KALABO 34

Da Leve Ɣɛ Le De Dɛ Ga Wõila Ɣa De Ya Jehova Ʋaa Ma?

Printed Edition

E lɔtɔga sa Jehova va e leve siɛgi va e tɔɔ-zeini la ga e Gala Kɔlɔi maa woli? E wõini e ɣaa-ɓaa e ya ziɛ-pului zu-ɓaa wo yɔɔzu wa Jehova? Ani na ɣa e wõini e kɛ, kwɛ̃ɛ ga ani Jehova ɣa wɛlɛna e va yiɛ ya wõilai maa wɔɔlɔ faa ma towa wõi ga yiɛ, e ɓɛdɛ e ma. Ya leve sa ɣɛ le e dɛ ga wõila ɣa e ya Jehova ʋaa ma?

1. Da leve ɣɛ le de dɛ ga wõila ɣa de ya Jehova ʋaa ma?

Da dɛ ga wõila ɣa de ya Jehova ʋaa ma ani da goo-mɛni kulona zeea. (1 Jɔ̃ 5:3 lodo.) Ɛ lɛ ga kui nu nɛpɛ ma ga e goo-mɛni kulo Jehova ya. Kɛ e ɓega de ɓɔgapɛ ba ga de da ɣisu ani de wõini de goo-mɛni kulo zeea ɔɔ ani dɛ lɛ wõini dɔ goo-mɛni kulo zeea. Zɛɓɛ e kɛɛ Jehova yiɛ nii ɣɛ? E wõini de ‘kulo ɣigii zu ga de yɛ ga goo-mɛni kulo vea.’ (Loomɛitiɛ 6:17) Na zu-wulo-zu ɣa ga, de mɛlɛ nɔ goo-mɛni kulo zeea ɓɔvɛlaale manɛɛ de kɛ. Kɛ manɛɛ de goo-mɛni kulo zeea ɓɔvɛlaale wõila ɣa de ya faa ma. Kɔlɔi nii ma zɛvɛ 3 ɓɔga 4 ɓɛtɛvɛ ga e ɓɔ e va e dɛ ga wõila ɣa e ya Jehova ʋaa ma. Na ɣa ga ani da zii-mai ɣɛɛna de ɓeteve niitiɛ va tɛ lɛ ga zii-ma.

2. Zɛɓɛi e kɛɛ na ɣa ɓaa ga de dɛ ga wõila ɣa de ya Jehova ʋaa ma?

“Faa ɓaa lamaa ɣa la tele-bo bea ma.” (Psalms 34:19) De pɛ da ga faa yowũ ɣɛɛ vea. Naʋolo ʋaa ɣa ɓaa de ma, tele-bo-tala luo ɣa wo ga diɛ e vɛɛ sa faa ɓaa tamaa va. Ani faa ɓaa ka laana de ma ɣeeta na ɣa ɓaa ga de nii ɣɛ Jehova wõini de kɛ. Ɓɔvɛlaale na lɛ ɓaani ga de goo-mɛni-tala wulo Jehova ya. Kɛ ani ya ɣaa ɓaana e niitiɛ ɓɔgapɛ kɛ Jehova wõini e kɛ, towa dɛ ga wõila ɣa e ya faa ma e leve ŋɛni nɛpɛ ba. Ya zoo e ɣata Jehova va tɔ ɓalaa towa ɣata e va. Lɛ wɔlɔ-wɔlɔ wulu ɣa ʋega e va.—Psalms 4:3 lodo.

FAA LAMAA MAA WOLI

Wɛlɛ nii va e kɛɛ manɛɛ de goo-mɛni kulo Jehova ya e vɛɛ velei va da leve la ga de goo-mɛni kulo zeea.

