ບົດຄວາມສຶກສາທີ 30
ເພງທີ 97 ຊີວິດເຮົາຕ້ອງອາໄສຄຳສອນຂອງພະເຈົ້າ
ເຮົາຍັງຮຽນຮູ້ສິ່ງໃໝ່ໆຈາກຄຳສອນພື້ນຖານໃນຄຳພີໄບເບິນໄດ້
“ຂ້ອຍຈຶ່ງເຕືອນພວກເຈົ້າຢູ່ເລື້ອຍໆບໍ່ໃຫ້ລືມເລື່ອງເຫຼົ່ານີ້ ເຖິງວ່າພວກເຈົ້າຮູ້ຢູ່ແລ້ວແລະເຖິງວ່າພວກເຈົ້າໝັ້ນຄົງໃນຄວາມຈິງ.”—2ປຕ. 1:12
ຈຸດສຳຄັນ
ສິ່ງທີ່ເຮົາຮຽນກ່ຽວກັບຄຳສອນພື້ນຖານໃນຄຳພີໄບເບິນຕັ້ງແຕ່ຕອນທຳອິດຍັງເປັນປະໂຫຍດຕໍ່ເຮົາແນວໃດໃນທຸກມື້ນີ້.
1. ຕອນທີ່ເຈົ້າຮຽນຄຳພີໄບເບິນໃໝ່ໆ ຄຳສອນໃນຄຳພີໄບເບິນສົ່ງຜົນຕໍ່ເຈົ້າແນວໃດ?
ຄຳສອນພື້ນຖານໃນຄຳພີໄບເບິນໄດ້ປ່ຽນຊີວິດເຮົາ. ຕົວຢ່າງເຊັ່ນ: ເມື່ອເຮົາໄດ້ຮູ້ວ່າພະເຈົ້າຊື່ເຢໂຫວາ ເຮົາກໍເລີ່ມໃກ້ຊິດກັບເພິ່ນ. (ອຊຢ. 42:8) ເມື່ອເຮົາໄດ້ຮຽນຮູ້ວ່າຄົນຕາຍແລ້ວເປັນແນວໃດ ເຮົາກໍບໍ່ສົງໄສອີກຕໍ່ໄປວ່າຄົນທີ່ເຮົາຮັກເຊິ່ງຕາຍໄປແລ້ວເຈັບປວດທໍລະມານຢູ່ບໍ ແລະເຮົາກໍບໍ່ຢ້ານຄົນຕາຍອີກຕໍ່ໄປ. (ປຍຈ. 9:10) ເມື່ອເຮົາໄດ້ຮຽນຮູ້ເລື່ອງຄຳສັນຍາຂອງພະເຢໂຫວາທີ່ວ່າໂລກນີ້ຈະເປັນສວນທີ່ງາມໆ ເຮົາກໍບໍ່ໄດ້ເປັນຫ່ວງກ່ຽວກັບອະນາຄົດອີກຕໍ່ໄປ. ເຮົາໝັ້ນໃຈວ່າເຮົາຈະບໍ່ໄດ້ມີຊີວິດຢູ່ສັ້ນໆແຕ່ 70 ຫຼື 80 ປີເທົ່ານັ້ນ ແຕ່ເຮົາຈະມີຊີວິດຢູ່ຕະຫຼອດໄປ.—ພສ. 37:29; 90:10
2. ເປັນຫຍັງເປໂຕຈຶ່ງເຕືອນພີ່ນ້ອງໃຫ້ຄິດເຖິງສິ່ງທີ່ໄດ້ຮຽນມາແລ້ວຈາກຄຳພີໄບເບິນ? (2 ເປໂຕ 1:12, 13)
2 ເຮົາຕ້ອງຈື່ໄວ້ສະເໝີວ່າຄຳສອນພື້ນຖານໃນຄຳພີໄບເບິນເປັນສິ່ງທີ່ສຳຄັນຫຼາຍ. ເປໂຕຂຽນຈົດໝາຍສະບັບທີ 2 ໄປຫາພີ່ນ້ອງທີ່ “ໝັ້ນຄົງໃນຄວາມຈິງ.” (ອ່ານ 2 ເປໂຕ 1:12, 13) ໃນຕອນນັ້ນ ເຂົາເຈົ້າເຈິກັບສິ່ງທີ່ເປັນອັນຕະລາຍຕໍ່ຄວາມເຊື່ອທີ່ຢູ່ໃນປະຊາຄົມເຊິ່ງລວມເຖິງພວກຜູ້ສອນປອມແລະຄົນທີ່ໝິ່ນປະໝາດພະເຈົ້າ. (2ປຕ. 2:1-3) ເປໂຕຢາກໃຫ້ພີ່ນ້ອງເຂັ້ມແຂງເພື່ອຈະປົກປ້ອງໂຕເອງຈາກເລື່ອງຂີ້ຕົວະທີ່ຄົນເຫຼົ່ານັ້ນສອນ ລາວຈຶ່ງເຕືອນເຂົາເຈົ້າໃຫ້ຄິດເຖິງຄຳສອນບາງຢ່າງທີ່ໄດ້ຮຽນມາແລ້ວ. ຄຳສອນເຫຼົ່ານີ້ຈະຊ່ວຍເຂົາເຈົ້າໃຫ້ຮັກສາຄວາມສັດຊື່ຕໍ່ພະເຢໂຫວາຕໍ່ໆໄປ.
