Myanda ya Kunyemena’ko ya Kabuku ka ku Kupwila Būmi ne Mwingilo
2-8 KWEJI 11
BYABULĒME BYA MU KINENWA KYA LEZA | DIVILU 39-40
“Mosesa Wālondele Senene Bulombodi”
Lelo Yehova Ukuyukile?
Ino Mosesa aye “wadi muntu mukōkele’tu, utabukile bantu bonsololo baikele panopanshi kikōkeji.” (Umb. 12:3) Wālombwele kwiubija ne kwityepeja na kusumininwa kulonda bwendeji bwa Yehova. (Div. 7:6; 40:16) I kutupu palombola’mba divule Mosesa wādi utatana muswelo ulonga Yehova bintu nansha kujingwa mutyima pa kulonda mupangila Yehova bintu. Kimfwa, Yehova wāletele musoñanya wa mwa kūbakila tabenakulo utela katye ne katye, kimfwa musombelo wa myonji ne buvule bwa nkobekelo ya kwingidija pa kupunga kisandi kya makupo. (Div. 26:1-6) Shi mu bulongolodi bwa Yehova mutadi wakupe bulombodi bumweka bu watwela mpata mu katye ne katye, kyaba kimo padi kwije kojingwe mutyima. Inoko, Yehova i mutadi mubwaninine, upāna mingilo ku bantu ne ukulupile bengidi bandi. Shi wapāna bulombodi mu kanda ne kanda, yuka’mba padi bubinga bwendele’mo. Inoko, yuka’mba Mosesa kākaladilepo Yehova pa kumupa bulombodi mu kanda ne kanda, nansha kulanga’mba wamuzawila nansha kumutyinya-mbavu mu bintu byayukile ne mu bwanapabo bwandi. Mosesa aye wādi utadija biyampe bengidi shi mungya misoñanya ya Leza “e mo balongele.” (Div. 39:32) Bine kuno i kwityepeja! Mosesa wādi uyukile amba uno i mwingilo wa Yehova kadi aye i kingidilwa bitupu kya kuvuija mingilo.
Lelo Utūkenye Umbintu Byonso?
Bahebelu 3:5 unena’mba: “Mosesa nandi wadi wabinebine.” I bika le byālengeje mupolofeto Mosesa ekale wa binebine? Pa mwanda utala lūbako ne kushimika kwa tabenakulo, “enka namino e mwalongele Mosesa; monka mwendele byonso byamusoñaninye Yehova, e mwālongele.” (Divilu 40:16) Batwe batōtyi ba Yehova netu tulombolanga amba twi ba binebine na kumwingidila na kikōkeji. Kino kilomba na bubine kulama dikōkeji dyetu kudi Yehova ne mu matompo makomo nansha mu bitompibwa byamalwa. Inoko, kunekenya matompo makatampe ke enka akopo kulombola amba twi ba binebine. Yesu wānene amba: “Aye utūkenye umbityetyetyetye nansha umbingi utūkenye. Nanshi aye wampikwa kutūkanya umbityetye nansha umbingi katūkanyapo, mhm.” (Luka 16:10) Tufwaninwe kwikala ba binebine enka ne mu tumyanda tumweka bu tutyetyetyetye.
Kukola Byabupeta bya ku Mushipiditu
it-2-F p. 510 mus. 4
Biseba bya Foke
Muswelo Wēbisokwele Bene Isalela. Shi kishima tachash kingidijibwe mu Bible kifunkila pa musaka wa foke, kino kitulengeja twiipangule mwāsokwedile bene Isalela biseba bya foke. Divule dine bafoke basenswe kushikata mu bifuko bya mashika, inoko kudi misaka imo ya bafoke basenswe kushikata mu kyanga. Dyalelo ke kushale bafoke batyetye mu Dijiba dya Meditelanea ne mu bifuko bikwabo bya mema a kyanga. Mu bula bwa myaka tutwa na tutwa bantu i bakubije bafoke bavule, inoko mu kitatyi kyālembelwe Bible bano banyema bādi’ko bavule mu Meditelanea ne mu Dijiba Dityila. Kufika mu 1832, dibuku dimo dya Calmet (Dictionary of the Holy Bible p. 139) dyānenene amba: “Pa tubisanga tuvule twa mu Dijiba Dityila, ku lusongo lwa Shinai kutanwa bafoke.”—Tala ne The Tabernacle’s Typical Teaching, na A. J. Pollock, Londoni, p. 47.
