Myanda ya Kunyemena’ko ya Kabuku ka ku Kupwila Būmi ne Mwingilo
3-9 KWEJI 6
BYABULĒME BYA MU KINENWA KYA LEZA | BENE NGALATEA 4-6
“‘Kyelekejo’ Kidi na Buluji Kotudi”
it-1-F p. 56 mus. 1
Hakala
Mungya mutumibwa Polo, Hakala wādi mu kyelekejo kidi na buluji kotudi, kine kyādi kyelekeja muzo wa Isalela wa ku ngitu, mwilunge kudi Yehova kupityila ku kipwano kya Bijila kyāshilwile ku lūlu lwa Shinai, kino kipwano kyābutwile “bana ba bupika.” Pa mwanda wa bubi bwabo, muzo kewākibwenyepo kulama kino kipwano. Mu kino kipwano, bene Isalela kebāikelepo banapabo inoko bādi baponejibwe bu banonga-bibi bafwaninwe lufu; nanshi, bādi bapika. (Yoa 8:34; Lo 8:1-3) Yelusalema wa mu mafuku a Polo wādi welekeja Hakala, mwanda muno mwipata, mwādi mwelekeja bulongolodi bwa Isalela wa ku ngitu, uno Yelusalema wāikele mu bupika pamo ne bandi bana. Bene Kidishitu babutulwe ku mushipiditu, abo bo bana ba “Yelusalema wa kokwa kūlu,” mwana-mukaji wa Leza wa kyelekejo. Pamo bwa Sala mwana-mukaji mwanapabo, uno Yelusalema kamuninwe bupika nansha dimo. Enka na mwāpangilwepangilwe Isake na Ishemele, mo monka ne bana ba “Yelusalema wa kokwa kūlu,” bene bākudilwe na Mwana, nabo bāpangilwepangilwe na bana ba Yelusalema mumunwe bupika. Inoko, kupangwa kwa ba Hakala ne wandi mwana, kwādi kwelekeja kupela kwāpelele Yehova muzo wa Isalela wa ku ngitu.—Ngt 4:21-31; tala ne Yoa 8:31-40.
Ikala na Lwitabijo Lwambulwa Kutelententa mu Bulopwe
11 Kipwano kya Abalahama byokyādi kya kufikidila ku ngitu pa lukunwa lwandi kitatyi kyobāpyene Ntanda ya Mulao, Bisonekwa bilombola’mba bino bishima bitala pa kipwano bifikidilanga ne ku mushipiditu. (Ngt. 4:22-25) Monka mwāshintulwidile’kyo mutumibwa Polo ku bukomo bwa mushipiditu, mu kuno kufikidila kukatampe, kipindi kibajinji kya lutundu lwa Abalahama i Kidishitu, kadi kipindi kya bubidi kifunkila pa bene Kidishitu bashingwe māni a mushipiditu 144 000. (Ngt. 3:16, 29; Kus. 5:9, 10; 14:1, 4) Uno mwana-mukaji wābutwile luno lutundu ke ungipo i “Yelusalema wa kokwa kūlu”—kipindi kya momwa mūlu kya bulongolodi bwa Leza, kibundilwe na bipangwa bya ku mushipiditu bya kikōkeji. (Ngt. 4:26, 31) Monka mwālaile’kyo kipwano kya Abalahama, lutundu lwa mwana-mukaji lukaletela muzo wa muntu madyese.
Kukola Byabupeta bya ku Mushipiditu
w09-F 1/4 p. 13
Lelo Wadi Uyukile Kala?
Mwanda waka Yesu wāityile Yehova bu “Abba, Tata” paādi ulombela?
Mu Kialamia kishima abba kibwanya kushintulula “tata wami” nansha’mba “A Tata.” Misunsa yonso isatu itanwa kino kishima mu Bisonekwa, kibadilwa mu milombelo, kadi i kingidijibwe’mo mwanda wa kutela Tata wa mūlu, Yehova. Le kino kishima kidi na buluji’ka?
