບ. (1ຂຄ. 5:1) ຍ້ອນຫຍັງ? ຫຼາຍ​ປີ​ກ່ອນ​ໜ້າ​ນີ້​ລາວ​ໄປ​ນອນ​ນຳ​ບິນຮາ​ທີ່​ເປັນ​ເມຍ​ນ້ອຍ​ຂອງ​ຢາໂຄບ. ບິນຮາ​ເປັນ​ສາວໃຊ້​ຂອງ​ຣາເຄນ​ເຊິ່ງ​ເປັນ​ເມຍ​ທີ່​ຢາໂຄບ​ຮັກ​ຫຼາຍ​ທີ່​ສຸດ​ເຊິ່ງ​ຕາຍ​ໄປ​ແລ້ວ. (ປຖກ. 35:19, 22) ຣູເບັນ​ເປັນ​ລູກ​ຂອງ​ເລອາ​ເຊິ່ງ​ເປັນ​ເມຍ​ອີກ​ຜູ້​ໜຶ່ງ​ຂອງ​ຢາໂຄບ. ຍ້ອນຫຍັງ​ຣູເບັນ​ຈຶ່ງ​ໄປ​ນອນ​ກັບ​ບິນຮາ? ອາດ​ເປັນ​ຍ້ອນ​ວ່າ​ລາວ​ຢາກ​ໃຫ້​ຢາໂຄບ​ຊັງ​ບິນຮາ​ແລະ​ໄປ​ຮັກ​ແມ່​ຂອງ​ລາວ​ຫຼາຍ​ກວ່າ. ຫຼື​ອາດ​ເປັນ​ໄປ​ໄດ້​ທີ່​ຣູເບັນ​ມັກ​ບິນຮາ​ແລະ​ລາວ​ບໍ່​ສາມາດ​ຄວບຄຸມ​ອາລົມ​ຄວາມ​ຮູ້ສຶກ​ທາງ​ເພດ​ໄດ້. ບໍ່​ວ່າ​ຈະ​ຍ້ອນ​ເຫດຜົນ​ໃດ ສິ່ງ​ທີ່​ຣູເບັນ​ເຮັດ​ໄດ້​ເຮັດ​ໃຫ້​ພະ​ເຢໂຫວາ​ແລະ​ຢາໂຄບ​ບໍ່​ພໍໃຈ​ຫຼາຍ.—ອ່ານ​ປະຖົມມະການ 49:3, 4

7. ເກີດ​ຫຍັງ​ຂຶ້ນ​ກັບ​ຣູເບັນ​ແລະ​ລູກ​ຫຼານ​ຂອງ​ລາວ? (ເບິ່ງ​ຂອບ “ສິ່ງ​ທີ່​ຢາໂຄບ​ເວົ້າ​ກ່ອນ​ທີ່​ລາວ​ຈະ​ຕາຍ” ນຳ)

⁷ ຢາໂຄບ​ບອກ​ຣູເບັນ​ວ່າ: “ເຈົ້າ​ຊິ​ບໍ່​ໄດ້​ກຽດ​ສູງ​ສຸດ​ນັ້ນ” ແລະ​ເລື່ອງ​ນີ້​ກໍ​ເກີດຂຶ້ນ​ແທ້. ໃນ​ຄຳພີ​ໄບເບິນ​ບໍ່​ມີ​ບ່ອນ​ໃດ​ທີ່​ເວົ້າ​ວ່າ​ລູກ​ຫຼານ​ຂອງ​ຣູເບັນ​ໄດ້​ເປັນ​ກະສັດ ປະໂລຫິດ ຫຼື ຜູ້​ພະຍາກອນ. ແຕ່​ຢາໂຄບ​ກໍ​ຍັງ​ໃຫ້​ຣູເບັນ​ໄດ້​ຮັບ​ມໍລະດົກ ແລະ​ລູກ​ຫຼານ​ຂອງ​ຣູເບັນ​ກໍ​ໄດ້​ເປັນ​ຕະກູນ​ໜຶ່ງ​ໃນ​ອິດສະຣາເອນ. (ຢຊ. 12:6) ຣູເບັນ​ສະແດງ​ຄຸນລັກສະນະ​ທີ່​ດີ​ໃນ​ໂອກາດ​ອື່ນ ແລະ​ໃນ​ຄຳພີ​ໄບເບິນ​ກໍ​ບໍ່​ມີ​ບ່ອນ​ໃດ​ທີ່​ເວົ້າ​ວ່າ​ລາວ​ເຮັດ​ຜິດ​ສິນລະທຳ​ທາງ​ເພດ​ອີກ.—ປຖກ. 37:20-22; 42:37

8. ເຮົາ​ໄດ້​ບົດ​ຮຽນ​ຫຍັງ​ຈາກ​ຕົວຢ່າງ​ຂອງ​ຣູເບັນ?