w15-F 15/7 p. 21 mus. 1
Le Mwingilo Obe Udi na Mvubu Kudi Ani?
Kipema pa kupwa, “dikumbi dyashilula kupūta pema wa kubungakena’ko, ntumbo ya Yehova nayo yayula mu kipema.” (Div 40:34) Bine, kino kyādi kilomboji kya patōkelela kya kwitabijibwa na Yehova! Molangila, le ba Bezalela ne Ohodiaba bēivwene namani? Nansha majina abo byokeālembelwepo pa bintu byobāpungile, ino bāsangele pa kumona’mba Leza waesela bukomo bobalongele. (Nki 10:22) Mu myaka yālondele’po, na bubine basangele bininge pa kumona’mba bintu byobapungile bikingidijibwa mu mwingilo wa Yehova. Pobakasangulwa mu ntanda mipya, ba Bezalela ne Ohodiaba bakasangala bya binebine pa kuyuka’mba kipema kyāingidijibwe mu butōtyi bwa bine mu kintu kya myaka 500!
9-15 KWEJI 11
BYABULĒME BYA MU KINENWA KYA LEZA | BENE LEVI 1-3
“Kitungo kya Byamulambu”
it-2-F p. 847
Byamulambu
Kyamulambu kisōkwe. Kyamulambu kisōkwe kyādi kilambulwa kyonso kituntulu kudi Leza; mwine ulambwile’kyo kādipo uyata’ko kipindi nansha kimo. (Dingakanya na Bat 11:30, 31, 39, 40.) Kyamulambu kisōkwe kyādi kilambulwa mwanda wa kulomba Yehova etabije nansha kulombola’mba witabije kyamulambu kya bubi kyādi kilambulwa kyaba kimo na kino kyamulambu. Yesu Kidishitu nandi wēpēne aye yense bu “kyamulambu kisōkwe.”
it-2-F p. 849 mus. 7
Byamulambu
Byamulambu bya miseke. Byamulambu bya miseke byādi bilambulwa pamo na byamulambu bya kipwano, na byamulambu bisōkwe, ne na byamulambu bya bubi, kadi byobyādi byangulwa bibajinji; kyaba kimo byādi bilambulwa ne abyo bine pa bula. (Div 29:40-42; Lev 23:10-13, 15-18; Umb 15:8, 9, 22-24; 28:9, 10, 20, 26-28; shap. 29) Bino byamulambu byādi bilambulwa mwanda wa kufwija’ko Leza pa madyese andi mavule ne ntundubuko. Byādi bilambulwa pamo na māni ne ensense itōka. Byamulambu bya miseke byādi bibwanya kwikala bya bukula bupēla, bya miseke mikange, bya mikate idi bwa ntonto, nansha tumikate tupapakane, bisōke mu kininga nansha mu fūlu. Kipindi kimo kya byamulambu bya miseke kyādi kitūlwa pa kisōkelo kya kyamulambu kisōkwe, kipindi kikwabo nakyo kyādi kidibwa na babitobo, kadi shi i kyamulambu kya kipwano, ne yewa uletele’kyo wādi udya’ko. (Lev 6:14-23; 7:11-13; Umb 18:8-11) Kyamulambu kya miseke kyonso kyādi kitūlwa pa kisōkelo kekyādipo kifwaninwe kwelwa’ko kiyujo nansha “būki” (padi i busuku bwa bikuyu nansha busuku bwa bipa) bwine bwādi bubwanya kwikitatukija.—Lev 2:1-16.