Dibuku The International Standard Bible Encyclopedia dinena’mba: “Mu kitatyi kya Yesu bantu pobesamba, kishima ‘abbā’ kyādi kingidijibwa dibajinji bu kishima kilombola kipwano ne bulēme pa bukata bwa bana ne bashabo.” Kyādi kishima kya buswe kadi kyādi kibadilwa mu bishima bibajinji byādi biyuka mwana ukifunda kwisamba. Yesu wāingidije uno muneneno paādi ulombela kudi Shandi. Mu budimi bwa Ngesemani, mansá matyetye’tu kumeso kwa lufu lwandi, Yesu wāityile Yehova mu milombelo bu “Abba, Tata.”—Mako 14:36.
Dibuku ditelelwe kūlu’ku dibweja’ko amba: “Bayuda ba mu kitatyi kya Bangidiki ne bene Loma kebādipo bavudile kwita Leza bu ‘Abbā,’ padi i mwanda bādi bamona’mba kwita Leza mu kino kishima kya bulunda i kubulwa bulēme.” Inoko, “kwingidija kwingidije Yesu kino kishima mu milombelo kulombola mu muswelo mufyame amba udi mu kipwano kikatampe na Leza.” Misunsa ibidi mikwabo idi’po kishima “Abba” mu Bisonekwa, itanwa mu bilembwa bya mutumibwa Polo, ilombola’mba bene Kidishitu ba mu myaka katwa kabajinji bāingidije kino kishima mu milombelo.—Bene Loma 8:15; Bene Ngalatea 4:6.
w10-F 1/11 p. 15
Lelo Wadi Uyukile Kala?
Le mutumibwa Polo wādi wisambila pa bika paānenene amba udi na “biyukeno bya bu umpika wa Yesu” ku ngitu yandi?—Bene Ngalatea 6:17.
Binenwa bya Polo byādi bibwanya kushintulula myanda mivule yādi iyukile bevwaniki bandi ba mu myaka katwa kabajinji. Kimfwa, kyuma kityile mu mudilo kyādi kingidijibwa mu bitatyi bya kala pa kutūla kiyukeno pa bakutwa ba ku divita, bangivi ba mu matempelo, ne bapika bamisungi. Shi bino biyukeno bibatūlwa pa bantu mu uno muswelo, kyādi kilomboji kya kufwijibwa bumvu.
Inoko, ke ponsopo pādi pamonwa biyukeno bya uno muswelo bu kufwijibwa bumvu. Bantu bavule ba pa kala bēbingidije mwanda wa kwiyukanya’mba i ba ku kabila nansha ba mu kipwilo kampanda. Kimfwa dibuku Theological Dictionary of the New Testament dinena’mba, “bene Shidea bēpēne kudi leza Hadada ne leza Atargatis na kwitūla biyukeno mu nkonyenyo ya makasa nansha mwishingo . . . Batōtyi ba Dionisusa bādi batūlwa kiyukeno kya dyani dya mulundu.”
Baneni bavule ba mu ano mafuku balanga’mba Polo wādi wisambila pa mikovu yaāshele nayo kitatyi kyaādi ususulwa mu mwingilo wandi wa bu mishonele mu byaba palapala. (2 Bene Kodinda 11:23-27) Padi Polo wādi ukimba kunena’mba mwiendelejo wandi o wādi umuyukanya bu mwine Kidishitu, ino ke biyukenopo bya ku ngitu.
