Kwijiba ku kipupo kya mboloji

Umpangi usa panopano ponka kutūla bantu bonso mu ludingo lumo mungya mobasakila. Ino pano potukitengele tukokeja kutabula matabula kampanda a kwijiba ku mboloji ya kwishila ituletela makambakano batwe ne bisaka byetu. Nelson Mandela, wadi mulopwe wa mu Afrika wa Kunshi, wanene amba “bintu bishalañanyanga bantu i byobya byotulupula mu byotudi nabyo, ke byobyapo byotupebwa.”

MĀNGA ibingija bino byandi binenwa. Bana-balume ne bana-bakaji bavule bapebwanga bintu bityetye pa kubutulwa kwabo, ino pa kwingidija byobadi nabyo, bafikila pa kutubuluka kwibavudijijanga bituntwa, ke bakelenge pa bula. Bakwabo nabo babutulwa beselwe madyese mavule, ino basupakanya’o, bakomenwa ne kujokela pa ditabula pobādi.

Ingidija byobya byodi nabyo!

Batumoni ba Yehova i bepāne bininge mu kukwasha bakwabo na kifundwa kya Bible nabo bekale na buyuki bwa mpango ya Leza. Mwanda bayukile amba pa kusaka muntu amwene bukwashi bushikate mu myanda idi mu Bible, ufwaninwe kwikala mufunde masomo. O mwanda Batumoni ba Yehova bafundijanga makumi ne makumi a tununu twa bantu kutanga ne kulemba, kubadila’mo ne bantu 23 000 bafundijibwe (mu kipindi kya myaka ya 1990) mu ntanda imo ya Kushika kwa Afrika. Julunale umo (San Francisco Examiner) wanene pa mwingilo wa kutendelwa wingila Batumoni ba Yehova wa kukwasha bantu amba: “Mufwaninwe kwibamona bu bana ba kibundi baleta kifwa kiyampe. Basonkanga musonko pakubulwa nsengwa, bakwasha babela, balwa na kubulwa kufunda masomo.”

Kadi Batumoni ba Yehova, na masomo abo a kufundija bityebitye buneni bwa pa kitango kya bantu, bafundijanga tununu ne tununu twa bantu kwikala baneni ba bwino, bakokeja kwisamba pambulwa kukolelwa mu kitango kya bantu. Mu bano bantu mudi ne bamo badi na bikoleja kampanda mu kunena. Tulete kifwa kya mwana-mulume umo wa mu Afrika wa Kunshi wasonekele amba: “Kikukumina kyami kyadi kikomo mpata, nafula ku kwikala muntu mwiumbile, ukulupile enka mu bakwetu ba kwisamba pa kyaba kyami. . . . Ponaanjile kupita ku Masomo a Mwingilo wa Kiteokratike, nashilwile na butangi bwa Bible ku meso a bemvwaniki batyetye . . . , nakukumina bibi, natunya ne kupwa butangi mu kitatyi kitungwe. Kupwa kwa kupwila, [mudingidi] waumpa madingi mayampe. Waleta madingi amba wiibidije kutanga na diwi ditunduke. Ye monalongele, difuku ne difuku nadi ngija kitatyi kilampe ntanga’nka kutanga wami Bible ne Kiteba kya Mulami.” Uno mukelenge waendelela mpata, pano kanenanga mashikulu ku meso a tutwa na tutwa twa bemvwaniki, pakwabo tununu.

Kusepelela kubulwa kwishila kudi mu banabetu

Pa mwanda utala masomo, bundapi, misokwe ya lupeto ne bukelenge, būmi i bwishile bininge mu Batumoni ba Yehova. Kuno kwishila i kilomboji kya ngikadilo ya kubulwa kubwaninina kwa ino ntanda yobadi’mo. Inoko i beshile na mitōtelo mikwabo, mwanda umbukata mwabo kemudipo mfwatakani ya kwishila kwa misaka, kwa tubila, nansha kwa misokwe.

