ເດັກນ້ອຍແລະໄວລຸ້ນ ພະຜູ້ສ້າງເຈົ້າຢາກໃຫ້ເຈົ້າມີຄວາມສຸກ
“ພະອົງໂຜດປະທານຂອງດີໃຫ້ເຈົ້າອີ່ມຈົນເຖົ້າແລ້ວ.”—ຄຳເພງ 103:5
1, 2. ເປັນຫຍັງຈຶ່ງສະຫຼາດທີ່ຈະເຊື່ອຟັງພະຜູ້ສ້າງເມື່ອເລືອກວ່າຈະເຮັດແນວໃດກັບຊີວິດ? (ເບິ່ງຮູບທຳອິດ)
ຖ້າເຈົ້າເປັນເດັກນ້ອຍຫຼືໄວລຸ້ນ ເຈົ້າອາດໄດ້ຮັບຄຳແນະນຳຫຼາຍຢ່າງກ່ຽວກັບອະນາຄົດ. ອາຈານສອນ ອາຈານທີ່ປຶກສາ ຫຼືຄົນອື່ນອາດບອກເຈົ້າວ່າເຈົ້າຕ້ອງຮຽນສູງໆແລະຊອກຫາວຽກທີ່ໄດ້ເງິນຫຼາຍໆ. ແຕ່ພະເຢໂຫວາໃຫ້ຄຳແນະນຳແຕກຕ່າງຈາກນັ້ນ. ແນ່ນອນວ່າພະເຢໂຫວາຢາກໃຫ້ເຈົ້າດຸໝັ່ນຮຽນໜັງສືເພື່ອທີ່ເຈົ້າຈະສາມາດຫາວຽກໄດ້ແລະເບິ່ງແຍງຕົວເອງໄດ້. (ໂກໂລດ 3:23) ແຕ່ພະອົງຍັງຮູ້ວ່າເຖິງວ່າເຈົ້າຍັງນ້ອຍ ເຈົ້າກໍຍັງມີເລື່ອງສຳຄັນທີ່ຕ້ອງຕັດສິນໃຈເຊິ່ງສົ່ງຜົນຕໍ່ອະນາຄົດຂອງເຈົ້າ. ດັ່ງນັ້ນ ພະອົງຈຶ່ງໃຫ້ຫຼັກການຫຼາຍຢ່າງເພື່ອຊີ້ນຳເຈົ້າ ແລະຊ່ວຍເຈົ້າໃຫ້ໃຊ້ຊີວິດໃນວິທີທີ່ເຮັດໃຫ້ພະອົງພໍໃຈໃນສະໄໝສຸດທ້າຍນີ້.—ມັດທາຍ 24:14
2 ຂໍໃຫ້ຈື່ວ່າພະເຢໂຫວາຮູ້ທຸກສິ່ງທຸກຢ່າງ. ພະອົງຮູ້ເຖິງສິ່ງທີ່ຈະເກີດຂຶ້ນໃນອະນາຄົດ ແລະຮູ້ວ່າຈຸດຈົບຂອງລະບົບນີ້ຢູ່ໃກ້ຫຼາຍສ່ຳໃດ. (ເອຊາອີ 46:10; ມັດທາຍ 24:3, 36) ພະເຢໂຫວາຍັງຮູ້ຈັກເຈົ້າເປັນຢ່າງດີ. ພະອົງຮູ້ວ່າສິ່ງໃດຈະເຮັດໃຫ້ເຈົ້າມີຄວາມສຸກແລະບໍ່ມີຄວາມສຸກ. ຄຳແນະນຳຂອງມະນຸດອາດເບິ່ງຄືວ່າດີ ແຕ່ຖ້າບໍ່ໄດ້ມາຈາກພະຄຳຂອງພະເຈົ້າ ນັ້ນກໍບໍ່ແມ່ນຄຳແນະນຳທີ່ດີແທ້ໆ.—ສຸພາສິດ 19:21
ສະຕິປັນຍາມາຈາກພະເຢໂຫວາຜູ້ດຽວເທົ່ານັ້ນ
3, 4. ການຟັງຄຳແນະນຳທີ່ບໍ່ດີສົ່ງຜົນຕໍ່ອາດາມກັບເອວາ ແລະລູກຫຼານຂອງເຂົາເຈົ້າແນວໃດ?