10-16 KWEJI 6
BYABULĒME BYA MU KINENWA KYA LEZA | BENE EFISESA 1-3
“Buludiki bwa Yehova ne Mwingilo Wabo”
it-2-F 858 mus. 2
Kifibwe Kikola
Bulopwe Bupelwe Meshiasa. Polo mu bilembwa byandi usokola patōkelela kifibwe kikola kya Kidishitu. Mu Bene Efisesa 1:9-11 ushintulula’mo amba Leza wayukanya “kifibwe kikola” kya kiswa-mutyima kyandi, kadi unena’mba: “Nakyo i mwendele kuloelelwa kwandi kwaetungīle aye mwine mwanda wa buludiki enka ne ku mfulo kwa bitatyi bitungwe, mwa kukongakenya bintu byonso mudi Kidishitu, bintu bya mūlu ne bintu bya pano panshi. Bine, i mudi aye otudi nandi mu bumo ne otwatūdilwe nandi bu bampyana, pa kutongwa kala mwendele mpango ya mwine ufikidija bintu byonso monka mwatyibila mbila mungya kiswa-mutyima kyandi.” Mu kino “kifibwe kikola” mubadilwa ne umbikalo wa Bulopwe bwa Leza bupelwe Meshiasa. “Bintu bya mūlu,” bisambile’po Polo, i Kidishitu ne bampyana nandi ba Bulopwe bwa mūlu. “Bintu bya pano panshi,” i babikalwa ba buno Bulopwe. Yesu wāsapwidile bandi bana ba bwanga’mba kifibwe kikola kikwatañene na Bulopwe paānenene amba: “Banwe mwi bapebwe kifibwe kikola kya Bulopwe bwa Leza.”—Mak 4:11.
“Yehova Kasukwa” Ukongakanyanga Kisaka Kyandi
3 Mosesa wāsapwidile Bene Isalela amba: “Yehova wetu Leza i Yehova kasukwa.” (Kup. 6:4) Bilongwa bya Yehova ne mpango yandi i bikwatañane. Nanshi, ‘pa kufikidila ponka myaka yonsololo,’ Leza watūla’ko “kilelo kya ntanda”—ko kunena’mba, mpangiko ya kulunga mu bumo bipangwa byandi byonso bya ñeni. (Tanga Efisesa 1:8-10.) Kino kilelo kya ntanda, kikavuija kitungo kyakyo mu bipindi bibidi. Kipindi kibajinji i kuteakanya kipwilo kya bashingwe māni bakamone būmi bwa momwa mūlu munshi mwa Yesu Kidishitu Mutwe wabo wa ku mushipiditu. Kino kipindi kyāshilwile mu Pentekosa 33 K.K. kitatyi kyāshilwile Yehova kukongakanya boba bakuludika na Kidishitu mūlu. (Bil. 2:1-4) Bano bashingwe māni byobamwenwe bu boloke ne bafwaninwe būmi pangala pa kitapwa kya kikūlwa kya Kidishitu, bayukile amba i betabijibwe bu “bāna ba Leza.”—Loma 3:23, 24; 5:1; 8:15-17.
4 Kipindi kya bubidi i kuteakanya boba ba kukekala mu Paladisa pano pa ntanda mu Bulopwe bwa Kidishitu bwa Kimeshiasa. “Kibumbo kikatampe” kyo kisumpi kibajinji kikatwela mu Paladisa. (Kus. 7:9, 13-17; 21:1-5) Mu bula bwa Umbikalo wa Myaka Kanunu, midiyo ne midiyo ya bantu bakasangulwa bakelunga nabo. (Kus. 20:12, 13) Fwatakanya’po bidi muswelo ukatuntwila lusangukilo ku bumo bwetu! Ku mfulo kwa myaka kanunu, ‘bintu byonso panopanshi’ bikatompibwa dya mfulo. Boba bakashala bakōkele baketabijibwa bu “bāna ba Leza” ba pano panshi.—Loma 8:21; Kus. 20:7, 8.
