Watchtower KIBĪKO PA ENTELENETE
Watchtower
KIBĪKO PA ENTELENETE
Kiluba
Ā
  • Ā
  • ā
  • Ē
  • ē
  • Ī
  • ī
  • Ō
  • ō
  • Ū
  • ū
  • Á
  • á
  • É
  • é
  • Ó
  • ó
  • Ñ
  • ñ
  • BIBLE
  • BILUPWILWE
  • KUPWILA
  • jr shap. 8 p. 92-102
  • Le Nobe “Ukekala Mūmi” Pamo bwa Yelemia?

Pano i patupu video

Yō, bibakoma kupūtula video.

  • Le Nobe “Ukekala Mūmi” Pamo bwa Yelemia?
  • Kinenwa Kitupele Leza Kupityila Kudi Yelemia
  • Tumitwe twa Myanda
  • Myanda Iifwene Nayo
  • MUSOÑANYA MWISHILE NA MIKWABO
  • BOILA ÑENI KU BUKUNGULUME BWA YELEMIA
  • KWASHA BAKWENU NOBE UKWASHIBWE
  • Madingi Mayampe Atala Bukunga Ne Busongi
    Kiteba kya Mulami Kisapula Bulopwe bwa Yehova—2011
  • Bukunga—mukenga Wa Mwingilo Wakubulwa Kilabi
    Kiteba kya Mulami Kisapula Bulopwe bwa Yehova—1996
  • “Natūla Binenwa Byami mu Kyakanwa Kyobe”
    Kinenwa Kitupele Leza Kupityila Kudi Yelemia
  • Le Ukatonga Balunda’ka?
    Kinenwa Kitupele Leza Kupityila Kudi Yelemia
Tala Bikwabo
Kinenwa Kitupele Leza Kupityila Kudi Yelemia
jr shap. 8 p. 92-102

SHAPITA WA MWANDA

Le Nobe “Ukekala Mūmi” Pamo bwa Yelemia?

1, 2. Mwanda waka bidi na buluji kuta mutyima ku muntu umo umo ne ku bisaka?

YOSHUA pa kupwa kukankamika Bene Isalela batonge obakengidila, wānene amba: “Ino padi amiwa nanshi ne njibo yami mine, tukamwingidilanga Yehova.” (Yos. 24:15) Yoshua wādi musumininwe kukōkela Leza, kadi wādi ukulupile amba ne kisaka kyandi kine kikakōkelanga. Mwenda myaka, pāfwenene bonakani bwa Yelusalema, Yelemia wālombwele Mulopwe Zedekia amba shi uketūle ku Bene Babiloni “abe ukekala mūmi ne njibo yobe mine.” (Yel. 38:17) Butongi bubi bwa mulopwe bwāmufikije kubi, aye, bandi bakaji, ne bandi bana bene. Bāipaya ne bandi bana ku meso andi; kupwa bāmubongotola meso ne kumusela bu musungi mu Babiloni.​—Yel. 38:18-23; 39:6, 7.

2 Mu milongo yonso ibidi isendekelwe’i, mwanda wādi unenwe ku muntu umo umo. Ino i batele’mo ne bisaka byabo bine. Bidi na buluji. Mwanda muntu ense mutame udi na kiselwa kumeso a Leza. Kadi, Bene Isalela bavule nabo bādi na bisaka. Kisaka kidi na kamweno ne ku Bene Kidishitu bene. Tumona kino pa byotutanga mu Bible ne pa byotubandaula ku kupwila kwa Bwine Kidishitu pa bitala busongi, kulela bana, ne kulēmeka ba mu kisaka.​—1 Kod. 7:36-39; 1 Tem. 5:8.

MUSOÑANYA MWISHILE NA MIKWABO

3, 4. Lelo ngikadila yādi’mo Yelemia yādi mishile namani na ya bantu bavule, ne le wāmwenine’mo bika?

