Le Batumoni ba Yehova Bamonanga Namani Bantu Badi mu Kyabo Kipwilo Ino Pano Kebakitōtangapo Nabo?
Tuloñanga bukomo bwa kusanswa bantu bonso, kwibalongela bintu na kanye ne kwibalēmeka. Shi Kamoni wa Yehova wazoza nansha padi waleka’byo kwingidila Yehova, tuloñanga bukomo bwa kukesamba nandia mwanda wa kumulombola’mba tumusenswe ne kumukwasha apwane monka na Leza.—Luka 15:4-7.
Kyaba kimo muntu ubwanya kulonga kintu kibwanya kumulengeja afundulwe mu kipwilo. (1 Bene Kodinda 5:13) Inoko byotusenswe banabetu bya binebine, tuloñanga bukomo bwa kukwasha mwanetu kumeso kwa kitatyi kutyina wakafundulwa mu kipwilo. Ino nansha shi wafundulwa, Bible witukankamika twendelele na kumusanswa ne kumulēmeka.—Mako 12:31; 1 Petelo 2:17.
Le i bika bifikijanga muntu ku kufundulwa mu kipwilo?
Bible ulombola patōkelela amba shi mwine Kidishitu walonga bubi bukatampe kadi wapele kushinta, ufwaninwe kufundulwa mu kipwilo.b (1 Bene Kodinda 5:11-13) Bible utela bubi bukatampe bubwanya kufundwilwa muntu mu kipwilo. Pamo bwa makoji, bunkolwankolwa, kwipayañana, kususula ba mu kisaka na kwibakupila nansha na kulala nabo ku bukomo, ne bwivi.—1 Bene Kodinda 6:9, 10; Bene Ngalatea 5:19-21; 1 Temote 1:9, 10.
Inoko, ketufundulangapo bukidibukidi mu kipwilo muntu walongele bubi bukatampe. Bakulumpec baloñanga bidi bukomo bwa kumukwasha ashinte mwiendelejo wandi. (Bene Loma 2:4) Baloñanga bukomo bwa kutenga mutyima wandi na mutyima mutūke, na bulēme ne na buswe. (Bene Ngalatea 6:1) Kulonga namino kukakwasha yewa ulongele bubi bukatampe ajingulule bubi bwandi kadi esāse. (2 Temote 2:24-26) Inoko shi bakulumpe abakwasha muntu misunsa mivule mwanda wa ashinte, aye’ko wendelela’nka na kulonga bintu bipelejibwe mu Bible kadi wapele kwisāsa, nabya ukafundulwa mu kipwilo. Kupwa bakulumpe bakela musapu wa kuyukija kipwilo amba muntu kampanda kakidipo Kamoni wa Yehova.
Bakulumpe baloñanga bukomo bwa kutenga mutyima wa nonga-bibi na kwisamba nandi na mutyima mutūke, na bulēme ne na buswe
Le i bika bilupukanga ku kufundula mu kipwilo muntu wendelela na kulonga bubi ku kusaka? Dibajinji bidi kipwilo kilombolanga amba i kikwatakanye mbila ya Leza ya mwa kwiendejeja, kadi muntu ufundwilwe’wa kakalengejapo bantu bakwabo ba mu kipwilo bamwiule. (1 Bene Kodinda 5:6; 15:33; 1 Petelo 1:16) Dya bubidi, kufundula mu kipwilo muntu ulongele bubi kukamukwasha aleke bilongwa byandi bibi, kadi alonge bukomo bwa kushinta.—Bahebelu 12:11.
Le Batumoni ba Yehova bamonanga namani bantu bafundwilwe mu kipwilo?
Bible ulombola bene Kidishitu ‘baleke kupwana’ na muntu mufundulwe mu kipwilo, kadi ‘baleke’nka ne kudya na muntu wa uno muswelo.’ (1 Bene Kodinda 5:11) Shako ketupwanangapo na muntu mufundulwe mu kipwilo, inoko ketumwelangapo. Tumulēmekanga. Kadi shi wakatanwa ku kupwila, Batumoni ba Yehova babwanya ne kumwimuna.d Ubwanya ne kulomba bakulumpe bamujokeje mu kipwilo.