Kukola Byabupeta bya ku Mushipiditu
Kokaleka Kintu Nansha Kimo Kikukankaje Kumona Ntumbo
15 Kūminina kwetu mu kulonga kiswa-mutyima kya Yehova kukwashanga bakwetu bamone ntumbo. Polo wāsonekēle kipwilo kya Efisesa amba: “Nsakila’mba, kemukapungila pa byamalwa byami bya pa bānwe, byo bidi bya ntumbo yenu.” (Ef. 3:13) Le byamalwa bya Polo byādi “ntumbo” ya bene Efisesa mu buluji’ka? Kwiteakanya kwādi kwiteakenye Polo kwibengidila nyeke nansha ke mu matompo, kulombola bene Efisesa amba dyese dyobādi nadyo dya kwikala bene Kidishitu dyādi na bulēme ne mvubu mikatampe. Shi Polo wāzozele paādi mu byamalwa, le kino kekyādipo kya kuleta musapu wa amba kipwano kyabo na Yehova, mwingilo wabo, ne lukulupilo lwabo kebyādipo na mvubu? Kūminina kwa Polo kwāzunzwile bwine Kidishitu ne kulombola’mba, kwikala mwanā bwanga kudi na mvubu kutabuka kitapwa kyo-kyonso.
“Muyuke ne Buswe bwa Kidishitu”
21 Kishima kya Kingidiki kyalamwinwe amba “muyuke” kishintulula kuyuka “bya binebine, kupityila ku bintu byowimwenine.” Shi tulombole buswe mwālombwedile’bo Yesu—twipānine bakwetu pampikwa kwisakila, tukwashe na lusa boba bafudilwe, ne kwibalekela na mutyima umo—nabya twivwanije biyampe buswe bwandi. Mu uno muswelo, na myanda mimweke, ‘tukayuka buswe bwa Kidishitu butabukile buyuki.’ Kadi, banwe banabetu, ketwakilwai nansha dimo amba shi twiule Kidishitu, tukafwena bininge yewa obaiwile kudi Yesu, ke Yehova Leza wa buswe kadi.
17-23 KWEJI 6
BYABULĒME BYA MU KINENWA KYA LEZA | BENE EFISESA 4-6
“Vwalai Bivwalwa Byonso bya Bulwi bya kwa Leza”
A Bankasampe Komenai Dyabola
MUTUMIBWA Polo wādingakenye bene Kidishitu na basola. Tudi mu bulwi, kadi balwana netu i bantu badi’ko bine! Ino bulwi bwetu ke bwa kulwapo na bantu; abo i bwa kulwa na Satana ne bandemona. Ke balwe divita mu tununu ne tununu twa myaka kadi bayukile’byo kulwa senene. O mwanda bibwanya kumweka’mba ketubwanyapo kunekenya dino divita, nakampata shi tukidi bankasampe. Le bankasampe babwanya kunekenya bano balwana bakomokomo? En-en babwanya, kadi bebanekenyanga! Namani? Yehova wibapanga bukomo. Kadi, pamo bwa basola bafundijibwe bulwi senene, bavwalanga “bivwalwa byonso bya bulwi bya kwa Leza” mwanda wa bekale beteakanye mwa kulwila.—Tanga Efisesa 6:10-12.
A Bankasampe Komenai Dyabola
4 Pamo bwa mukaba, bubine botwifunda mu Kinenwa kya Leza bwitukiñanga ku bufundiji bwa bubela. (Yoano 8:31, 32; 1 Yoano 4:1) Potwenda twifunda kusanswa bininge bubine bwa mu Kinenwa kya Leza, po pene biketupēlela kwiendeja mungya misoñanya ya Leza, nansha kuvwala “kilama-kyadi.” (Ñimbo ya Mitōto 111:7, 8; 1 Yoano 5:3) Kadi, shi twivwanije senene buno bubine, nabya tukabwanya kulwa na balwana netu.—1 Petelo 3:15.
7 Misoñanya myoloke ya Yehova, mine ikiñanga “mutyima” wetu, nansha bumuntu bwetu bwa munda, ibwanya kudingakanibwa na kino kilama-kyadi. (Nkindi 4:23) Sola kādipo ufwaninwe kushinta kilama-kyadi kya byuma bikomo na kya byuma bya bulebule. Mu muswelo umo onka, netu ketufwaninwepo kushinta nansha dimo misoñanya myoloke ya Yehova na milangwe yotumona batwe bene bu myoloke. Ketubwanyapo kukinga mutyima wetu batwe bene. (Nkindi 3:5, 6) O mwanda tufwaninwe kubandaula kyaba kyonso amba kyetu “kilama-kyadi” kikilamine mutyima wetu.