3 Yelemia ubadilwa mu bantu bāendelele ‘kwikala bōmi’ mu abo mafuku. Wāpandile pa konakanibwa kwa Yelusalema, ino ngikadilo yaādi’mo yādi mishile na ya bavule. (Yel. 21:9; 40:1-4) Leza wāmunene aleke kusonga ne kubutula bana nansha ke kulonga bintu bikwabo byādi bilongwa na Bayuda mu kyokya kitatyi.​—Tanga Yelemia 16:1-4.

4 Mu mafuku a Yelemia ne mungya bibidiji bya kwabo, ke kyādipo kibi kusonga ne kubutula bana. Bayuda bavule bādi basonga ne kubutula, mwanda wa kulama ntanda ya bashabo mu muzo ne mu kisaka.a (Kup. 7:14) Mwanda waka kupeleja enka Yelemia? Pa mwanda wa byādi bitengele kumeso, Leza wāmunene aleke kulonga byādi bilonga bantu mafuku onso shi bya bulanda shi bya nsangaji. Kādipo wa kusenga badila mu madilo nansha kudya nabo bidibwa bya madilo; nansha ke kwisangaja ku masobo a butundaile bwa Bayuda. Masobo ne kwisangaja uno muswelo byādi pabwipi na kufula lonso. (Yel. 7:33; 16:5-9) Būmi bwa Yelemia bwāpele mutyika musapu wandi ne kukomeneja mwādi mwa kunanina butyibi. Ebiya kino kyamalwa kyāfika. Ulanga i muswelo’ka wēivwene bantu pobāikele kukolelwa kebedi nansha boba bēmwenine mubolela baswe babo? (Tanga Yelemia 14:16; Mad. 2:20.) Nanshi, Yelemia wampikwa kusonga kādipo mu ngikadila ya bulanda. Nansha kasāla ka makweji 18 ne butapani byobyādi bya kutukija bisaka, Yelemia kadipo wa kujimija mukaji nansha bana.

5. Lelo bulombodi budi mu Yelemia 16:5-9 butala namani Bene Kidishitu?

5 Le ko kunena’mba Yelemia 16:5-9 witutala ne batwe? Mhm. Bene Kidishitu i bakankamikwe ‘kwibasenga boba badi mu byamalwa’ ne ‘kusepelela na boba basepelela.’ (2 Kod. 1:4; Loma 12:15) Yesu wātenwe ku butundaile ne kusangala nabo. Nansha nankyo, bintu bitengele ino ngikadilo imbi ya bintu i mwanda musumininwe. Bene Kidishitu bakokeja kumona malwa ne kujimija bintu. Yesu wāshintulwile mvubu ya kwikala beteakanye kulonga bukomo bonso mwanda wa kūminina ne kulama kikōkeji, pamo bwa banabetu bānyemene Yudea mu myaka katwa kabajinji. Nanshi, kushala bukungulume nansha bukungakaji, kusonga ne kusongwa, nansha ke kubutula bana bilomba kulanguluka’po na kusumininwa.​—Tanga Mateo 24:17, 18.

Kifwatulo pa paje 94

6. Le i bāni bakokeja kumwena mu kulangulukila pa musoñanya wa Leza kudi Yelemia?

6 Lelo i kamweno’ka kadi mu musoñanya wa Leza wa amba Yelemia kakisonga nansha kubutula bana? Dyalelo, Bene Kidishitu bamo ba dikōkeji i bampikwa kusonga nansha kusongwa ne kubutula bana mpika. Le i ñeni’ka yobakokeja kuboila ku kimfwa kya Yelemia? Ne mwanda waka nansha ke Bene Kidishitu besonge ne badi na bana bafwaninwe kuta mutyima ku uno mwanda wa umbūmi bwa Yelemia?