3 ຄຳແນະນຳທີ່ບໍ່ດີມີມາແຕ່ດົນແລ້ວ. ຊາຕານເປັນຜູ້ທຳອິດທີ່ໃຫ້ຄຳແນະນຳທີ່ບໍ່ດີກັບມະນຸດ. ມັນບອກເອວາວ່າລາວກັບອາດາມຈະມີຄວາມສຸກຫຼາຍກວ່ານີ້ຖ້າຕັດສິນໃຈເອົາເອງວ່າຈະໃຊ້ຊີວິດແນວໃດ. (ຕົ້ນເດີມ 3:1-6) ແຕ່ຊາຕານເຫັນແກ່ຕົວ! ມັນຢາກໃຫ້ອາດາມກັບເອວາ ລວມທັງລູກຫຼານຂອງເຂົາເຈົ້າເຊື່ອຟັງແລະນະມັດສະການມັນ ບໍ່ແມ່ນພະເຢໂຫວາ. ຊາຕານບໍ່ໄດ້ໃຫ້ຫຍັງກັບອາດາມແລະເອວາເລີຍ. ມີແຕ່ພະເຢໂຫວາຕ່າງຫາກທີ່ໃຫ້ທຸກສິ່ງທຸກຢ່າງກັບເຂົາເຈົ້າ. ພະອົງໃຫ້ເຂົາເຈົ້າເປັນຜົວເມຍທີ່ຮັກກັນ ມີສວນທີ່ສວຍງາມ ແລະມີຮ່າງກາຍສົມບູນແບບທີ່ຈະຢູ່ໄດ້ຕະຫຼອດໄປ.
4 ໜ້າເສຍດາຍ ອາດາມແລະເອວາບໍ່ໄດ້ເຊື່ອຟັງພະເຈົ້າ. ເຂົາເຈົ້າຕັດຕົວເອງອອກຈາກຜູ້ທີ່ໃຫ້ຊີວິດ. ຜົນທີ່ກໍຄື ເຂົາເຈົ້າຄ່ອຍໆເຖົ້າລົງແລະສຸດທ້າຍກໍຕາຍ ຄືກັບດອກໄມ້ທີ່ຖືກຕັດອອກຈາກຕົ້ນ. ລູກຫຼານຂອງເຂົາເຈົ້າເຊິ່ງລວມເຖິງພວກເຮົາກໍປະສົບແບບນັ້ນຄືກັນ. (ໂລມ 5:12) ຜູ້ຄົນສ່ວນຫຼາຍໃນທຸກມື້ນີ້ບໍ່ສົນໃຈສິ່ງທີ່ພະເຈົ້າບອກແລະມັກເຮັດຕາມໃຈຕົວເອງ. (ເອເຟດ 2:1-3) ຜົນເປັນແນວໃດ? ຄຳພີໄບເບິນບອກວ່າ: ຄົນທີ່ຕໍ່ຕ້ານພະເຢໂຫວາຈະ “ບໍ່ມີຄວາມປັນຍາ.”—ສຸພາສິດ 21:30
5. ພະເຈົ້າໝັ້ນໃຈຫຍັງກ່ຽວກັບມະນຸດ ແລະພະອົງຄິດຖືກບໍ?
5 ພະເຢໂຫວາໝັ້ນໃຈວ່າຍັງມີຫຼາຍຄົນເຊິ່ງລວມເຖິງເດັກນ້ອຍແລະໄວລຸ້ນທີ່ຢາກຮູ້ຈັກພະອົງແລະນະມັດສະການພະອົງ. (ຄຳເພງ 103:17, 18; 110:3) ພະເຢໂຫວາຖືວ່າເດັກນ້ອຍແລະໄວລຸ້ນເຫຼົ່ານີ້ມີຄ່າຫຼາຍ! ເຈົ້າເປັນໜຶ່ງໃນນັ້ນບໍ? ຖ້າແມ່ນ ເຈົ້າກໍຈະໄດ້ເພີດເພີນກັບ “ຂອງດີ” ຕ່າງໆຈາກພະເຈົ້າ ແລະສິ່ງເຫຼົ່ານີ້ຈະເຮັດໃຫ້ເຈົ້າມີຄວາມສຸກຫຼາຍຂຶ້ນ. (ອ່ານຄຳເພງ 103:5; ສຸພາສິດ 10:22) ເຮົາຈະພິຈາລະນາຂອງດີ 4 ຢ່າງເຫຼົ່ານີ້ຄື: ຄວາມຮູ້ທີ່ເຮັດໃຫ້ໃກ້ຊິດກັບພະເຈົ້າ ໝູ່ທີ່ດີທີ່ສຸດ ເປົ້າໝາຍທີ່ດີ ແລະອິດສະຫຼະແທ້.
ພະເຢໂຫວາໃຫ້ຄວາມຮູ້ທີ່ຊ່ວຍເຈົ້າໃຫ້ໃກ້ຊິດກັບພະອົງ
6. ເປັນຫຍັງເຮົາຈຶ່ງຄວນສົນໃຈທີ່ຈະໃກ້ຊິດກັບພະເຈົ້າ? ແລະພະເຢໂຫວາໄດ້ຈັດກຽມຫຍັງແດ່ເພື່ອຊ່ວຍເຮົາ?