⁸ ເຮົາ​ໄດ້​ບົດ​ຮຽນ​ຫຍັງ? ເຮົາ​ຕ້ອງ​ພະຍາຍາມ​ເຕັມທີ​ທີ່​ຈະ​ຄວບຄຸມ​ໂຕເອງ​ແລະ​ຕັ້ງໃຈ​ທີ່​ຈະ​ບໍ່​ເຮັດ​ຜິດ​ສິນລະທຳ​ທາງ​ເພດ. ຖ້າ​ເຮົາ​ຖືກ​ລໍ້ໃຈ​ໃຫ້​ເຮັດ​ຜິດ ເຮົາ​ຄວນ​ຢຸດ​ແລະ​ຄິດ​ວ່າ​ການ​ກະທຳ​ຂອງ​ເຮົາ​ຈະ​ເຮັດ​ໃຫ້​ພະ​ເຢໂຫວາ ຄົນ​ໃນ​ຄອບຄົວ ແລະ​ຄົນ​ອື່ນໆ​ເສຍໃຈ​ຫຼາຍ​ສ່ຳ​ໃດ? ເຮົາ​ຄວນ​ຈື່​ໄວ້​ຄື​ກັນ​ວ່າ “ຜູ້​ໃດ​ຫວ່ານ​ສິ່ງ​ໃດ​ກໍ​ຕ້ອງ​ເກັບ​ກ່ຽວ​ສິ່ງ​ນັ້ນ.” (ຄລຕ. 6:7) ສິ່ງ​ທີ່​ເກີດຂຶ້ນ​ກັບ​ຣູເບັນ​ເຕືອນ​ເຮົາ​ວ່າ​ພະ​ເຢໂຫວາ​ມີ​ຄວາມ​ເມດຕາ. ເຖິງ​ວ່າ​ພະ​ເຢໂຫວາ​ບໍ່​ໄດ້​ປົກປ້ອງ​ເຮົາ​ຈາກ​ຜົນ​ເສຍຫາຍ​ໃນ​ຄວາມ​ຜິດ​ທີ່​ເຮົາ​ເຮັດ ແຕ່​ເພິ່ນ​ຈະ​ອວຍພອນ​ຄວາມ​ພະຍາຍາມ​ຂອງ​ເຮົາ​ເມື່ອ​ເຮົາ​ເຮັດ​ສິ່ງ​ທີ່​ຖືກຕ້ອງ.

ຊີເມໂອນ​ກັບ​ເລວີ

9. ເປັນ​ຫຍັງ​ຢາໂຄບ​ຈຶ່ງ​ບໍ່​ພໍໃຈ​ໃຫ້​ຊີເມໂອນ​ກັບ​ເລວີ? (ປະຖົມມະການ 49:5-7)

