Bambutwile​—Fundijai Benu Bana Tamba pa Bwanuke

¹ “Tamija [“fundija,” NW] mwana mu dishinda dimufwaninwe, kadi nansha mu bununu kakasasukamopo, ehe.” (Nk. 22:6) Bambutwile, shi musaka benu bana baleke ‘kusasuka’ mu dishinda dya bubinebine, i kitatyi’ka kyomufwaninwe kushilula kwibafundija buno bufundiji? I tamba pa bwanuke bwabo!

² Pānene Polo amba bufundiji bwa ku mushipiditu bwāfundijibwe Temote bwāshilwile tamba “pa bwanuke,” wādi usaka’tu kunena amba bwāshilwile pakidi wa lukeke. (2 Tem. 3:14, 15) Kino kyo kyālengeje Temote ekale mwana-mulume mutame byabinebine ku mushipiditu. (Fid. 2:19-22) Bambutwile, nenu mufwaninwe kushilula kufundija benu bana tamba “pa bwanuke” mwanda wa nabo bayuke mwa ‘kutamina ku mpala ya Yehova.’​—1 Sam. 2:21.

³ Mwibasangilei Mema Ebasakilwa Mwa Kutamina’bo: Tumityi twana tusakanga kusangilwa nyeke mema mwa kutamina’to ke mityi mikata, ne bana nabo mo monka, nansha bekale na myaka mivule namani, basakilwa kusangilwa mema a bubinebine butamba mu Bible mwanda wa nabo bekale bengidi ba Leza bapye. Muswelo umbajinji wa kufundija bana bubinebine ne kwibakwasha basambe bulunda na Yehova i kwifunda nabo nyeke kifundwa kya Bible mu kisaka. Inoko bambutwile bakatala mwendele lūku lwa mwana ne mwana. Kifwa ku bankasampe, kwifunda nabo myanda mīpi mu byaba bivule pala pala i kuyampe kupita’ko kwifunda nabo misunsa mityetye inoko myanda mulwi.​—Kup. 11:​18, 19.

⁴ Kemukasebulai nansha dimo lūku ludi na bana lwa kukwatyila myanda ifundwa. Mwibasekunwinei mānga ya mu Bible. Mwibanenei bafwatule bifwatulo bya myanda ya mu Bible nansha kukaya moyāpityile. Ingidijai biyampe mabande a video ne mabande a kasete, kubadila’mo ne madrame emanine pa Bible. Kwatañanyai kifundwa kya kisaka mungya myaka ya benu bana ne ñeni yabo. Bifundwa bibajinji bifwaninwe kwikala bidi bipēla kadi bityetye; ino mwana pa kutama, ne bifundwa nabyo byenda bivula ne kuninga. Loijai bufundiji bwa Bible, bwikale bwa myanda mishileshile. Mwene musakanga benu bana batamije “kwabila” kobabila Kinenwa, nanshi longai kifundwa kikale kisangaja byabinebine.​—1 Pet. 2:2.

⁵ Mwibatwejei mu Myanda ya Kipwilo: Tungilai benu bana bitungo bityebitye mwanda wa nabo bakwate myanda ya kipwilo makasa abidi. Le kitungo kibajinji kikokeja kwikala kitungo’ka? Bambutwile badi na bana batyetye babidi banenene amba: “Bonso babidi bāshilwile kutambula madingi a kushikata talala mu Njibo ya Bulopwe.” Bambutwile, kwashai bana bayuke kulondolola mu kupwila mu bishima bya abo bene, kadi mwibatungilei kitungo kya kwiandikija ku Masomo a Mwingilo wa Kiteokratike. Mu mwingilo wa budimi namo mudi bitungo, kitungo kimo kifwaninwe bidi kufikila’po i kupāna matrakte ku bibelo, kutanga bisonekwa, kuyuka mwa kupānina mapepala, ne kushilula mīsambo na benē mobo pambulwa kukolelwa.

⁶ Letai Kifwa kya Bupyasakane: Lelo benu bana bemwivwananga nyeke mwisambila padi Yehova ne kumulomba mu milombelo? Lelo bemumonanga mwifunda Kinenwa kyandi, mutanwa ku kupwila, mutambila mu busapudi, ne kuloelelwa pa kulonga kiswa-mutyima kya Leza? (Mit. 40:8) I kipite buya bamone bino byonso kadi mulonga’byo pamo nabo. Mwana-mukaji umo wātendele inandi wātamije bana basamba bonso bāikala ke Batumoni bakikōkeji amba: “Kintu kyādi kitutulumuna nakampata i kifwa kya Mama aye mwine​—kifwa kyandi kyādi kīsamba bivule kupita’ko binenwa.” Mbutwile umo wa bana baná nandi wānene amba: “‘Kutūla Yehova pa kifuko kibajinji’ kebyādipo binenwa bya kukanwa bitupu’tu, ino po pādi pemanine būmi bwetu.”

⁷ Banwe bambutwile, shilulai kufundija benu bana pakidi mema mu manwi, mwibafundijei bubinebine bwa mu Kinenwa kya Leza, mwibatungilei bitungo bityebitye, kadi letai kifwa kiyampe mpata. Wivwane mulonge namino, bine kemukabulwepo kusangala!