6 ສັດບໍ່ໄດ້ຮູ້ສຶກວ່າມັນຢາກຮູ້ຈັກພະຜູ້ສ້າງ ແຕ່ເຮົາທີ່ເປັນມະນຸດເຮົາຮູ້ສຶກແບບນັ້ນ. (ມັດທາຍ 4:4) ຖ້າເຮົາເຊື່ອຟັງພະເຈົ້າ ເຮົາກໍຈະມີຄວາມເຂົ້າໃຈເລິກເຊິ່ງ ມີສະຕິປັນຍາ ແລະມີຄວາມສຸກ. ພະເຍຊູບອກວ່າ: “ຄົນທີ່ຮູ້ຕົວວ່າຈຳເປັນຕ້ອງເພິ່ງພະເຈົ້າກໍມີຄວາມສຸກ.” (ມັດທາຍ 5:3, ລ.ມ.) ພະເຈົ້າໃຫ້ເຮົາມີຄຳພີໄບເບິນແລະໃຊ້ “ທາດທີ່ສັດຊື່ແລະສຸຂຸມ” ຈັດກຽມສື່ແລະສິ່ງພິມຕ່າງໆເພື່ອຊ່ວຍເຮົາໃຫ້ມີຄວາມເຊື່ອທີ່ເຂັ້ມແຂງ. (ມັດທາຍ 24:45, ລ.ມ.) ເຮົາປຽບທຽບສື່ແລະສິ່ງພິມເຫຼົ່ານີ້ເປັນຄືກັບອາຫານເພາະມັນບຳລຸງລ້ຽງຄວາມເຊື່ອແລະເຮັດໃຫ້ສາຍສຳພັນຂອງເຮົາກັບພະເຢໂຫວາເຂັ້ມແຂງ. ເຮົາດີໃຈທີ່ໄດ້ມີສື່ແລະສິ່ງພິມທີ່ຫຼາກຫຼາຍເຫຼົ່ານີ້.—ເອຊາອີ 65:13, 14
7. ຄວາມຮູ້ຈາກພະເຈົ້າຈະຊ່ວຍເຮົາແນວໃດ?
7 ຄວາມຮູ້ຈາກພະເຈົ້າຈະຊ່ວຍເຮົາໃຫ້ມີສະຕິປັນຍາແລະຮູ້ຈັກຄິດໄຈ້ແຍກ ເຊິ່ງຈະປົກປ້ອງເຮົາໄວ້ຈາກຫຼາຍບັນຫາ. (ອ່ານສຸພາສິດ 2:10-14) ຕົວຢ່າງ: ສອງຄຸນລັກສະນະນີ້ຈະຊ່ວຍໃຫ້ຮູ້ຄຳຕົວະ ເຊັ່ນ ຄຳຕົວະວ່າບໍ່ມີຜູ້ສ້າງ ຫຼືເງິນແລະວັດຖຸສິ່ງຂອງຈະເຮັດໃຫ້ເຮົາມີຄວາມສຸກ. ສະຕິປັນຍາແລະການຮູ້ຈັກຄິດໄຈ້ແຍກຍັງຈະຊ່ວຍເຮົາໃຫ້ຫຼີກລ່ຽງຄວາມຕ້ອງການຫຼືນິດໄສທີ່ກໍ່ຜົນເສຍຫາຍແກ່ເຮົາ. ດັ່ງນັ້ນ ຂໍໃຫ້ເຮັດທຸກຢ່າງເພື່ອຈະເປັນຄົນມີສະຕິປັນຍາແລະຮູ້ຈັກຄິດໄຈ້ແຍກ. ແລ້ວເຮົາຈະເຫັນດ້ວຍຕົວເອງວ່າພະເຢໂຫວາຮັກເຮົາແລະຢາກໃຫ້ເຮົາໄດ້ຮັບສິ່ງທີ່ດີທີ່ສຸດ.—ຄຳເພງ 34:8; ເອຊາອີ 48:17, 18
8. ເປັນຫຍັງເຮົາຄວນໃກ້ຊິດພະເຈົ້າຫຼາຍຂຶ້ນໃນຕອນນີ້ ແລະນີ້ຈະເປັນປະໂຫຍດຕໍ່ເຮົາແນວໃດໃນອະນາຄົດ?
8 ອີກບໍ່ດົນ ໂລກຂອງຊາຕານຈະຖືກທຳລາຍ. ມີແຕ່ພະເຢໂຫວາເທົ່ານັ້ນທີ່ສາມາດປົກປ້ອງເຮົາແລະຈັດໃຫ້ເຮົາມີສິ່ງຈຳເປັນ ເຊິ່ງອາດຈະໝາຍເຖິງອາຫານໃນຄາບຕໍ່ໄປ. (ຫາບາກຸກ 3:2, 12-19) ຕອນນີ້ເປັນເວລາທີ່ຈະໃກ້ຊິດພະເຈົ້າຫຼາຍຂຶ້ນແລະໄວ້ວາງໃຈພະອົງໃຫ້ຫຼາຍຂຶ້ນ. (2 ເປໂຕ 2:9) ຖ້າເຮັດຢ່າງນັ້ນ ບໍ່ວ່າເຫດການອ້ອມຂ້າງເຮົາຈະເປັນແນວໃດ ເຮົາກໍຈະຮູ້ສຶກແບບດາວິດທີ່ບອກວ່າ: “ຂ້ານ້ອຍໄດ້ຕັ້ງໃຈໃຫ້ມີພະເຢໂຫວາຢູ່ພາຍໜ້າຂ້ານ້ອຍເລື້ອຍບໍ່ຂາດ. ຂ້ານ້ອຍຈະບໍ່ຫວັ່ນໄຫວຍ້ອນພະອົງສະຖິດຢູ່ຂ້າງຂວາຂ້ານ້ອຍ.”—ຄຳເພງ 16:8
ພະເຢໂຫວາໃຫ້ເຈົ້າມີໝູ່ທີ່ດີທີ່ສຸດ
9. (ກ) ຕາມໂຢຮັນ 6:44 ພະເຢໂຫວາເຮັດຫຍັງ? (ຂ) ການພົບຄົນທີ່ເປັນພະຍານພະເຢໂຫວາແຕກຕ່າງຈາກການພົບຄົນທົ່ວໄປແນວໃດ?