⁹ ອ່ານ​ປະຖົມມະການ 49:5-7. ຕໍ່​ມາ ຢາໂຄບ​ໄດ້​ເວົ້າ​ກັບ​ຊີເມໂອນ​ແລະ​ເລວີ ແຕ່​ສິ່ງ​ທີ່​ຢາໂຄບ​ເວົ້າ​ສະແດງ​ໃຫ້​ເຫັນ​ວ່າ​ລາວ​ບໍ່​ພໍໃຈ​ລູກ 2 ຄົນ​ນີ້​ຫຼາຍ. ຫຼາຍ​ປີ​ກ່ອນ​ໜ້າ​ນີ້ ດີນາ​ລູກ​ສາວ​ຂອງ​ຢາໂຄບ​ຖືກ​ເຊເຄັມ​ທີ່​ເປັນ​ຄົນ​ການາອານ​ຂົ່ມຂືນ. ເຂົ້າໃຈ​ໄດ້​ທີ່​ພວກ​ລູກ​ຊາຍ​ຂອງ​ຢາໂຄບ​ໃຈ​ຮ້າຍ​ຫຼາຍ​ໃນ​ສິ່ງ​ທີ່​ເກີດຂຶ້ນ​ກັບ​ນ້ອງ​ສາວ​ຂອງ​ເຂົາເຈົ້າ. ແຕ່​ຊີເມໂອນ​ກັບ​ເລວີ​ບໍ່​ໄດ້​ຄວບຄຸມ​ຄວາມ​ໃຈ​ຮ້າຍ​ຂອງ​ໂຕເອງ. ສອງ​ຄົນ​ນີ້​ຕົວະ​ຜູ້​ຊາຍ​ເມືອງ​ເຊເຄັມ​ວ່າ ຖ້າ​ເຂົາເຈົ້າ​ຮັບ​ສິນຕັດ ເຂົາເຈົ້າ​ກໍ​ຈະ​ເປັນ​ມິດ​ກັບ​ຄອບຄົວ​ຂອງ​ຢາໂຄບ. ພວກ​ຜູ້​ຊາຍ​ເຫຼົ່າ​ນັ້ນ​ກໍ​ເຮັດ​ຕາມ. ຕອນ​ທີ່​ຍັງ​ເຈັບ​ຢູ່​ຍ້ອນ​ຮັບ​ສິນຕັດ ຊີເມໂອນ​ກັບ​ເລວີ “ໄດ້​ຖື​ດາບ​ເຂົ້າ​ໄປ​ໃນ​ເມືອງ​ໂດຍ​ທີ່​ບໍ່​ມີ​ຜູ້​ໃດ​ສົງໄສ ແລ້ວ​ກໍ​ຂ້າ​ຜູ້​ຊາຍ​ທຸກ​ຄົນ​ໃນ​ເມືອງ​ນັ້ນ.”—ປຖກ. 34:25-29

10. ສິ່ງ​ທີ່​ຢາໂຄບ​ເວົ້າ​ກ່ຽວກັບ​ຊີເມໂອນ​ກັບ​ເລວີ​ເກີດຂຶ້ນ​ແທ້​ແນວ​ໃດ? (ເບິ່ງ​ຂອບ “ສິ່ງ​ທີ່​ຢາໂຄບ​ເວົ້າ​ກ່ອນ​ທີ່​ລາວ​ຈະ​ຕາຍ” ນຳ)

¹⁰ ຢາໂຄບ​ໃຈ​ຮ້າຍ​ຫຼາຍ​ໃຫ້​ຊີເມໂອນ​ກັບ​ເລວີ​ທີ່​ຂ້າ​ຄົນ​ຕາຍ​ບັກ​ຫຼາຍໆ. ລາວ​ບອກ​ລ່ວງ​ໜ້າ​ວ່າ​ເຂົາເຈົ້າ​ຈະ​ກະຈັດກະຈາຍ​ຢູ່​ທົ່ວ​ອິດສະຣາເອນ. ຫຼາຍ​ກວ່າ 200 ປີ​ຕໍ່​ມາ ຄຳເວົ້າ​ນີ້​ເກີດຂຶ້ນ​ແທ້​ຕອນ​ທີ່​ຊາດ​ອິດສະຣາເອນ​ເຂົ້າ​ໄປ​ແຜ່ນດິນ​ທີ່​ພະ​ເຢໂຫວາ​ສັນຍາ​ໄວ້. ດິນ​ມູນ​ທີ່​ຕະກູນ​ຊີເມໂອນ​ໄດ້​ຮັບ​ແມ່ນ​ຢາຍ​ຢູ່​ທົ່ວ​ເຂດ​ຂອງ​ຕະກູນ​ຢູດາ. (ຢຊ. 19:1) ດິນ​ມູນ​ທີ່​ຕະກູນ​ເລວີ​ໄດ້​ລວມ​ທັງໝົດ​ມີ 48 ເມືອງ​ເຊິ່ງ​ກະຈັດກະຈາຍ​ຢູ່​ທົ່ວ​ອິດສະຣາເອນ.—ຢຊ. 21:41

11. ຕະກູນ​ຊີເມໂອນ​ກັບ​ຕະກູນ​ເລວີ​ໄດ້​ເຮັດ​ສິ່ງ​ທີ່​ດີ​ຫຍັງ​ແດ່?