it-2-F p. 847 mus. 5
Byamulambu
Byamulambu bya kipwano (nansha byamulambu bya ndoe). Byamulambu bya kipwano bitabijibwe na Yehova byādi bishintulula kwikala nandi mu ndoe. Yewa uletele kino kyamulambu ne ba mu njibo yandi nabo bādi badya’ko (mungya kibidiji, mu kipango kya kipema mwādi mushimike bitanda munda mwa mpashila yādi ikingile kipango; ino mu tempelo amo, mwādi byumba bya kudīla’mo). Kitobo wimanine mwingilo wādi upebwa kipindi kimo, ebiya kipindi kikwabo kyāpebwa babitobo bādi bengila mingilo mikwabo. Ino Yehova aye wādi upebwa luvumba luyampe lwa mwishi wa māni masōke. Mashi byoafunkila pa būmi, ādi apebwa’nka Leza kete. Nanshi babitobo, yewa uletele kyamulambu ne ba mu njibo yandi, ne Yehova abo bonso bādi badīla pamo, ko kunena’mba bādi bekala mu ndoe. Shi muntu wadī’ko aye papo na disubi (disubi dyo-dyonso dyādi ditelelwe mu Bijila) nansha shi wadī mwita’wa kitatyi kya kwiudya ke kipite (mu kitatyi kya kyanga mwita wādi ubwanya kushilula kubola) yao muntu wādi ufwaninwe kutyibwa’ko mu bantu bandi. Wādi usubija nansha kukobakanya byakudya pa mwanda wa disubi dyandi nansha pa mwanda wa kudya bintu ke bibole ku meso a Yehova Leza, kino kyādi kilombola’mba kalēmekelepo bintu bikola.—Lev 7:16-21; 19:5-8.
Kukola Byabupeta bya ku Mushipiditu
Myanda Mikatampe ya mu Mukanda wa Bene Levi
2:13—Mwanda waka mwepo wādi utobwa mu ‘byakwela byonso’? Ke mwandapo wa kutobaja bitapwa, mhm. Ntanda yonso ingidijanga mwepo mwanda wa kulama bintu. Mobimwekela bādi batoba’o mu byakwela kutyina amba byakabola ne koneka.
it-1-F p. 1003
Māni
Bubinga bwa kino kijila. Mu kipwano kya Bijila, mashi ne māni byādi bimonwa bu bintu bya Yehova kete. Mashi i būmi, bwine bubwanya kupānwa’nka na Yehova kete; nanshi i andi. (Lev 17:11, 14) Māni nao ādi amonwa bu kipindi kilumbuluke mpata ku nyema. Muntu wādi ulambula māni a nyema, mwanda wa kulombola’mba bipindi bilumbuluke mpata i bya Yehova, mwine upānanga pampikwa kakama, kadi wādi ulombola’mba udi na mutyima wa kupa Leza kyokya kitabukile kunengela. Māni byoādi afunkila pa kintu kitabukile kunengela kyādi kipāna bene Isalela kudi Yehova, Bible ulombola’mba ādi afituka pa kisōkelo bu “kyakudya” ne bu “luvumba luyampe” kwadi. (Lev 3:11, 16) Nanshi kudya māni kwādi kusela bintu bipandulwe kudi Leza, kuyata bintu bipelwe Yehova. Muntu wādi udya māni wādi upebwa mfuto ya lufu. Inoko kwishila na mashi, māni ao ādi abwanya ne kwingidijibwa mu miswelo mikwabo, kimfwa shi nyema wefwila aye mwine nansha shi waipaibwa na nyema mukwabo.—Lev 7:23-25.