9 ຕອນທີ່ພົບຄົນທີ່ບໍ່ໄດ້ເປັນພະຍານພະເຢໂຫວາຄັ້ງທຳອິດ ເຈົ້າຮູ້ຈັກລາວຫຼາຍສ່ຳໃດ? ເຈົ້າອາດຮູ້ວ່າລາວຊື່ຫຍັງແລະໜ້າຕາເປັນແນວໃດເທົ່ານັ້ນ. ແຕ່ບໍ່ຄືກັບຕອນທີ່ເຈົ້າພົບກັບຄົນທີ່ເປັນພະຍານພະເຢໂຫວາຄັ້ງທຳອິດ. ເຈົ້າຮູ້ເລີຍວ່າລາວຮັກພະເຢໂຫວາ ແລະກໍຮູ້ວ່າພະອົງເຫັນບາງສິ່ງທີ່ດີໃນຕົວລາວຈຶ່ງຊວນລາວໃຫ້ເຂົ້າມາເປັນສະມາຊິກຄອບຄົວຂອງພະອົງ. (ອ່ານໂຢຮັນ 6:44) ບໍ່ວ່າຄົນນັ້ນຈະມາຈາກໃສຫຼືຖືກລ້ຽງມາແນວໃດ ເຈົ້າກໍຮູ້ຈັກລາວຫຼາຍ ແລະລາວກໍຮູ້ຈັກເຈົ້າຫຼາຍຄືກັນ!
ພະເຢໂຫວາຢາກໃຫ້ເຈົ້າມີໝູ່ທີ່ດີທີ່ສຸດແລະຕັ້ງເປົ້າໝາຍທີ່ດີ (ເບິ່ງຂໍ້ 9-12)
10, 11. ພະຍານພະເຢໂຫວາມີຫຍັງທີ່ຄືກັນ ແລະສິ່ງນີ້ສົ່ງຜົນຕໍ່ເຈົ້າແນວໃດ?
10 ທັນທີທີ່ພົບກັບພະຍານພະເຢໂຫວາ ເຈົ້າກໍຮູ້ວ່າລາວມີສິ່ງທີ່ສຳຄັນທີ່ສຸດໃນຊີວິດຄືກັນກັບເຈົ້າ. ເຈົ້າຮູ້ວ່າເຖິງວ່າເຈົ້າຈະເວົ້າພາສາອື່ນ ແຕ່ເຈົ້າກໍເວົ້າ “ພາສາບໍລິສຸດ” ແຫ່ງຄວາມຈິງຄືກັນ. (ໂຊໂຟນີ 3:9, ລ.ມ.) ນີ້ໝາຍຄວາມວ່າທັງເຈົ້າແລະລາວເຊື່ອໃນພະເຈົ້າອົງດຽວກັນ ໃຊ້ຊີວິດຕາມມາດຕະຖານດ້ານສິນລະທຳດຽວກັນ ແລະມີຄວາມຫວັງເລື່ອງອະນາຄົດຄືກັນ. ສິ່ງເຫຼົ່ານີ້ຊ່ວຍພວກເຈົ້າໃຫ້ເຊື່ອໃຈກັນແລະກັນ ແລະສ້າງສາຍສຳພັນທີ່ເຮັດໃຫ້ເປັນໝູ່ກັນຕະຫຼອດໄປ.
11 ດັ່ງນັ້ນ ເມື່ອເຈົ້ານະມັດສະການພະເຢໂຫວາ ເຈົ້າກໍເວົ້າໄດ້ຢ່າງເຕັມປາກວ່າເຈົ້າມີໝູ່ທີ່ດີທີ່ສຸດ. ເຈົ້າມີໝູ່ຢູ່ທົ່ວໂລກເຖິງວ່າຈະບໍ່ເຄີຍເຫັນກັນກໍຕາມ! ນອກຈາກພະຍານພະເຢໂຫວາແລ້ວ ເຈົ້າຄິດວ່າມີກຸ່ມໃດອີກບໍທີ່ມີຂອງຂວັນທີ່ມີຄ່າແບບນີ້?
ພະເຢໂຫວາຊ່ວຍເຈົ້າໃຫ້ຕັ້ງເປົ້າໝາຍທີ່ດີ
12. ເຈົ້າສາມາດຕັ້ງເປົ້າໝາຍທີ່ດີຫຍັງແດ່?
