Shapita 17
Tana mutyima-ntenke umbukata mwa bantu ba Leza
KIMFWA, kubalupuka kimpumpu kikomokomo kibaonakanya kifuko kyomushikete’po. Kibatyumuna yobe njibo ne kujimija bintu byenu byonso. Bidibwa bibasakana. Būmi bubakoma. Ino banwe’mba mubezemuke, abemutumina bukwashi buvule. Bidibwa ne milwi na milwi ya bisandi. Abakūbakila ne njibo impya. Bine ukafwijako bininge muntu wemupa bino bintu byonso.
2 Kudi kintu kya muswelo umo na kino dyalelo. Butomboki bwa ba Adama ne Eva ibulete musala mukatampe mu muzo wa muntu, pamo’nka bwa kino kimpumpu kya luvula. Paladisa, kikalo kilumbuluke kya bantu, pano i mijimine. Tamba’nka penepa, maludiki a bantu i makomenwe kunyongolola bantu ku mavita, ku buñonaona ne ku kubulwa boloke. Pano mitōtelo i miponeneje bantu mu nzala yabinebine ya kubulwa bidibwa bya kumushipiditu. Ino, mu muneneno wa kumushipiditu, Yehova Leza pano uletanga bidibwa, bivwalwa, ne kinyemeno. Lelo wikiloñanga muswelo’ka?
“UMPIKA WABINEBINE NE WAMANWA”
3 Mungya buluji, shi bantu abafikilwa na kizumba, bapebwanga bukwashi kupityila ku malongolodi mateakanibwe senene; ye mulongela ne Yehova pa kupa bantu bandi bukwashi bwa kumushipiditu. Kimfwa, bene Isalela bādi bu “kipwilo kya Yehova” umbula bwa myaka 1 500. Umbukata mwabo mwādi bamo-bamo bātudilwe na Leza bu dishinda dya kufundijija’mo Mukanda wandi wabijila. (1 Bilongwa 28:8; 2 Bilongwa 17:7-9) Mu myaka katwa imbajinji K.K., Yehova wātudileko bulongolodi bwa bwine-kristu. Kwābundwa bipwilo, byādi bingila munshi mwa buludiki bwa kitango kyendeji kyādi kibundilwe na batumibwa ne bakulumpe. (Bilongwa 15:22-31) Dyalelo nadyo, Yehova ukwatakenye bantu bandi kupityila ku kitango kilongololwe senene. Lelo twikiyukile muswelo’ka?
4 Yesu wānene’mba kitatyi kya kwikalapo kwandi mu lupusa lwa Bulopwe, wādi wa kukatana “umpika wabinebine ne wamanwa” ‘upāna bidibwa pa kitatyi kifwaninwe’ ku balondi Bandi. (Mateo 24:45-47) Pābikikilwe Yesu bu Mulopwe momwa mūlu mu 1914, lelo i ani wēlombwele bu ye aye uno “umpika”? Bine kebādipo bakulumpe ba Bipwilo bya Ki-kristu. Mwanda bādi badisha lwabo luombe na kwibasoñanya bakwatakanye maludiki a ino ntanda mu Divita I dya Ntanda-yonso. Ino bidibwa bilumbuluke bya kumushipiditu byādi biletwa pa kitatyi kifwaninwe na kibumbo kya bakristu babine, bāshingilwe-māni a mushipiditu sandu wa Leza, ba mu boba bāityilwe na Yesu bu “kaluombe katyetye.” (Luka 12:32) Bano bakristu bashingwe-māni bādi basapula Bulopwe bwa Leza, kyaba kya kutumbija maludiki a bantu. Mwingilo wabo umbula bwa myaka wālupwile tununu ne tununu twa “mikōko mikwabo” ya mityima yaboloke, yēlungile ku “umpika” mushingwe-māni mwanda wa kulonda mutōtelo wabine. (Yoano 10:16) Leza uludikanga bulongolodi bwa bantu bandi kupityila ku ‘umpika wabinebine’ ne Kitango kyandi Kyendeji, mwanda wa kuteakanya bidibwa bya kumushipiditu, bivwalwa ne kinyemeno ku boba bonso bebisaka.