7. Lelo kubulwa kubutula bana kwānenwe Yelemia kufwaninwe kulangulukilwa’po namani dyalelo?

7 Tubandaule mwanda umbajinji amba Yelemia wādi ufwaninwe kushala pampikwa kubutula bana. Yesu kāsoñenyepo balondi bandi amba baleke kubutula bana. Ino, i kiyukane kyaānene amba “malwa abo” boba bakēmita mafu nansha bakwamusha bana kitatyi kikafika kyamalwa mu Yelusalema mu 66-70 K.K. Kino kitatyi kyadi kya kwikala kya makambakano nakampata kobadi, mwanda wa ngikadilo yobadi’mo. (Mat. 24:19) Netu ketudi pabwipi na malwa matakata. Bene Kidishitu besongele basaka kubutula bana bafwaninwe kulangulukila’po bininge. Mwene nobe witabije amba būmi bwendanga bukomena’ko mu ino myaka ya malwa? Kadi balume ne bakaji i bamone amba bine pano ke bikomo kutamija bana ‘bakekala bōmi’ ne kukapanda ku mfulo ya ino ngikadilo ya bintu. Nansha ba mulume ne mukaji byobafwaninwe kutonga nansha kupela kubutula, i biyampe kuta mutyima ku kimfwa kya Yelemia. Ino le musoñanya wa Leza wa amba Yelemia kakisonga nao?

I musoñanya’ka mwishile na mikwabo wātambwile Yelemia, ne kino kitutonona tulangulukile pa bika?

BOILA ÑENI KU BUKUNGULUME BWA YELEMIA

8. I kika kyotunenena amba kebilombepo enka kusonga pa kusangaja Leza?

8 Leza paālombwele Yelemia amba kokisonga, kino ke kijilapo kyaātūdile bengidi bandi bonsololo kulonda. Busongi i kintu kiyampe. Yehova wātūdile mpangiko ya bantu kwisonga mwanda wa kuyuja ntanda, kwisangaja ne kuloelelwa kwa binebine. (Nk. 5:18) Inoko, ke bonsopo bādi basonge. Mu bantu ba Leza mwādi ne bantungu kitatyi kyādi kinena Yelemia bupolofeto.b Ne kadi, yuka’mba mwadi ne bakaji ba bishala ne bafwilwe bakaji. Nanshi ke enkapo Yelemia kete wādi wampikwa mwine pandi mu batōtyi ba bine. Na bubine, wādi na bubinga kampanda bwa kulekela kusonga, monka mobikadile ne ku Bene Kidishitu bamo dyalelo.

9. Le i madingi’ka a ku bukomo bwa mushipiditu atala busongi otufwaninwe kulangulukila’po na kusumininwa?

9 Bene Kidishitu bavule basoñanga nansha kusongwa, ino ke bonsopo. Uyukile amba Yesu kāsongelepo, kadi wānene amba bana ba bwanga bamo bakokeja kwikala mu ñeni ne mu mutyima wabo na kyabuntu kya ‘kutambula uno mwanda’ wa bukunga. Wānene boba babwanya’kyo kulongela monka. (Tanga Mateo 19:11, 12.) Nanshi, shi muntu waendelela kwikala nkunga mwanda wa kulonga bivule mu mwingilo wa Leza, i biyampe kumutendela, pa kyaba kya kumusepa. Shako, Bene Kidishitu bamo bakidi bankunga pa mwanda wa kukolelwa. Kimfwa, padi i pa mwanda kebatene Mwine Kidishitu mufwaninwe kwisonga nandi, ino bafwaninwe kufwijibwa’ko mwanda i basumininwe kulama musoñanya wa kusonga “monka mudi Mfumwetu.” (1 Kod. 7:39) Ne kadi, bengidi ba Leza bakwabo nabo i bafwilwe balume nansha bakaji, o mwanda beshikatyile bunka bwabo.c Kebafwaninwepo kwilwa amba Leza (ne Yesu mwine) batele mutyima bano bampikwa bene pabo.​—Yel. 22:3; tanga 1 Kodinda 7:8, 9.