12 ອ່ານຜູ້ເທສະໜາປ່າວປະກາດ 11:9–12:1. ເຈົ້າມີເປົ້າໝາຍທີ່ກຳລັງພະຍາຍາມເຮັດໃຫ້ໄດ້ບໍ? ເຈົ້າອາດຕັ້ງເປົ້າໝາຍທີ່ຈະອ່ານຄຳພີໄບເບິນທຸກມື້ ອອກຄວາມຄິດເຫັນໃຫ້ດີຂຶ້ນ ເຮັດສ່ວນປະຊຸມໃຫ້ດີກວ່າເກົ່າ ຫຼືເຈົ້າອາດພະຍາຍາມໃຊ້ຄຳພີໄບເບິນໃຫ້ເກີດຜົນຫຼາຍຂຶ້ນໃນການປະກາດ. ເຈົ້າຮູ້ສຶກແນວໃດເມື່ອສັງເກດເຫັນວ່າເຈົ້າເອງພັດທະນາຂຶ້ນ ຫຼືເມື່ອຄົນອື່ນບອກວ່າເຈົ້າເຮັດໄດ້ດີຂຶ້ນ? ເຈົ້າຄົງຮູ້ສຶກມີຄວາມສຸກຫຼາຍ! ຍ້ອນຫຍັງ? ຍ້ອນເຈົ້າຮູ້ວ່າເຈົ້າກຳລັງເຮັດສິ່ງທີ່ພະເຢໂຫວາຢາກໃຫ້ເຈົ້າເຮັດຄືກັບທີ່ພະເຍຊູໄດ້ເຮັດ.—ຄຳເພງ 40:8; ສຸພາສິດ 27:11
13. ການຮັບໃຊ້ພະເຈົ້າດີກວ່າການຕິດຕາມເປົ້າໝາຍຂອງຄົນໃນໂລກນີ້ແນວໃດ?
13 ເມື່ອເຈົ້າຈົດຈໍ່ຢູ່ທີ່ວຽກຮັບໃຊ້ພະເຢໂຫວາ ເຈົ້າກໍກຳລັງເຮັດວຽກທີ່ຈະເຮັດໃຫ້ເຈົ້າມີຄວາມສຸກແລະມີຈຸດມຸ່ງໝາຍໃນຊີວິດ. ໂປໂລແນະນຳວ່າ: “ຂໍໃຫ້ໝັ້ນຄົງໄວ້ ຢ່າຫວັ່ນໄຫວ ໃຫ້ທຸ່ມເທກັບວຽກຂອງຜູ້ເປັນນາຍທີ່ມີໃຫ້ເຮັດຢ່າງຫຼວງຫຼາຍ ເພາະພວກເຈົ້າຮູ້ວ່າວຽກໜັກທີ່ພວກເຈົ້າເຮັດໃຫ້ກັບຜູ້ເປັນນາຍນັ້ນຈະບໍ່ເສຍລ້າໆແນ່ນອນ.” (1 ໂກລິນໂທ 15:58, ລ.ມ.) ແຕ່ເມື່ອຜູ້ຄົນຈົດຈໍ່ຢູ່ທີ່ເປົ້າໝາຍຂອງໂລກນີ້ ເຊັ່ນ: ການຫາເງິນໃຫ້ໄດ້ຫຼາຍໆ ຫຼືເປັນຄົນມີຊື່ສຽງ ເຮົາກໍເຫັນວ່າເຂົາເຈົ້າບໍ່ໄດ້ມີຄວາມສຸກແທ້. ເຖິງວ່າເຂົາເຈົ້າຈະປະສົບຄວາມສຳເລັດ ແຕ່ທີ່ຈິງແລ້ວ ຫຼາຍຄັ້ງເຂົາເຈົ້າກໍຮູ້ສຶກວ່າງເປົ່າ. (ລືກາ 9:25) ເຮົາຈະຮຽນເລື່ອງນີ້ຈາກຕົວຢ່າງຂອງກະສັດຊາໂລໂມນ.—ໂລມ 15:4
14. ເຈົ້າໄດ້ຮຽນຮູ້ຫຍັງຈາກການທົດລອງຂອງຊາໂລໂມນ?
14 ຊາໂລໂມນເປັນຄົນໜຶ່ງທີ່ຮັ່ງມີຫຼາຍທີ່ສຸດແລະມີອຳນາດຫຼາຍທີ່ສຸດ ລາວໄດ້ເຮັດການທົດລອງໜຶ່ງ. ລາວເວົ້າກັບຕົວເອງວ່າ: “ເຮົາຈະລອງເຮັດຫຍັງມ່ວນໆເບິ່ງ ແລະເບິ່ງວ່າຈະມີຫຍັງດີໆຕາມມາ.” (ຜູ້ເທສະໜາປ່າວປະກາດ 2:1-10, ລ.ມ.) ດັ່ງນັ້ນ ຊາໂລໂມນຈຶ່ງສ້າງວັງທີ່ຫຼູຫຼາ ອອກແບບສວນທີ່ສວຍງາມກັບສວນສາທາລະນະ ແລະໄດ້ເຮັດທຸກຢ່າງທີ່ລາວຢາກເຮັດ. ແຕ່ລາວມີຄວາມພໍໃຈແລະມີຄວາມສຸກບໍ? ເມື່ອຊາໂລໂມນເບິ່ງຫວນຄືນທຸກສິ່ງທີ່ລາວໄດ້ເຮັດ ລາວບອກວ່າ: “ການນັ້ນເປັນແຕ່ຄວາມເປົ່າ . . . ບໍ່ມີປະໂຫຍດໃນການນັ້ນ.” (ຜູ້ເທສະໜາປ່າວປະກາດ 2:11) ເຈົ້າໄດ້ບົດຮຽນຈາກສິ່ງທີ່ຊາໂລໂມນໄດ້ທົດລອງເຮັດບໍ?