¹¹ ລູກ​ຫຼານ​ຂອງ​ຊີເມໂອນ​ກັບ​ເລວີ​ບໍ່​ໄດ້​ເຮັດ​ຜິດ​ຄື​ກັບ​ປູ່ຍ່າຕານາຍ​ຂອງ​ເຂົາເຈົ້າ. ຕະກູນ​ເລວີ​ສະໜັບສະໜູນ​ການ​ນະມັດສະການ​ແທ້​ຢ່າງ​ພັກດີ. ຕອນ​ທີ່​ໂມເຊ​ຂຶ້ນ​ໄປ​ພູ​ຊີນາຍ​ເພື່ອ​ໄປ​ເອົາ​ກົດໝາຍ​ຈາກ​ພະ​ເຢໂຫວາ ພວກ​ອິດສະຣາເອນ​ຫຼາຍ​ຄົນ​ໄດ້​ນະມັດສະການ​ຮູບ​ງົວ​ນ້ອຍ ແຕ່​ຕະກູນ​ເລວີ​ບໍ່​ໄດ້​ເຮັດ​ແບບ​ນັ້ນ. ເຂົາເຈົ້າ​ຢູ່​ຝ່າຍ​ໂມເຊ​ແລະ​ໄດ້​ຊ່ວຍ​ລາວ​ຂ້າ​ພວກ​ທີ່​ນະມັດສະການ​ຮູບ​ງົວ​ນ້ອຍ. (ອພຍ. 32:26-29) ພະ​ເຢໂຫວາ​ໄດ້​ເລືອກ​ຜູ້​ຊາຍ​ຈາກ​ຕະກູນ​ເລວີ​ໃຫ້​ເປັນ​ປະໂລຫິດ​ເຊິ່ງ​ເປັນ​ສິດທິ​ພິເສດ​ທີ່​ມີ​ຄ່າ​ຫຼາຍ. (ອພຍ. 40:12-15; ຈຊບ. 3:11, 12) ຕໍ່​ມາ ຕະກູນ​ຊີເມໂອນ​ໄດ້​ຊ່ວຍ​ຕະກູນ​ຢູດາ​ຕໍ່ສູ້​ກັບ​ພວກ​ການາອານ​ເພື່ອ​ຍຶດ​ເອົາ​ເຂດ​ທີ່​ເປັນ​ດິນ​ມູນ​ຂອງ​ເຂົາເຈົ້າ​ໃນ​ແຜ່ນດິນ​ທີ່​ພະ​ເຢໂຫວາ​ສັນຍາ​ໄວ້.—ຜຕສ. 1:3, 17

12. ເຮົາ​ໄດ້​ບົດ​ຮຽນ​ຫຍັງ​ຈາກ​ຕົວຢ່າງ​ຂອງ​ຊີເມໂອນ​ກັບ​ເລວີ?

¹² ເຮົາ​ໄດ້​ບົດ​ຮຽນ​ຫຍັງ? ເຮົາ​ຕ້ອງ​ຄວບຄຸມ​ຄວາມ​ໃຈ​ຮ້າຍ​ຖ້າ​ເຮົາ​ຫຼື​ຄົນ​ທີ່​ເຮົາ​ຮັກ​ຖືກ​ປະຕິບັດ​ແບບ​ບໍ່​ຍຸຕິທຳ. ເປັນ​ເລື່ອງ​ປົກກະຕິ​ທີ່​ເຮົາ​ຈະ​ຮູ້ສຶກ​ໃຈ​ຮ້າຍ. (ພສ. 4:4) ແຕ່​ເຮົາ​ຕ້ອງ​ຈື່​ໄວ້​ວ່າ​ພະ​ເຢໂຫວາ​ບໍ່​ພໍໃຈ​ກັບ​ຄຳເວົ້າ​ຫຼື​ການ​ກະທຳ​ທີ່​ສະແດງ​ເຖິງ​ຄວາມ​ໃຈ​ຮ້າຍ. (ຢກບ. 1:20) ເຮົາ​ເຈິ​ຄວາມ​ບໍ່​ຍຸຕິທຳ​ທັງ​ໃນ​ແລະ​ນອກ​ປະຊາຄົມ. ແຕ່​ຕາມ​ຫຼັກການ​ໃນ​ຄຳພີ​ໄບເບິນ ເຮົາ​ຕ້ອງ​ຫຼີກລ່ຽງ​ທີ່​ຈະ​ບໍ່​ເວົ້າ​ຫຼື​ເຮັດ​ສິ່ງ​ທີ່​ຈະ​ເຮັດ​ໃຫ້​ຄົນ​ອື່ນ​ເສຍໃຈ​ຍ້ອນ​ເຮົາ​ຄວບຄຸມ​ຄວາມ​ໃຈ​ຮ້າຍ​ຂອງ​ໂຕເອງ​ບໍ່​ໄດ້. (ຣມ. 12:17, 19; 1ປຕ. 3:9) ອີກ​ບົດ​ຮຽນ​ໜຶ່ງ​ແມ່ນ ເຖິງ​ວ່າ​ພໍ່​ແມ່​ຂອງ​ເຮົາ​ເຮັດ​ສິ່ງ​ທີ່​ພະ​ເຢໂຫວາ​ບໍ່​ມັກ ແຕ່​ຂໍ​ໃຫ້​ຈື່​ໄວ້​ວ່າ​ເຮົາ​ບໍ່​ຈຳເປັນ​ຕ້ອງ​ເຮັດ​ຄື​ກັບ​ເຂົາເຈົ້າ ແລະ​ເຮົາ​ກໍ​ບໍ່​ຄວນ​ສະຫຼຸບ​ວ່າ​ເຮົາ​ບໍ່​ສາມາດ​ເຮັດ​ສິ່ງ​ທີ່​ພະ​ເຢໂຫວາ​ພໍໃຈ​ໄດ້. ພະ​ເຢໂຫວາ​ຈະ​ຊ່ວຍ​ເຮົາ​ໃຫ້​ເຮັດ​ສິ່ງ​ທີ່​ຖືກຕ້ອງ ແລະ​ເພິ່ນ​ຈະ​ໃຫ້​ລາງວັນ​ເຮົາ​ທີ່​ພະຍາຍາມ​ເຮັດ​ແບບ​ນັ້ນ.