Myanda Mikatampe ya mu Mukanda wa Bene Levi
3:17. Māni byoādi amonwa bu kipindi kya mvubu ne kilumbuluke kutabuka, kupeleja kudya’o kwādi kupa bene Isalela milangwe ya kuyuka amba Yehova ufwaninwe kupebwa kipindi kilumbuluke kutabuka byonso. (Ngalwilo 45:18) Kino kituvuluja amba netu tufwaninwe kupa Yehova kyokya kilumbuluke kutabuka.—Nkindi 3:9, 10; Kolose 3:23, 24.
16-22 KWEJI 11
BYABULĒME BYA MU KINENWA KYA LEZA | BENE LEVI 4-5
“Pá Yehova Kyokya Kitabukile Kunengela”
it-2-F p. 848 mus. 12
Byamulambu
Byamulambu bya mambo. Byamulambu bya mambo byādi bilambulwa ne bu byamulambu bya bubi, mwanda bubi bwādi bulengeja muntu apye mambo. Byamulambu bya mambo byādi bilambulwa pa mwanda wa bubi kampanda bwādi bulengeja muntu apye mambo, ino byādi bishile bityetye na byamulambu bikwabo bya bubi, mwanda byamulambu bya mambo byādi biletwa shi muntu walubila muntu mukwabo. Pa kino, muntu’wa wādi ulubila Yehova nansha kulubila muzo wandi ujila. Kyamulambu kya mambo kyādi kiletwa mwanda wa kulonda boloke bwa Yehova, kadi kino kyādi kikwasha nonga-bibi wesāsa ekale na būmi na bwaadi nabo, aleke kususuka na bipa bibi bilupukile ku bubi bwandi.—Dingakanya na Isa 53:10.
w09-F 1/6 p. 26 mus. 3
Aye Uyukile Mikalo Yetu
Pa kulombola mutyima wa lusalusa wa Yehova, Bijila byānenene amba: “Ino shi kabwanyapo kusokola mukōko, nabya ukaselela Yehova tukutyikutyi tubidi nansha bibondya bya bankunda bibidi bu kyamulambu kya mambo mwanda wa bubi.” (Vese 7) Musemwa “shi kabwanyapo kusokola,” ubwanya kwalamunwa ne bu “shi kabwanyapo kufikila’po.” Shi mwine Isalela i mulanda kabwanyapo kusokola mukōko, Leza wādi witabija kintu kyabwanya kufikila’po—tukutyikutyi tubidi nansha bankunda babidi.
w09-F 1/6 p. 26 mus. 4
Aye Uyukile Mikalo Yetu
Le byādi bikala namani shi muntu kadipo nansha na muswelo wa kusokola toni tubidi? Bijila byānenene amba: “Nankyo ufwaninwe kusela bu kyamulambu kyandi mwanda wa bubi bwandi, kipindi kimo kya pa bipindi dikumi bya efa [makopo mwānda nansha kitema] wa bukula bupēla bu kyamulambu kya bubi.” (Vese 11) Yehova wāpele balanda bininge mukenga wa kulambula kyamulambu kya bubi kya kubulwa mashi. Mu Isalela bulanda kebwādipo bubudija muntu dyese dya kupūta bubi nansha dya kwikala mu ndoe na Leza.
Kukola Byabupeta bya ku Mushipiditu
Boila Ñeni ku Bengidi ba Yehova ba Lulamato
Nobe ubwanya kulamata bidi kudi Yehova ne ku bantu bakwabo na kanye. Kimfwa, shi ubayuka amba mwanetu umo i mulonge bubi bukatampe. Bine, ukasaka kulamata kwadi, nakampata shi i mulunda nobe wa pa mutyima nansha shi i muntu wa mu kisaka. Inoko kadi uyukile’mba kulamata kudi Yehova kyo kintu kya mvubu kutabuka. Pamo bwa Natana, kōkela Yehova ne kwikala na kanye kudi mwanenu. Mulombole amba ufwaninwe kukalomba bukwashi ku bakulumpe ne kadi amba ufwaninwe kukebasapwila kiponka na ponka. Shi wapele, nabya kalombole’mo bakulumpe. Shi ulonge namino, ukashala mulamate kudi Yehova. Kadi mu kino kitatyi, ubalombola kanye kudi mwanenu mwanda bakulumpe bakamukwasha ajokeje monka kipwano kyandi na Yehova. Bine, bakamudingila na butūkanye ne mu muswelo muyampe.—Tanga Levi 5:1; Ngalatea 6:1.