15. ຕາມທີ່ໄດ້ຮຽນຈາກຄຳເພງ 32:8 ເປັນຫຍັງເຈົ້າຕ້ອງມີຄວາມເຊື່ອແລະຄວາມເຊື່ອຊ່ວຍເຈົ້າແນວໃດ?
15 ບາງຄົນໄດ້ບົດຮຽນຊີວິດຍ້ອນເຮັດຜິດພາດແລະໄດ້ຮັບຜົນເສຍຫາຍ. ພະເຢໂຫວາບໍ່ຢາກໃຫ້ສິ່ງນີ້ເກີດຂຶ້ນກັບເຈົ້າ. ພະອົງຢາກໃຫ້ເຈົ້າເຊື່ອຟັງແລະເຮັດຕາມທີ່ພະອົງບອກ. ເພື່ອຈະເຮັດແບບນັ້ນໄດ້ ເຈົ້າຕ້ອງມີຄວາມເຊື່ອ ແລະເຈົ້າຈະບໍ່ມີວັນເສຍໃຈທີ່ເລືອກເຮັດຕາມຄວາມເຊື່ອນັ້ນ. ພະເຢໂຫວາບໍ່ມີວັນລືມ “ຄວາມຮັກທີ່ທ່ານທັງຫຼາຍໄດ້ສຳແດງສຳລັບນາມຊື່ຂອງພະອົງ.” (ເຫບເລີ 6:10) ດັ່ງນັ້ນ ໃຫ້ພະຍາຍາມຢ່າງເຕັມທີເພື່ອເຮັດໃຫ້ຄວາມເຊື່ອເຂັ້ມແຂງ. ແລ້ວເຈົ້າຈະຕັດສິນໃຈໄດ້ດີໃນຊີວິດ ແລະເຈົ້າກໍຈະເຫັນວ່າພະເຢໂຫວາພໍ່ໃນສະຫວັນຢາກໃຫ້ເຈົ້າໄດ້ສິ່ງທີ່ດີທີ່ສຸດໃນຊີວິດ.—ອ່ານຄຳເພງ 32:8
ການເຊື່ອຟັງພະເຢໂຫວາສົ່ງຜົນດີຕໍ່ເຮົາແລະເຮັດໃຫ້ເຮົາເປັນອິດສະຫຼະແທ້ໆ
ພະເຈົ້າໃຫ້ເຈົ້າເປັນອິດສະຫຼະແທ້ໆ
16. ເປັນຫຍັງເຮົາຄວນເຫັນຄຸນຄ່າອິດສະຫຼະພາບແລະໃຊ້ມັນຢ່າງສະຫຼາດ?
16 ໂປໂລຂຽນວ່າ: “ຄົນທີ່ໄດ້ຮັບພະລັງຂອງພະເຢໂຫວາກໍມີອິດສະຫຼະ.” (2 ໂກລິນໂທ 3:17, ລ.ມ.) ພະເຢໂຫວາຮັກອິດສະຫຼະພາບ ແລະພະອົງກໍສ້າງເຈົ້າໃຫ້ຮັກອິດສະຫຼະພາບຄືກັນ. ແຕ່ພະອົງຢາກໃຫ້ເຈົ້າໃຊ້ອິດສະຫຼະຂອງເຈົ້າຢ່າງສະຫຼາດເພື່ອຈະປົກປ້ອງເຈົ້າ. ໝູ່ຂອງເຈົ້າບາງຄົນອາດເບິ່ງສິ່ງລາມົກ ເຮັດຜິດສິນລະທຳທາງເພດ ຫຼິ້ນກິລາທີ່ສ່ຽງຊີວິດ ໃຊ້ຢາເສບຕິດ ຫຼືກິນເຫຼົ້າຫຼາຍໂພດ. ທຳອິດ ເບິ່ງຄືວ່າສິ່ງເຫຼົ່ານີ້ເປັນສິ່ງທີ່ມ່ວນຊື່ນຫຼືໜ້າຕື່ນເຕັ້ນ ແຕ່ສຸດທ້າຍກໍປະສົບຜົນເສຍຮ້າຍແຮງ ເຊັ່ນ: ຕິດພະຍາດ ຕິດເຫຼົ້າຕິດຢາ ແລະເຖິງຂັ້ນເສຍຊີວິດ. (ຄາລາຊີ 6:7, 8) ເດັກນ້ອຍແລະໄວລຸ້ນທີ່ຫຍຸ້ງກ່ຽວກັບສິ່ງເຫຼົ່ານີ້ອາດຄິດວ່າເຂົາເຈົ້າເປັນອິດສະຫຼະ ແຕ່ທີ່ຈິງເຂົາເຈົ້າບໍ່ໄດ້ເປັນແບບນັ້ນ.—ຕິໂຕ 3:3
17, 18. (ກ) ການເຊື່ອຟັງພະເຈົ້າເຮັດໃຫ້ເຮົາເປັນອິດສະຫຼະແທ້ແນວໃດ? (ຂ) ອາດາມແລະເອວາມີອິດສະຫຼະຫຼາຍກວ່າມະນຸດໃນທຸກມື້ນີ້ແນວໃດ?