ຢູດາ

13. ເມື່ອ​ຮອດ​ຕອນ​ທີ່​ຢາໂຄບ​ເວົ້າ​ກັບ​ຢູດາ ເປັນ​ຫຍັງ​ລາວ​ຈຶ່ງ​ຮູ້ສຶກ​ກັງວົນ?

¹³ ລູກ​ຜູ້​ຕໍ່​ໄປ​ທີ່​ຢາໂຄບ​ຈະ​ເວົ້າ​ນຳ​ແມ່ນ​ຢູດາ. ຫຼັງ​ຈາກ​ໄດ້​ຍິນ​ສິ່ງ​ທີ່​ຢາໂຄບ​ເວົ້າ​ກັບ​ອ້າຍ​ທັງ​ສອງ​ຄົນ ຢູດາ​ຄື​ຊິ​ຮູ້ສຶກ​ກັງວົນ​ຍ້ອນ​ລາວ​ກໍ​ໄດ້​ເຮັດ​ຜິດ​ຮ້າຍ​ແຮງ​ຄື​ກັນ. ຫຼັງ​ຈາກ​ຊີເມໂອນ​ກັບ​ເລວີ​ຂ້າ​ພວກ​ຜູ້​ຊາຍ​ຢູ່​ເມືອງ​ເຊເຄັມ ຢູດາ​ກໍ​ໄປ​ກັບ​ພວກ​ອ້າຍ​ນ້ອງ​ຂອງ​ລາວ​ເພື່ອ​ໄປ​ປຸ້ນ​ເອົາ​ເຄື່ອງ​ຂອງ​ໃນ​ເມືອງ​ນັ້ນ. (ປຖກ. 34:27) ຢູດາ​ຍັງ​ມີ​ສ່ວນ​ຮ່ວມ​ກັບ​ພວກ​ອ້າຍ​ໃນ​ການ​ຂາຍ​ໂຢເຊັບ​ໄປ​ເປັນ​ທາດ​ແລະ​ຕົວະ​ພໍ່​ກ່ຽວກັບ​ເລື່ອງ​ນີ້. (ປຖກ. 37:31-33) ຕໍ່​ມາ ຫຼັງ​ຈາກ​ທີ່​ລູກ​ຊາຍ​ຂອງ​ຢູດາ​ຕາຍ ລາວ​ໄດ້​ໄປ​ນອນ​ນຳ​ລູກໃພ້​ຂອງ​ໂຕເອງ​ທີ່​ຊື່​ຕາມາ​ຍ້ອນ​ຄິດ​ວ່າ​ລາວ​ເປັນ​ໂສເພນີ.—ປຖກ. 38:15-18

14. ຢາໂຄບ​ເວົ້າ​ຫຍັງ​ກັບ​ຢູດາ ແລະ​ຢູດາ​ໄດ້​ເຮັດ​ສິ່ງ​ທີ່​ດີ​ຫຍັງ​ແດ່? (ປະຖົມມະການ 49:8, 9)