it-2-F p. 861 mus. 8
Buujila
Banyema ne byangulwa. Banyema balume babajinji kubutulwa ba bañombe, mikōko, ne ba bambuji bādi bamonwa bu bajila ku meso a Yehova kadi kebādipo ba kukūla. Bādi bapandulwe mwanda wa kwibalambula bu kitapwa, bipindi bimo byāpebwa babitobo bapandulwe. (Umb 18:17-19) Byangulwa bibajinji ne kya kujikija dikumi byādi bijila, enka ne bitapwa ne byabuntu byonso byādi bitūlwa mwanda wa mwingilo wa ku kipandulwe. (Div 28:38) Bintu byonso bijila ku meso a Yehova byādi bikola, bifwaninwe kukwata na bulēme, kadi kebyādipo bifwaninwe kwingidijibwa mu muswelo wampikwa kufwaninwa. Kimfwa kimo bidi i kijila kitala bya kujikija dikumi. Shi muntu watūla pafula bintu bya kujikija dikumi kimfwa miseke ya ñano, ino aye nansha muntu mukwabo wa mwinjibo weingidija pampikwa kuyuka, watēka’yo, muntu’wa wādi ujilula kijila kya Leza kitala kulēmeka bintu bijila. Mungya Bijila wādi ufwaninwe kukalwija ku kipandulwe buvule bumo bonka kupwa wābweja’ko ne musubu, kadi wādi ufwaninwe ne kulambula kitapwa kya mukōko mulume wa mu luombe lwandi. Kino kyādi kilengeja bantu balēmeke bininge bintu bijila bipēnwe kudi Yehova.—Lev 5:14-16.
23-29 KWEJI 11
BYABULĒME BYA MU KINENWA KYA LEZA | BENE LEVI 6-7
“Kilomboji kya Kufwija’ko”
Ñeni Yotubwanya Kuboila ku Mukanda wa Bene Levi
Ñeni ya bubidi: Twingidilanga Yehova mwanda tusakanga kumufwija’ko. Pa kwivwanija uno mwanda, twisambilei bidi pa byamulambu bya kipwano, kintu kikwabo kya mvubu kyādi kilongwa mu butōtyi bwa bine mu Isalela wa kala. Mu mukanda wa Bene Levi, twifunda’mo amba mwine Isalela wādi ulambula kitapwa kya kipwano “bu kilomboji kya kufwija’ko.” (Levi 7:11-13, 16-18) Kādipo ulambula kino kyamulambu na kuningilwa ino i na kusaka kwandi. Kino kyādi kyamulambu kya kwilanga kyādi kilambula muntu mwanda usenswe Leza wandi, Yehova. Muntu wādi ulambula kino kyamulambu, kisaka kyandi, ne babitobo bādi badya mwita wa kitapwa kya nyema. Inoko kudi bipindi bimo bya kitapwa kya nyema byādi bilambulwa’nka kudi Yehova kete. Le i bipindi’ka?
