Le Kifundwa kya Bible Kīfundanga Batumoni ba Yehova na Bantu I Bika?
Batumoni ba Yehova bengidijanga manwa mayampe a kwifunda nao byobya bifundija Bible. Mpangiko yetu ya kwifunda Bible ibwanya kukukwasha:
Wikale na nsangaji mu būmi
Wikale mulunda na Leza
Uyuke byobya bilaile Bible pa būmi bwa kumeso
Mu kino kishinte, usa kutana’mo bilondololwa ku bino bipangujo:
Shi nashilula kwifunda Bible, bakanza kuningila ngikale Kamoni wa Yehova?
Shi kendi kala mwifunde Bible na Batumoni ba Yehova, le mbwanya kushilula monka kwifunda?
Lelo kudi ne miswelo mikwabo yombwanya kwifunda Bible pampikwa muntu wiya kumfundija?
Le kifundwa kya Bible kiloñwanga namani?
Yewa ukufundija Bible ukakukwasha uyuke senene myanda idi mu Bible na kulonda mitwe ya myanda. Kifundwa kyobe kya Bible kīmanine pa dibuku Ikala Mūmi Nyeke!, kikakukwasha wifunde bityebitye byobya bifundija Bible ne muswelo wabwanya kukukwasha. Pa kuyukila’ko bivule, tala ino video.
Le mfwaninwe kufuta lupeto pa kwifunda?
Aa. Batumoni ba Yehova balondanga bulombodi bwāletele Yesu ku bandi bana ba bwanga amba: “Mubatambula ku bitupu, nenu pānai ku bitupu.” (Mateo 10:8) Kadi bingidilwa byomukengidija pa kwifunda, mwine mubadilwa Bible ne dibuku Ikala Mūmi Nyeke! nabyo i bya ku bitupu.
Le i kwifunda mu bula bwa bitatyi binga?
Kifundwa kituntulu kidi na bifundwa 60. Abe ye wa kutonga mosakila kwifunda, inoko bavule befundwa nabo bavuyanga kifundwa kimo nansha bivule ku yenga.
Le mbwanya kwilembeja namani mwanda wa kushilula kwifunda?
1. Dinga fomu pa Entelenete. Tukengidija myanda ikutala enka mwanda wa kulondolola kulomba kobe kwa kwimona na Kamoni wa Yehova.
2. Mwadimu umo ukāya kukumona. Ukakulombola mupityilanga kifundwa kya Bible ne kulondolola bipangujo byonso byobwanya kwikala nabyo.
3. Abe ne mwadimu obe mukakwata’ko mpangiko. Mubwanya kwifunda mpala na mpala nansha ku telefone, kupityila ku lwito lwa video, nansha ku misapu. Divule kifundwa kiloñanga nsá umo, inoko kibwanya kusela kitatyi kivule nansha kityetye kukwatañana na kitatyi kyodi nakyo.
Lelo mbwanya bidi kutompa?
En-en. Dinga fomu pa Entelenete. Shi mwadimu umo wakwite, mulombole’mba usakanga bidi kutompa mwanda wa kumona mupityilanga kifundwa. Mwadimu ukengidijia boloshile Ikala Mūmi Nyeke! mwine mudi bifundwa bya ntwelelo, mwanda wa kukukwasha umone shi kifundwa kikusangaja.
Shi nashilula kwifunda Bible, bakanza kuningila ngikale Kamoni wa Yehova?
Aa. Batumoni ba Yehova basenswe kufundija bantu myanda ya mu Bible, inoko kebaningilangapo bantu batwele mu wabo mutōtelo. Basangelanga kulombola na bulēme byobya binena Bible, kadi bamonanga’mba muntu ne muntu udi na bwanapabo bwa kutonga nkulupilo yandi.—1 Petelo 3:15.
Le mbwanya kwingidija wami Bible?
En-en, ubwanya kwingidija bwalamuni bo-bonso bwa Bible bodi nabo. Nansha byotusenswe kwingidija Bible upēla kwivwana kadi wa bine wa Bisonekwa Bijila—Bwalamuni bwa Ntanda Mipya, tuyukile amba bavule basakanga kwingidija bwalamuni bwa Bible bobebidile.
Lelo mbwanya kwita ne bantu bakwabo batanwe nami ponefunda?
En-en. Ubwanya kwita ba mu kyobe kisaka ne balunda nobe.
Shi kendi kala mwifunde Bible na Batumoni ba Yehova, le mbwanya kushilula monka kwifunda?
En-en. Kadi ukasangela bininge mpangiko yetu mipya ya kifundwa, ke-pantu yajadikilwe mwanda wa kwiikwatañanya na bisakibwa bya bantu bya dyalelo. Ino mpangiko mipya ya kwifunda Bible isangaja bininge ne kulengeja bantu besambe kutabuka mpangiko ya mafuku kunyuma.
Lelo kudi ne miswelo mikwabo yombwanya kwifunda Bible pampikwa muntu wiya kumfundija?
En-en. Nansha bavule botwifunda nabo byobasangelanga kwifunda biyampe na bukwashi bwa muntu wibafundija, bamo basakanga dibajinji kwifunda abo bene. Kipindi kyetu Bingidilwa bya Kwifunda Nabyo Bible kidi na bingidilwa bya ku bitupu bibwanya kukukwasha mu kifundwa kyobe kya Bible. Tala bingidilwa bimobimo bibwanya kukukwasha:
Mavideo Esambila pa Bible. Ano mavideo mēpi a bufundiji ashintulula bufundiji bwa kyalwilo bwa mu Bible.
Bipangujo bya mu Bible Bilondolwelwe. Bino bishinte bileta malondololo ku bipangujo bivule bitala Bible.
Le Ano Mavese a mu Bible Ashintulula Bika? Tala mushintulwila mavese amo ne misemwa mitumbe.