Shapita 56

I Bika Bisubija Muntu Disubi?

MFIKA yafikilwa Yesu yenda ininga. Ke’nkapo mwanda wa bana-babwanga bavule bamupalukile, ehe, pano ke ne Bayuda ba mu Yudea bakimba kumwipaya, na mobalongele paadi mu Yelusalema kitatyi kya Pashika wa mu 31 K.K.

Pano ke Pashika wa mu 32 K.K. Mobimwekela, Yesu waenda kukatanwa ku Pashika mu Yelusalema mungya musoñanya wa Leza. Inoko waenda’ko na budyumuku mwanda būmi bwandi budi mu kyaka. Kupwa papo wajokela ku Ngadilea.

Yesu udi padi mu Kapanama, Bafadiseo ne basonekeji batamba mu Yelusalema abaiya kwadi. Bakimba pa kumutopekela amba ujilulanga bijila bya mu mutōtelo wabo. “Lelo i bika bijilwila bāna-bobe-babwanga bisela bya bakulumpe, a?” bo abo bamwipanguja. “Mwanda abo pa kudya bidibwa koya keboye makasa.” Uno ke musoñanyapo wa Leza, ino ku Bafadiseo, kuleka kulonda bisela bya bwana bukulu, kifwa, koya ku makasa kufikija mu nkongweba i kujilula kukatampe.

Yesu pa kyaba kya kulondolola bidi ku byobamutopeka, ino webanena’mba banwe’ko bo bajilwila Bijila bya Leza ku nshikani ne ku kusaka. “Lelo nenu i bika le byo mupelwila binenwa bya Leza, ke mulonda bibidiji bya banwe bene?” (MB) ye aye wipanguja. “Mwanda Leza wanene’mba: ‘Lemeka shobe ne inobe,’ kadi’mba: ‘Yewa unena shandi nansha inandi bibibibi ufwanyinwe kwipaibwa.’ Ino banwe munenanga’mba shi muntu alombole tu shandi nansha inandi amba: ‘Kipindi kya lupeto kyo nadi nsaka kukukwasha nakyo ke kya kulambula Leza,’ nabya kakikwashapo shandi nansha inandi mwine.” (MB)

Byabine, Bafadiseo bafundijanga’mba lupeto, kituntwa, kintu kyo-kyonso kitūlwa bu kyabuntu kudi Leza i kya mu tempelo kete, ke kya kwingidijapo ku bintu bingi. Ne amba muntu utūdile kyabuntu ye yenka wikibīka. Mu uno muswelo, mwana unena’mba ami lwami lupeto nansha kituntwa kyami i “kobana”—i kyabuntu kitelelwe kutūla kudi Leza nansha ku tempelo—wetentula kiselwa kya kukwasha bambutwile bandi banunu, nansha shi i bominwe namani.

Yesu pa kumona Bafadiseo banyengakanya bibibibi Bijila bya Leza, wajingwe mutyima, webatuluja’mba: “I enka namino mo mujilwila kijila kya Leza pa mwanda wa bisela byenu. Yō! bānwe banzazangi! nanshi kyo kyēmubangidile Isaya wafikije pēmunene’mba: Bano bantu bano bamfwenanga ne kyakanwa kyonka bandemeka ku milomo, ino mutyima wabo kulampe kwine na ami. Nanshi i bitupu bitupu byo bantōta, bafundija byakufundija, nanshi i bijila bya bantu byonka.”

Kekubulwe padi kibumbo kibataluka’po bidi mwanda wa kushīla Bafadiseo kyaba kya kwipangula Yesu. Pano Yesu watopeka Bafadiseo byamwiko, abo pa kukomenwa kulondolola ku ano matope, waite kibumbo kyungwidile pabwipi. ‘Ntejei penepa mwivwanije buluji,’ ye aye unena, ‘Kekudipo kintu nansha kimo kya panja kipita munda mwa muntu kikokeja kumusubija disubi; ino bintu bitamba panja pa muntu byo abyo bisubijanga muntu disubi.’

Kupwa, abo batwela mu njibo, bandi bana-babwanga abamwipangula’mba: “Le uyukile’mba Bafadiseo badi abakolelwa mpata po badi abakumvwana unena nabya’pa?” (MB)

“Mityi yonso ya kubulwa kutumbwa ne Tata wa mūlu īkajulwa,” ye Yesu ulondolola. “Mwibalekei abo, i batulombwe bampofu. Kadi shi mpofu alombole mukwabo mpofu dishinda, nankyo baponena mu kina bonso babidi.”

Mobimwekela, Yesu watulumuka pa kumona Petelo wipangula bisubijanga muntu disubi bine i bika, mwanda wa bana-babwanga bevwanije. “Lelo ne bānwe nenu nanshi kemudipo na manwa, a?” ye Yesu ulondolola. “Kemuyūkile byonso bitwelanga mu kanwa bikapitanga munda byakēlwa kuntanda. Nanshi byobya bitamba mu kanwa bishilukanga mu mutyima, e b[isubij]a muntu byobya. Mwanda mu mutyima mushilukanga byakufwatakanya bibi, ne byakwipaya bantu, ne makoji, ne busekese, ne bwivi, ne mabela a kubepela bantu, ne butukani monka. Ke byo b[isubij]a muntu byabyo, ino kudya bidibwa ne makasa ampikwa koya ako keku[subijangapo] muntu, ehe.”

Pano Yesu kakankejepo kwikala na bukundwe. Kapelejepo muntu koya ku makasa kumeso kwa kutēka bidibwa nansha kwa kudya byakudya, mhm. Ino Yesu watopeka buzazangi bwa bendeji ba bipwilo bakimba kukongoloka bijila byoloke bya Leza, baninga’ko na bisela byampikwa kukwatañana na Bisonekwa. Bine, bilongwa bibi byo bisubijanga muntu disubi, kadi Yesu walombola’mba bisulukanga ku mutyima wa muntu. Yoano 7:1; Kupituluka 16:16; Mateo 15:1-20; Mako 7:1-23; Divilu 20:12; 21:17; Isaya 29:13.

▪ I mfika’ka yafikilwa Yesu pano?

▪ I matope’ka amutopeka Bafadiseo, ino mungya binenwa bya Yesu, Bafadiseo bajilulanga namani Bijila bya Leza ku kusaka?

▪ I bintu’ka bisubijanga muntu disubi byatela Yesu?