Le Misoñanya ya mu Bible ya Kiyampe ne Kibi Ikidi na Kamweno?

Bantu bavule, enka ne boba betela bu bene Kidishitu, balañanga’mba misoñanya ya mu Bible itala pa kusambakena pamo ne busongi ke ya kala. Bipwilo bimo ke bishinte bintu byobifundija pa mwiendelejo muyampe ne mubi, mwanda wa kwibikwatañanya na myanda ipita dyalelo. Le misoñanya ya mu Bible ya kiyampe ne kibi ikidi na kamweno? En-en. Kino kishinte kishintulula kine kyotwanenena namino.

Bantu basakilwa misoñanya ya Leza ya kiyampe ne kibi

Bantu bāpangilwe mwanda wa kuludikwa na Umpangi wabo. Bible unena’mba: “Muntu wenda kadipo na lupusa lwa kōlola ditabula dyandi.” (Yelemia 10:23) Nansha Yehovaa Leza byaētupangile na bukomo bwa kukwata butyibi, ino kētupelepo lupusa nansha bukomo bwa kwitūdila’ko misoñanya ya kiyampe ne kibi. O mwanda usakanga tumukulupile.—Nkindi 3:5.

Misoñanya ya Leza twiitana mu Bible. Tala bubinga bubidi bunenenwa’mba ino misoñanya idi na kamweno bininge.

• Leza wētupangile. (Ñimbo ya Mitōto 100:3) Byadi Umpangi wetu, Yehova Leza uyukile bine byotusakilwa pa kwikala na bukomo bwa ngitu buyampe kadi na nsangaji ku ngitu ne mu ñeni. Kadi uyukile bikalupuka’ko shi tubapumpunya bulombodi bwandi bwa mwa kwikadila. (Bene Ngalatea 6:7) Ne kadi Yehova witusakilanga biyampe. O mwanda Bible utela Leza bu “Mwine ukufundija mwanda wa kamweno kobe, Mwine ukwendeja mu dishinda dyofwaninwe kwenda.”—Isaya 48:17.

• Kusakasaka kwetu kubwanya kwitudimba. Bantu bavule balañanga’mba babwanya kuyuka kiyampe ne kibi na kulonda bibalombola mutyima wabo, ko kunena’mba byobasakasaka. Ino aye Bible unena’mba “mutyima i ñongojani kutabuka kintu kyo-kyonso kadi i mubimubi.” (Yelemia 17:9) Shi mutyima wetu keuludikwapo na tunangu twa Leza, uketulengeja tulonge bintu byotukealakanya mwenda mafuku.—Nkindi 28:26; Musapudi 10:2.

Le bendeji ba bipwilo banenwe kupumpunya binena Bible pa kiyampe ne kibi?

Aa! Bible ufundijanga bubine butala padi Leza ne muswelo wasaka twiendeje. (1 Bene Kodinda 6:9-11; Bene Ngalatea 5:19-23) Usakanga bantu bayuke buno bubine. (1 Temote 2:3, 4) O mwanda bengidi bene Kidishitu bafwaninwe kufundija byobya binena Kinenwa kya Leza.—Tetusa 1:7-9.

Bantu bavule kebasakilepo kwivwana misoñanya ya mu Bible ya mwa kwikadila, balombanga buludiki kudi bafundiji ba bipwilo bene “ba kwibafundija bisangaja matwi abo.” (2 Temote 4:3, kunshi kwa dyani) Inoko mu Kinenwa kya Leza mudi kino kidyumu kisumininwe kya amba: “Malwa abo boba banena kiyampe amba i kibi ne kibi nakyo amba i kiyampe.” (Isaya 5:20) Na bubine, Leza usa kupa mfuto bendeji ba bipwilo kebafundijapo bantu bine binena Leza amba i biyampe ne bibi.

Le misoñanya ya mu Bible ikankamika bantu bekale na kilomonyeka?

Aa. Boba basaka kusangaja Leza balondanga kimfwa kya Yesu Kidishitu ne bufundiji bwandi. Wāfundije balondi bandi baleke kutyibila bakwabo mambo, ino basanswe ne kulēmeka bantu bonso.—Mateo 5:43, 44; 7:1.

Boba bādi balonda Yesu bādi banenwe kwingidija misoñanya ya Leza mu būmi bwabo. Inoko bādi banenwe ne kwitabija’mba bantu bakwabo babwanya kutonga kulonda nkulupilo mishile na yabo. (Mateo 10:14) Yesu kāpelepo balondi bandi lupusa lwa kwingidija politike nansha bintu bikwabo mwanda wa kuningila bantu bakōkele misoñanya ya Leza.—Yoano 17:14, 16; 18:36.

Le i kamweno’ka kadi mu kulonda misoñanya ya mu Bible?

Boba balonda misoñanya ya Leza ya kiyampe ne kibi bakamwena’mo tamba’nka pano ne mu mafuku a kumeso. (Ñimbo ya Mitōto 19:8, 11) Ko kunena’mba:

• Badi na nsangaji mivule.—Nkindi 29:6.

• Bapwene na Leza bininge.—Nkindi 3:32.

• Leza wibakwashanga mu bitatyi bya makambakano.—Nkindi 11:8.

• Bakekala na būmi bwa nyeke pano pa ntanda.—Ñimbo ya Mitōto 37:29.