10, 11. (a) Le i bika byākweshe Yelemia abwanye bukungulume? (b) Lelo myanda mimweke ya ano mafuku ilombola namani amba bantu bampikwa kusonga bakokeja kwikala na būmi bwa nsangaji?

10 Kadi, Yelemia pa kulama bukungulume bwandi, wādi ufwaninwe kweamina ku bukwashi bwa Leza. Muswelo’ka? Vuluka amba Yelemia wādi usepelela kinenwa kya Yehova. Ino yo yādi nsulo ya bukomo kudi Yelemia ne kikulupiji umbula bwa myaka makumi aādi ūminine mu mwingilo wāmupele Leza. Kadi, wādi uta mutyima kwepuka kipwano na boba bādi bamusepa mwanda wa bukungulume. Wāsakile ‘kushikata bunka bwandi’ pa kyaba kya kwikala mu kitango kya bantu ba uno muswelo.​—Tanga Yelemia 15:17.

11 Bankunga Bene Kidishitu bavule​—bana-balume ne bana-bakaji, bankasampe nansha batame​—balondanga kimfwa kiyampe kya Yelemia. Myanda mimweke ilombola amba kamweno kadi mu kwielelela mu mwingilo wa Leza, na kwipāna bininge mu mingilo ya mvubu, ke mingilo ya ku mushipiditu kadi. Kimfwa, Kamoni umo wa mu kipwilo kya ludimi lwa Kishinwa unena’mba: “Mwingilo wa bupania unkwashanga mwa kwiendejeja. Pano ponakidi nkungakaji, ñingilanga bininge, kitatyi kyonso, kino kinkwashanga neivwane bu nkidipo bunka. Ngivwananga nsangaji ku mfulo kwa dyuba ne dyuba mwanda monanga amba mwingilo wami ukwashanga bantu binebine. Kino kimpanga nsangaji mikatampe.” Kaka umo pania wa myaka 38 unena’mba: “Momwena, pa kumona nsangaji i biyampe kuyuka kuloelelwa mu bintu biyampe bya ngikadilo yonso yotanwa’mo.” Mwine Kidishitu umo wampikwa kusongwa wa mu Bulaya bwa kunshi wanene pampikwa kafinda amba: “Būmi bwami kebudipo monadi mfwatakenya dibajinji, inoko ndi ne nsangaji kadi nkendelela kwikala nayo.”

Kifwatulo pa paje 97

12, 13. (a) Le i mumweno’ka mufwaninwe utala bukunga ne busongi? (b) Būmi bwa Polo ne madingi andi bilombola bika bitala bukunga?

12 Le Yelemia nandi i uno wāmwene amba būmi bwandi kebwikelepo mwaādi ufwatakenya kitatyi kyaādi utama? Ino i uno wāmwene kadi amba e mobikadilanga ne ku bavule basonga ne kubutula bana. Kaka umo pania wa mu Eshipanye wanene amba: “Ndyukile bantu bamo besongele badi na nsangaji, bakwabo nabo kebadipo na nsangaji. Bino byonso bibandyukija amba nsangaji yami keitambepo ku kusongwa nansha kubulwa kusongwa.” I bine, mwanda wēmwenine Yelemia​—umo’tu wa mu bantu tununu​—ulombola amba muntu wampikwa kusongwa nansha kusonga ukokeja kwikala na būmi bwa maloa, buyampe, ne bwa nsangaji. Bukamoni bukwabo i bwa mutumibwa Polo, wāsonekele’mba: “Nena ne bakubulwa kusonga, ne ku bakaji-ba-bafu na’mba: I biyampe abo longa bēkele pamo’nka bwa amiwa.” (1 Kod. 7:8) Padi Polo wādi mufwilwe mukaji. Nansha bikale namani, kādipo na mukaji kitatyi kyaāingile bivule mu mwingilo wa bu mishonele. (1 Kod. 9:5) Mwene i byendele’mo kunena’mba kwikala kwaādi kwampikwa mukaji kwādi na kamweno? Kino kyāmukweshe ‘até mutyima kudi Mfumwetu kwampikwa ne kya kumupuakanya,’ o mwanda wālongele bintu bilumbuluke bivule.​—1 Kod. 7:35.

