Mushipiditu wa Kwituma Uletanga Madyese
1. Lelo ba Davida ne Nehemia bālombwele namani mushipiditu wabo wa kwituma?
1 Ngodiata pa kutuka bibumbo bya bulwi bya Isalela, kekwādipo sola nansha umo wāitabije kulwa nandi. Ino nkasampe umo mukumbi, kafundilepo nansha divita dine, wāitabija kwenda. (1 Sam. 17:32) Bayuda bāselelwe bu misungi pa kujokela kwabo ku Yelusalema bātuninye kubakulula nsakwa, penepa kaseya umo wa mulopwe wa Peleshia wētuma aye mwine na kushiya mwingilo wandi wa bulēme mu ndaku ya mulopwe ne kwenda ku Yelusalema amba akalongolole’ko mwingilo’wa. (Neh. 2:5) Yehova wāesele bano bana-balume babidi, ba Davida ne Nehemia mwanda bādi na mushipiditu wa kwituma.—1 Sam. 17:45, 50; Neh. 6:15, 16.
2. Mwanda waka Bene Kidishitu balombolanga mushipiditu wa kwituma?
2 Mu ntanda ya dyalelo mushipiditu wa kwituma ke mutupu’o. Ino mu ano “mafuku a kumfulo” bantu i bavudilwe bya kulonga, kadi bavule i ‘besanswe abo bene.’ (2 Tem. 3:1, 2) O mwanda i bipēla muntu epāne mu bintu bimutala pa kyaba kya kukimba mikenga ya kwituma mu mingilo ilomba kukwasha bakwabo. Inoko batwe Bene Kidishitu, tusakanga kwiula Yesu wādi na mutyima wa kukwasha bakwabo. (Yoa. 5:5-9; 13:12-15; 1 Pet. 2:21) I muswelo’ka otukalombola mushipiditu wa kwituma, ne i madyese’ka otukapebwa?
3. Mushipiditu wa kwituma ukwashanga namani mu kupwila kwa pa kipwilo?
3 Pangala pa Banabetu: Tukokeja kupa bakwetu ‘kyabuntu kya ku mushipiditu’ shi twitabija kuleta malondololo ku bipindi bya ku kupwila bilomba bemvwaniki nabo besambe’po. (Loma 1:11) Kuleta malondololo kupanga Yehova bulēme, kukomanga bubinebine mu ñeni ne mu mityima yetu, kadi kubwejanga nsangaji ku kupwila kwetu. (Mit. 26:12) Tukokeja kadi kwituma pa kulonga kipindi kya ku Masomo a Mwingilo wa Kiteokratike shi wadi wa kulonga’kyo kailepo. Kino kiketukwasha tulumbulule bwino bwetu bwa kufundija.
4. Lelo tukalombola mushipiditu wa kwituma mu miswelo’ka imoimo?
4 Batutu bakokeja kulombola mushipiditu wa kwituma shi bekankila’ko kusela biselwa bya pa kipwilo. (Is. 32:2; 1 Tem. 3:1) Batwe bonso tukokeja kukwasha ku kubungakana ne ku bitango na kwitabija mingilo ya kwituma mu bipindi bishileshile bya mingilo. Shi twitabija kwingila pamo na mutadi wendakana mu busapudi nansha tumwendela bidibwa kwetu, nabya “i kwikankamika kwa bātwe bonso mu lwitabijo.” (Loma 1:12) Wivwane tuleta bukwashi bumweke ku bana banshiye, bakaji ba bishala, babela ne babilema, balolo balela bana kasuku, ne bakwabo mu kipwilo, nabya ketukabulwepo nsangaji ne kwitabijibwa na Yehova.—Nk. 19:17; Bil. 20:35.
5. I mu myanda’ka itala Njibo ya Bulopwe mulomba mushipiditu wa kwituma?
5 Muswelo mukwabo wa kwituma i kupāna kitatyi ne bukomo bwetu mu kukomba ne kukundula Njibo ya Bulopwe. Ne kadi, bilomba kūbaka Mobo a Bulopwe mavule mapya na batutu ba kwituma mwanda bantu bavule betabijanga pano bubinebine. Ba mulume ne mukaji bamo bepēne abo bene kukakwasha mu Komite wa Lūbako lwa mu Mwaba nansha byokebadipo na bwino buvule mu myanda ya lūbako. Mwenda mafuku, bano ba mulume ne mukaji bafundijibwa mingilo, panenwa pano bakwashanga’ko mu kufwatula matafwadi. Mukaji unena’mba: “Kwingila pamo na bakwetu i kwitwikadije na balunda ba pa mutyima. Kadi ku mfulo kwa difuku, nansha byotwikalanga bakōke ku ngitu, ino ku mushipiditu twikalanga na mityima mitūke.”
6. Mwanda waka busapudi i mwingilo mwinemwine wa kwituma otufwaninwe kwingila?
6 Mu Busapudi: Mwingilo mwinemwine ulomba kwituma dyalelo i mwingilo wa kusapula Bulopwe. Ekale tubakwasha bantu kwivwanija madingi a mu Bible ne kwialonda, nabya bakekala na kitungo mu būmi bwabo, kadi bakekala na bukomo bwa kunekenya bibidiji bibi. Bakekala na lukulupilo lusangaja lwa mu Bible pa mafuku a kumeso. Bine, potupāna bufundiji bwa mu Bible, twingilanga na mutyima tō mwingilo wa kwituma udi na byabuyabuya bya nyeke. (Yoa. 17:3; 1 Tem. 4:16) Ngikadilo yotudi’mo ikokeja padi kwitupa mukenga wa kwingila bu pania mukwashi, bu pania wa lonso, kuvilukila kokwa kusakibwa basapudi bavule, nansha kwifunda ludimi lukwabo.
7. Mwanda waka pano po pene pasakilwa kwikala na mushipiditu wa kwituma?
7 Mulopwe Davida wālaile amba mu kitatyi kikashilula Meshiasa kubikala, bantu ba Leza bakepāna “abo bene ku mityima tō.” (Mit. 110:3) Mingilo ilomba mushipiditu wa kwituma pano ibavula mwanda Yehova upelakanyanga mwangulo wa mfulo wa ku mushipiditu. (Is. 60:22) Lelo uketabija amba: “Ami uno, ntume bidi”? (Is. 6:8) Eyo, shi twikale na mushipiditu wa kwituma, nabya tukasangaja Yehova ne tukangula mpalo mivule.