Boba bafundwilwe mu kipwilo babwanya kutanwa ku kupwila
Le bikalanga namani shi muntu i mufundulwe mu kipwilo inoko wandi mukaji ne bandi bana bakidi kwinjibo i Batumoni ba Yehova? Nansha bya kakitōtapo Yehova pamo na kyandi kisaka, ino ukendelela kupwana nabo kipwano kya bubutule. Kadi bakendelela kwisanswa na wandi mukaji ne na bandi bana.
Muntu ufundwilwe mu kipwilo ubwanya kulomba bakulumpe bamupempule mwanda wa bamupe madingi a mu Bible ne kumukankamika esāse ne kujokela kudi Leza. (Zekadia 1:3) Shi washinta kakilongapo bilongwa bibi kadi welombola bya binebine amba pano kalonda byobya binena Bible, nabya ubwanya kujokejibwa monka mu kipwilo. Bantu mu kipwilo ‘bakamulekela na mutyima tō ne kumusenga,’ enka na mwālongele bene Kidishitu ba mu Kodinda pāshintyile nonga-bibi umo, wāleka mashinda andi mabi.—2 Bene Kodinda 2:6-8.
Le boba badi bafundulwe mu kipwilo kya Batumoni ba Yehova banena’po namani?
Tala binena Batumoni ba Yehova bamo badi bafundulwe mu kipwilo kupwa mwenda mafuku bakwata butyibi bwa kujokela kudi Leza.
“Ponadi nkimba kujokela mu kipwilo, nadi nanga amba bakulumpe bakangipangula kanda ne kanda konadi nonga mu bula bwa myaka mivule yonadi mufundulwe. Inoko abo bansapwidile’tu amba, ‘Abe tá mutyima ku byolonga pano.’ Ponaivwene namino, mutyima wauntūka.”—Maria, wa mu États-Unis.
“Kipwilo kyasangele ponajokele. Nemwene bu wa mvubu. Batutu ne bakaka ba mu kipwilo banengeje nemone amba Leza i mundekele kadi bankweshe ñendelele kumeso. Bakulumpe badi bankwasha kitatyi ne kitatyi nejokeje. Baunsengele ne kunkwasha mone amba Yehova ukimwene bu wa mvubu kadi unsenswe.”—Malcom, wa mu Sierra Leone.
“Yehova usenswe bantu bandi, o mwanda usakanga bekale nyeke na mwiendelejo muyampe. Nansha shi bantu bamo bamonanga bu kufundula muntu mu kipwilo i kūmwa mutyima, inoko kulonga namino i kwendele’mo kadi kulombolanga amba tusenswe bantu. Bine Tata wetu wa mūlu i Leza wa buswe kadi wa lulekelo.”—Sandi, wa mu États-Unis.
a Nansha byotwesambila pa mwana-mulume, ino myanda idi mu kino kishinte itala ne mwana-mukaji.
b Mafuku kunyuma twadi twita banonga-bibi bapela kwisāsa bu bapangwe. Inoko pano ketwingidijanga muneneno wa mu Bible ne kwibeta bu bafundulwe mu kipwilo.
c Bakulumpe i bana-balume bene Kidishitu bayukile myanda ya Leza badi na kiselwa kya kufundija myanda idi mu Bible ne kulela bantu ba Leza na kwibakwasha ne kwibakankamika. Kebafutwangapo.—1 Petelo 5:1-3.
d Kimfwa kudi bantu bamo batambanga mu kipwilo bashilula kwikifutulula ne kutompa kulengeja bashele’mo bebalonde mu bilongwa byabo bibi. Shi kubaikala muntu wa namino, tulondanga madingi a mu Bible a kuleka “nansha kumwimuna kwine.—2 Yoano 9-11.