I bafike pa dino ditabula mwanda bekankilanga’ko kwingidija byobefunda mu Bible. Bakwete makasa abidi misoñanya ya mu Bible inena’mba: “Yehova kabandilangapo mubandidila muntu, mhm; mwanda muntu ubandila ponka paelele meso, ino Yehova ubandilanga pa mutyima.” (1 Samwele 16:7) “Leza kalemekangapo bantu’mba: Yeu ye yeu, mhm. Nanshi mu mizo yonso enka umutyina, ulonga bilumbuluke nabya ye waitabijibwa kudi aye.” (Bilongwa 10:34, 35) “Kekulubwila muntu bubi na bubi, shi ani, shi ani. Tai mityima ku bintu bifwaninwe ku meso a bantu bonso. Shi kyendelemo, nankyo mwikale ne ndoe ne bantu bonso ku wenu mutamba.”—Loma 12:17, 18; tala ne 1 Temote 6:17-19; Yakoba 2:5, 9.

Batumoni ba Yehova balamete ku ino misoñanya ya mu Bible iloeja bumo, i bapele kumona umbukata mwabo nkalañani itamba ku kwishila kwa misaka, kwa tubila, nansha kwa misokwe. Bino bintu kebebitalangapo pa kupa muntu kampanda madyese a mingilo mu kipwilo kya bwine Kidishitu. Kupebwa biselwa, kifwa bufundiji ne butadi, kwimanine enka pa kubwanya bisakibwa bya kumushipiditu.—1 Temote 3:1-13; Tetusa 1:5-9.

Bine, kwikala na batutu ne bakaka betumwene mu ludingo lumo ku meso a Umpangi wabo i kintu kitalaja mityima ya boba bādi basusuka pangala pa mboloji itumbile mu ino ntanda! Martina ukokeja kwitabija kino. Mwanda shandi pa kupwa kunyema kisaka, Martina wāshele watamina mu kisaka kilanda kilelwa na mbutwile umo. Pavule wadi ususulwa pamo bwa kavukwa-mpuya, kadipo mwikulupile; ino wadi utyina’nka ne kulumba bakwabo. Wimona bu mwelwe. Ino bintu byaiya kushinta pa kushilula kwifunda Bible, ke Kamoni wa Yehova. Unena’mba: “Ne dyalelo nakilwa na milangwe mibi, inoko pano nayuka mwa kupwijija makambakano. Kendi muntu mwilēmeke, kadi nena na kikulupiji kyonso. Bubinebine bubamfundija kwikala muntu uyukile kusela biselwa byami. Pano nayuka amba Yehova unswele ne amba būmi kebubipilepo kwikala nabo.”

Batumoni ba Yehova i kisaka kya bene Kidishitu kujokoloka ntanda yonso kidi mu matanda 230 ne musubu, badi mu ludingo lumo kelwamwekele kashaa mu ino ntanda ya dyalelo. Lelo kudi kisumpi kikwabo kya mutōtelo kikokeja kunena uno muswelo ne kulombola byokinena na bintu bimweke?

I bine, Batumoni ba Yehova badi na mumweno mujalale. Beyukile amba balupukile mu ngikadilo yakubulwa kubwaninina, kebabwanyapo kupwija kwishila kubikubi kudi mu bantu kwālwile nako bakwabo mu bula bwa tutwa twa myaka—ino bākomenwa. Inoko badi na nsangaji umbukata mwabo, mwanda abo bonso baloñanga bukomo bwa kwijiba ku kino kipupo kipaijana. Kadi badi na lwitabijo lukomo mu milao ya Leza, batengele ntanda impya ya boloke mukekalanga nyeke ne nyekeke mutupu kwishila kubikubi.

Eyo, bantu bonso bakikōkeji bakekala panopano ponka mu ludingo lumo “mu bulēmantu ne mu byepelo” monka mwāsakile’kyo Umpangi wabo tamba ku ngalwilo. Bine, i mulangwe mulumbuluke! Usa kufikidila’nka mu ino myaka yotwenda nayo!

[Picture on page 7]

Batumoni ba Yehova balwanga na kubulwa kufunda masomo, bafundija makumi ne makumi a tununu twa bantu kutanga ne kulemba

[Picture on page 8]

Bubinebine bwa mu Bible bufundulanga mfwatakani ya misaka, ya tubila ne ya misokwe