¹⁴ ແຕ່​ຢາໂຄບ​ພັດ​ຍ້ອງ​ຢູດາ​ແລະ​ສັນຍາ​ວ່າ​ຈະ​ມີ​ແຕ່​ສິ່ງ​ດີໆ​ເກີດຂຶ້ນ​ກັບ​ລາວ​ແລະ​ລູກ​ຫຼານ​ຂອງ​ລາວ. (ອ່ານ​ປະຖົມມະການ 49:8, 9) ຢູດາ​ເປັນ​ຫ່ວງ​ແທ້ໆ​ຕໍ່​ຄວາມ​ຮູ້ສຶກ​ຂອງ​ພໍ່​ທີ່​ເຖົ້າ​ແລ້ວ ແລະ​ລາວ​ຍັງ​ອີ່ຕົນ​ເບັນຢາມິນ​ທີ່​ເປັນ​ນ້ອງ​ຫຼ້າ​ນຳ.—ປຖກ. 44:18, 30-34

15. ມີ​ສິ່ງ​ດີໆ​ຫຍັງ​ແດ່​ເກີດຂຶ້ນ​ກັບ​ຢູດາ?

¹⁵ ຢາໂຄບ​ບອກ​ລ່ວງ​ໜ້າ​ວ່າ​ຢູດາ​ຈະ​ເປັນ​ຜູ້​ນຳ​ພວກ​ອ້າຍ​ນ້ອງ​ຂອງ​ລາວ. ແຕ່​ປະມານ 200 ປີ​ຕໍ່​ມາ ຄຳ​ພະຍາກອນ​ນີ້​ຈຶ່ງ​ເລີ່ມ​ເກີດຂຶ້ນ​ແທ້​ຫຼັງ​ຈາກ​ຄົນ​ອິດສະຣາເອນ​ອອກ​ຈາກ​ເອຢິບ​ແລະ​ເດີນທາງ​ຜ່ານ​ບ່ອນ​ກັນດານ​ເຂົ້າ​ໄປ​ໃນ​ແຜ່ນດິນ​ທີ່​ພະ​ເຢໂຫວາ​ສັນຍາ​ໄວ້. ຕະກູນ​ຢູດາ​ເປັນ​ຈຸ​ທຳອິດ​ທີ່​ເຂົ້າ​ໄປ ແລ້ວ​ຕະກູນ​ອື່ນໆ​ຈຶ່ງ​ເຂົ້າ​ໄປ​ນຳ​ຫຼັງ. (ຈຊບ. 10:14) ຫຼາຍ​ສິບ​ປີ​ຕໍ່​ມາ ພະ​ເຢໂຫວາ​ໄດ້​ມອບໝາຍ​ໃຫ້​ຕະກູນ​ຢູດາ​ເປັນ​ພວກ​ທຳອິດ​ທີ່​ໄປ​ຕໍ່ສູ້​ກັບ​ພວກ​ການາອານ​ເພື່ອ​ຍຶດ​ເອົາ​ແຜ່ນດິນ​ທີ່​ເພິ່ນ​ສັນຍາ​ໄວ້. (ຜຕສ. 1:1, 2) ດາວິດ​ເປັນ​ກະສັດ​ຜູ້​ທຳອິດ​ທີ່​ມາ​ຈາກ​ຕະກູນ​ຢູດາ. ແຕ່​ຍັງ​ມີ​ເລື່ອງ​ອື່ນໆ​ອີກ​ທີ່​ຄຳ​ພະຍາກອນ​ນີ້​ເກີດຂຶ້ນ​ແທ້​ກ່ຽວກັບ​ຢູດາ.

16. ຄຳ​ພະຍາກອນ​ໃນ​ປະຖົມມະການ 49:10 ເກີດຂຶ້ນ​ແທ້​ແນວ​ໃດ? (ເບິ່ງ​ຂອບ “ສິ່ງ​ທີ່​ຢາໂຄບ​ເວົ້າ​ກ່ອນ​ທີ່​ລາວ​ຈະ​ຕາຍ” ນຳ)

