Mboloji lelo Leza wāsakile ikale’ko?

Malondololo i mhm. Tutalei kyotwanenena namino.

LEZA wāsakile bantu bonso bekale mu ludingo lumo mu būmi ne mu nsangaji. Tutanga pa mwanda utala kupangwa kwa muntu amba: “Ebiya kadi kwivwana Leza wanena’mba: Leka bidi tulonge muntu mu bu-kyelekejo kyetu, mwendele kīfwa kyetu; ino abikale bulopwe bwa pa mwita wa kalunga-kamema, ne bwa pa byoni bya mūlu, ne bwa pa banyema banja bene, ne bwa panopantanda ponsololo, ne bwa bintu byonso bilandala, byakulandala panopantanda.” Bupangi bwa bya pano panshi pobwāpwile, “Leza wamona byonso byālongele, kabidi monaipo bidi byadi biyampe’tu byamwiko.”—Ngalwilo 1:26, 31.

Lelo Leza ukokeja kutela ngikadilo mibi miyule kwishila idi’ko dyalelo bu ‘miyampe’tu byamwiko’? Nansha dimo, mwanda “Leza i buswe.” (1 Yoano 4:8, BB) Pa mwanda wandi, Bible unena’mba “kabangilepo bantu amba yeu e yeu, mhm” kadi amba “mingilo yandi i mibwaninine’tu; mwanda mashinda andi onso i moloke swā! I Leza wa binebine ne wampikwa bukondame, aye i moloke ne mululame.” (Kupituluka 10:17; 32:4; enzankanya na Yoba 34:19.) Mutumibwa Petelo nandi amba: “I binebine nanshi, namone Leza kalemekangapo bantu’mba: Yeu ye yeu, mhm. Nanshi mu mizo yonso enka umutyina, ulonga bilumbuluke nabya ye waitabijibwa kudi aye.”—Bilongwa 10:34, 35.

Leza byadi Leza wa buswe, wambulwa mboloji, moloke, mululame ne wa ndudi, i muswelo’ka wakokeja kupanga bantu badi na byepelo bishile mu kwikala na būmi bwa nsangaji? Kuleka bantu belalulula ne kwibatūla mu ngikadilo ya kwishila kekukwatañenepo na bumuntu bwandi. Leza wāsakile bantu bonso “babutulwe na bwanapabo ne mu ludingo lumo lwa bulēmantu ne byepelo.” Ino bintu dyalelo kebidipo mu uno muswelo. Mwanda waka?

Kutambile kwishila

Kunena’mba Leza wāpangile bantu mu ludingo lumo kekishintululapo amba wāsakile bonso bekale badingakane mu bintu byonso. Bādi bakokeja kwikala beshile mu bwino, mu bya kusangela ne mu bumuntu. Bādi bakokeja kwishila ne mu biselwa nansha mu lupusa. Kifwa mwana-mulume ne mwana-mukaji kebādipo ba kwikala badingakane mu bintu byonso, mwanda Leza wāpangile mwana-mukaji bu “mukwashi” wa kwioba na mwana-mulume. (Ngalwilo 2:18) Bambutwile ne bana nabo bādi ba kwishila mu lupusa. Ino nansha kudi kuno kwishila, abo bonso—ne bana-balume, ne bana-bakaji, ne bana—bādi ba kwikala na mikenga mivule ya muswelo umo ipāna Leza ibwanya kwibasokwela bisakibwa bibapa nsangaji. Abo bonso bādi ba kwikala na bulēmantu bumo ne mwimanino wa ludingo lumo ku meso a Leza.

Ne bana ba ku mushipiditu ba Leza bāpangilwe kumeso kwa bantu nabo monka na monka, bāpelwe mingilo ne biselwa bishileshile. (Ngalwilo 3:24; 16:7-11; Isaya 6:6; Yude 9) Inoko bonso basepelelanga mpango ya Leza ya būmi ne nsangaji mu ludingo lumo mungya mikalo yobapelwe. Balombolanga nabo kubulwa mboloji kudi na Leza mu muswelo wa kutendelwa.