“BIDIBWA PA KITATYI KIFWANINWE”
5 Yesu wānene’mba: “Muntu nanshi kakamwenapo būmi mu mikate yonka, mhm, poso mu myanda yonso itamba mu kyakanwa kya Mwine Leza.” (Mateo 4:4) Ino i kyabulanda, bantu bavule kebatelepo mutyima ku myanda ya Leza. Pano kudi “kipupo kya nzala muntanda, ke kipupo kya bidibwapo, mhm, nansha bu-kyumwa kya mema, ehe, ino nanshi i kya kwivwana binenwa bya Yehova,” ye mokyātobelwe na mupolofeto Amose. (Amose 8:11) Nansha ke bene Leza basumininwe bene nabo badi mu nzala mikomo ya kumushipiditu. Inoko kiswamutyima kya Yehova i kino, usakilanga “bantu bonso kupanda, bafike ne pa kuyukidija kwa [bubinebine, NW].” (1 Temote 2:3, 4) Omwanda uletanga bidibwa bya kumushipiditu bivulevule. Ino lelo tukokeja kwibitana kwepi?
6 Mu mānga yonso, Yehova wādi udisha bantu bandi abo bonso pamo mu kitango. (Isaya 65:13) Kimfwa, babitobo ba muzo wa Isalela bādi bongwija bana-balume, bana-bakaji ne bana batyetye mwanda wa kwibafundijija pamo Mukanda-wabijila. (Kupituluka 31:9, 12) Na buludiki bwa kitango kyendeji, bakristu ba mu myaka katwa imbajinji bālongolwele bipwilo ne kuteakanya kupwila mwanda wa kutambula bufundiji ne kwikankamika umo ku mukwabo. (Loma 16:5; Filemone 1, 2) Ba Tumoni twa Yehova balondanga kino kimfwa. Nobe tubakwite na nsangaji yonso, enda ukatanwe ku kupwila kwabo konso.
7 Eyo, padi kodi kala mwifunde bintu bivule mu kwifunda kobe kwa Bible pakasuku. Kadi padi kudi muntu wāile kukukwasha pa kino. (Bilongwa 8:30-35) Lwitabijo lobe lukokeja kwenzankanibwa na mutyi ukokeja kufumba ne kūma, shi kekudipo wa kwiukwatakanya senene. Omwanda ufwaninwe kutambula bidibwa bya kumushipiditu bifwaninwe. (1 Temote 4:6) Kupwila kwa bwine-kristu kwitupanga bufundiji bwa kitatyi ne kitatyi bufwaninwe mwanda wa kukudisha kumushipiditu ne kukukwasha wendelele na kutama mu lwitabijo koku wenda ulundilako buyuki bwa Leza.—Kolose 1:9, 10.
8 Kadi kupwila kudi na kitungo kikwabo kya kamweno umbūmi. Polo wāsonekele’mba: “Twitei mityima batwe bene na bene ya pa kwisombela ku lusa ne ku mingilo miyampe; ne kuleka’byo kubungakana mpika.” (Bahebelu 10:24, 25) Kishima kya Kingidiki kyalamwinwe bu “kwisombela” kishintulula monka “kunona bui.” Lukindi lumo lwa mu Bible lunena’mba: “Kilonda kinonanga kilonda; enka nenki mo mulangwila ne muntu nandi mpala ya mulunda nandi.” (Nkindi 27:17) Batwe bonso tusakanga ‘kunonwa.’ Makambakano a difuku ne difuku a mu ino ntanda akokeja kupwa bui bwa lwitabijo lwetu. Kitatyi kyotutanwa ku kupwila, twikankamikanga umo ku mukwabo. (Loma 1:11, 12) Bantu bonso mu kipwilo balondanga kino kidyumu kya Polo, “mwikankamikei banwe bene na bene, ne kwitamija banwe bene,” kino kinonanga lwitabijo lwetu. (1 Tesalonika 5:11) Kutanwa kitatyi kyonso ku kupwila kwa bwine-kristu, nako kulombolanga’mba bine tusenswe Leza, kadi kwitupanga byaba bya kumutendela.—Mitōto 35:18.