“Bitatyi byondi kasuku bibadilwa mu bitatyi bilēme mpata. Mu bino bitatyi mbwanya kwisamba na Yehova mu milombelo. Nkokeja kulanguluka ne kwifunda kifundwa kya kasuku kwampikwa kupuakanibwa. . . . Bukungakaji bumbwejanga’ko nsangaji.”​—Babette

13 Polo na bukomo bwa mushipiditu wābweja’ko kintu kikwabo amba: “Badi namino [basonga ne kusongwa], abo bakamonanga malwa a mu ngitu.” Leza wāsoñenye Polo atweje’mo buno bubinebine bwa mushike amba: “Yewa wakukankamana ne kukankamana monka umutyima wandi . . . [kulama bu-mujike bwandi, NW] aye, nankyo, ulonga biyampe. Penepo kadi, wakwitabija [wakupāna bu-mujike bwandi mu busongi, NW], nankyo walonga biyampe; ino aye wakubulwa kwitabija [kwibupāna mu busongi, NW], nabya aye watabukamo kunengeja.” (1 Kod. 7:28, 37, 38) Yelemia kātangilepo nansha dimo bino binenwa, ino būmi bwandi mu myaka makumi bulombola amba bukunga kebukankajapo muntu kwikala na būmi bwa nsangaji mu mwingilo wa Leza. Kadi, bukokeja kukwasha bininge mu būmi bwimanine pa mutōtelo wa bine. Mulopwe Zedekia nansha byaādi musonge kālondelepo madingi a Yelemia ne kwendelela ‘kwikala mūmi,’ aye’ko mupolofeto wampikwa kusonga wāikele na mwiendelejo wāmukweshe endelele kwikala mūmi.

I bika byokokeja kwifundila ku kimfwa kya Yelemia kya kwikala nkungulume mu myaka makumi?

KWASHA BAKWENU NOBE UKWASHIBWE

14. Lelo kipwano kya kisaka kya Akwila ne Polo kilombola bika?

14 Monka mokyapwa kulombwelwa, bana-balume ne bana-bakaji bavule ba mu mafuku a Yelemia bādi besonga ne kwikala na bisaka. E mo byādi bikadile ne mu mafuku a Polo mwine. Ne kutatana kwine mpika, Bene Kidishitu bavule ba bisaka kebādipo babwanya kwipāna mu mwingilo mu matanda makwabo pamo bwa Polo, ino bādi balonga bivule mu byabo bibundi. Kadi bādi bekele bu dyese ku batutu ne bakaka bampikwa kusonga ne kusongwa. Vuluka’mba kitatyi kyāfikile Polo mu Kodinda, Akwila ne Pishila bāmutundaile mu yabo njibo ne kwingila nandi mu mingilo yabo. Ino kebākadikilepo enka papo. Bulunda bwāpwene kisaka kya Akwila na Polo kebwābudilwepo kumukwasha. Langa’po kudya pamo byakudya bya munsonso ne kwisangaja na balunda mu byaba bikwabo. Lelo Yelemia wāmwenine mu kipwano kya uno muswelo? Wādi wingidija bukungulume bwandi mu mwingilo wa Leza, nanshi ketwakilanga’mba wādi ushikilwe kwikala na bakwabo. I uno wādi mu kipwano kityite na bisaka bya bengidi bepāne ba Leza, padi i na bisaka bya Baluki, Ebede-meleke, nansha bakwabo.​—Loma 16:3; tanga Bilongwa 18:1-3.

15. Lelo bisaka bya Bene Kidishitu bikokeja namani kukwasha pakatampe Bene Kidishitu bampikwa kusonga ne bampikwa kusongwa?