3. Fai pilegɛi e va

E ɣɛ velei Gala Kɔlɔi boga la, nii Seeta boni ɛ lɛ nɔ Joobi to gila faa ma kɛ e ɣɛni ʋaazu niitiɛ ɓɔgapɛ ma te wõini te Jehova yii-mai ɣɛ. A Job 1:1, 6–2:10 lodo, wo gaa-zaɣa-kɛɛ niitiɛ ɣaa wote:

E ɣɛ velei Seeta boni la, zɛɓɛi e kɛɛni Joobi yiɛ goo-mɛni kulo Jehova ya?—Wɛlɛ Job 1:9-11 va.
Zɛɓɛi Seeta boni e vile nu ɓɔgapɛ ba?—Wɛlɛ Job 2:4 va.

A Job 27:5b lodo, wo gaa-zaɣa-kɛɛ nii ɣaa wote:

Joobi dɛɛni ɣɛ le ga wõila ɣɛni ɓɔɔ zeea Jehova ʋaa ma?

Seeta ɣa wũfe-ma lala wulozu ga Jehova. Seeta ɣa dɛɛzu ga wõila ɓɔɔɓɔɔ lɛ Joobi ya Jehova ʋaa ma nii dɔwɔi wuloni ma e vɛɛ Jehova ʋeli veaitiɛ va zaa. — Joobi dɛɛni ga wõila ɣa zeea Jehova ʋaa ma ga velei e ɣatani la Jehova va

Da dɛ ga wõila ɣa de ya Jehova ʋaa ma ani da ɣatana Jehova va

4. Kɛ Jehova wuuzu nɛɛ

A Proverbs 27:11 lodo, wo gaa-zaɣa-kɛɛ niitiɛ ɣaa wote:

Jehova ɣa ɣi-gaa-ziɛ ɣɛ le ani ya ɣɛna ga kele-ɣele nu, yiɛ goo-mɛni kulo zeea? Zɛɓɛi e kɛɛ yiɛ na wo?

5. Ya zoo e ɣata Jehova va

Ani wõila ɣana de ya Jehova ʋaa ma towa kɛ de yɛpɛ numaa wɔ e vile ba. Wõilai nii ɣa kɛ wɔnɔ de na ɣɛ ani ɓalaa na ɓaavɛ de yee ma. ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.

ƲILIOGI: Lo Kpã Zee-La-Mai Zu Ani Ɓalaa Faa Ɓaa Ka Laazu E Ma (5:09)

Na ɓaavɛ e yee ma ga e yɛpɛ numaa wɔ e vile Jehova va?
Ʋiliogi nii zu, zɛɓɛi e ɓɔni Grayson va ga e duoi yee maazu ɣale?

Na lɛ ɓaa ga de ɣata Jehova va ani da wõina ga niitiɛ e wõini la na ɣa ɣɛɛna de ɓeteve niitiɛ va lɛ wõini la. A Psalm 97:10 lodo, wo gaa-zaɣa-kɛɛ niitiɛ ɣaa wote:

Velei sa e maa wolia la, zɛɓɛi Jehova wõini la? Zɛɓɛi Jehova lɛ wõini la?
Ya leve ɣɛ le e wõi ga niitiɛ Jehova wõini la na ɣa ɣɛɛna e zili ga niitiɛ ɛ lɛ wõini la?

6. Ani da goo-mɛni kulona Jehova ya da wulo su-nu-ma

Tɔ ga faa vagɔ ga de goo-mɛni kulo Jehova ya. A Isaiah 48:17, 18 lodo, wo gaa-zaɣa-kɛɛ niitiɛ ɣaa wote:

E ɣisu manɛɛ de laala ga Jehova kwɛ̃ni nii pagɛi de ʋaa ma? Zɛɓɛi e kɛɛ yiɛ na wo?
Niitiɛ e maa wolia Gala Kɔlɔi zu tɔ ɓɔsu e va ɣɛ le? Gaama Ɣalagi Jehova ɣa ɓɔsu e va ɣɛ le?

NUMAA TANIGA TA ƔƐ TEA: “Dɛ lɛ zooga dɔ Gala yii-la.”