¹⁶ ຢາໂຄບ​ບອກ​ວ່າ​ຜູ້​ປົກຄອງ​ມະນຸດ​ຈະ​ມາ​ຈາກ​ຕະກູນ​ຢູດາ ແລະ​ລາວ​ຈະ​ປົກຄອງ​ຕະຫຼອດ​ໄປ. (ອ່ານ​ປະຖົມມະການ 49:10 ແລະ​ໄຂເງື່ອນ) ຜູ້​ປົກຄອງ​ຜູ້​ນັ້ນ​ແມ່ນ​ພະ​ເຢຊູ​ເຊິ່ງ​ຢາໂຄບ​ເອີ້ນ​ວ່າ​ຊີໂລ. ທູດສະຫວັນ​ກໍ​ເວົ້າ​ເຖິງ​ພະ​ເຢຊູ​ວ່າ: “ພະ​ເຢໂຫວາ​ພະເຈົ້າ​ຈະ​ຍົກ​ບັນລັງ​ຂອງ​ດາວິດ​ປູ່ຍ່າຕານາຍ​ຂອງ​ລາວ​ໃຫ້​ລາວ.” (ລກ. 1:32, 33) ນອກ​ຈາກ​ນັ້ນ ພະ​ເຢຊູ​ຍັງ​ຖືກ​ເອີ້ນ​ວ່າ: “ສິງ​ຈາກ​ຕະກູນ​ຢູດາ.”—ພນມ. 5:5

17. ເຮົາ​ຈະ​ຮຽນ​ແບບ​ພະ​ເຢໂຫວາ​ແນວ​ໃດ​ໃນ​ວິທີ​ທີ່​ເຮົາ​ເບິ່ງ​ຄົນ​ອື່ນ?

¹⁷ ເຮົາ​ໄດ້​ບົດ​ຮຽນ​ຫຍັງ? ພະ​ເຢໂຫວາ​ອວຍພອນ​ຢູດາ​ເຖິງ​ວ່າ​ລາວ​ໄດ້​ເຮັດ​ຜິດ​ຮ້າຍ​ແຮງ​ບາງ​ຢ່າງ. ແຕ່​ພວກ​ອ້າຍ​ນ້ອງ​ຂອງ​ຢູດາ​ຄື​ຊິ​ສົງໄສ​ວ່າ​ພະ​ເຢໂຫວາ​ເຫັນ​ຫຍັງ​ໃນ​ໂຕ​ຢູດາ. ບໍ່​ວ່າ​ເຂົາເຈົ້າ​ຈະ​ຄິດ​ແນວ​ໃດ ແຕ່​ເຮົາ​ຮູ້​ວ່າ​ພະ​ເຢໂຫວາ​ເຫັນ​ຄຸນລັກສະນະ​ທີ່​ດີ​ໃນ​ໂຕ​ຂອງ​ຢູດາ​ແລະ​ເພິ່ນ​ໄດ້​ອວຍພອນ​ລາວ​ຍ້ອນ​ສິ່ງ​ນັ້ນ. ເຮົາ​ຈະ​ຮຽນ​ແບບ​ຕົວຢ່າງ​ຂອງ​ພະ​ເຢໂຫວາ​ແນວ​ໃດ? ເມື່ອ​ພີ່ນ້ອງ​ໄດ້​ຮັບ​ວຽກ​ມອບໝາຍ​ທີ່​ສຳຄັນ ເຮົາ​ອາດ​ບໍ່​ເຂົ້າໃຈ​ວ່າ​ເປັນ​ຫຍັງ​ລາວ​ຈຶ່ງ​ໄດ້​ຮັບ​ວຽກ​ມອບໝາຍ​ນັ້ນ​ຍ້ອນ​ເຮົາ​ຮູ້​ຈັກ​ຂໍ້​ບົກ​ພ່ອງ​ຂອງ​ລາວ. ແຕ່​ເຮົາ​ຄວນ​ຈື່​ໄວ້​ວ່າ​ພະ​ເຢໂຫວາ​ພໍໃຈ​ແທ້ໆ​ກັບ​ຄຸນລັກສະນະ​ທີ່​ດີ​ໃນ​ໂຕ​ຜູ້​ນັ້ນ. ພະ​ເຢໂຫວາ​ຊອກ​ເບິ່ງ​ສິ່ງ​ທີ່​ດີໆ​ໃນ​ໂຕ​ຜູ້​ນະມັດສະການ​ຂອງ​ເພິ່ນ ແລະ​ເຮົາ​ກໍ​ຄວນ​ພະຍາຍາມ​ເຮັດ​ແບບ​ນັ້ນ​ຄື​ກັນ.

18. ເຮົາ​ຈະ​ຮຽນ​ແບບ​ລູກ​ຫຼານ​ຂອງ​ຢູດາ​ແນວ​ໃດ?

