Kulupula Mabuku Esambila Pa Bible Mwanda wa Kutumbija Leza
Ba Tumoni twa Yehova i bayukane bininge pamwanda wa busapudi bwabo bwa Bulopwe bwa Leza bobasapulanga kupityila ku mikanda mitampwe. Tamba mu 1920, Sosiete Watch Tower wingidijanga ba Tumoni bengidi bakwisakila mwanda wa kulupula milami ne mabuku afwaninwe kwabanya. Bekiloñanga mwanda wa kulupula bino bilembwa ku lupoto lutyetye bininge.
Mu myaka 70 yapityile kunyuma’i, Sosiete watundulwidile’ko mwingilo wa kulupula mabuku esambila pa Bible ne kwiusambakanya konso konso, dibajinji mu Brooklyn, kupwa ke mu matanda makwabo. Ino mingilo yonsololo ingilwanga na kibumbo kikatampe kya bengidi bakwisakila.
Kumfulo kwa myaka ya 1970, bulongolodi bwālupwile manwa a kukwasha mu mwingilo wa bwalamuni, wa bulembi ne wa kutampa bilembwa, kupityila ku makompyuta, mashini a mudilo ajadika bilembwa, ne a kutampa nao. Makambakano ādi’po i ano: bingidilwa bya bansunga byādi’ko byādi bimanine pa kibalwa kityetye bininge kya ndimi. Mu kine kitatyi’kya, Sosiete wādi kala ulupula mabuku mu ndimi kubwipi kwa 160, ne kwādi kukisakila mikwabo.
Penepo, bāita bengidi bakwisakila mwanda wa kutūla’ko kingidilwa kya busendwe bwa kujadika bilembwa na mashini a mudilo mu ndimi mivule. Bipa byālupukile’ko byādi bilumbuluke. Penepo bālupula busendwe bupya butelwa bu MEPS, bwa kutweja bilembwa, kwibipanga pa dyani senene, ne kwibitampa na mashini a mudilo mu ndimi mishileshile. Bukokeja kulupula bilembwa kubwipi kwa mu ndimi 200. Kukokeja kubwejibwa mikwabo.
Dyalelo busendwe bwa kutweja ne kutampa bilembwa na MEPS, bwino bulupwilwe na ba Tumoni twa Yehova, bwingidijibwanga mu matanda 100 kadi kudi mulangwe wa kulundila’ko makwabo. Bengidi bakwisakila ba mu ano matanda bafundijibwanga kwingidija ne kulongolola kino kituntwa. Dyalelo Sosiete ulupulanga milami mu ndimi 100 ne kupita, mu matanda 36, ebiya mu ano matanda mudi 5 alupulanga mabuku makatampe ne ma Bible.
Kwingila uno mwingilo kulomba bengidi—balembi, bālamuni, balemununi, batampi, balamiki ba mabuku, ne bantu ba kwiatuma. Bakwabo bemanine mwingilo wa kwisonekela na bipwilo. Bamo-bamo nabo bapaula bidibwa, batēka byakudya, kukomba, kukenda, ne bikwabo. Byonso bino bingilwanga’nka na bengidi bakwisakila ba mu matanda meshileshile beidile abo bene. Mu 1995, kujokoloka ntanda yonso, kwādi bengidi bakwisakila 16 468 bengila mu mabilo meshileshile; mu bitampilo, mu mobo a bīkalo, mu bipōpo ne mu byombe.
Lelo bano bantu i bāni? I bana-balume ne bana-bakaji, bankunga ne basonge, bankasampe ne banunu, abo bonso i ba Tumoni twa Yehova bepāne. Bamo-bamo ke balāle mu uno mwingilo myaka 40, 50, bakwabo’nka ne myaka 60. Bapityijanga kibalwa kya nsāa 44 ku yenga ne yenga mu mwingilo wibapelwe, kubweja’po ne ma nsāa a ntentekelo shi kifwaninwe. Kyolwa ne kumfulo kwa yenga i bitatyi bitūdilwe kwenda umbusapudi bwa myanda miyampe bwa ku njibo ne njibo, ne kuvuija mingilo mikwabo ya pa kipwilo.
Kujokoloka ntanda yonso, bano bengidi bakwisakila bapebwanga kīkalo ne bidibwa bifikile na mingilo ya Sosiete imanine myanda ya mobo a bīkalo, atelwa bu Mobo a Betele. Kadi batambulanga ne kalupeto katyetye ka kufuta dishinda mu mwingilo wabo ne kakwikwasha nako.
Tamba mu 1920, bano bengidi bakwisakila kebalupule mamiliyare kitema ne kupita a ma Bible, mabuku, milami, ne mikanda mikwabo kubwipi kwa mu ndimi 200, a kwabanya kujokoloka ntanda yonso. Bavuijanga kipindi kyabo mwanda wa myanda miyampe yanyeke isapulwe bu musapu wa kuleta nsangaji ku mizo yonso, ku bisaka, ku ndimi ne ku bantu.—Kusokwelwa 14:6, 7.
• I mingilo’ka itala pa kutampa mabuku ingilanga Sosiete Watch Tower, ne mwanda waka?
• I bāni bengilanga ino mingilo yonso, ne bashikete namani?
[Kapango pa paje 24]
Bengidi bakwisakila bengila mingilo yobapelwe ya kulupula mabuku esambila pa Bible mu bitampilo, mu mobo a bīkalo, mu mabilo, mu bipōpo ne mu byombe, ku Brooklyn ne mu Wallkill, New York, U.S.A.
[Kapango pa paje 25]
Bengidi bakwisakila bengila mingilo ya kulupula ma Bible ne mabuku esambila pa Bible
Espanye, Alemanye, Felande, Kanada, Denemark, Swede, Afrique du Sud, Brezile, Nederlande, Ostrali