3. ເປັນຫຍັງເຮົາຄວນຄິດຕຶກຕອງກ່ຽວກັບຄຳສອນພື້ນຖານໃນຄຳພີໄບເບິນຕໍ່ໆໄປ? ຂໍໃຫ້ຍົກຕົວຢ່າງ.
3 ເຖິງວ່າຢູ່ໃນຄວາມຈິງມາດົນແລ້ວ ແຕ່ເຮົາກໍຍັງໄດ້ບົດຮຽນໃໝ່ໆຈາກຄຳສອນພື້ນຖານໃນຄຳພີໄບເບິນ. ຍົກຕົວຢ່າງ: ພໍ່ຄົວທີ່ຊຳນານກັບຄົນທີ່ກຳລັງຮຽນແຕ່ງກິນໃໝ່ອາດຈະໃຊ້ວັດຖຸດິບແບບດຽວກັນໃນການເຮັດອາຫານເຍື່ອງໜຶ່ງ. ແຕ່ເມື່ອເວລາຜ່ານໄປ ພໍ່ຄົວທີ່ຊຳນານໄດ້ຮຽນຮູ້ວິທີທີ່ຈະໃຊ້ວັດຖຸດິບແບບດຽວກັນນີ້ເພື່ອແຕ່ງອາຫານແນວໃໝ່ທີ່ແຊບໆໄດ້. ຄ້າຍຄືກັນ ຄົນທີ່ຢູ່ໃນຄວາມຈິງມາດົນແລ້ວກັບຄົນທີ່ຫາກໍຮຽນໃໝ່ອາດຈະເຫັນແງ່ມຸມທີ່ຕ່າງກັນຈາກພະຄຳພີຂໍ້ດຽວກັນ. ສະພາບການຂອງເຮົາຫຼືສິ່ງທີ່ເຮົາເຮັດໃນການຮັບໃຊ້ພະເຢໂຫວາອາດປ່ຽນໄປຕັ້ງແຕ່ເຮົາຮັບບັບເຕມາ. ເມື່ອເຮົາເອົາຄຳສອນໃນຄຳພີໄບເບິນທີ່ເຮົາໄດ້ຮຽນແຕ່ດົນແລ້ວມາໃຊ້ກັບສະພາບການຂອງເຮົາໃນຕອນນີ້ ເຮົາອາດຈະເຫັນວິທີໃໝ່ໆທີ່ຈະຊ່ວຍເຮົາໃນເລື່ອງທີ່ເຮົາເຈິຢູ່. ໃຫ້ມາເບິ່ງວ່າຄົນທີ່ຢູ່ໃນຄວາມຈິງມາດົນແລ້ວສາມາດຮຽນຮູ້ຫຍັງຈາກຄຳສອນພື້ນຖານ 3 ເລື່ອງໃນຄຳພີໄບເບິນ.
ພະເຢໂຫວາເປັນຜູ້ສ້າງ
4. ການຮູ້ວ່າພະເຢໂຫວາເປັນຜູ້ສ້າງສົ່ງຜົນຕໍ່ເຮົາແນວໃດ?
4 ຄຳພີໄບເບິນບອກວ່າຜູ້ທີ່ສ້າງທຸກສິ່ງແມ່ນພະເຈົ້າ. ຍ້ອນແນວນີ້ເຮົາຈຶ່ງຮູ້ວ່າຜູ້ສ້າງທີ່ມີສະຕິປັນຍາແລະມີລິດເດດເປັນຜູ້ສ້າງໂລກແລະທຸກສິ່ງທີ່ຢູ່ໃນໂລກນີ້. (ຮຣ. 3:4) ແຕ່ຍັງມີອີກຫຼາຍເລື່ອງທີ່ເຮົາຮຽນຮູ້ໄດ້ຈາກການຮູ້ວ່າມີຜູ້ສ້າງ. ຍ້ອນພະເຢໂຫວາສ້າງເຮົາ ເພິ່ນຈຶ່ງຮູ້ທຸກສິ່ງກ່ຽວກັບໂຕເຮົາ. ເພິ່ນຍັງເປັນຫ່ວງເຮົາແລະຮູ້ວ່າອັນໃດດີທີ່ສຸດສຳລັບເຮົາ. ການຮູ້ວ່າພະເຢໂຫວາເປັນຜູ້ສ້າງສົ່ງຜົນຕໍ່ຊີວິດຂອງເຮົາໃນຫຼາຍໆທາງແລະເຮັດໃຫ້ຊີວິດເຮົາມີຈຸດມຸ່ງໝາຍ.