17 ກົງກັນຂ້າມ ການເຊື່ອຟັງພະເຢໂຫວາສົ່ງຜົນດີຕໍ່ເຮົາ. ການເຊື່ອຟັງພະອົງສົ່ງຜົນດີຕໍ່ສຸຂະພາບແລະເຮັດໃຫ້ເຮົາເປັນອິດສະຫຼະແທ້ໆ. (ຄຳເພງ 19:7-11) ຖ້າເຈົ້າໃຊ້ອິດສະຫຼະຂອງເຈົ້າໃນວິທີທີ່ສະຫຼາດໂດຍເລືອກເຮັດຕາມກົດໝາຍແລະຫຼັກການທີ່ສົມບູນແບບຂອງພະເຈົ້າ ເຈົ້າກໍສະແດງໃຫ້ທັງພະເຈົ້າແລະພໍ່ແມ່ຂອງເຈົ້າເຫັນວ່າເຈົ້າເປັນຄົນທີ່ມີຄວາມຮັບຜິດຊອບ. ພໍ່ແມ່ຂອງເຈົ້າຄົງຈະໄວ້ໃຈເຈົ້າຫຼາຍຂຶ້ນແລະໃຫ້ອິດສະຫຼະຫຼາຍຂຶ້ນ. ພະເຢໂຫວາສັນຍາວ່າບໍ່ດົນພະອົງຈະໃຫ້ອິດສະຫຼະທີ່ສົມບູນແບບແກ່ຜູ້ຮັບໃຊ້ທີ່ສັດຊື່ຂອງພະອົງທຸກຄົນ ເຊິ່ງຄຳພີໄບເບິນເອີ້ນວ່າ: “ອິດສະລະພາບອັນຮຸ່ງເຮືອງແຫ່ງບັນດາລູກຂອງພະເຈົ້າ.”—ໂລມ 8:21, ທ.ປ.
18 ນີ້ເປັນອິດສະຫຼະພາບແບບດຽວກັບທີ່ອາດາມແລະເອວາເຄີຍມີ. ຕອນທີ່ຢູ່ໃນສວນເອເດນ ມີສິ່ງດຽວທີ່ພະເຈົ້າບອກເຂົາເຈົ້າບໍ່ໃຫ້ເຮັດນັ້ນຄື ຫ້າມກິນໝາກໄມ້ຈາກຕົ້ນໜຶ່ງ. (ຕົ້ນເດີມ 2:9, 17) ເຈົ້າຄິດວ່າພະເຈົ້າບໍ່ຍຸຕິທຳຫຼືເຂັ້ມງວດຫຼາຍເກີນໄປບໍທີ່ໃຫ້ກົດໝາຍນີ້ກັບເຂົາເຈົ້າ? ບໍ່ເລີຍ! ລອງຄິດເບິ່ງວ່າມະນຸດໄດ້ຕັ້ງກົດໝາຍຫຼາຍຂໍ້ສ່ຳໃດແລ້ວບັງຄັບໃຫ້ຄົນອື່ນເຮັດຕາມ. ແຕ່ພະເຢໂຫວາໃຫ້ກົດໝາຍພຽງຂໍ້ດຽວກັບອາດາມແລະເອວາ.
19. ພະເຢໂຫວາແລະພະເຍຊູກຳລັງສອນຫຍັງເຮົາເພື່ອຈະຊ່ວຍເຮົາໃຫ້ເປັນອິດສະຫຼະ?