Bitapwa Byādi Bisangaja Leza
Kyakwela kikwabo kya na mutyima tō kyādi kyelwa i kitapwa kya kipwano, kitelelwe mu bene Levi shapita 3. Dijina dya kino kyakwela dikokeja kwalamunwa ne bu “kitapwa kya byakwela bya ndoe.” Mu Kihebelu, kishima “ndoe” kekidipo enka na buluji bwa kwikala ku matwi talala, pambulwa divita nansha kavutakanya. Dibuku dimo (Studies in the Mosaic Institutions) dinena’mba: “Mu Bible, kidi na buno buluji, kadi kishintulula ne kushikata nansha kupwana kipwano kya ndoe na Leza, ntundubuko, nsangaji ne tusepo.” Nanshi bitapwa bya kipwano byādi byelwa kebyādipo byelelwa kutyina kukalañana na Leza, pamo bwa kumutūkija mutyima, mhm, ino byādi byelelwa kumufwija’ko nansha kuvuluka būmi bwa ndoe buyule madyese bwa kupwana na Leza budi na boba betabijibwe na aye. Babitobo ne mwedi wa kitapwa bādi badya’ko shi abapu kulambula mashi ne māni kudi Yehova. (Levi 3:17; 7:16-21; 19:5-8) Mu muswelo mulumbuluke ne wa kyelekejo, babitobo, mwedi wa kitapwa ne Yehova Leza, bādi badya pamo mwanda wa kulombola kipwano kya ndoe kyobādi bapwene umbukata mwabo.
Bitapwa bya Lutendelo Bisangaja Yehova
Lelo mwine wela kyakwela’wa nandi? Bijila byādi binena amba muntu yense wiya ku meso a Yehova ufwaninwe kwikala utōka, wambulwa kiko. Muntu yense musubile pa buluji bo-bonso wādi bidi wela kyakwela kya bubi nansha kya kujilula mwanda wa ekale utōka ku meso a Yehova, nabya kyakwela kyandi kisōkwe nansha kitapwa kya kipwano kiketabijibwa na Yehova. (Levi 5:1-6, 15, 17) Mwene pano tubamone mvubu yotufwaninwe nyeke kwikadila na mwimanino utōka ku meso a Yehova? Shi tusaka butōtyi bwetu bwikale bwitabijibwe na Leza, tufwaninwe kupelakanya kolola bupya-mambo bo-bonso butala pa kujilula bijila bya Leza. Tufwaninwe kupelakana kwileta batwe bene ku bingidilwa bitupele Leza bya kwitukwasha—“bakulumpe ba kipwilo” ne Yesu Kidishitu, “kitapwa kya kipwanyino’mba tulekelwe bubi bwetu.”—Yakoba 5:14; 1 Yoano 2:1, 2, MB.
Kukola Byabupeta bya ku Mushipiditu
it-1-F p. 889 mus. 2
Mudilo
Ku kipema ne ku tempelo. Mudilo wādi wingidijibwa mu butōtyi bwa ku kipema ne mwenda mafuku mu butōtyi bwa ku tempelo. Lubanga lonso ne pa bukata bwa byolwa bibidi, kitobo mukatampe wādi usōka ensense pa kisōkelo kya ensense. (Div 30:7, 8) Bijila bya Leza byāsoñenye amba mudilo wa pa kisōkelo kya kyamulambu kisōkwe ufwaninwe nyeke kulamwa utēma’nka kutēma. (Lev 6:12, 13) Mungya kishi kya Bayuda, abo balanga’mba, mudilo wa pa kisōkelo wābanjilwe mu kingelengele na Leza, ino nansha bantu bavule byobetabije uno mulangwe, inoko keukwatañenepo na Bisonekwa. Mungya bulombodi bubajinjibajinji bobāpele Mosesa kudi Yehova, bana ba Alone bādi bafwaninwe kubanza “mudilo pa kisōkelo ne kupanga nkuni pa mudilo” kumeso kwa kutūla kitapwa pa kisōkelo. (Lev 1:7, 8) I pa kupwa kutūlwa’ko kwa babitobo ba ku musuku wa Alone, ne pa kupwa kulambula bitapwa kitatyi kyātūdilwe’ko babitobo, pātambile mudilo kudi Yehova, mobimwekela wātambile mu dikumbi dyādi pangala pa kipema, wāloteja kyamulambu kyonso kyādi pa kisōkelo. Kukwatañana na kino, mudilo wa mu kingelengele wāmwekele, ino kewāakijepo nkuni yādi pa kisōkelo, ao wāloteje “kyamulambu kisōkwe ne biseso bya māni pa kisōkelo.” Mobimwekela mudilo wāendelele kutēma pa kisōkelo i mudilo wādi kala pa kisōkelo wētyangile na mudilo wātambile kudi Leza. (Lev 8:14–9:24) Muswelo umo onka, mudilo wa mu kingelengele wātambile kudi Yehova, wāloteja bitapwa pāpwile’tu Solomone kulombela kitatyi kyāfikidijibwe tempelo.—2Bi 7:1; tala ne Bat 6:21; 1Ba 18:21-39; 1Bi 21:26 pa kuyukila’ko bimfwa bikwabo bya mudilo wa mu kingelengele wāingidije Yehova pa kwitabija byamulambu byālambwile bengidi bandi.
