Kulombola Kamweno ka Myanda Umbūmi

NANSHA shi wisamba na muntu umo nansha na bemvwaniki bavule, kokalanga amba mwimvwaniki nansha bemvwaniki bobe bakasangela kishinte kyobe mwanda’po’tu abe usangedile’kyo. Musapu osapula shao udi na mvubu, ino shi ubulwe kulombola patōka kamweno kao umbūmi, bine kukalamapo kitatyi kilampe mutyima wa kusangela myanda udi na bemvwaniki bobe.

Ne ku Njibo ya Bulopwe nako i monka na monka. Bantu bakokeja kukwivwana shi ubaingidija kyelekejo nansha kusekununa mwanda okebaivwene kashā. Ino bakokeja kupuakanya ñeni shi wisambila pa myanda yobayukile kala, nakampata shi ubatunya kushimika pa mine myanda’ya. Ufwaninwe kwibakwasha bajingulule kine kikadile myanda yonena na kamweno ka binebine kobadi ne muswelo mwine oidi na kamweno.

Bible witukankamikanga kulanga na kutala mvubu ya bintu. (Nk. 3:21) Yehova wāingidije Yoano Umbatyiji akunkwije bantu ku ‘tunangu twa mvubu twa boba boloke.’ (Luka 1:17, NW) Tuno to tunangu twimanine mpata pa kwakamwa Yehova mobifwaninwe. (Mit. 111:10) Boba bakwata tuno tunangu na mutyika bapebwanga muswelo wa kunekenya būmi bwa dyalelo ne kulamata ku būmi bwinebwine, ke būmi bwa nyeke bwiya kumeso kadi.​—1 Tem. 4:8; 6:19.

Kulombola Kamweno ka Mwisambo. Shi usaka mwisambo obe wikale na mvubu, kufwaninwepo kuta mutyima mpata enka ku myanda ya kunena kete, mhm, ino ta’o ne ku bemvwaniki. Kokebamona enka bu kisumpi kya bantu. Ino yuka amba kino kisumpi i kibundwe na muntu umo umo ne na bisaka. Mukokeja kwikala bankasampe bininge, bansongwa, batame, ne bamobamo banunu. Mukokeja kwikala ne bapya basangela musapu ne boba bashilwile kwingidila Leza abe kwabutwilwe ne kubutulwa kwine. Bamo bakokeja kwikala bapye ku mushipiditu; bakwabo nabo bakitādilwa bikatampe na ngikadila ne bilongwa bya ino ntanda. Wiipangule amba: ‘Lelo bemvwaniki bakamwena namani mu ino myanda yonsa kukanena? Nkokeja kwibakwasha namani bemvwanije byonena?’ Ukokeja kutyiba mbila ya kuta mutyima bininge ku kisumpi kimo nansha bibidi pa byatelwa kūlu’bi. Ino kokavulaminwa lonso bisumpi bikwabo bishele.

Ino ukalonga namani shi abakupe kwisambila pa bufundiji bwa kyalwilo bwa mu Bible? Ukalonga namani mwanda wa mwisambo obe wikale na kamweno ku bemvwaniki betabije kala buno bufundiji? Longa buninge bwa kukomeja kikulupiji kyobakulupidile’bo. Namani? Na kulanguluka pa bubinga bwa mu Bisonekwa bwibubingija. Kadi ukokeja kutamija mutyika obakwete nao bwine bufundiji bwa mu Bible’bwa. Ukokeja kutamija’o na kulombola muswelo ukwatañene bwine bufundiji’bwa na bubinebine bukwabo bwa mu Bible ne na bumuntu bwine bwa Yehova. Leta bimfwa​—nansha nsekununi mimweke umbūmi shi bibwanika​—bilombola byabuyabuya byamwenine bantu mu kwivwanija buno bufundiji ne mokwaalamwinine mumweno wabo obadi bamona būmi bwa kumeso.

Kokalombola kamweno ka myanda yobe mu tubintu tubala-tunga’tu ku mvuyo ya mwisambo obe kete. Ino tamba’tu ku ngalwilo, mwimvwaniki ne mwimvwaniki ufwaninwe kwinena mu mutyima amba “uno mwanda untala ami.” Shi ubapu kwala kino kyalwilo, endelela na kuleta nshintulwilo ya mvubu ponso povungulula mwanda ne mwanda mukatampe mu kilu kya mwisambo ne ku mvuyo kwine.