“VWALAI BUSWE”
9 Polo wāsonekele’mba: “Vwalai buswe, mwanda kyo kijimba kibwaninine kya bumo.” (Kolose 3:14, NW) Yehova, ku lusa lwandi, i mwitupe bino bivwalwa. Mu muswelo’ka? Bakristu bakokeja kulombola buswe, mwanda i kimo kya mu bipa bya mushipiditu sandu wa Yehova. (Ngalatea 5:22, 23) Yehova aye mwine wētulombwele buswe bukatakata pa kwitutumina wandi Mwana wabunka’mba tumone būmi bwanyeke ne nyeke. (Yoano 3:16) Kino kilomboji kya buswe bukatakata i kitupe kimfwa kya kulondelapo netu tulombole ino ngikadilo. Mutumibwa Yoano wāsonekele’mba: “Bitusanshilwe Leza namino, i kitwendelemo ne kwisanswa batwe bene na bene.”—1 Yoano 4:11.
10 Kutanwa kobe ku kupwila kwa ku Njibo ya Bulopwe kukakupa muswelo wa kulombola buswe. Ukatanangako bantu ba miswelo ne miswelo. Bine ukakokwa na kisanso kya bavule umbukata mwabo. Inoko bumuntu i bwishile nansha ke umbukata mwa bantu bengidila Yehova. Pakwabo, mu mafuku a kunyuma, wādi utyina kwenda kisense na bantu balonga byokusake, nansha bampikwa mu lobe ludingo. Ino, bakristu bafwaninwe ‘kusanswa kisaka kyonso kya bana betu.’ (1 Petelo 2:17) Nanshi, witungile kitungo kya kwiyuka na bonso bayanga ku Njibo ya Bulopwe—nansha shi badi na myaka, bumuntu, lukoba, nansha ludingo lwa mu kufunda masomo lwishile na lobe. Kukabulwepo kukajingulula’mba umo ne umo udi na ngikadilo kampanda milumbuluke.
11 Kwishila kwa ngikadila ya bantu mu kipwilo kekufwaninwepo kukufityija mutyima. Kimfwa, shi udi mu dishinda, myotoka mivule ikupita koku ne koku. Yonso keikanyemenapo lubilo pamo, kadi yonso keipungilwepo mu muswelo umo. Imo padi kemyende kyala kilampe, ino mikwabo padi ikishilula kwenda pamo’nka na abe. Nansha byoishidile, inoko ayo yonso idi mu lwendo mu dishinda dimo dyonka. Ye mwikadile ne bantu mu kipwilo. Kebatamijangapo ngikadilo ya bwine-kristu abo bonso na lubilo lwa muswelo umo. Kadi beshidile ku imbidi ne ku milangilo kwine. Bamo bāshilwile kutōta Yehova kepadi myaka mivule; bakwabo bakishilula. Inoko abo bonso badi mu lwendo mu dishinda ditwala ku būmi bwanyeke, “babambakanibwe pamo, monka umutyima umo” ne mu dilango dimo dyonka. (1 Kodinda 1:10) Shi kepano, kimba mobadi ngikadilo milumbuluke kyaba kya kutala enka bukōkekōke bwabo. Kulonga uno muswelo kukakuletela kyanga ku mutyima, ke-pantu ukajingulula’mba bine Leza udi umbukata mwa bano bantu. Nabubine, ufwaninwe kwikala mu bantu ba uno muswelo.—1 Kodinda 14:25.
