Bikalonga Bulopwe bwa Leza pa Kusakana kwa Misokwe

Bantu bavule ntanda yonso, kalupeto katyetye kobatambulanga ku kweji, kekavudilepo kuvuija bisakibwa byabo kufika ne ku kweji ulonda’ko. I bulwi bwa binebine.

• Mungya lapolo imo ya panopano,a lupeto “lufutwanga bengidi ku kweji, pano ke lutyetye bininge.” Ino lapolo idyumuna’mba shi byendelele enka namino, “bampeta bakekala beshile bininge na balanda benda balandapela’ko” kadi “būmi bwa bengidi bavule ne bisaka byabo bukakomena’ko bininge.”

Lelo maludiki akabwanya bine kupwija kusakana kwa misokwe kwenda kuvudila’ko ne kwikunekenya?

Bible unena’mba kudi buludiki bukabwanya kupwija makambano a kusakana kwa misokwe, kubadila’mo ne atala kwishila pa bukata bwa bampeta ne balanda. Unena’mba “Leza wa mūlu ukemika bulopwe,” ko kunena’mba buludiki bukemanina myanda yonso ya ino ntanda. (Danyele 2:44) Mu buno buludiki, kebakavulaminwa’mopo muntu nansha umo. (Ñimbo ya Mitōto 9:18) Bulopwe bwa Leza bukata muntu ense mutyima na kumupa byonso byasakilwa amba ekale na nsangaji. Bonso bakasangela mpalo milumbuluke ya mingilo yabo mikomo.—Isaya 65:21, 22.