15 Dyalelo nadyo Bene Kidishitu bankungulume ne bankungakaji bamwenanga mu kipwano kya kyanga kidi pamo na kya kisaka kya Akwila ne Polo. Shi udi na kisaka, le witungile kitungo kya kupwana na bantu bampikwa kusonga nansha kusongwa? Kaka umo unena bidi mu mutyima wandi amba: “Nashile ntanda ne nkyabilangapo kujokela’mo. Inoko, nsakanga kutebwa mutyima ne kusanshibwa. Nombanga Yehova etupe bidibwa bivule bya ku mushipiditu ne kwitukankamika batwe Bene Kidishitu bankungakaji. Bantu betumwene shako, ne kadi ke batwepo bonso babilanga kusongwa. Ino, kyaba kimo bimweka bu twi basūlwe. Shako, tukokeja kweyamina kudi Yehova, ino kitatyi kyotusaka kwikala na bantu, le tubulwe’po kwisamba na kisaka kyetu kya ku mushipiditu?” Banabetu bavule bankungulume ne bankungakaji babwanya kulondolola pampikwa budimbidimbi amba eyo. Basangelanga kwikala na bantu ba mu kyabo kipwilo. Kebapwanangapo enka na batutu ne bakaka ba yabo myaka kete. Byobasenswe kwikala na bantu, basangelanga bulunda na bantu ba myaka palapala, kubadila’mo banunu ne banuke ba mu bisaka bya Bene Kidishitu bya kwabo.

Kifwatulo pa paje 100

16. Le i bintu’ka bipēla byokokeja kulonga mwanda wa kukwasha Bene Kidishitu bampikwa kusonga nansha kusongwa badi mu kyenu kipwilo?

16 Byowayuka kino, ukokeja kwikala nsulo ya kukankamika bankunga na kwibatweja kyaba kimo mu mingilo ya mu kisaka, kimfwa mu bwenu Butōtyi bwa Kisaka bwa kyolwa. Kudya pamo na tutu nansha na kaka nkunga kukokeja kulonga bintu bivule kutabuka ne bidibwa biyampe bine. Wabulwa’po kukwata’ko mpangiko ya kusapula nabo pamo? Ulanga namani kwita Mwine Kidishitu nkunga amba engile pamo na kyenu kisaka pa kulongolola Njibo ya Bulopwe nansha kyaba kikwabo pomukapota bintu? Kadi kudi bisaka bitanga mukaji wa kishala, muntu mufwilwe mukaji, nansha pania nkunga amba bende nandi ku kitango nansha mu lwendo lwa konje. Kisense kya uno muswelo kikwashanga umo ku mukwabo.

17-19. (a) Mwanda waka bana basakilwa buswe ne bujalale pobakwata mpangiko ya mwa kulelela bambutwile babo banunu ne balemane? (b) Le i ñeni’ka yotuboila ku byālongele Yesu bitala mwa kulelela inandi?

17 Mwanda mukwabo wa kuta’ko mutyima pa batutu ne bakaka bampikwa kusongwa i utala kulela bambutwile banunu. Mu mafuku ādi Yesu pa ntanda, Bayuda bamo batumbe bādi bepuka na budyumuku kulela shabo ne inabo. Bādi bafwatakanya’mba kulonda bijila bitūdile’ko mutōtelo wabo kutabukile bijila bibapele Leza bitala bambutwile babo. (Mako 7:9-13) Kekifwaninwepo kulongwa mu bisaka bya Bwine Kidishitu.​—1 Tem. 5:3-8.