5. ການຮູ້ຄວາມຈິງໃນເລື່ອງໃດຊ່ວຍເຮົາໃຫ້ເປັນຄົນຖ່ອມ? (ເອຊາຢາ 45:9-12)
5 ການຮູ້ຄວາມຈິງທີ່ວ່າພະເຢໂຫວາເປັນຜູ້ສ້າງສອນເຮົາວ່າເຮົາຄວນເປັນຄົນຖ່ອມ. ຕົວຢ່າງເຊັ່ນ: ມີໄລຍະໜຶ່ງໂຢບມີຄວາມຄິດທີ່ບໍ່ຖືກຕ້ອງກ່ຽວກັບພະເຢໂຫວາ ລາວລືມວ່າອັນໃດແມ່ນສິ່ງທີ່ສຳຄັນທີ່ສຸດ. ລາວຄິດເຖິງແຕ່ໂຕເອງຫຼາຍໂພດແລະພະຍາຍາມພິສູດວ່າລາວເປັນຝ່າຍຖືກ. ແຕ່ພະເຢໂຫວາເຕືອນລາວໃຫ້ຈື່ວ່າເພິ່ນເປັນຜູ້ສ້າງທີ່ມີລິດເດດສູງສຸດ. (ໂຢບ 38:1-4) ການເຕືອນແບບນີ້ຊ່ວຍໂຢບໃຫ້ເຂົ້າໃຈວ່າແນວທາງຂອງພະເຢໂຫວາຢູ່ເໜືອແນວທາງຂອງມະນຸດ. ຕໍ່ມາ ຜູ້ພະຍາກອນເອຊາຢາໄດ້ຂຽນສິ່ງທີ່ສອດຄ່ອງກັນນີ້ວ່າ: “ດິນດາກຈະຖາມຊ່າງປັ້ນບໍວ່າ ‘ເຈົ້າປັ້ນຫຍັງ?’”—ອ່ານເອຊາຢາ 45:9-12
6. ຕອນໃດທີ່ເຮົາຄວນຄິດວ່າພະເຢໂຫວາເປັນຜູ້ສ້າງທີ່ເໜືອກວ່າເຮົາ? (ເບິ່ງຮູບນຳ)
6 ເມື່ອເຮົາຢູ່ໃນຄວາມຈິງມາດົນ ເຮົາອາດເລີ່ມເພິ່ງຄວາມຄິດຂອງໂຕເອງຫຼາຍໂພດແທນທີ່ຈະຊອກຫາການຊີ້ນຳຈາກພະເຢໂຫວາແລະຈາກຄຳພີໄບເບິນ. (ໂຢບ 37:23, 24) ແຕ່ການຄິດຢ່າງເລິກເຊິ່ງວ່າພະເຢໂຫວາເປັນຜູ້ສ້າງທີ່ມີສະຕິປັນຍາແລະມີລິດເດດຫຼາຍກວ່າເຮົາ ມັນຊ່ວຍເຮົາແນວໃດ? (ອຊຢ. 40:22; 55:8, 9) ການຮູ້ຄວາມຈິງນີ້ຈະຊ່ວຍເຮົາໃຫ້ເປັນຄົນຖ່ອມແລະບໍ່ເພິ່ງຄວາມຄິດຂອງໂຕເອງ.
ສິ່ງໃດຈະຊ່ວຍເຮົາໃຫ້ຈື່ວ່າຄວາມຄິດຂອງພະເຢໂຫວາເໜືອກວ່າຄວາມຄິດຂອງເຮົາ? (ເບິ່ງຂໍ້ 6)d
7. ຣາເຮລາໄດ້ເຮັດຫຍັງເພື່ອຈະຍອມຮັບການປ່ຽນແປງໃນອົງການ?
7 ພີ່ນ້ອງຣາເຮລາທີ່ຢູ່ສະໂລວີເນຍຮູ້ສຶກວ່າການຄິດເຖິງຄວາມຈິງທີ່ວ່າພະເຢໂຫວາເປັນຜູ້ສ້າງຊ່ວຍລາວໃຫ້ຍອມຮັບການປ່ຽນແປງໃນອົງການ. ລາວເວົ້າວ່າ: “ບາງເທື່ອມັນກໍບໍ່ງ່າຍສຳລັບຂ້ອຍທີ່ຈະຍອມຮັບການປັບປ່ຽນທີ່ມາຈາກພີ່ນ້ອງທີ່ນຳໜ້າ. ຕົວຢ່າງເຊັ່ນ: ເຖິງວ່າໄດ້ເບິ່ງລາຍງານຈາກຄະນະກຳມະການປົກຄອງ ປີ 2023 ຕອນ 8 ທີ່ເວົ້າເລື່ອງພີ່ນ້ອງຊາຍຈົ່ງໜວດ ແຕ່ຂ້ອຍກໍຍັງຕົກໃຈຍ້ອນເປັນເທື່ອທຳອິດທີ່ເຫັນພີ່ນ້ອງຊາຍທີ່ໃຫ້ຄຳບັນລະຍາຍຈົ່ງໜວດ. ສະນັ້ນ ຂ້ອຍຈຶ່ງອະທິດຖານຫາພະເຢໂຫວາເພື່ອໃຫ້ເພິ່ນຊ່ວຍຂ້ອຍໃຫ້ປັບໂຕຕໍ່ກັບການປ່ຽນແປງນີ້.” ຣາເຮລາເຂົ້າໃຈວ່າຍ້ອນພະເຢໂຫວາເປັນຜູ້ສ້າງສະຫວັນແລະໂລກນີ້ ເພິ່ນຈຶ່ງຮູ້ວິທີທີ່ດີທີ່ສຸດທີ່ຈະຊີ້ນຳອົງການຂອງເພິ່ນ. ຖ້າເຈົ້າຮູ້ສຶກວ່າຍາກທີ່ຈະປັບໂຕຕໍ່ກັບຄວາມເຂົ້າໃຈໃໝ່ແລະຍອມຮັບການປ່ຽນແປງໃໝ່ໆຂອງອົງການ ໃຫ້ໃຊ້ເວລາຄິດຕຶກຕອງວ່າພະເຢໂຫວາທີ່ເປັນຜູ້ສ້າງມີສະຕິປັນຍາແລະມີລິດເດດຫຼາຍສ່ຳໃດ.—ຣມ. 11:33-36
ເປັນຫຍັງພະເຈົ້າຍອມໃຫ້ມີຄວາມທຸກລຳບາກ
8. ການຮູ້ເຫດຜົນທີ່ພະເຈົ້າຍອມໃຫ້ມີຄວາມທຸກລຳບາກເປັນປະໂຫຍດຕໍ່ເຮົາແນວໃດ?