12 Bantu bonso byobadi bakubulwa kubwaninina, padi muntu kampanda pa kipwilo ukokeja kitatyi kimo kunena nansha kulonga kintu kikufityija mutyima. (Loma 3:23) Yakoba mwana-bwanga wāsonekele na bubinebine’mba: “Batwe bonso tukukalanga mu bintu bivule. Shi kudi umo wakubulwa kukukala mu kinenwa, nankyo aye i mubwanininye.” (Yakoba 3:2) Shi muntu wakulubila, lelo ukalonga’po kika? Lukindi lumo lwa mu Bible lunena’mba: “Ñeni [bujinguludi, NW] ya muntu imutūkija kufuna bulobo; kadi kulekela kujilula yo ntumbo yandi.” (Nkindi 19:11) Kwikala na bujinguludi kishintulula kumona munda mwa kintu, kukimba kupotolola buluji bwa myanda mine ilengeja muntu esambe nansha kulonga mu muswelo kansangwa. Bavule umbukata mwetu twingidijanga bininge bujinguludi pa kupityija bilubo byotulubanga batwe bene. Mwanda’ka ketukokejapo kwibwingidija ne mwanda wa kupima kwivwanija ne kulekela bakwabo kutupatupa kwabo?—Mateo 7:1-5; Kolose 3:13.
13 Ketufwaninwepo kwilwako nansha dimo, shi tusaka’mba Yehova etulekele, tufwaninwe netu kulekela bakwetu. (Mateo 6:9, 12, 14, 15) Shi tulondanga bubinebine, nankyo tukamona bakwetu na buswe. (1 Yoano 1:6, 7; 3:14-16; 4:20, 21) Nanshi, shi mubelubila na muntu mu kipwilo, kokakolwa kumukanina nansha kumufikila mfika. Shi uvwele buswe ukapelakana kupwija uno mwanda, ne kukekakapo kulomba kufwilwa lusa shi uwalubila muntu.—Mateo 5:23, 24; 18:15-17.
14 Bivwalwa byetu bya kumushipiditu bidi kadi na ngikadilo mikwabo ikwatañene na buswe. Polo wāsonekele’mba: “Vwalai . . . mutyima wa lusalusa ne kanye, ne bumvu, ne kikokeji, ne kutūkija mutyima.” Ino ngikadilo, kutentekelapo ne buswe, i kipindi kya ‘bumuntu bupya’ bwa bwine Leza. (Kolose 3:10, 12) Lelo ukalonga buninge bwa kuvwala uno muswelo? Nakampata shi uvwele buswe bwa bu bana na bana, bine udi na kiyukeno kya bu mwana-bwanga wa Yesu, mwanda wānene’mba: “Po ponka po bakemuyukila bu-bana-bami-babwanga ponka pa kwisanswa mo mwikadile banwe bene.”—Yoano 13:35.
KIFUKO KYA MUTYIMA-NTENKE
15 Kadi kipwilo kidi pamo bwa kinyemeno, nsakwa ya kwiubijamo na mutyima-ntenke. Ukatana’mo bantu bakubulwa budimbidimbi, basumininwe mu kulonga byoloke kumeso a Leza. Bavule umbukata mwabo kebafundule milongelo ne ngikadila imbi, yowikonda nayo kunekenya. (Tetusa 3:3) Bakakukwasha, mwanda twibakankamikwe ‘kwiselela bitundu bilema umo ku mukwabo.’ (Ngalatea 6:2) Mungya buluji, kulonda dishinda ditwala ku būmi bwanyeke ne nyeke i kiselwa kikutala abe mwine. (Ngalatea 6:5; Fidipai 2:12) Inoko Yehova i mutuleko kipwilo kya bwine-kristu bu dishinda dilumbuluke dya kwitupa bukwashi ne bwangudi. Nansha shi udi na myanda ya muswelo’ka, yuka’mba kudi bwangudi bulumbuluke bukutudilwe’ko—kipwilo kya buswe, kikakwela mu kyadi mu kitatyi kya makambakano ne bufudile.—Enzakanya na Luka 10:29-37; Bilongwa 20:35.