I kya bulanda, kipangwa kimo kya ku mushipiditu kekyāsangedilepo ino mpango yakubulwa mboloji ya Leza. Kyasaka bivule kutabuka pa byēkipele Leza, kekyabila kitenta kine kikatakata, kya peulu. Pa kutamija kino kilokoloko, kyētūla akyo kine mu mfika na Yehova udi na bubinga bwa kwikala na kitenta kipityile kya bonso mwanda ye Umpangi. Uno mwana wa Leza wa ku mushipiditu ntomboki wāongola ne bantu mwenda mafuku amba balombe Leza bintu bipite pa byaādi kala wibapele. (Ngalwilo 3:1-6; enzankanya na Isaya 14:12-14.) O mwanda mpango yākwete Yehova ya amba bantu bamone būmi ne nsangaji imwekanga bu isunkuta. Uno mushipiditu ntomboki utelwa mu Kusokwelwa 20:2 bu “dyabola, Satana,” wāikele ke kalenga byanzwe bya kwishila kubikubi kubikele mu bantu.

Lelo bintu bikālamuka?

Malondololo i eyo!

Ino i ani ukokeja kuleta kuno kwalamuka kusakibwa? Bambikavu bamobamo ba mutyima muyampe, tamba kalāa baloñanga bukomo bwa kulonga biyampe. Ino ne tutyetye twine tobalonga i kukambakana bitupu, kino kyo kifikijanga bantu bavule ku kunena’mba kebibwanikapo kupwija makambakano a kwishila kubikubi kudi mu bantu. Ino ivwana mumweno wa Leza mu Isaya 55:10, 11, unena’mba: “Monka munokela mvula, ne mashika makamankate bitūka kūlu, ne kujokela konka mpika, ino bibombeja nshi, ne kwiimeneja, ne kushipukija bikunwa, ne kupa bikunwa kudi mukushi ne bidībwa kudi wakudya; e monka mukekadila ne kinenwa kyami kyalupuka mu kyakanwa kyami; kekiketolelapo bitupu ko ndi; ehe, nanshi kikalonga kyoki kyo nswele, kabidi kikafikijija biyampe’tu kintu kyo nekitumine.”

I kintu kitusenga ku mityima pa kuyuka amba Yehova Leza ulaile kufikidija mpango yandi imbajinjibajinji ya kupa bantu bonso byepelo bya būmi ne nsangaji mu ludingo lumo! Ukafikidijanga uno mulao wandi, mwanda i Leza wa bubinebine. Kadi uswele ne udi na bukomo bwa kufikidija’o. Lelo ukeufikidija namani?

Malondololo atanwa mu Bulopwe bwāfundije Yesu Kidishitu ku balondi bandi kulombela’mba: “Abe Tata wetu wa mūlu, . . . Bulopwe bobe bufike. Muswidile mutyima obe mūlu ne panopantanda pene i monka.” (Mateo 6:9, 10) Eyo, Bulopwe bwa Leza bo bukengidijibwa na Yehova mwanda wa ‘kutyumuna bipindibipindi ne kukubija malopwe ano’a onsololo [adi’ko dyalelo], kadi bukemananga nyeke.’—Danyele 2:44.

Kukekalanga kisaka kipya kya bantu kikaludikwa na Bulopwe bwa mūlu. Mutumibwa Yoano wāsonekele pa uno mwanda mu Kusokwelwa, mukanda wa mfulo mu Bible, amba: “Namwene ne diulu dipya, ne ntanda nayo impya; ke-dintu diulu dibajinji dibatukidila, ne ntanda mīne monka; ne kalunga ka mema nako monka kutupu’ko.” (Kusokwelwa 21:1) Bibi byonso bitamba ku mboloji—bulanda, misongo, kubulwa kufunda, kwilalulula, ne bumonya-malwa bwa bantu bo-bonso—bikapwa.a

Pano ke katwa ka myaka ne kupita, Batumoni ba Yehova bakokela’nka kukokela milangwe ya bantu pa buno Bulopwe. (Mateo 24:14) Bakwasha bakwabo na mabuku ne na kwibendela abo bene na kininga amba nabo bekale na buyuki bwa mpango ya Leza isonekelwe mu Bible. Mwingilo wabo wa bufundiji kujokoloka ntanda yonso upanga bantu lukulupilo lwa kukekala mu ludingo lumo ne mu nsangaji mu mafuku āya kumeso, ne kadi uloñanga kala bintu bivule bimweke bilombola’mba bantu abashilula kala kwijiba ku mboloji tamba’nka pano. Tutalei i mu muswelo’ka.

[Kunshi kwa dyani]

[Bushintuludi pa paje 6]

Leza usaka bantu bonso bekale na būmi ne nsangaji mu ludingo lumo