8 ເປັນຫຍັງພະເຈົ້າຍອມໃຫ້ມີຄວາມທຸກລຳບາກ? ບາງຄົນທີ່ບໍ່ຮູ້ຄຳຕອບຂອງຄຳຖາມນີ້ໃຈຮ້າຍໃຫ້ພະເຈົ້າຫຼືຄິດວ່າເພິ່ນບໍ່ມີຕົວຕົນຢູ່ແທ້. (ສພສ. 19:3) ແຕ່ເຮົາໄດ້ຮຽນຮູ້ວ່າມະນຸດເຈິຄວາມທຸກແລະຕາຍຍ້ອນບາບແລະຄວາມບໍ່ສົມບູນແບບ ບໍ່ແມ່ນຍ້ອນພະເຢໂຫວາ. ເຮົາຍັງໄດ້ຮຽນຮູ້ວ່າການທີ່ພະເຢໂຫວາອົດທົນກັບມະນຸດເປີດໂອກາດໃຫ້ຫຼາຍລ້ານຄົນໄດ້ມາຮູ້ຈັກເພິ່ນແລະຮູ້ວ່າພະເຢໂຫວາຈະກຳຈັດຄວາມທຸກລຳບາກໃຫ້ໝົດໄປຢ່າງຖາວອນ. (2ປຕ. 3:9, 15) ການຮູ້ເຫດຜົນເຫຼົ່ານີ້ເຮັດໃຫ້ເຮົາມີກຳລັງໃຈແລະຊ່ວຍເຮົາໃຫ້ໃກ້ຊິດກັບເພິ່ນຫຼາຍຂຶ້ນ.
9. ຕອນໃດທີ່ເຮົາຄວນຄິດເຖິງເຫດຜົນທີ່ພະເຢໂຫວາຍອມໃຫ້ມີຄວາມທຸກລຳບາກ?
9 ເຮົາຕ້ອງອົດທົນຕອນທີ່ລໍຖ້າໃຫ້ພະເຢໂຫວາກຳຈັດຄວາມທຸກລຳບາກໃຫ້ໝົດໄປ. ແຕ່ເມື່ອເຮົາຫຼືຄົນທີ່ເຮົາຮັກເຈິບັນຫາ ຄວາມບໍ່ຍຸຕິທຳ ຫຼືສູນເສຍຄົນທີ່ເຮົາຮັກ ເຮົາອາດສົງໄສວ່າເປັນຫຍັງພະເຢໂຫວາຄືບໍ່ຈັດການເລື່ອງນີ້ໄວໆ. (ຮບກ. 1:2, 3) ເມື່ອຮູ້ສຶກແບບນັ້ນ ເປັນສິ່ງທີ່ດີທີ່ເຮົາຈະຄິດເຖິງເຫດຜົນທີ່ວ່າເປັນຫຍັງພະເຢໂຫວາຍອມໃຫ້ຄົນດີເຈິກັບຄວາມຍາກລຳບາກ.a (ພສ. 34:19) ນອກຈາກນັ້ນ ໃຫ້ເຮົາຄິດເຖິງຄວາມຕ້ອງການຂອງພະເຢໂຫວາທີ່ຈະກຳຈັດຄວາມທຸກລຳບາກໃຫ້ໝົດໄປຢ່າງຖາວອນ.
10. ອັນໃດຊ່ວຍແອນໃຫ້ມີກຳລັງໃຈຫຼັງຈາກທີ່ແມ່ລາວຕາຍ?
10 ການຮູ້ເຫດຜົນທີ່ພະເຢໂຫວາຍອມໃຫ້ມີຄວາມທຸກລຳບາກຊ່ວຍເຮົາໃຫ້ອົດທົນໄດ້. ພີ່ນ້ອງແອນທີ່ຢູ່ເກາະມາຢັອດໃນມະຫາສະໝຸດອິນເດຍເວົ້າວ່າ: “ຕອນທີ່ແມ່ຂ້ອຍຕາຍສອງສາມປີກ່ອນ ຂ້ອຍໂສກເສົ້າເສຍໃຈຫຼາຍ. ແຕ່ຂ້ອຍກໍເຕືອນໂຕເອງເລື້ອຍໆວ່າພະເຢໂຫວາບໍ່ແມ່ນຕົ້ນເຫດຂອງເລື່ອງນີ້. ເພິ່ນຕ້ອງການແທ້ໆທີ່ຈະກຳຈັດຄວາມທຸກລຳບາກທຸກຢ່າງໃຫ້ໝົດໄປແລະຈະປຸກຄົນທີ່ເຮົາຮັກໃຫ້ຟື້ນຄືນມາ. ການຄິດຕຶກຕອງກ່ຽວກັບເລື່ອງເຫຼົ່ານີ້ຊ່ວຍຂ້ອຍໃຫ້ສະຫງົບໃຈແລະໄດ້ກຳລັງໃຈ.”
