Bipangujo bya batangi

Polo wēsambile padi Yesu mu Fidipai 2: 9 (MB) amba: ‘Leza wamuzunzwidile pa kifuko kitabukile kutunduka. Wamupa dijina ditabuke majina onso buleme.’ Lelo dino dijina dipya i dijina’ka? Ne kadi shi Yesu utabukilwe na Yehova, lelo dijina dya Yesu ditabukile majina onso muswelo’ka?

Tutanga mu Fidipai 2:​8, 9 (MB) amba: “[Yesu] wepelwile aye mwine pa kukokela’nka ne ku lufu, lufu nalo kadi ee, lwa ku [mutyi wa masusu, NW] tu! O mwanda mwine wamuzunzwidile Leza pa kifuko kitabukile kutunduka. Wamupa dijina ditabuke majina onso buleme.”

Kino kisonekwa kekishintululapo amba Yehova byadi kasuku kandi na dijina ditabukile pakatampe majina onso buleme, Yesu ye yenka Yehova. Yesu wāpelwe dino dijina dyandi didi peulu pa majina onso kupwa kwa lusangukilo lwandi, pamo’nka na mwikilombwela myanda idi mu Fidipai shapita wa 2. Kādipo na dino dijina kumeso kwa lusangukilo lwandi. Kadi, Yehova wikalanga nyeke pangala pa byonso, ne kitenta kyandi kekyalamukangapo nansha dimo. Yesu wāinikilwe dijina didi peulu pa dyodya dyādi nadyo kumeso kwa kwiya’ye kwingila mwingilo wandi pano pantanda, kino kilombola patōka’mba ke ayepo Yehova. Pānene Polo amba Yesu wāpelwe dijina ditabukile majina onso buleme, kishintulula’mba pano Yesu wainikwa dijina didi peulu pa majina a bipangwa byonso bya Leza.

Lelo dijina dya Yesu didi peulu i dijina’ka? Isaya 9:6 witupa muswelo wa kujingulula malondololo. Pa kutoba butobo butala padi Yesu, Meshiasa wādi ufwaninwe kwiya, uno vese unena’mba: “Buledi bwa ntanda bukekalanga pa kipuji kyandi; ino dijina dyandi dikenikwa bu-Wakwanwa, bu-Mukalañeni, bu-Leza Mukomokomo’tu, bu-Shandya myaka yonso nyeke, bu-Mwana-mulopwe wa ndoe.” Mu uno vese, “dijina” dya Yesu dikwatañene na kitenta kyandi kizunzulwe ne lupusa lwandi, kadi o muswelo otumvwana bishima binena’mba “dijina ditabuke majina onso buleme” bitelelwe mu Fidipai 2:9. Manwi onso apelwe mbila ya kufukatyila Yesu mwanda wa kulombola kwitabija kitenta kizunzulwe kya lupusa lumupelwe na Yehova​—kitenta kya lupusa ludi peulu pa lupusa lupelwe bipangwa bikwabo byonso. Kishima “makwabo” kidi mu buno bwalamuni, kekitelelwepo mu bisonekwa bya Kingidiki, ino kingidijibwe’mo mungya buluji bwa vese. “Dijina” dya Yesu keditabukilepo dijina dyandi aye mwine, ino ditabukile majina a bipangwa bikwabo byonso.

I nsangaji ya muswelo’ka yotufwaninwe kwikala nayo pa kwilunga ku bamwikeulu ne bantu bonso bakikokeji mu kufukata mwanda wa kwitabija dijina dya Yesu! Twikiloñanga mwanda tukōkele Yesu udi pa kitenta kizunzulwe kadi kya bukomo bukatampe kimupele Yehova​—“ku ntumbo ya Leza Shandi.”—Fidipai 2:11; Mateo 28:18.