16 Umbukata mwa bano bakakukwasha, mudi ne ‘bantu bu byabuntu’—bakulumpe, baledi batongwe pa kipwilo, bakumba luombe na kiswamutyima kyabo kyonso ne pakubulwa kalengwa. (Efisesa 4:8, 11, 12; Bilongwa 20:28; 1 Petelo 5:2, 3) Isaya wātobele butobo bwibatala’mba: “[Bakekala] bwa kinyemeno kya luvula, ne mpakala ku kintenshi; pamo’nka bwa minonga ya mema [mu nshi myumu], bwa mwemba wa dibwe dikatakata muntanda myumu.”—Isaya 32:2.
17 Pādi Yesu pano pantanda, bakulumpe ba bipwilo babudilwe kilelo kya buswe, kyādi kya bulanda. Ngikadilo yādi’mo bantu yāmutenekele bininge, omwanda wādi usaka nakampata kwibakwasha kumushipiditu. Yesu wēbakwatyilwe lusa mwanda “basusukile ne kususuka, ne kusansana badingakana pamo na mikōko yampikwa mukumbi.” (Mateo 9:36) Ye mwikadile ne bantu bavule dyalelo, bekondanga na makambakano, ino wa kwibakwasha nansha kwibasenga kumushipiditu mpika. Ino bengidi ba Yehova badi na bukwashi bwa kumushipiditu, mwanda wālaile’mba: “Nkatalula bakumbi po badi bakebadisha, ino kebakakwatwapo moyo monka, ehe, nansha kwikala na nzuba, nansha kukafudilwapo, nansha umo mwine.”—Yelemia 23:4.
18 Wiyuke na bakulumpe ba pa kipwilo. Bajingulwile myanda mivule ya mwa kwingidijija buyuki bwa Leza, mwanda i babwanye bisakibwa bya bu baledi, mobilembelwe mu Bible. (1 Temote 3:1-7; Tetusa 1:5-9) Kokikaka kwifwenya kudi umo wa umbukata mwabo shi usaka bukwashi bwa kumushipiditu, mwanda wa kunekenya kibidiji kampanda nansha ngikadila kansangwa yakubulwa kukwatañana na bisaka Leza. Ukajingulula’mba bakulumpe balondanga musoñanya wāletele Polo’mba: “Dingilai bamulele-mulele madingi, kankamikai bampungiji ya ku mutyima, kwashai babukōkekōke, kadi mwikale kwibatukijija mutyima bonsololo.”—1 Tesalonika 2:7, 8; 5:14.
LOELELWAI MU MUTYIMA-NTENKE NA BANTU BA YEHOVA
19 Nansha dyalelo byotwikele mu ngikadilo yakubulwa kubwaninina, Yehova witupanga bidibwa bya kumushipiditu, bivwalwa ne kinyemeno. Eyo, tukungile mulao wa Leza wa ntanda impya, mu paladisa ye amo motukasepelela byabuyabuya bya kungitu. Ino boba badi umbulongolodi bwa Yehova kebapwe kala kutwela mu paladisa wa kumushipiditu mobashikete na mutyima-nteke. Ezekyele wātobele butobo butala pobadi’mba: ‘Bakekalanga ne mutyima-ntenke, pakubulwa nansha umo ukebalengeja moyo.’—Ezekyele 34:28; Mitōto 4:8.