¹⁸ ບົດ​ຮຽນ​ອີກ​ຢ່າງ​ໜຶ່ງ​ທີ່​ເຮົາ​ໄດ້​ຈາກ​ເລື່ອງ​ຂອງ​ຢູດາ​ແມ່ນ​ເຮົາ​ຕ້ອງ​ເປັນ​ຄົນ​ອົດທົນ. ພະ​ເຢໂຫວາ​ເຮັດ​ໃຫ້​ຄຳ​ສັນຍາ​ຂອງ​ເພິ່ນ​ເກີດຂຶ້ນ​ແທ້​ສະເໝີ ແຕ່​ເພິ່ນ​ຈະ​ບໍ່​ໄດ້​ເຮັດ​ໃນ​ວິທີ​ຫຼື​ໃນ​ເວລາ​ທີ່​ເຮົາ​ຄາດໝາຍ​ໄວ້​ສະເໝີ​ໄປ. ລູກ​ຫຼານ​ຂອງ​ຢູດາ​ບໍ່​ໄດ້​ນຳໜ້າ​ປະຊາຊົນ​ຂອງ​ພະ​ເຢໂຫວາ​ທັນທີ ແຕ່​ເຂົາເຈົ້າ​ກໍ​ສະໜັບສະໜູນ​ຜູ້​ທີ່​ພະ​ເຢໂຫວາ​ແຕ່ງຕັ້ງ​ໃຫ້​ນຳໜ້າ​ບໍ່​ວ່າ​ຈະ​ເປັນ​ໂມເຊ​ຄົນ​ເລວີ ໂຢຊວຍ​ຄົນ​ເອຟຣາຢິມ ຫຼື​ຊາອູນ​ຄົນ​ເບັນຢາມິນ. ເຮົາ​ກໍ​ຄື​ກັນ ຄວນ​ສະໜັບສະໜູນ​ຜູ້​ທີ່​ພະ​ເຢໂຫວາ​ເລືອກ​ໃຫ້​ນຳໜ້າ​ເຮົາ​ໃນ​ທຸກ​ມື້​ນີ້.—ຮຣ. 6:12

19. ເຮົາ​ໄດ້​ຮຽນ​ຫຍັງ​ກ່ຽວກັບ​ພະ​ເຢໂຫວາ​ຈາກ​ສິ່ງ​ທີ່​ຢາໂຄບ​ເວົ້າ​ກ່ອນ​ທີ່​ລາວ​ຈະ​ຕາຍ?

¹⁹ ເຮົາ​ໄດ້​ບົດ​ຮຽນ​ຫຍັງ​ຈາກ​ສິ່ງ​ທີ່​ຢາໂຄບ​ເວົ້າ​ກັບ​ລູກ​ຊາຍ 4 ຄົນ​ກ່ອນ​ທີ່​ລາວ​ຈະ​ຕາຍ? ເຮົາ​ເຫັນ​ວ່າ “[ພະ​ເຢໂຫວາ] ບໍ່​ໄດ້​ເບິ່ງ​ຄື​ກັບ​ທີ່​ມະນຸດ​ເບິ່ງ.” (1ຊມ. 16:7) ພະ​ເຢໂຫວາ​ເປັນ​ພະເຈົ້າ​ທີ່​ມີ​ຄວາມ​ອົດທົນ​ຫຼາຍ​ແລະ​ພ້ອມ​ຈະ​ໃຫ້​ອະໄພ. ພະ​ເຢໂຫວາ​ບໍ່​ມັກ​ເມື່ອ​ເຮົາ​ເຮັດ​ສິ່ງ​ທີ່​ບໍ່​ດີ ແຕ່​ເພິ່ນ​ກໍ​ບໍ່​ໄດ້​ຄາດໝາຍ​ວ່າ​ເຮົາ​ຕ້ອງ​ເປັນ​ຄົນ​ທີ່​ສົມບູນແບບ. ເພິ່ນ​ເຖິງຂັ້ນ​ອວຍພອນ​ຄົນ​ທີ່​ເຮັດ​ຜິດ​ຮ້າຍ​ແຮງ​ໃນ​ອະດີດ​ຖ້າ​ເຂົາເຈົ້າ​ກັບໃຈ​ແທ້ໆ​ແລະ​ກັບ​ມາ​ເຮັດ​ສິ່ງ​ທີ່​ຖືກຕ້ອງ. ໃນ​ບົດ​ຕໍ່​ໄປ​ເຮົາ​ຈະ​ເບິ່ງ​ສິ່ງ​ທີ່​ຢາໂຄບ​ເວົ້າ​ກັບ​ລູກ​ຊາຍ​ອີກ 8 ຄົນ​ຂອງ​ລາວ.