19 ພະເຢໂຫວາປະຕິບັດກັບເຮົາໃນວິທີທີ່ສະຫຼາດຫຼາຍ. ແທນທີ່ຈະໃຫ້ກົດໝາຍບັກຫຼາຍໆຂໍ້ກັບເຮົາ ພະອົງໄດ້ອົດທົນສອນກົດໝາຍກ່ຽວກັບຄວາມຮັກໃຫ້ເຮົາ. ພະອົງສອນເຮົາໃຫ້ໃຊ້ຊີວິດຕາມຫຼັກການຂອງພະອົງແລະກຽດຊັງສິ່ງທີ່ຊົ່ວ. (ໂລມ 12:9) ໃນຄຳເທດເທິງພູເຂົາ ພະເຍຊູລູກຊາຍຂອງພະອົງຊ່ວຍເຮົາໃຫ້ເຂົ້າໃຈວ່າເປັນຫຍັງຜູ້ຄົນຈຶ່ງເຮັດຊົ່ວ. (ມັດທາຍ 5:27, 28) ໃນໂລກໃໝ່ ພະເຍຊູເຊິ່ງເປັນກະສັດຂອງລາຊະອານາຈັກພະເຈົ້າຈະສອນເຮົາຕໍ່ໆໄປໃຫ້ຮູ້ວ່າອັນໃດຖືກອັນໃດຜິດຄືກັບເພິ່ນ. (ເຫບເລີ 1:9) ພະເຍຊູຍັງຈະເຮັດໃຫ້ເຮົາມີຄວາມຄິດແລະຮ່າງກາຍທີ່ສົມບູນແບບ. ຂໍໃຫ້ນຶກພາບວ່າເຈົ້າຮູ້ສຶກແນວໃດຖ້າບໍ່ໄດ້ຖືກລໍ້ໃຈໃຫ້ເຮັດຊົ່ວແລະບໍ່ປະສົບກັບຄວາມທຸກລຳບາກຍ້ອນຄວາມບໍ່ສົມບູນແບບ. ໃນທີ່ສຸດ ເຮົາຈະມີ “ອິດສະລະພາບອັນຮຸ່ງເຮືອງ” ທີ່ພະເຢໂຫວາສັນຍາໄວ້.
20. (ກ) ພະເຢໂຫວາໃຊ້ອິດສະຫຼະຂອງພະອົງແນວໃດ? (ຂ) ເຮົາຈະຮຽນແບບພະອົງໄດ້ແນວໃດ?
20 ໃນໂລກໃໝ່ ອິດສະຫຼະພາບຂອງເຮົາກໍຍັງຈະມີຂີດຈຳກັດຢູ່. ແນວໃດ? ເຮົາຍັງຕ້ອງມີແຮງກະຕຸ້ນທີ່ເກີດຈາກຄວາມຮັກທີ່ມີຕໍ່ພະເຈົ້າແລະຕໍ່ຄົນອື່ນ. ເມື່ອເຮົາໃຫ້ຄວາມຮັກຊີ້ນຳ ເຮົາກໍຮຽນແບບພະເຢໂຫວາ. ເຖິງວ່າພະເຢໂຫວາມີອິດສະຫຼະແບບບໍ່ຈຳກັດ ແຕ່ພະອົງກໍໃຫ້ຄວາມຮັກຊີ້ນຳທຸກສິ່ງທີ່ພະອົງເຮັດ ລວມເຖິງວິທີທີ່ພະອົງປະຕິບັດກັບເຮົາ. (1 ໂຢຮັນ 4:7, 8) ດັ່ງນັ້ນຈຶ່ງມີເຫດຜົນທີ່ວ່າເຮົາຈະມີອິດສະຫຼະແທ້ໄດ້ກໍຕໍ່ເມື່ອເຮົາຮຽນແບບພະເຢໂຫວາ.
21. (ກ) ດາວິດຮູ້ສຶກແນວໃດກ່ຽວກັບພະເຢໂຫວາ? (ຂ) ເຮົາຈະພິຈາລະນາເລື່ອງຫຍັງໃນບົດຄວາມຕໍ່ໄປ?
21 ເຈົ້າຂອບໃຈພະເຢໂຫວາສຳລັບສິ່ງດີຕ່າງໆທີ່ພະອົງໄດ້ໃຫ້ເຈົ້າບໍ? ພະອົງໃຫ້ເຈົ້າມີຄວາມຮູ້ທີ່ເຮັດໃຫ້ໃກ້ຊິດກັບພະເຈົ້າ ມີໝູ່ທີ່ດີທີ່ສຸດ ເປົ້າໝາຍທີ່ດີ ແລະຄວາມຫວັງທີ່ຈະມີອິດສະຫຼະທີ່ສົມບູນແບບໃນອະນາຄົດ ລວມທັງຂອງຂວັນທີ່ດີເລີດຫຼາຍຢ່າງ. (ຄຳເພງ 103:5) ເຈົ້າອາດຮູ້ສຶກຄືກັບດາວິດຕອນທີ່ລາວອະທິດຖານເຊິ່ງຂຽນໄວ້ໃນຄຳເພງ 16:11 (ລ.ມ.) ທີ່ວ່າ: “ພະອົງເຮັດໃຫ້ຂ້ອຍຮູ້ຈັກທາງແຫ່ງຊີວິດ ຂ້ອຍດີໃຈທີ່ໄດ້ຢູ່ໃກ້ຊິດພະອົງ ແລະມີຄວາມສຸກທີ່ໄດ້ຢູ່ຂ້າງຂວາມືຂອງພະອົງຕະຫຼອດໄປ.” ໃນບົດຄວາມຕໍ່ໄປ ເຮົາຈະພິຈາລະນາຄວາມຈິງທີ່ມີຄ່າອື່ນໆຈາກຄຳເພງບົດ 16. ຄວາມຈິງເຫຼົ່ານີ້ຈະຊ່ວຍເຈົ້າໃຫ້ຮູ້ວ່າເຈົ້າຈະເຮັດແນວໃດເພື່ອຈະມີຊີວິດທີ່ດີທີ່ສຸດ!