11. ການຮູ້ເຫດຜົນທີ່ພະເຢໂຫວາຍອມໃຫ້ມີຄວາມທຸກລຳບາກຊ່ວຍເຮົາແນວໃດໃຫ້ປະກາດຕໍ່ໆໄປ?
11 ການຮູ້ເຫດຜົນທີ່ພະເຢໂຫວາຍອມໃຫ້ມີຄວາມທຸກລຳບາກກະຕຸ້ນເຮົາໃຫ້ປະກາດຕໍ່ໆໄປ. ຫຼັງຈາກທີ່ເປໂຕບອກວ່າພະເຢໂຫວາອົດທົນກໍຍ້ອນເພິ່ນຢາກໃຫ້ຄົນກັບໃຈແລະລອດຊີວິດ ລາວຂຽນວ່າ: “ພວກເຈົ້າຕ້ອງຄິດໃຫ້ດີວ່າຄວນເປັນຄົນແບບໃດ. ພວກເຈົ້າຄວນປະພຶດໂຕໃຫ້ບໍລິສຸດແລະເຮັດສິ່ງທີ່ສະແດງວ່າພວກເຈົ້າຢ້ານຢຳພະເຈົ້າ.” (2ປຕ. 3:11) ການເຮັດວຽກປະກາດເປັນສິ່ງໜຶ່ງທີ່ສະແດງວ່າເຮົາ “ຢ້ານຢຳພະເຈົ້າ.” ເຮົາຮັກຜູ້ຄົນຄືກັບທີ່ພະເຢໂຫວາຮັກ ເຮົາຢາກໃຫ້ເຂົາເຈົ້າໄດ້ຢູ່ໃນໂລກໃໝ່. ພະເຢໂຫວາອົດທົນເພື່ອໃຫ້ຄົນທີ່ຢູ່ໃນເຂດຂອງເຈົ້າມີໂອກາດເຂົ້າມານະມັດສະການເພິ່ນ. ເຈົ້າມີສິດທິພິເສດທີ່ໄດ້ເປັນໝູ່ເຮັດວຽກຮ່ວມກັບພະເຢໂຫວາແລະຊ່ວຍຫຼາຍຄົນເທົ່າທີ່ເປັນໄປໄດ້ໃຫ້ຮຽນຮູ້ກ່ຽວກັບເພິ່ນກ່ອນທີ່ຈຸດຈົບຈະມາຮອດ.—1ກຣ. 3:9
ເຮົາມີຊີວິດຢູ່ໃນ “ສະໄໝສຸດທ້າຍ”
12. ການຮູ້ວ່າເຮົາມີຊີວິດຢູ່ໃນ “ສະໄໝສຸດທ້າຍ” ເຮັດໃຫ້ເຮົາໝັ້ນໃຈໃນເລື່ອງໃດ?
12 ຄຳພີໄບເບິນເວົ້າຖືກຕ້ອງວ່າຄົນໃນ “ສະໄໝສຸດທ້າຍ” ຈະເປັນແນວໃດ. (2ຕມ. 3:1-5) ເມື່ອເຮົາເບິ່ງການປະພຶດຂອງຄົນທີ່ຢູ່ອ້ອມຂ້າງເຮົາ ເຮົາກໍເຫັນແຈ້ງວ່າຄຳພີໄບເບິນເວົ້າຖືກແທ້ໆ. ເຮົາເຫັນວ່າຄວາມຄິດແລະການກະທຳຂອງຄົນຊົ່ວລົງເລື້ອຍໆ. ເລື່ອງນີ້ແຮ່ງເຮັດໃຫ້ເຮົາໝັ້ນໃຈຫຼາຍຂຶ້ນວ່າຄຳພີໄບເບິນເຊື່ອຖືໄດ້.—2ຕມ. 3:13-15
13. ຈາກຕົວຢ່າງປຽບທຽບຂອງພະເຢຊູໃນລູກາ 12:15-21 ເຮົາຄວນຖາມໂຕເອງແນວໃດ?