si-F p. 27 mus. 15
Mukanda wa Busatu wa mu Bible—Bene Levi
(3) Shi muntu walonga bubi pampikwa kusaka nansha mu kalengwa, wādi ufwaninwe kulambula kyamulambu kya bubi. Nyema wādi ulambulwa wādi ukwatañana na muntu mwine ulongele bubi bulomba kupūtwa—kimfwa kitobo, bantu bonso mu kikonge, mfumu, nansha muntu bitupu. Kwishila na kyamulambu kisōkwe ne byamulambu bya kipwano byādi bya kwilanga, ino kyamulambu kya bubi akyo kyādi kisoñanibwe.—4:1-35; 6:24-30.
30 KWEJI 11–6 KWEJI 12
BYABULĒME BYA MU KINENWA KYA LEZA | BENE LEVI 8-9
“Kilomboji kya Kwitabijibwa na Yehova”
it-1-F p. 1189
Kutūlwa
Mosesa wāoije Alone ne bana ba Alone ba Nadaba, Abihu, Eleaza, ne Itamala (nansha padi wēbasoñenye boye abo bene) mu kyoilo kya mukuba kyādi mu kipango, kupwa wāvwika Alone bivwala bya ntumbo bya bu kitobo mukatampe. (Umb 3:2, 3) Alone byaāvwikilwe bisandi bilumbuluke mpata, bino bisandi byādi bifunkila pa ngikadila ne biselwa bya mwingilo wandi. Kupwa Mosesa wāshinga kipema māni, bipungwa byonso bya mu kipema, kisōkelo kya kyamulambu kisōkwe, kyoilo, ne bipungwa byonso byādi bingidijibwa’ko. Wēbipandwile, wēbitūla pafula mwanda wa kwibingidija’nka mu mwingilo wa Leza kete. Ku mfulo Mosesa wāshinga Alone māni na kumupungulwila māni pa mutwe.—Lev 8:6-12; Div 30:22-33; Ñi 133:2.
it-1-F p. 1190 mus. 3
Kutūlwa
Mu difuku dya mwānda, babitobo bateakanibwe bāshilula musunsa mubajinji kwingila mwingilo wabo (pampikwa bukwashi bwa Mosesa), bāingila mwingilo wa kupūta bubi bwa muzo wa Isalela, mwine wādi usakilwa nakampata kutōkejibwa, ke enkapo ku bubi bwa kubulwa kubwaninina, ino i ne ku bubi bwa kubulwa kikōkeji pobātōtele kyana kya ñombe kya olo, ne kino kekyāsangejepo Yehova. (Lev 9:1-7; Div 32:1-10) Dya ku mfulo kwa mwingilo mubajinji wāingile bano babitobo bapya, Yehova wālombola’mba witabije bengile uno mwingilo na kutuma mudilo mu kingelengele, na bubine uno mudilo wātambile mu dikumbi dyādi peulu pa kipema, wāloteja bipindi byonso bya kitapwa byādi bishele pa kisōkelo.—Lev 9:23, 24.