10 Bilato byādi bivwala basola bene Loma byādi bibakwasha banekenye ku bulwi, netu bilato bya kyelekejo byotuvwala bitukwashanga tusapule “myanda miyampe ya bintu biyampe.” (Isaya 52:7; Loma 10:15) Kyaba kimo, bilombanga bukankamane bukatampe pa kusapula. Bo, wa myaka 20, unena’mba: “Nadi ngivwana moyo pa kusapwila bakwetu ba ku masomo. Nadi ngivwana bumvu. Shi mvuluke, nkiyukilepo kine kyonadi neivwanina uno muswelo. Inoko pano ngidi na nsangaji ya kusapwila bakwetu.”
w18.05 p. 29-31 mus. 13, 16, 20
A Bankasampe Komenai Dyabola
13 Lelo i ‘miketo’ka ya mudilo’ ibwanya kukwasa Satana? Padi ubwanya kukutamba na bubela pa myanda itala padi Yehova. Satana ukusakilanga wimone amba Yehova kakusenswepo ne amba i kutupu muntu nansha umo ukutele mutyima. Ida, wa myaka 19, unena’mba: “Divule nadi nemona’mba Yehova kadipo nami pabwipi kadi kasakengapo kwikala Mulunda nami.” Le i bika byaadi ulonga shi weivwana uno muswelo? “Kupwila kukomejanga lwitabijo lwami. Nadi nsenswe kushikata’mo pampikwa kulondolola, nanga’mba i kutupu muntu nansha umo usa kusangela byonsa kulondolola. Inoko pano, nteakanyanga kupwila ne kulonga bukomo bwa kulondolola’ko dibidi nansha disatu. Ke bimpēlelangapo, ino neivwananga biyampe shi nalonga namino. Kadi batutu ne bakaka bankankamikanga bininge. Divule njokanga ku kupwila koku ndyukile amba Yehova unsenswe.”
16 Monka mulaminanga kilama-mutwe bongolo bwa sola, “lukulupilo lwa lupandilo” lwetu nalo lulamanga milangwe yetu. (1 Tesalonika 5:8; Nkindi 3:21) Lukulupilo lwitukwashanga tute mutyima ku milao ya Leza ne kuleka kutyumukwa mutyima pa mwanda wa makambakano etu. (Ñimbo ya Mitōto 27:1, 14; Bilongwa 24:15) Pa kusaka’mba lukulupilo lwitulame, lufwaninwe kwikala lwa bine kotudi. Tufwaninwe kuvwala “kilama-mutwe” ku mutwe wetu, ke kusela’kyopo ku makasa!
20 Mutumibwa Polo wānenene amba Kinenwa kya Leza kidi bwa kipete. Yehova i mwitupe’kyo. Ino tufwaninwe kwifunda mwa kwikingidijija na bunwa pa kubingija lwitabijo lwetu nansha kusendulula mulangilo wetu. (2 Kodinda 10:4, 5; 2 Temote 2:15) Le i muswelo’ka obwanya kulumbulula bwino bobe? Sebastian, wa myaka 21, unena’mba: “Nadi nembanga vese umo mu shapita ne shapita mu butangi bwami bwa Bible. Nakongakenye pamo mavese onsenswe.” Kino kyamukweshe evwanije senene mulangilo wa Yehova. Daniel ubweja’ko amba: “Mu butangi bwami bwa Bible, ntoñanga mavese omona’mba akakwasha bantu bonketana nabo mu busapudi. Najingulwile amba bantu batejanga biyampe shi abamone amba abe mwine usangedile byobya binena Bible kadi uloñanga bukomo bwa kwibakwasha.”