13 ການຮູ້ວ່າເຮົາມີຊີວິດຢູ່ໃນສະໄໝສຸດທ້າຍຍັງຊ່ວຍເຮົາໃຫ້ຈົດຈໍ່ໃນສິ່ງທີ່ສຳຄັນແທ້ໆ. ໃຫ້ມາເບິ່ງວ່າເຮົາຮຽນຫຍັງໃນເລື່ອງນີ້ຈາກຕົວຢ່າງປຽບທຽບຂອງພະເຢຊູໃນລູກາ 12:15-21. (ອ່ານ) ເປັນຫຍັງຈຶ່ງເອີ້ນຜູ້ຊາຍທີ່ຮັ່ງວ່າ “ຄົນບໍ່ຮູ້ຈັກຄິດ”? ເພິ່ນເວົ້າແບບນັ້ນບໍ່ແມ່ນຍ້ອນລາວເປັນຄົນຮັ່ງ ແຕ່ຍ້ອນລາວຈັດລຳດັບຄວາມສຳຄັນບໍ່ຖືກ. ລາວສະສົມ “ຊັບສົມບັດໄວ້ໃຫ້ໂຕເອງ ແຕ່ພະເຈົ້າບໍ່ໄດ້ຖືວ່າລາວເປັນຄົນຮັ່ງ.” ການໃຊ້ເວລາແບບບໍ່ສະຫຼາດເປັນຄວາມຜິດພາດທີ່ໃຫຍ່ແທ້ໆຂອງຜູ້ຊາຍຄົນນີ້ ຍ້ອນເວລາທີ່ລາວຈະມີຊີວິດຢູ່ເຫຼືອບໍ່ຫຼາຍ. ພະເຈົ້າເວົ້າກັບລາວວ່າ: “ຄືນນີ້ເຈົ້າຊິຕາຍ.” ເລື່ອງນີ້ສອນຫຍັງເຮົາ? ຍ້ອນຈຸດຈົບຂອງໂລກນີ້ໃກ້ຈະມາຮອດແລ້ວຈຶ່ງເຫຼືອເວລາບໍ່ຫຼາຍ. ສະນັ້ນ ໃຫ້ຖາມໂຕເອງວ່າ: ‘ເປົ້າໝາຍໃນຊີວິດຂອງຂ້ອຍສະແດງໃຫ້ເຫັນບໍວ່າຂ້ອຍຈົດຈໍ່ໃນສິ່ງທີ່ສຳຄັນທີ່ສຸດ? ຂ້ອຍຊ່ວຍລູກໃຫ້ຕັ້ງເປົ້າໝາຍແບບໃດໃນຊີວິດ? ຂ້ອຍໃຊ້ເວລາ ກຳລັງ ແລະເງິນຄຳຂອງຂ້ອຍເພື່ອເຮັດສິ່ງທີ່ສຳຄັນຕໍ່ພະເຢໂຫວາບໍຫຼືຂ້ອຍກຳລັງຈົດຈໍ່ໃນສິ່ງທີ່ເຮັດໃຫ້ໂຕເອງພໍໃຈ?
14. ເລື່ອງຂອງມິກິຊ່ວຍເຮົາແນວໃດໃຫ້ເຫັນວ່າເປັນເລື່ອງສຳຄັນທີ່ຈະຈື່ໄວ້ວ່າເຮົາມີຊີວິດຢູ່ໃນສະໄໝສຸດທ້າຍ?
14 ເມື່ອເຮົາຄິດເຖິງຄວາມຈິງທີ່ວ່າເຮົາກຳລັງມີຊີວິດຢູ່ໃນສະໄໝສຸດທ້າຍມັນກໍເຮັດໃຫ້ຄວາມຄິດຂອງເຮົາປ່ຽນໄປ. ເລື່ອງນີ້ເກີດຂຶ້ນກັບພີ່ນ້ອງຍິງຄົນໜຶ່ງຊື່ມິກິ. ລາວເລົ່າວ່າ: “ຕອນທີ່ຂ້ອຍຮຽນຈົບມັດທະຍົມຕອນປາຍ ຂ້ອຍຢາກຮຽນຕໍ່ມະຫາວິທະຍາໄລຫຼັກສູດການຮຽນຮູ້ເລື່ອງສັດ ແລ້ວເຮັດວຽກໃນດ້ານນີ້. ຂ້ອຍຍັງມີເປົ້າໝາຍເປັນໄພໂອເນຍປະຈຳແລະຢາກຮັບໃຊ້ໃນບ່ອນທີ່ຕ້ອງການຜູ້ປະກາດຫຼາຍກວ່າ. ພີ່ນ້ອງບາງຄົນໃນປະຊາຄົມແນະນຳຂ້ອຍໃຫ້ຄິດຄັກໆວ່າ ມັນຈະເປັນໄປໄດ້ແທ້ໆບໍທີ່ຈະເຮັດວຽກອາຊີບທີ່ຂ້ອຍຢາກເຮັດແລະທັງເຮັດຕາມເປົ້າໝາຍທາງຄວາມເຊື່ອ. ເຂົາເຈົ້າເຕືອນຂ້ອຍວ່າຈຸດຈົບຂອງໂລກນີ້ໃກ້ຈະມາຮອດແລ້ວ ແລະຍັງຊ່ວຍຂ້ອຍໃຫ້ຄິດເຖິງວ່າໃນໂລກໃໝ່ຂ້ອຍຈະມີເວລາຕະຫຼອດໄປທີ່ຈະຮຽນຮູ້ກ່ຽວກັບສັດທຸກຊະນິດ. ສະນັ້ນ ຂ້ອຍຈຶ່ງເລືອກຮຽນວິຊາຊີບທີ່ບໍ່ໄດ້ໃຊ້ເວລາດົນ. ການເລືອກແບບນີ້ຊ່ວຍຂ້ອຍໃຫ້ໄດ້ວຽກທີ່ຫາລ້ຽງໂຕເອງໄດ້ແລະເປັນໄພໂອເນຍໄດ້ນຳ. ຕໍ່ມາ ຂ້ອຍໄດ້ຍ້າຍໄປເອກົວດໍເຊິ່ງຢູ່ຫັ້ນຕ້ອງການຜູ້ປະກາດຫຼາຍ.” ຕອນນີ້ມິກິກັບຜົວຂອງລາວຮັບໃຊ້ໃນວຽກເບິ່ງແຍງໝວດຢູ່ເອກົວດໍ.