18 Ino, bikekala namani shi bambutwile banunu badi na bana bangi Bene Kidishitu? Shi mwana umo kasongelepo nansha kusongwa, lelo aye ye mwine ufwaninwe kwibalela? Kaka umo mu Jampani usoneka’mba: “Nsakanga kusongwa, ino byondi na kiselwa kya kulela bami bambutwile, nkibwanyapo kusongwa. Nkulupile amba Yehova kedilwepo njia ya kulela bambutwile ne musanshila mutyima wa bankunga.” Mwene uno kaka i uno na banababo basonge ne basongwe bakwete butyibi bwa kumulekela alele bunka bambutwile, ino pampikwa kwisamba nandi? Mu ngikadila bwa ino, i biyampe kuyuka’mba Yelemia wādi na banababo bana-balume kebadipo nandi biyampe.​—Tanga Yelemia 12:6.

19 Yehova wivwananga bankunga ne kuyuka mwikadile boba badi mu ngikadila ya matompo. (Mit. 103:11-14) Inoko, bambutwile banunu nansha balemane i bambutwile ba babo bana bonso, ke enkapo ba boba bakubulwa kusonga nansha kusongwa. Na bubine, bana bamo padi i basonge ne kwikala na lutundu lwabo. Inoko, kino kekijimijapo kisanso kya kipangila na babo bambutwile, nansha kwibatalula kiselwa kyabo kya Bwine Kidishitu kya kwibakwasha pobasakilwa bukwashi. Tuvuluka amba nansha ke kitatyi kyādi Yesu kubwipi na kufwa ku mutyi, wāyukile kiselwa kyandi ne kulonga’po kintu mwa kulelela inandi. (Yoa. 19:25-27) Bible kaletelepo kijila kimo ne kimo kya mwa kulelela bambutwile banunu nansha balemane; kadi kaletapo mulangwe wa amba bana bampikwa kusonga nansha kusongwa bo bene badi na kiselwa kya kwibalela. Mu uno mwanda musumininwe, bonso bafwaninwe kubandaula twanda tutyetutye na bujalale ne kulangila bakwabo, koku balama mu ñeni kimfwa kyāshile Yesu kya mwa kulelela inandi.

20. Lelo umonanga namani kipwano na bantu bampikwa kusonga nansha kusongwa badi mu kyenu kipwilo?

20 Yelemia wānene ku bukomo bwa mushipiditu amba: “Kebakalombolapo monka kadi, muntu ense ku mwikadi nandi kadi, nansha muntu ense ku mwanabo, amba: yuka Yehova mwanda bonso bakandyuka.” (Yel. 31:34) Na bubine, tusangalanga byotudi kala mu kipwano kya kutendelwa na bekadi ba uno muswelo mu kipwilo kya Bwine Kidishitu, kubadila’mo ne batutu ne bakaka bankunga. Ne kutatana kwine mpika, batwe bonso tusakanga kwikankamika nabo ne kumona bano bampikwa kusonga nansha kusongwa ‘bekele bōmi.’

Le i matabula’ka makwabo obwanya kutabula pa kukankamika nansha kukankamikwa na batutu ne bakaka bamo bampikwa kusonga nansha kusongwa?

a Mu Bisonekwa bya Kihebelu, i mutupu kishima “nkunga.”

b Isaya wēsambile mu bupolofeto pa bantungu ba mu yabo myaka bādi batūdilwe mikalo ku mingilo imoimo mu butōtyi bwa mu Isalela. Wālaile amba bantungu ba kikōkeji bakapebwa kintu ‘kitabukile kunengela bāna bana-balume, nansha bana-bakaji,’ ne kupebwa ‘dijina dya nyeke ne nyeke, kedikatukijibwapo.’​—Is. 56:4, 5.

c Bakwabo bashikete bunka mwanda mwinē pandi, kepabulwe i wampikwa kwitabija, shi mukusuke shi munyeme, nansha kadi i belubule.

    Mabuku a mu Kiluba (1993-2025)
    Tamba
    Twela
    • Kiluba
    • Tumina
    • Byosaka
    • Copyright © 2025 Watch Tower Bible and Tract Society of Pennsylvania
    • Bijila bya Mwingidijijo
    • Bitala Myanda Mifyame
    • Mwa Kujadikila Myanda Mifyame
    • JW.ORG
    • Twela
    Tumina