20 Bine tufwaninwe kufwijako Yehova bikatampe, pa kwitutūdilako na buswe bwandi bidibwa bya kumushipiditu, kupityila ku Kinenwa kyandi ne ku bulongolodi bwandi! Wilunge ku bantu ba Leza. Kokijokela kunyuma na kutyina bintu bikakulangila balunda nobe, nansha balongo bobe, pangala pa buyuki bwa Leza botambula. Bamo-bamo bakakushikwa mwanda ubelunga ku ba Tumoni twa Yehova, ne kutanwa ku kupwila ku Njibo ya Bulopwe. Ino Leza ukapingakenya madyese pa byonso byokajimija pamwanda wa mutōtelo wandi. (Malaki 3:10) Kadi Yesu wānene’mba: “Kepadipo, nansha umo, wakunshīla njibo, nansha bana babo bana-balume ne bana-bakaji, nansha bashandi ne inandi bene, nansha mukaji ne bana, nansha madimi, pamwanda wa amiwa ne pa myanda-miyampe. Aye kabulwepo kumona ponka pano katwa ka mobo, ne ka bana babo bana-balume, ne katwa ka bana babo bana-bakaji, ne ka bainabo, ne ka bana, ne katwa ka madimi, ne kupangwapangwa kudi ponka, ebiya myaka ya kukāya būmi bwa kuladila nyeke na nyeke.” (Mako 10:29, 30) Eyo, nansha shi ubashiye bintu bivule muswelo’ka nansha kadi shi ūmininanga bintu’ka, ukatana kisense kilumbuluke ne mutyima-ntenke wa kumushipiditu mu bantu ba Leza.
[Bipangujo]
1, 2. Ngikadilo idi’mo bantu, idingakene muswelo’ka na ya bantu baponenwe na kimpumpu kya kivula kikomo?
3. Yehova upanga bantu bidibwa muswelo’ka, kino i kilombolwe na bimfwa’ka?
4. I ani wīlombwele bu “umpika wabinebine ne wamanwa” mu kino kyetu kitatyi, ne Leza witupanga bidibwa bya kumushipiditu muswelo’ka?
5. I ngikadilo’ka ya kumushipiditu idi’mo ntanda dyalelo, ne Yehova ulongangapo kika?
6. I muswelo’ka wādi udisha Yehova bantu bandi pakala?
7. Kutanwa kitatyi ne kitatyi ku kupwila kwa bwine-kristu le kukwatañene na buyuki bwa Leza muswelo’ka?
8. Mwanda’ka twibakankamikwe kutanwa ku kupwila kwa ba Tumoni twa Yehova?
9. I kimfwa’ka kitupele Yehova mu kulombola buswe?
10. I muswelo’ka otukokeja kumwena mu ‘kisaka kyonso kya bana betu’?
11. Mwanda’ka ngikadila mishileshile ya bantu mu bantu ba Yehova keifwaninwepo kukunyongamija mutyima?
12, 13. (a) Shi muntu umo mu kipwilo wakulubila, ufwaninwe kulonga kika? (b) Mwanda’ka ke kiyampepo kwikala na mfika nansha na kinongo?
14. I ngikadilo’ka yotufwaninwe kuvwala?
15. Kipwilo kidi pamo bwa kinyemeno mu buluji’ka?
16. I bukwashi’ka bupānanga bakulumpe ba pa kipwilo?
17. (a) I bukwashi bwa muswelo’ka bwādi bukimba Yesu? (b) Leza wālaile kuteakenya bantu bandi bidibwa’ka?
18. Mwanda’ka tufwaninwe kufwena bakulumpe kitatyi kyo tusaka bukwashi bwa kumushipiditu?
19. I madyese’ka apanga Yehova boba bonso bakimba kwikala ne mutyima-ntenke mu bulongolodi bwandi?
20. I muswelo’ka ukapingakenya Yehova madyese pa byonso byotukajimija pamwanda wa mutōtelo wandi?
TOMPA BUYUKI BOBE
“Umpika wabinebine ne wamanwa” lelo i ani?
I bidibwa’ka bya kumushipiditu bitupele Yehova?
I muswelo’ka ukokeja kwitukwasha bakwabo pa kipwilo kya bwine-kristu?
[Kifwatulo pa dyani dituntulu pa paje 165]