Shi kolombola mvubu ya myanda, lombola’yo enka mu muswelo ukwatañene na misoñanya ya mu Bible. Le ko kunena namani? Ko kunena amba lombola’yo na buswe ne kwitūla pa kyaba kya bakwenu. (1 Pet. 3:8; 1 Yoa. 4:8) Mutumibwa Polo, nansha byaātenwe na bikoleja bikomo mu Tesalonika, wālongele bukomo bwa kulombola patōka myanda miyampe ya kwendelela kwādi kwendelela banababo bene Kidishitu kumeso ku mushipiditu. Kadi wāikele na kikulupiji amba kebakabulwepo kusaka kulonga byoloke mu mwanda obādi besambila’po. (1 Tes. 4:1-12) Bine kino kyo kimfwa kiyampe kwiula!

Lelo mwisambo obe i wa kukunka banabetu ku mityima batambile mu mwingilo wa kusapula ne kufundija bakwabo myanda miyampe? Nabya tamija buzanzamuke bwabo ne mutyika obakwete nao ano madyese. Ino potamija bino bintu, yuka amba ludingo lutambila bantu mu mwingilo i lwishile ku muntu ku muntu, mo munenena ne Bible. (Mat. 13:23) Kokapa banabenu mutyima wa kwitopeka. Bahebelu 10:24 witusoñanya ‘kwisombela ku buswe ne mingilo miyampe.’ Wivwane twisombele ku buswe, nankyo ne mingilo ingilwa na kukanina kwa mutyima kuyampe nayo keikabulwepo kumweka. Yuka amba kisaka Yehova i kushinsakanya “kikōkeji kya lwitabijo,” ke kuningilapo bakwetu kulonga bintu muswelo umo. (Loma 16:26) O mwanda tukimbanga kukankamika lwitabijo​—lwetu ne lwa banabetu.

Kwivwanija Bakwetu Myanda. Ponso posapwila bakwenu, kokolwa kuleka kukoma kamweno kakatampe ka myanda miyampe yotusapula. Kukoma kano kamweno kulomba kuta bidi mutyima ku milangwe idi mu ñeni ya bantu ba mu wenu mwaba. Ukeiyuka namani? Ivwana myanda yobanena ku maladiyo nansha matelevijo. Tala pa kibalu kya pangala kya julunale kampanda. Kadi longa buninge bwa kukokela bantu mu mīsambo, ne kuteja pobesamba. Ukokeja kumona amba bekondanga na myanda ya bukidibukidi​—ya kujimija twaji, kufutyila njibo, misongo, lufu lwa muntu wa mu kisaka, kyaka kya bipolapola, mboloji ya mulungu kampanda, kupomoka kwa maluo, kulama bana batyetye biyampe, ne mikwabokwabo. Lelo Bible ukebakwasha? Bine, ukebakwasha.

Pa kushilula mīsambo, kubulwangapo kwikala na mwanda kampanda mu ñeni. Ino shi muntu mwine wamweka amba udi na mwanda wa bukidibukidi umukambakanya, kokeshisa kwisamba’o nandi shi ubwanya, nansha kumunena amba usa kwiya dikwabo kumupa’po milangwe miyampe. Eyo, twepukanga shetu ‘kwiela mu myanda ya bene,’ ino tusangelanga kusapwila bakwetu madingi a mvubu aleta’po Bible. (2 Tes. 3:11, MB) Kunena na bubine, bintu bikatenga bantu ku mityima mpata i madingi a mu Bible akwatañene biyampe na būmi bwabo.

Shi bantu kebamwenepo amba musapu otusapula wibatala abo, bakokeja kutyiba mīsambo bukidibukidi. Nansha shi abetuleka tunena, kubulwa kulombola kamweno ka mwanda wetu kukalengeja musapu wetu uleke kwikala na lupusa lukatampe mu būmi bwabo. Ino shi tulombole patōka kamweno ka musapu wetu, mīsambo yetu ikanza kushinta bintu mu būmi bwa bantu.

Shi wendeja bifundwa bya Bible, endelela na kulombola patōka kamweno kadi na myanda yoshintulula’ya umbūmi. (Nk. 4:7) Ivwanija befundi madingi, misoñanya, ne bimfwa bya mu Bisonekwa bibalombola mwa kunangila mu mashinda a Yehova. Nena ukoma byabuyabuya bimwenwa mu kulonda bino bintu. (Is. 48:17, 18) Kino kikapa befundi mutyima wa kwalamuka biyampe mu būmi bwabo. Tamija munda mwabo buswe bwa kuswa Yehova ne mutyima wa kusaka kumusangaja, kupwa leka milangwe ya kusaka kulonda madingi a mu Kinenwa kya Leza itambe mu nkulwe ya mityima yabo.