Malondololo Ku Bipangujo Bimanine Pa Bible

Le tukekalanga na umbikalo umo pano pa ntanda ponso?

Langapo byabuyabuya bibwanya kumwena bantu mu umbikalo umo wa ntanda. Dyalelo bantu bavule basusukanga pa mwanda i balanda, bakwabo’ko bampeta. Inoko umbikalo umo wa ntanda wivwanije bisakibwa bya bantu, ukavuija bisakibwa byabo. Lelo molangila bantu babwanya kutūla’ko umbikalo pamo bwa uno?—Tanga Yelemia 10:23.

Mu bula bwa mānga, imbikalo yakomenwe mu miswelo mivule kuvuija bisakibwa bya babikalwa babo, nakampata balanda. Imbikalo imo i ya kasusu. (Musapudi 4:1; 8:9) Inoko Leza Mwine Bukomo Bonso i mulaye kuleta’ko umbikalo ukapingakena pa imbikalo yonso. Mulopwe wabo ukavuija bisakibwa bya bantu.—Tanga Isaya 11:4; Danyele 2:44.

Le Bulopwe bwa Leza bukalonga bika?

Yehova Leza i mutonge Mulopwe muyampe wa ntanda—ke wandi Mwana, Yesu kadi. (Luka 1:31-33) Yesu paādi pano pa ntanda bu muntu, wādi utele mutyima ku kukwasha bantu. Padi bu Mulopwe, ukatūla bantu ba mizo yonso mu bumo ne kupwa masusu onso a bantu.—Tanga Ñimbo 72:8, 12-14.

Lelo bantu bonso baketabija Yesu bu Mulopwe? Mhm. Inoko Yehova utūkije mutyima. (2 Petelo 3:9) I mupe bantu mukenga wa kwitabija Yesu bu Mulopwe. Panopano ponka, Yesu usa kutalula’ko bantu babi pano pa ntanda kadi usa kuleta ndoe ne mutyima-ntenke pano pa ntanda ponso.—Tanga Mika 4:3, 4.

Shi usaka kuyukila’ko bivule, tala shapita 8 wa dibuku Lelo I Bika Bine Bifundija Bible?, dilupwilwe na Batumoni ba Yehova

Ditūdilwe ne pa www.jw.org