Ñeni Yotubwanya Kuboila ku Mukanda wa Bene Levi
Ñeni ya buná: Yehova weselanga kipindi kya pano panshi kya bulongolodi bwandi. Tulangulukilei bidi pa bintu byālongekele mu 1512 Yesu Kaile kitatyi kyāubakilwe kipema munshi mwa Lūlu lwa Shinai. (Div. 40:17) Mosesa ye wāimanine kinkumenkume kya kutongwa kwa Alone ne bandi bana bu babitobo. Muzo wa Isalela wēbungile mwanda wa kwimwena palambula babitobo bitapwa bya banyema musunsa mubajinji. (Levi 9:1-5) Le Yehova wālombwele namani amba witabije kutongwa kwa bano babitobo bapya? Ba Alone ne Mosesa pobādi besela bantu, Yehova wātuma mudilo, nao wāsōka kitapwa kyonso pa kisōkelo.—Tanga Bene Levi 9:23, 24.
Kukola Byabupeta bya ku Mushipiditu
Kine Kyotufwaninwe Kwikadila Bajila
Butōki bwa ku ngitu bwādi bulombwa mu butobo bwa mu Isalela budi na buluji bwa binebine ku bantu ba Yehova dyalelo. Boba botwifunda nabo Bible divule bamonanga amba bifuko byetu bya kutōtela’po i bitōka kadi muvwadilo wetu nao amba i muyampe ne mufwaninwe. Kadi, butōki bwa butobo bwitukwasha tumone amba yewa yense ukanda ku lūlu luzunzulwe lwa kutōtela’po Yehova ufwaninwe kwikala na “mutyima [utōka]!” (Tanga Ñimbo 24:3, 4; Isa. 2:2, 3.) Mwingilo ujila otwingidila Leza ufwaninwe kumwingidilwa na ñeni, mityima, ne imbidi, byonso bikele bitōka. Kino kitulomba twikale kwibandaula kyaba ne kyaba, kadi ku bamo bibalomba kushinta bininge mwa kwikadila bajila. (2 Ko. 13:5) Kimfwa, muntu mubatyijibwe utala ku kusaka bifwatulo bya bantu badi mutaka ufwaninwe kwiipangula’mba, ‘Lelo ndi ujila?’ Penepa kakakimbe bukwashi bwa kuleka kino kilongwa kibi.—Yak. 5:14.
it-2-F p. 310 mus. 5
Mosesa
Leza wātūdile Mosesa bu nsenga wa kipwano kya Bijila na Isalela, mwingilo wa pa bula kewapelwe muntu nansha umo na Leza poso Yesu Kidishitu, Nsenga wa kipwano kipya. Mosesa wāyata mashi a bitapwa bya banyema wēashinga ku mukanda wa kipwano mwine wādi welekeja Yehova bu “kipindi kimo kya kipwano” kupwa wāshinga’o bantu (bamfumu ba bantu) bu “kipindi kikwabo kya kipwano.” Ebiya wātangila bantu mukanda wa kipwano, nabo bālondolola’mba, “byobya byonso byanena Yehova twitabije kwibilonga, kadi tukebikōkelanga.” (Div 24:3-8; Bah 9:19) Mosesa byaādi nsenga, wāikele na dyese dya kwimanina mwingilo wa kūbaka kipema ne wa kupunga bipungwa byonso bya mu kipema mungya kimfwa kya kulondela’po kyāmupele Leza, kadi wātūdile ne babitobo mu mingilo yabo, wāshinga kipema māni ne Alone kitobo mukatampe, māni masobakanibwe na bintu bya pa bula. Ne kadi aye ye wāimanine mwingilo mubajinji wa babitobo bapya bātūdilwe’ko.—Div shap. 25-29; Lev shap. 8, 9.