15. ເລື່ອງຂອງຢາໂກໂບຊ່ວຍເຮົາແນວໃດໃຫ້ເຫັນວ່າເຮົາບໍ່ຄວນເຊົາປະກາດກັບຄົນທີ່ຍັງບໍ່ທັນສະແດງຄວາມສົນໃຈຟັງຂ່າວດີ? (ເບິ່ງຮູບນຳ)
15 ເຮົາບໍ່ຄວນທໍ້ໃຈເມື່ອຄົນບໍ່ສົນໃຈຟັງຂ່າວດີທີ່ເຮົາປະກາດ. ຄົນເຮົາປ່ຽນແປງໄດ້. ຂໍໃຫ້ເບິ່ງຕົວຢ່າງຂອງຢາໂກໂບນ້ອງຊາຍຂອງພະເຢຊູ. ລາວເຫັນພະເຢຊູເຕີບໃຫຍ່ ເຫັນເພິ່ນເຮັດໃຫ້ຄຳພະຍາກອນກ່ຽວກັບເມຊີອາເກີດຂຶ້ນແທ້ ແລະເຫັນເພິ່ນສອນໃນແບບທີ່ບໍ່ມີໃຜສອນແບບນັ້ນໄດ້. ແຕ່ຢາໂກໂບໄດ້ໃຊ້ເວລາຫຼາຍປີຈຶ່ງເຂົ້າມາເປັນລູກສິດຂອງພະເຢຊູ. ລາວເຂົ້າມາເປັນລູກສິດຂອງພະເຢຊູຫຼັງຈາກທີ່ເພິ່ນຟື້ນຄືນມາຈາກຕາຍແລ້ວ ແລະລາວເປັນຜູ້ປະກາດທີ່ກະຕືລືລົ້ນຫຼາຍ.b (ຢຮ. 7:5; ຄລຕ. 2:9) ເປັນເລື່ອງສຳຄັນທີ່ເຮົາຈະບໍ່ເຊົາປະກາດກັບຄົນໃນຄອບຄົວແລະຍາດຕິພີ່ນ້ອງທີ່ຍັງບໍ່ທັນສົນໃຈໃນຂ່າວດີ ແລະບໍ່ເຊົາປະກາດກັບຄົນທີ່ບໍ່ສົນໃຈຟັງເຮົາກ່ອນໜ້ານີ້. ຂໍໃຫ້ຈື່ໄວ້ວ່າເຮົາກຳລັງມີຊີວິດຢູ່ໃນສະໄໝສຸດທ້າຍ. ສະນັ້ນ ວຽກປະກາດຈຶ່ງເປັນວຽກທີ່ຮີບດ່ວນ. ສິ່ງທີ່ເຈົ້າເວົ້າກັບເຂົາເຈົ້າໃນຕອນນີ້ເຂົາເຈົ້າອາດຈະຄິດພໍ້ໃນພາຍຫຼັງ. ບາງເທື່ອເຂົາເຈົ້າອາດຈະຄິດພໍ້ຫຼັງຈາກຄວາມທຸກລຳບາກຄັ້ງໃຫຍ່ເລີ່ມຕົ້ນຊ້ຳ.c
ອັນໃດຈະຊ່ວຍເຮົາບໍ່ໃຫ້ເຊົາປະກາດກັບຍາດຕິພີ່ນ້ອງທີ່ຍັງບໍ່ທັນສົນໃຈຟັງຂ່າວດີ? (ເບິ່ງຂໍ້ 15)e
ໃຫ້ເຫັນຄ່າຄຳສອນພື້ນຖານໃນຄຳພີໄບເບິນສະເໝີ
16. ເຮົາໄດ້ຮັບປະໂຫຍດຫຍັງຈາກຄຳສອນພື້ນຖານໃນຄຳພີໄບເບິນ? (ເບິ່ງຂອບ “ໃຊ້ຄວາມຈິງໃນຄຳພີໄບເບິນເພື່ອຊ່ວຍຄົນອື່ນ” ນຳ)
16 ຄວາມຮູ້ບາງຢ່າງທີ່ເຮົາໄດ້ຮັບແມ່ນສຳລັບຄົນທີ່ບໍ່ເຄີຍຮູ້ຈັກເລື່ອງໃນຄຳພີໄບເບິນ. ຕົວຢ່າງເຊັ່ນ: ຄຳບັນລະຍາຍສາທາລະນະໃນແຕ່ລະອາທິດ ບາງບົດຄວາມແລະບາງວິດີໂອໃນເວັບໄຊ jw.org ແລະປຶ້ມສະບັບສາທາລະນະແມ່ນກຽມໄວ້ສຳລັບຄົນທີ່ບໍ່ແມ່ນພະຍານພະເຢໂຫວາ. ເຖິງຈະເປັນແນວນັ້ນ ເຮົາກໍໄດ້ຮັບປະໂຫຍດຈາກຂໍ້ເຕືອນໃຈເຫຼົ່ານີ້ຍ້ອນມັນຊ່ວຍເຮົາໃຫ້ຮັກພະເຢໂຫວາຫຼາຍຂຶ້ນ ເຮັດໃຫ້ເຮົາເຊື່ອໝັ້ນໃນຄຳພີໄບເບິນຫຼາຍຂຶ້ນ ແລະຊ່ວຍເຮົາໃຫ້ສອນຄວາມຈິງໃນຄຳພີໄບເບິນເກັ່ງຂຶ້ນ.—ພສ. 19:7
17. ຕອນໃດແດ່ທີ່ເຮົາຄວນຄິດເຖິງຄຳສອນພື້ນຖານໃນຄຳພີໄບເບິນ?