Kukola Byabupeta bya ku Mushipiditu
it-2-F p. 859 mus. 7
Buujila
Mushipiditu ujila. Mushipiditu nansha’mba bukomo bwa Yehova bwingila, ulondanga bwendeji bwandi kadi ufikidijanga nyeke mpango yandi. I wampikwa disubi, utōka, ukola, kadi i mupandulwe mwanda wa kwingidijibwa biyampe na Leza. O mwanda utelwanga bu “mushipiditu ujila” nansha’mba “mushipiditu wa buujila.” (Ñi 51:11; Luk 11:13; Lo 1:4; Ef 1:13) Mushipiditu ujila wingila mu muntu, i bukomo bumukwasha ekale na buujila ne wampikwa disubi. Kilongwa kyonso kya disubi nansha kibi, kilwanga nansha’mba ‘kifītyijanga’ mushipiditu mutyima. (Ef 4:30) Nansha byokeudipo bu muntu, mushipiditu ujila i kilomboji kya bumuntu bujila bwa Leza, o mwanda bibwanika ‘kwiufītyija mutyima.’ Kulonga bilongwa bibi kutwalanga ku ‘kubula mudilo wa mushipiditu.’ (1Ts 5:19) Shi bilongwa bya uno muswelo bilongwa kyaba ne kyaba, nabya mushipiditu ujila wa Leza ‘ukafītwa’ kadi muntu ulonga namino Leza umumonanga bu walwana nandi. (Isa 63:10) Muntu ufītyija mushipiditu ujila mutyima ubwanya kufula ne ku kwiutuka, ne buno ye bubi bwēsambile’po Yesu amba kebukalekelwapo muntu mu ino ngikadilo ya bintu nansha ke mu yoya ikāya’ko mine.—Mat 12:31, 32; Mak 3:28-30.
it-1-F p. 237 mus. 7
Makomwa-Meso
Amwekelanga mu Bilongwa. Makomwa-meso amwekelanga mu bilongwa bimwekelele bilombola bubi bwa muntu ne bya kusakasaka byandi byampikwa kwendela’mo. Yakoba mulembi wa Bible witulombola’mba bya kusakasaka bibi, shi bibaimitwa bibutulanga bubi. (Yak 1:14, 15) Muntu wa makomwa-meso uyukenanga ku byalonga. Mutumibwa Polo unena’mba muntu wa makomwa-meso i mutōtyi wa bilezaleza. (Ef 5:5) Uno muntu umonanga bya kusakasaka byandi bya makomwa-meso bu leza wandi na kwibitūla pa kifuko kibajinji kupita mwingilo ne butōtyi bwatōta Umpangi.—Lo 1:24, 25.
24-30 KWEJI 6
BYABULĒME BYA MU KINENWA KYA LEZA | BENE FIDIPAI 1-4
“Kemwakizumbijai Mityima pa Kintu Nansha Kimo”
“Ndoe ya Leza Itabukile Milangwe Yonso”
10 Lelo i bika bibwanya kwitukwasha tuleke kukambakanya “mityima pa kintu nansha kimo” inoko twikale na “ndoe ya Leza”? Binenwa bya Polo ku bene Fidipai bilombola amba shi tukambakanya mityima pa kintu kampanda, kya kulonga i kulombela. O mwanda nanshi tufwaninwe kupingakanya kukambakanya mutyima na milombelo. (Tanga 1 Petelo 5:6, 7.) Polombela kudi Yehova, ikala na kikulupiji kyonso amba ukutele mutyima. Mufwije’ko nyeke pa madyese andi onso akwesela. Kadi kokilwa nansha dimo amba Yehova ukokeja “kulonga byobya bivulevule kupita ne byonso byotulomba ne byotulanga.”—Efisesa 3:20.