17 ພວກເຮົາທີ່ຮັບໃຊ້ພະເຢໂຫວາມາດົນຮູ້ສຶກຕື່ນເຕັ້ນເມື່ອໄດ້ຮັບຄວາມເຂົ້າໃຈໃໝ່ກ່ຽວກັບຄວາມຈິງໃນຄຳພີໄບເບິນ. ເຮົາຍັງຮູ້ສຶກຂອບໃຈຄຳສອນພື້ນຖານໃນຄຳພີໄບເບິນທີ່ເຮົາໄດ້ຮຽນໃນຕອນທຳອິດເຊິ່ງຊ່ວຍເຮົາໃຫ້ໃກ້ຊິດກັບພະເຢໂຫວາ. ເມື່ອເຮົາໄດ້ຮັບການຊີ້ນຳຈາກອົງການ ແຕ່ເຮົາຄິດວ່າຄວາມຄິດຫຼືວິທີຂອງເຮົາດີກວ່າ ໃຫ້ເຮົາຖ່ອມໃຈແລະຈື່ໄວ້ວ່າພະເຢໂຫວາເປັນຜູ້ສ້າງທີ່ມີສະຕິປັນຍາແລະມີລິດເດດເປັນຜູ້ທີ່ຊີ້ນຳອົງການ. ເມື່ອເຮົາຫຼືຄົນທີ່ເຮົາຮັກເຈິບັນຫາ ໃຫ້ເຮົາອົດທົນແລະຄິດຕຶກຕອງວ່າເປັນຫຍັງພະເຢໂຫວາຍອມໃຫ້ມີຄວາມທຸກລຳບາກ. ຕອນທີ່ເຮົາຕັດສິນໃຈວ່າຈະໃຊ້ເວລາແລະຊັບສິນຂອງເຮົາແນວໃດ ໃຫ້ຈື່ໄວ້ວ່າເຮົາກຳລັງມີຊີວິດຢູ່ໃນສະໄໝສຸດທ້າຍແລະເວລາກໍເຫຼືອບໍ່ຫຼາຍ. ຂໍໃຫ້ຄຳສອນພື້ນຖານໃນຄຳພີໄບເບິນເຮັດໃຫ້ເຮົາເປັນຄົນສະຫຼາດຂຶ້ນແລະຊ່ວຍເຮົາໃຫ້ຮັບໃຊ້ພະເຢໂຫວາຢ່າງສັດຊື່ຕໍ່ໆໄປ.
ເພງທີ 95 ແສງສະຫວ່າງທີ່ແຮງກ້າຂຶ້ນ
a ເບິ່ງບົດຄວາມ “ເຫດຜົນທີ່ຄວາມທຸກທັງໝົດຈະໝົດໄປໃນບໍ່ຊ້າ” ໃນຫໍສັງເກດການ 15 ພຶດສະພາ 2007 ໜ້າ 21-25. (ພາສາໄທ)
c ເບິ່ງບົດຄວາມ “ເຮົາຮູ້ຫຍັງແດ່ກ່ຽວກັບການຕັດສິນຂອງພະເຢໂຫວາໃນອະນາຄົດ?” ໃນຫໍສັງເກດການ ເດືອນພຶດສະພາ ປີ 2024 ໜ້າ 8-13.
d ຄຳອະທິບາຍຮູບ: ຜູ້ເບິ່ງແຍງຄົນໜຶ່ງສະເໜີຄວາມຄິດເຫັນໃນການປະຊຸມຜູ້ເບິ່ງແຍງ ແຕ່ຜູ້ເບິ່ງແຍງຄົນອື່ນບໍ່ເຫັນດີນຳ. ຕໍ່ມາ ໃນຕອນກາງຄືນ ລາວແນມຂຶ້ນໄປເທິງຟ້າແລະຄິດຕຶກຕອງວ່າພະເຢໂຫວາເປັນຜູ້ສ້າງທີ່ມີສະຕິປັນຍາແລະມີລິດເດດຫຼາຍ. ເລື່ອງນີ້ຊ່ວຍລາວໃຫ້ເຂົ້າໃຈວ່າຄວາມຕ້ອງການຂອງພະເຢໂຫວາສຳຄັນກວ່າຄວາມຕ້ອງການຂອງລາວ.
e ຄຳອະທິບາຍຮູບ: ຕອນທີ່ພີ່ນ້ອງຍິງຄົນໜຶ່ງກຳລັງສຶກສາສ່ວນໂຕກ່ຽວກັບຫຼັກຖານທີ່ວ່າເຮົາມີຊີວິດຢູ່ໃນສະໄໝສຸດທ້າຍ ລາວໄດ້ໂທໄປເລົ່າໃຫ້ນ້ອງສາວຟັງກ່ຽວກັບເລື່ອງນີ້.