“Ndoe ya Leza Itabukile Milangwe Yonso”
7 Banabetu ba mu Fidipai pobātangile mukanda wēbalembēle Polo, le wēbavulwije bika? Padi bavule bāvulukile byobya byātene ba Polo ne Shilasa ne muswelo wēbakweshe Yehova mu kitulumukila. Lelo Polo wēbafundije bufundiji’ka mu mukanda wāebatumine? Bufundiji i buno amba: Kemwakikambakanyai mityima. Lombelai, ebiya mukekala na “ndoe ya Leza itabukile milangwe yonso.” Le uno muneneno ushintulula bika? Malamuni amo a Bible anena’mba “itabukile bilotwa byetu byonso” nansha’mba “itabukile mpango yonso ya bantu.” Nanshi Polo wādi usaka kunena’mba “ndoe ya Leza” i ya kutendelwa’po kashā. Nansha kitatyi kimo byoketubwanyapo kuyuka kya kulonga pa makambakano etu, aye Yehova uyukanga. Kadi ubwanya kulonga bintu mu kitulumukila—Tanga 2 Petelo 2:9.
“Ndoe ya Leza Itabukile Milangwe Yonso”
16 I bika bikalongeka shi tubaikala na “ndoe ya Leza itabukile milangwe yonso”? Bible unena’mba “ikalama” mityima yetu ne ñeni yetu. (Fidipai 4:7) Muneneno mwinemwine kutambile kishima ‘kulama,’ i muneneno wa basola wādi ufunkila pa kibumbo kya basola kyādi kipelwe mwingilo wa kulama kibundi. Bekadi ba mu kibundi kya Fidipai nabo bādi balamwa na kino kibumbo. Bādi balāla biyampe bufuku mwanda bādi bayukile amba kibundi kyabo i kilamibwe. Mu muswelo umo onka, netu shi tudi na “ndoe ya Leza,” nabya ketukakambakanyapo mutyima kadi mityima yetu ne ñeni yetu bikalamwa. Tuyukile amba Yehova witutele mutyima kadi witusakilanga biyampe. (1 Petelo 5:10) Kadi kino kitukiñanga ku kulēmenenwa na kukambakanya mutyima nansha kutyumukwa’o.
Kukola Byabupeta bya ku Mushipiditu
it-2-F p. 850 mus. 1
Byamulambu
Byamulambu bya bitomibwa. Byamulambu bya bitomibwa byādi bilambulwa pamo na byamulambu bikwabo bivule, byādi bilambulwa nakampata mu kitatyi kyādi kishikete bene Isalela mu Ntanda ya Mulao. (Umb 15:2, 5, 8-10) Byādi bya vinyu (“mālwa”) kadi yādi itūtwa pa kisōkelo. (Umb 28:7, 14; dingakanya na Div 30:9; Umb 15:10) Mutumibwa Polo wālembēle bene Kidishitu ba mu Fidipai amba: “shi mpungululwanga bwa kyamulambu kya bitomibwa pa kitapwa ne mwingilo ujila wemufikije’ko lwitabijo lwenu, nasangala.” Pano wāelekeje kyamulambu kya bitomibwa na mutyima wandi wa kwipānina bakwabo bene Kidishitu. (Fid 2:17) Mafuku matyetye kumeso kwa aye kufwa wālembēle Temote amba: “Ami mpungululwanga kala bwa kyamulambu kya bitomibwa, kadi kitatyi kyami kya kukutululwa kibafwena.”—2Tm 4:6.
“Lusangukilo Lubajinji”—Lukyendelela ne Pano!
5 Kupwa, bashingwe māni ba mu “Isalela wa Leza” bafwaninwe kuketana na Mfumwetu Yesu Kidishitu mu ntumbo ya mūlu, mobakekala “nyeke ne nyeke na Mfumwetu.” (Ngalatea 6:16, MB; 1 Tesalonika 4:17) Kino kinkumenkume kitelwanga bu “kusanguka” kubajinji nansha “lusangukilo lubajinji.” (Fidipai 3:10, 11; Kusokwelwa 20:6, MB) Pasa kupwa luno lusangukilo, papo ke kitatyi kya midiyo ne midiyo kusangulwa pano pa ntanda amba bamone būmi bwa nyeke mu Paladisa. Nanshi shi tukulupile kwenda mūlu nansha kukekala pano pa ntanda, batwe bonso tusakanga kujingulula luno “lusangukilo lubajinji.” Le i lusangukilo lwa muswelo’ka? Lukalongeka kitatyi’ka?